सुरेन्द्र पाण्डेलाई एमालेको चेतावनी–सच्चिन दिएको मौकालाई कमजोरी ठाने थप कारबाही (पत्रसहित)

काठमाडौं । स्पष्टीकरणको जवाफ चित्तबुझ्दो नभएको भन्दै नेकपा (एमाले)ले नेता सुरेन्द्र पाण्डेलेलाई ६ महिनाका लागि निलम्बन गरेको छ ।
पाण्डेले १७ चैतमा पार्टीले सोधेको स्पष्टीकरणको जवाफ दिएका थिए।

अहिलेको कारबाही सच्चिनको लागि अन्तिम मौका भएको भन्दै निलम्बन पत्रमा यसलाई कमजोरी ठाने थप कारबाही हुने चेतावनी दिइएको छ।

‘तपाईँलाई सच्चिनको लागि यो अन्तिम मौका हो,’ पत्रमा भनिएको छ, ‘आफ्ना विचार र क्रियाकलापहरु सच्याई पार्टीका पक्षमा आएमा पार्टीले निलम्बन अवधिको बीचैमा पनि निलम्बनको अबधि घटाउने निर्णय गर्न सकिने र यस सच्चिन दिईएको मौकालाई पार्टीको कमजोरी ठानी पार्टी विरोधी गतिविधिहरु कायमै राखेमा निलम्बनको अवधि बीचमै थप कारवाही गर्न सकिने व्यहोरा समेत जानकारी गराईन्छ।’

७ चैतमा बसेको एमालेको केन्द्रीय कमिटी बैठकले माधव नेपाल, भीम रावल, घनश्याम भुसाल र सुरेन्द्र पाण्डेलाई स्पष्टीरकण सोध्ने निर्णय गरेको थियो। स्ष्टीकरणको जवाफ चित्त बुझ्दो नभएको भन्दै एमालेले नेपाल, रावल र भुसाललाई ६ महिनाका लागि निलम्बन गरिसकेको छ।