काठमाडौं । अन्तरिम प्रधानमन्त्री सुशीला कार्की लैनचौरस्थित शहीद स्मारक पुगेकी छन् ।
सिंहदरबारमा पदभार ग्रहण गर्नुअघि उनले शहीदको सालिकमा माल्यार्पणसहित श्रद्धाञ्जली अर्पण गरेकी छन् ।
कार्कीले केही बेरमा सिंहदरबारको गृहमन्त्रालयको नयाँ भवनबाट जिम्मेवारी सम्हाल्दै छिन् । जेनजी आन्दोलनको बलमा कार्की शुक्रबार राति अन्तरिम सरकारको प्रधानमन्त्री नियुक्त भएकी छन् ।
काठमाडौं । बौद्धमा रहेको भाटभटेनी सुपर स्टारमा ४ वटा शव भेटिएको छ ।
प्रहरीका अनुसार शनिबार बेलुकी शव फेला परेका हुन् । डढेको कारण शव पहिचान भएको छैन । सबै मृतक पुरुष भएको प्रहरीले जनाएको छ ।
शव पोस्टमार्टमको लागि त्रिवि शिक्षण अस्पतालमा पठाइएको छ ।
जेनजी आन्दोलनका क्रममा भाटभटेनी लगायत देशका विभिन्न स्थानमा रहेका सरकारी र निजी संरचनाहरुमा आगजनी भएको थियो ।
काठमाडौं । प्रधानमन्त्री सुशीला कार्कीले आज ११ बजे पदभार ग्रहण गर्ने भएकी छन् ।
उनी गत शुक्रवार प्रधानमन्त्रीमा नियुक्त भएर शपथग्रहण गरेकी थिइन् ।
कार्कीले सिंहदरबारभित्रै रहेको गृह मन्त्रालयको नयाँ भवनलाई प्रधानमन्त्री कार्यालय बनाइएको छ । सोही कार्यालयमा कार्कीले पदभार ग्रहण गर्न लागेकी हुन् ।
काठमाडौं । संयुक्त राज्य अमेरिकाले नेपालमा गत साताको दुखद घटनाक्रमपछि शान्ति-सुरक्षा पुनर्बहाली भएकोप्रति खुसी व्यक्त गरेको छ ।
अमेरिकी दूतावासले एक विज्ञप्ति जारी गर्दै अन्तरिम सरकारका नवनियुक्त प्रधानमन्त्री सुशीला कार्कीसँग सहकार्य गर्न चाहेको समेत बताएको छ ।
दूतावासको विज्ञप्तिमा राष्ट्रपति रामचन्द्र पौडेल र युवा नेताहरूले प्रजातान्त्रिक समाधानका निम्ति प्रतिबद्धता प्रस्तुत गरेको भन्दै सराहना गरिएको छ । यस्तै नेपाली सेनाका प्रधानसेनापति अशोकराज सिग्देलको उच्च प्रशंसा गरिएको छ ।
विज्ञप्तिमा भनिएको छ, ‘शान्ति बहाली गर्ने र नागरिक सरकार गठनमार्फत शान्तिपूर्ण निकास निकाल्न सहजीकरण गर्ने कार्यमा नेपाली सेना र प्रधानसेनापति अशोक राज सिग्देलको महत्त्वपूर्ण भूमिकाको हामी उच्च कदर गर्छौँ ।’
काठमाडौं । नागरिक उन्मुक्ति पार्टीका संरक्षक रेशम चौधरीले उक्त पार्टीबाट अलग भएको घोषणा गरेका छन् ।
सामाजिक सञ्जाल मार्फत उनले उक्त पार्टी छोडेको घोषणा गरेका हुन् । त्यासँगै नागरिक उन्मुक्ति पार्टी नेपाल घोषणा गरेका हुन् ।
दशकौँको राजनीतिक सङ्क्रमण, पटक-पटकको व्यवस्था परिवर्तन र असंख्य आन्दोलनले एउटा कठोर सत्य देखाएका छन्, केवल सत्ता फेरिँदा देश फेरिँदैन। संविधानको पाना बदल्दा मात्र जनताको भाग्य बदलिँदैन। जबसम्म राज्यको संरचना र शासनको आचरण नै नयाँ हुँदैन, हाम्रा सपना कागजमै कैद रहन्छन्।
निम्न कुरासँग अहिलेको क्रान्तिलाई जोड्ने हो भने केही सम्भावना रहला कि ?
