काठमाडौं । हिजो राति निधन भएका नेपाली काँग्रेस केन्द्रीय सदस्य तथा पूर्वमन्त्री नवीन्द्रराज जोशीलाई सभामुख अग्निप्रसाद सापकोटासँगै शीर्षस्थ नेता, शुभेच्छुक एवम् आफन्तले अन्तिम श्रद्धान्जलि अर्पण गरेका छन् । स्वर्गीय जोशीलाई नेपाली कांग्रेसका सभापति शेरबहादुर देउवा, अर्थमन्त्री विष्णु पौडेल, परराष्ट्रमन्त्री प्रदीप ज्ञवालीसहितका मन्त्रीहरुले श्रद्धाञ्जलि अर्पण गरेका छन् ।
नेपाली कांग्रेसको पार्टी कार्यालय सानेपामा राखिएको जोशीलाई श्रद्धान्जली दिन माओवादी केन्द्रका अध्यक्ष तथा पूर्वप्रधानमन्त्री प्रचण्ड, नेता नारायणकाजी श्रेष्ठ, पम्फा भुसाल, पूर्वप्रधानमन्त्री तथा एमाले नेता माधवकुमार नेपाल, अष्टलक्ष्मी शाक्य, सुवासचन्द्र नेम्वाङलगायत सानेपा पुगेका थिए ।
जोशीको पार्थिव शरीरलाई अन्तिम श्रद्धाञ्जलीका लागि शनिबार मध्याह्न १२ बजेदेखि नेपाली कांग्रेसको पार्टी केन्द्रीय कार्यालय सानेपामा राखिएको थियो ।
काँग्रेस सभापति शेरबहादुर देउवाले जोशीको पार्थिव शरीरमा पार्टीको झण्डा ओढाएर सम्मान व्यक्त गरेका थिए ।
जोशीको निधनमा नेपाली कांग्रेसले तीन दिन पार्टीको झण्डा आधा झुकाउने निर्णय गरेको छ ।
Leave a Reply