न्यूयोर्क । एसियाली समुदायमाथि आक्रमणका घटना बढ्न थालेपछि अमेरिकास्थित एसियाली फेसन डिजाइनर प्रदर्शनमा उत्रिएका छन् । यो प्रदर्शनमा नेपाली फेसन डिजाइनर प्रबल गुरुङदेखि विश्व फेसन जगतका हस्तीहरु फिलिप लाम, डाओ वी चो सहभागि छन् ।
‘मेनस्ट्रिम मिडियाले हामीलाई स्थान दिएन र हामीले प्रतिक्षा गर्ने अवस्था पनि रहेन’ प्रबलले भने, ‘एसियालीविरोधी अपराधका पीडितलाई न्याय दिने र अर्थ सहयोग गर्ने कुरामा हामी एकजुट भएका हौं ।’
एट्लान्टामा ६ जना एसियाली महिलासहित आठजनाको ज्यान जाने गरि भएको घटनापछि एसियाली फेसन डिजाइनरहरु आन्दोलनमा उत्रिएका हुन् । उनीहरुले सामाजिक संजालमा एसियाली अमेरिकनमाथिको आक्रमण रोक्न माग गरेका छन् ।
एसियाली समुदायबाहेकका नेताहरुले पनि आफूहरुको प्रदर्शनमा सहभागिता जनाएको गुरुङले जनाए । ब्ल्याक लाइभ्स म्याटर प्रदर्शनका दुईजना अगुवा कोफी र पावर पनि आफूहरुको प्रदर्शनमा सहभागि भएर सहानुभूति व्यक्त गरेको उनले जनाए ।
पछिल्लो समय अमेरिकामा एसियाली समुदायमाथि आक्रमणका घटना बढिरहेका छन् ।