१. निष्पक्ष अन्तरिम सरकार: नयाँ सुरुवातको आधार
दलहरूको पुरानो खेल र व्यक्तिगत स्वार्थको जाल तोड्न, सर्वदलीय सहमतिको आधारमा निष्पक्ष अन्तरिम सरकार गठन गरिनु आवश्यक छ। पूर्वप्रधानन्यायाधीश सुशीला कार्कीजस्ता निर्भीक व्यक्तित्वको नेतृत्वमा विभिन्न विषयका विज्ञ समेटिएको मन्त्रिपरिषद् नै नयाँ सुरुवातको पहिलो कदम बन्नसक्छ। यो सरकार कुनै दलको होइन, सम्पूर्ण जनताको सरकार हुनुपर्छ।
२. कानूनी बाटोबाट नयाँ जनादेश
अन्तरिम सरकारले संसद बैठक बोलाई आवश्यक संशोधन गरी सांसदको सिफारिसमा राष्ट्रपतिमार्फत् संसद विघटन गरी नयाँ जनादेशको बाटो खोल्नुपर्छ। परिवर्तनको यात्रा शान्तिपूर्ण र संविधानमैत्री हुनैपर्छ।
३. प्रत्यक्ष निर्वाचित प्रधानमन्त्री र नयाँ शासकीय संरचना
छ महिनाभित्रको चुनावमार्फत प्रत्यक्ष निर्वाचित प्रधानमन्त्रीको व्यवस्था ल्याउनु आवश्यक छ। समानुपातिक प्रणालीको जटिलता हटाई सांसदबाट मन्त्री बन्ने परम्परा अन्त्य गरिनुपर्छ, ताकि संसद नीति निर्माणको मञ्च होस् र कार्यकारीतन्त्र दक्ष विज्ञको हातमा सुम्पन सकियोस्। प्रधानमन्त्रीले योग्य विज्ञलाई मन्त्रीमा छनोट गर्न पाउने व्यवस्था नै उत्तरदायी शासनको आधार बन्न सक्छ।
४. कर्मचारीतन्त्रमा डिजिटल क्रान्ति
राजनीतिक हस्तक्षेपले जकडिएको कर्मचारीतन्त्रलाई प्राविधिक दक्षता र परिणाममुखी प्रशासनमा रूपान्तरण गर्नुपर्छ। डिजिटल सेवा प्रवाह र पारदर्शी प्रणालीले मात्रै जनताको भरोसा पुनः स्थापित गर्नसक्छ।
५. दलभित्र पुस्तान्तरणको सुनिश्चितता
पुरानो पुस्ताले पाएका विशेष सुविधाभन्दा बाहिर, नयाँ पुस्ताले कम्तीमा एकपटक चुनाव लड्न पाउने कानूनी व्यवस्था गरिनु जरुरी छ। नेतृत्वको स्वाभाविक पुस्तान्तरणबिना लोकतन्त्र बाँच्न सक्दैन।
६. योजना आयोग र राष्ट्र बैंकको पुनर्जागरण
राष्ट्रिय योजना आयोग र राष्ट्र बैंकलाई प्रविधिमैत्री, पारदर्शी र विदेशी लगानीमैत्री कानूनले सबल बनाउनुपर्छ। दिगो आर्थिक विकासको नक्सा यिनै संस्थाले कोर्छन्।
७. शिक्षा र स्वास्थ्य: मौलिक अधिकारको प्रत्याभूति
शिक्षा र स्वास्थ्यलाई राज्यको मातहत राख्दै पर्याप्त लगानी बढाउनुपर्छ।
शिक्षकहरूलाई हरेक पाँच वर्षमा योग्यता परीक्षण गरेर सेवा थप्ने व्यवस्था गर्नुपर्छ, ताकि शिक्षा गुणस्तरमा निरन्तर सुधार होस्।
स्वास्थ्य सेवा विपन्न र गरिब नागरिकको सहज पहुँचमा पुर्याउने नीति राज्यले सुनिश्चित गर्नुपर्छ। उपचार नागरिकको अधिकार हो, पैसाले मात्रै नापिने वस्तु होइन।
८. अर्थतन्त्र र प्राकृतिक स्रोतको सदुपयोग
देशका प्राकृतिक स्रोत—जल, ऊर्जा, खानी, वन—पारदर्शी र दिगो ढङ्गले प्रयोग गर्दै विदेशी लगानी आकर्षित गर्न राज्यले सक्रिय भूमिका खेल्नुपर्छ।
९. ठूला उद्योग र कलकारखाना– रोजगारी र समृद्धिको बाटो
देशभित्र ठूला–ठूला उद्योग र कलकारखाना स्थापना गर्नु आर्थिक पुनरुत्थानको मेरुदण्ड हो। चाहे स्वदेशी पूँजी होस् वा विदेशी लगानी, राज्यले लगानीको सुरक्षा र ग्यारेन्टी गर्न तयार हुनुपर्छ। यस्तो वातावरण बनेमा युवा विदेशिनुपर्ने बाध्यता घट्छ र आफ्नै मातृभूमिमा रोजगारी सिर्जना हुन्छ।
१०. कृषिमा प्राविधिक जागरण
अनुदानको अस्वस्थ संस्कृति हटाउँदै कृषकलाई प्रविधि र तालिमको पहुँच दिनुपर्छ। राज्यले कृषकको उत्पादन बजारसम्म पुर्याउने स्पष्ट जिम्मेवारी लिनुपर्छ, ताकि किसान आत्मनिर्भर र गर्विलो पेशामा रहोस्।
११. खेलकुद, मनोरञ्जन र सांस्कृतिक सम्पदा
देशको पहिचान केवल आर्थिक विकासले मात्र बनिँदैन, खेलकुद, कला र संस्कृति पनि त्यत्तिकै शक्तिशाली धरोहर हुन्।
विद्यालयदेखि स्थानीय तहसम्म खेलकुदलाई प्रोत्साहित गर्दै प्रतिभावान् युवालाई विश्वस्तरीय स्तरमा प्रतिस्पर्धा गर्न सक्षम बनाउनु आवश्यक छ।
फिल्म, संगीत, नाटक जस्ता मनोरञ्जनका माध्यमलाई प्राविधिक र वित्तीय सहयोग पुर्याई अन्तर्राष्ट्रिय बजारमा पुर्याउने वातावरण तयार गर्नुपर्छ।
लोपोन्मुख परम्परा, मठ–मन्दिर, पुरातात्त्विक स्थल र सांस्कृतिक उत्सवहरूको संरक्षणलाई राज्यले प्राथमिकता दिनुपर्छ।
१२. पर्यटन– सुन्दरता र संस्कृतिको विश्वमञ्च
हिमाल, पहाड र तराईको अनुपम सुन्दरता, जातजातिको बहुल संस्कृति—यी केवल पहिचान होइन, समृद्धिको स्रोत पनि हुन्। पर्यटकीय पूर्वाधारमा लगानी, सेवा गुणस्तरको सुधार र विश्वव्यापी प्रचारले नेपाललाई विश्वकै अग्रणी गन्तव्य बनाउनसक्छ।
केवल सत्ता फेरिनु पर्याप्त छैन। राज्यको आत्मा, संस्थागत संस्कार र शासनको चरित्र नै रूपान्तरण गर्न आवश्यक छ। हिम्मत, स्पष्ट दृष्टि र सामूहिक संकल्पले मात्र नयाँ नेपाल निर्माण सम्भव छ। २०८२ को अपेक्षित परिवर्तन नारामा होइन, कर्ममा परिणत हुनुपर्छ, यही हाम्रो भविष्यको असली नक्सा हुनेछ।
विराटनगर । भदौ २४, जेनजी आन्दोलनको मौका छोप्दै अराजक समूहले देशभरका सरकारी, निजी र ऐतिहासिक संरचनालाई निशाना बनाए । आगो झोसे, तोडफोड गरे, लुटपाट मच्चाए । यही बीचमा जोगिन सफल भयो विराटनगरको गौरव वीरेन्द्र सभागृह । र, भिडलाई सम्झाउने साहस गरे अनमोल सुब्बाले । अहिले उनको चौतर्फी तारिफ भइरहेको छ ।
कोशी प्रदेशको राजधानी विराटनगरमा पनि यसको बाछिटा पर्यो । प्रदेशसभा, जिल्ला प्रशासनलगायतका सरकारी कार्यालयमा तोडफोड र आगजनी भइरहेको थियो । धुवाको मुस्लोले ढाकिएको थियो विराटनगरको आकाश ।
त्रासमै थियो विराटनगर । दिउँसै खुलेआम लुटपाट हुँदा र जेनजीको आवरणमा आपराधिक गिरोहले विध्वंश मच्चाउँदा सुरक्षामा खटिएका प्रहरी ज्यान जोगाएर भागिसकेका थिए ।
कोशी प्रदेशको प्रदेशसभा भवन, प्रदेश प्रमुखको कार्यालय, मन्त्रालय र दर्जनौं संरचना ध्वस्त पार्दै अघि बढेको समूह ‘जिन्दावाद’ र ‘मुर्दावाद’ को नारा लगाउँदै विराटनगर-७ को वीरेन्द्र सभागृहमा पुग्यो ।
जिल्ला प्रशासन र हुलाक कार्यालयमा लगाइएको आगोको धुवाँले ढाकेको सभागृहमा एक उत्तेजित हुल मूलगेटको ताला फुटाउँदै भित्र छिरेर जलाउने तयारीमा लाग्यो ।
जेनजी आन्दोलनको अग्रपंक्तिमा थिए २३ वर्षीय अनमोल । काँधमा राष्ट्रिय झण्डा बोकेका उनले भिडलाई सम्झाइ बुझाइ गर्न थाले । विराटनगर-६ का सुब्बा सोमबारदेखि नै आन्दोलनमा सक्रिय थिए । शान्तिपूर्ण आन्दोलनको नेतृत्वमा रहेका उनी दोस्रो दिनको प्रदर्शन हिंसात्मक बनेपछि पछि हटेका थिए । सभागृह जलाउने प्रयास भएपछि हतास अनुहारसहित उनी त्यहाँ आए ।
अनमोललाई तेजनारायण चौधरीसहितका केही युवाले साथ दिए । त्यत्तिकैमा खन्ती, फरुवा बोकेर भित्र छिरेका २-४ जनाले भित्रबाट सामान ल्याएर मोटरसाइकलमा राख्दै ओसार्न थाले ।
अनमोलले बिन्तीभाउ गरेर माहोल नियन्त्रण बाहिर जान दिएनन् । उनले सभागृह बचाउन गरेको हरदम प्रयास अहिले सामाजिक सञ्जालमा भाइरल छ ।
भिडलाई अनमोलले सम्झाउँदै भनेका छन्, ‘यो हाम्रै सम्पत्ति हो । हामीलाई नै चाहिन्छ । केही पनि गर्न हुँदैन । यति राम्रो बनेको छ । दाइ यस्तो केही नगर्नु न ! यो जेनजीको आन्दोलन हो । यसमा केही नगरिदिनु न । बाहिरका सामान लैजानु, बरु भित्र नगइदिनू ।’
उनले आग्रह गरिरहँदा प्रधानमन्त्रीको राजीनामा नआएसम्म तोडफोड र आगजनी नरोक्ने भन्दै आक्रोशित भिडले उनलाई धम्की दिन्छ । तर, हार नमानि उनी सम्झाउँछन्, ‘ओली (प्रधामन्त्री केपी शर्मा ओली) ले छोडिसक्यो । यस्ता काम छाडौं ।’
केहीबेर अनुनय विनय गर्दै आक्रोशित भिडलाई मत्थर पारेर बाहिर निकाल्न अनमोल सफल बने । तर, केही लुटपाट र चोरी भने भयो ।
आगजनीबाट सभागृह जोगाएपछि उनले भनेका छन्, ‘हामीले बचाउन सफल भएका छौं, यति राम्रो ठाउँलाई ।’
सभागृह बचाउन भिडलाई ‘कन्भिन्स’ गर्न सफल अनमोलको अहिले चौतर्फी प्रशंसासमेत भइरहेको छ । त्यसदिन आफूलाई रातभर निद्रा नलागेको बताउँदै सुब्बा भोलिपल्ट बिहानै पुगेर हेर्दा सभागृह सुरक्षित देखेपछि मन शान्त भएको सुनाउँछन् ।
‘रातभर मनमा चिन्ता भयो । के भयो होला ? भनेर निदाउनै सकिनँ । भोलिपल्ट बिहानै दौडेर सभागृह पुगेँ । जस्ताको तस्तै देख्दा ढुक्क भएँ । राज्यको सम्पत्ति जोगाउन पाउँदा सन्तोष मिल्यो ।’
जनता आदर्श बहुमुखी क्याम्पसमा बीएसडब्लू तेस्रो सेमेस्टरका विद्यार्थी अनमोल सामाजिक सञ्जालमा सक्रिय छन् ।
सभागृह जोगाउँदाको दृश्य पनि उनले सामाजिक सञ्जालमा राखेका छन् । जुन छोटो समयमै भाइरल भयो ।
उनी वीरेन्द्र सभागृहसँग आफ्नो भावनात्मक सम्बन्ध रहेको भन्दै स्कुल पढ्दा त्यहाँ कार्यक्रम गरेको सम्झिन्छन् । भन्छन्, ‘त्यो सम्झनाले पनि जोगाउन बल मिल्यो ।’
२०३० सालमा बनेको वीरेन्द्र सभागृह विराटनगरको गौरव मानिन्छ । विराटनगर महानगरपालिकाले पुरानो आकृति सुरक्षित राख्दै करिब २३ करोड रूपैयाँ खर्चेर ‘रेट्रोफिटिङ’ गरी पुनः प्रयोगमा ल्याएको छ ।
गतवर्ष रेट्रोफिटिङ पूरा भएपछि सभागृहलाई पुन: खुला गरिएको थियो ।
काठमाडौं । काठमाडौं महानगरपालिकाले आइतबारदेखि विद्यालयमा उपस्थित भई पठनपाठनका लागि आवश्यक तयारी गर्न शिक्षक तथा व्यवस्थापनलाई आग्रह गरेको छ ।
महानगरपालिकाको शिक्षा विभागका निमित्त विभागीय प्रमुख केशव ज्ञवालीका अनुसार देशमा पछिल्ला दिनमा सिर्जित परिस्थितिका कारण बन्द भएका विद्यालय सञ्चालनका लागि आवश्यक तयारी गर्न आग्रह गरिएको हो ।
विद्यालयमा कुनै क्षति भएरनभएको एकिन गर्न, अभिभावकसँग सम्पर्क गरी विद्यार्थीको अवस्था बुझ्न अवस्था सामान्य नहुञ्जेलसम्म बालबालिकालाई विद्यालयमा ल्याउन र लैजाने कार्य गर्न अनुरोध गर्न महानगरले सूचनामार्फत अनुरोध गरेको छ ।
महानगरको शिक्षा विभागले विभिन्न चार बुँदामा सबै विद्यालयलाई कक्षा सञ्चालन, यही भदौ २३ र २४ गतेदेखि देशमा सिर्जित अवस्थाका कारण विद्यालयमा क्षति भए/नभएको एकिन गर्न र कक्षा सञ्चालनका लागि आवश्यक तयारी गर्न सूचित गरेको हो ।
महानगरले यही भदौ ३० गते सोमबारदेखि भने मनोसामाजिक परामर्शसँगै भौतिक रूपमा कक्षा सञ्चालन गर्न, विद्यालयमा अभिभावकसँग आउन र जान नसक्ने विद्यार्थीका हकमा श्रव्यदृश्यका माध्यमबाट कक्षा सञ्चालन गर्न आग्रह गरेको छ ।
काठमाडौं । हाल मनसुनको न्यून चापीय रेखा सरदर स्थान आसपास अवस्थित रहेको छ ।
जल तथा मौसम विज्ञान मौसम पूर्वानुमान महाशाखाका अनुसार आज दिउँसो देशभर साधारणतया बदली रहनेछ । देशका पहाडी भागका केही तथा तराई भागका केही स्थानमा मध्यम वर्षाको सम्भावना छ ।
कोशी प्रदेशलगायत बागमती र गण्डकी प्रदेशका पहाडी भागका एकदुई स्थानमा भारी वर्षाको पनि सम्भावना छ ।
त्यसैगरी, आज राति देशभर साधारणतया बदली रहनेछ । कोशी, मधेस, बागमती, गण्डकी र लुम्बिनी प्रदेशका केही स्थान र अन्य प्रदेशका बाँकी भागका केही स्थानमा मध्यम वर्षाको सम्भावना छ ।
कोशी, मधेस र लुम्बिनीलगायत गण्डकी प्रदेशका पहाडी भागका एकदुई स्थानमा भारी वर्षाको पनि सम्भावना छ ।
रुपन्देही । प्युठानको झिमरुक गाउँपालिकामा सुदर्शन जिसीले अध्यक्ष पितबहादुर महतराको कार्यकक्षमा आगलागी मात्रै गरेनन् उपाध्यक्ष प्रमोद पोखरेल र लेखा शाखामा तोडफोड गरेका छन् । ०७५ सालदेखि रोजगार संयोजकका रूपमा कार्यरत वडा नं ७ का ३२ वर्षीय जिसी अध्यक्ष महतराको जेठानको छोरा हुन् ।
नेकपा माओवादी केन्द्रबाट पालिकामा महतरा निर्वाचित भएसँगै जिसीले धेरैपटक कर्मचारी हप्काउने, समयमा काम नगर्ने गरिरहेका आरोप थियो । स्थानीयका अनुसार जिसी पनि माओवादीमै आबद्ध छन् । शुक्रवार राती गाउँपालिका कार्यालय नजिकै कोठा भाडा लिएर बस्दै आएका जिसीले आगलागी र तोडफोड गरेसँगै नजिकै रहेका सुरक्षा गार्डले अरूलाई बोलाएर उनलाई नियन्त्रणमा लिएको थियो । जिसी अघिल्लो सरकारकै पालादेखि प्रदेश सरकारमार्फत गाउँपालिकामा करारमा कार्यरत छन्।
आफ्नै गाउँपालिकामा आगो लगाएका कर्मचारी जिसीलाई प्रहरीले नियन्त्रणमा लिएको छ। जिल्ला प्रहरी कार्यालय प्युठानका प्रमुख प्रहरी नायब उपरीक्षक दिपेश बस्यालले उनलाई नियन्त्रणमा लिएको जनाउँदै पालिकाले किटानी जाहेरी दिएसँगै कानुन अनुसार कारबाही हुने जनाएका छन् ।
पालिका उपाध्यक्ष प्रमोद पोखरेलले आफू काम विशेषले जिल्ला बाहिर रहेको जनाउँदै पालिकाकै कर्मचारीले आगजनी र तोडफोड गरेको सूचना पाएको र उनलाई प्रहरीले नियन्त्रणमा लिएको सूचना पाएको जनाएका छन् । उनी नेपाली काङ्ग्रेसबाट निर्वाचित भएका हुन् ।
कार्यालयकै कर्मचारीले आगो लगाएपछि कर्मचारीहरूमा समेत त्रास देखिएको र सुरक्षा चुनौती बढेको प्रमुख प्रशासकीय अधिकृत शाकुन्तला अर्यालले जनाएकी छन् ।
गाउँ कार्यपालिकाको आइतबार बिहान साढे ७ बजे बैठक बोलाएको छ । बैठकले आगो लगाउने कर्मचारीमाथि कारबाहीका विषयमा निर्णय गर्ने जनाएको छ । गाउँपालिका अध्यक्ष पितबहादुर महतराले पालिकाकै कर्मचारीले यस्तो गलत काम गरेकाले शुक्रवार राती नै प्रहरीलाई बुझाइएको नेपाल प्रेसलाई बताए ।
‘उनी मानसिक बिरामी थिए, नियमित मेडिसिन लिन्थे, केही दिनयता त्यो छुटाएका रहेछन्, बन्दका कारण बुटवलबाट ल्याउन पनि सम्भव भएन, राती मादक पदार्थ सेवन गरेर यस्तो गराएपछि प्रहरीले पक्राउ गरेको छ, घटनाको क्षतिको विवरण पनि लिएर छ’ उनले भने, ‘अरू विषयले भन्दा बिरामी भएकैले यस्तो गरेकोजस्तो लागेको छ, स्थानीय हुन् ०७५ देखि काम गरिरहेका छन्, पार्टीमा क्रियाशील भएकोजस्तो लाग्दैन ।’
काठमाडौं । नेपालको एकमात्र गुप्तचरी संगठन राष्ट्रिय अनुसन्धान विभागको नेतृत्व राजनीतिक शून्यताबीच आइतबार खालि हुँदैछ । वर्तमान प्रमुख हुतराज थापा भोलि आइतबारदेखि अनिवार्य अवकाश हुँदैछन् ।
थापाको अवकाशपछि हालका अतिरिक्त मुख्य अनुसन्धान निर्देशकहरू टेकेन्द्र कार्की र ओम जोशीबीच प्रमुख नियुक्तिका लागि प्रतिस्पर्धा छ । कार्की जुम्लाका बासिन्दा हुन् । उनीसँग यथेष्ट राजनीति पहुँच छैन । जोशी भने कांग्रेस सभापति शेरबहादुर देउवा र निवर्तमान सरकारका गृह मन्त्री रमेश लेखकका नातेदार हुन् ।
अहिले राजनीतिक अवस्था फेरिएको र सरकारले गर्नुपर्ने अनगिन्ती निर्णयका बीच विभाग प्रमुख को हुन्छ भन्नेमा निश्चित छैन । यद्यपि प्रशासनिक नेतृत्व सन्तुलित र गैरराजनीतिक पृष्ठभूमिको गुप्तचर प्रमुखको पक्षमा रहेको बुझिन्छ ।
विभागको हालको ऐन, नियमावली र कार्यविधिले नयाँ प्रमुख चयनका निम्ति ज्येष्ठतालाई आधार मानेको छैन । कार्यसम्पादन, कार्यक्षमता, प्राज्ञिक स्तरलाई आधार मानेको छ । त्यस आधारमा कार्की अगाडि भएको स्रोतले जनाएको छ ।
अर्थपूर्ण नियुक्ति
राष्ट्रिय अनुसन्धान विभाग प्रमुखको नयाँ नियुक्ति दुई कारणले अर्थपूर्ण छ । पहिलो हो, यसभित्र जकडिएर रहेको राजनीति धङधङी अन्त्य नभएसम्म यो एउटा सरकारी अड्डाका नाममा बुख्याचा मात्र बन्छ । अर्को हो, पूर्ववर्ती सरकारले नागरिकका टेलिफोन संवादसहितका वैयक्तिक गोपनीयता संग्रहित गर्ने गरी तयार पारेका उपकरणको कुशलतापूर्वक व्यवस्थापन गर्ने विषय । राज्यले नागरिक अधिकार कुण्ठित गर्नुहुँदैन भन्ने मान्यताका बीच अनुसन्धान विभाग प्रमुखको भूमिका प्रतीक्षित छ ।
स्थापनाकालदेखि नै गृह मन्त्रालयको मातहतमा रहेको उक्त विभाग केपी शर्मा ओलीको दोस्रो प्रधानमन्त्रीकाल (२०७४-२०७८) देखि हालसम्म प्रधानमन्त्री कार्यालयमातहत राखिएको छ । फलतः यसको नियन्त्रण र रेखदेखमा समस्या आउँदा लक्षित उद्देश्य पूरा गर्न सकेको छैन ।
हेटौँडा । मधेश प्रदेश सरकारको नेतृत्व गरिरहेको जनमत पार्टीले मुख्यमन्त्री र सबै मन्त्रीलाई फिर्ता बोलाएको छ ।
जनमत पार्टीको मधेश प्रदेश संसदीय दलका नेता महेश यादवले पार्टी प्रदेश सरकारबाट फिर्ता हुने निर्णयमा पुगेको भन्दै प्रदेश प्रमुखलाई पत्राचार गरेका छन् । उनले सरकारलाई दिइएको समर्थन फिर्ता लिँदै मुख्यमन्त्री र मन्त्रीहरूलाई फिर्ता बोलाउने निर्णय गरेको जानकारी सहितको पत्र प्रदेश प्रमुख कहाँ पठाएका हुन् ।
यसअघि दिउँसो मधेश प्रदेशका मुख्यमन्त्री सतिश कुमार सिंहले अहिलेको भाँडभैलोमा फेरि सरकार बनाउने र गिराउने खेल हुने भएकाले कुनै ठोस निकास नभएसम्म काम गर्नु पर्ने भएकाले राजीनामा नदिने बताएका थिए । उनले नेपालप्रेससँग भनेका थिए, ‘संसद विघटनसँगै प्रदेश सरकार पनि विघटन भएको छैन, केही सम्बोधन भएन, मैले राजीनामा दिँदा फेरि सरकार बनाउने र भत्काउने खेल हुन्छ, मधेश बनाउनु पर्ने मात्रै होइन, एउटा पनि मन्त्रालयको भवनमा बसेर काम गर्न सक्ने अवस्था नभएकाले पहिलो सरकार चलाउने भवन बनाउनु पर्ने चुनौती छ, म काम गर्न चाहन्छु ।’
उनले आफ्नो फेसबुक पेजमा पनि लामो सन्देश लेख्दै भनेका छन्, ‘जनताको ज्यानभन्दा ठुलो पद होइन, राजीनामाले जनताको जीवन रक्षा र सम्पत्तिको क्षति रोक्न मदत पुग्छ भने सचिवालयमार्फत सामाजिक सञ्जालमा गरिएको राजीनामाको जानकारी सत्य हो नत्र संविधान र सङ्घीयताको रक्षार्थ म हरेक बाटो रोज्न तयार छु, तर सङ्घीयताको आत्मा मधेशलाई नेतृत्वविहीन बनाई अरूको खेल मैदान बनाउन दिने कुनैपनि प्रयास स्वीकार्य हुने छैन ।’
उनले भने ‘सहमतिबाट नयाँ मुख्यमन्त्री चयन गर्ने बेला तत्काल राजीनामा दिन तयार छु र अहिलेलाई सबै मिलेर प्रदेशका संरचना पुनः साविक अवस्थामा फर्काऔँ, अझ मजबुत र जनमुखी बनाऔँ, सङ्घीयताको रक्षा गर्ने बाटो बनाऔँ ।’
काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेलाई अन्ततः नख्खु कारागारमा राखिने भएको छ । कारागारमा थप सुरक्षा व्यवस्था माग गरिएको प्रहरी स्रोतले बतायो ।
पाँच दिनअघि कारागारबाट निस्किएका रवि आज आफैँ फर्किएका थिए । स्रोतका अनुसार उनले सुरक्षाको प्रत्याभूति गराउन माग गरेका छन् । कारागार प्रहरीले सुरुमा आनाकानी गरे पनि अहिले थप सुरक्षा व्यवस्थासहित उनलाई राख्ने पहल भएको छ ।
नख्खु कारागार सशस्त्र प्रहरीको सुरक्षा नियन्त्रणमा छ । रविले अहिलेको परिस्थितिमा सुरक्षा व्यवस्था अपर्याप्त भएको बताएका थिए ।
जिल्ला प्रहरी परिसर ललितपुरका एसएसपी श्यामकृष्ण अधिकारीले रविको मागबारे कारागार सुरक्षामा तैनाथ सशस्त्र प्रहरीलाई पत्र लेखेर प्रहरीले ध्यानाकर्षण गराएको बताए ।
उनले भने, ‘आइसकेपछि फर्काउने कुरा हुँदैन । उहाँको मागलाई लिएर सशस्त्र प्रहरीमा ध्यानाकर्षण गराइएको छ ।’
अहिले रवि लामिछानेसँगै कारागारभित्र पत्नी निकिता पौडेल, रास्वपाका कार्यवाहक सभापति डीपी अर्याल लगायत प्रहरी–प्रशासनसँग सम्वादमा छन् । रवि करिब ५ बजे कारागार पुगेका थिए ।
कारागारमा अन्य कैदीहरु पनि धमाधम फर्किरहेका छन् ।
काठमाडौं । प्रधानमन्त्री सुशीला कार्कीले पदबहाली गर्नु अगावै आज जेनजी आन्दोलनमा घाइते भएर उपचाररत युवाहरूलाई भेटेकी छन् । देशको नयाँ कार्यकारीलाई आफू अगाडि पाउँदा घाइते युवाहरूको अनुहार उज्यालिएको थियो ।
प्रधानमन्त्री कार्की वीर अस्पताल, ट्रमा सेन्टर, सिभिल अस्पताल लगायतमा पुगेर घाइतेहरूलाई हौसला र सान्त्वना दिइन् । ट्रमा सेन्टरमा एक घाइते युवकले बेडबाटै प्रधानमन्त्रीलाई शुभकामना दिए । तर, कार्कीले आफूलाई बधाई नदिन आग्रह गरिन् ।
‘मलाई अहिले कसैले पनि बधाई नदिनुहोला । मेरो कार्यकाल सफल भयो भने बधाई दिँदा हुन्छ,’ उनले भनिन् ।
ट्रमा सेन्टरको ४३१ नम्बर बेडमा रहेका घाइते युवाले भने, ‘जुन जिम्मेवारी पाउनुभएको छ, त्यो पुरा गरेर सुनौला अक्षरले नाम लेखियोस् ।’
कार्कीले जवाफ फर्काइन्, ‘मलाई कसैले बधाई नभनोस् । मेरो कार्यकाल सकिएको भोलिपल्ट मात्रै भनोस् । गर्न सकिएन भने केको बधाई ।’
युवाले ३ करोड नेपालीको आमाको रूपमा लिएको बताए । कार्कीले पनि भनिन्, ‘तपाईँ पनि मेरो एउटा छोरा हो ।’
अर्का घाइते युवाले संघीयता खारेजीका लागि प्रधानमन्त्री कार्कीसँग माग गरे । ती युवाले बेडबाट उठ्न खोज्दै नमस्कार गरेपछि कार्कीले सोधिन् घर कहाँ हो ? युवकले भने सिन्धुपाल्चोक ।
कार्कीले नाम सोधेपछि उनले भने- मदन कार्की ।
‘ए… कुन कार्की ?’ आफू पनि कार्की भएकीले प्रधानमन्त्री जिज्ञासा राखिन् । युवकले भने– सुतार कार्की ।
‘के पढ्ने ?’ प्रधानमन्त्रीको अर्को जिज्ञासा ।
युवाले जवाफ दिए, ‘पढ्दै भन्दा पनि काम गर्दै हो । तर, देशका लागि लडेँ । भोलि देश केही राम्रो होला कि भनेर हो ।’
‘हामीले नसके अब तपाईँहरूले गर्नुपर्छ’ कार्कीले भनिन् ।
युवाले भने- ‘तपाईँले त हामीलाई आमाले जस्तो सल्लाह दिने हो । बाटोमा लगाउने हो । मेरो माग भनेको प्रदेश सरकार खारेज हुनुपर्यो । अनि कार्यकारी राष्ट्रप्रमुख हुनुपर्यो । ४८ सालदेखि सरकारी पद धारणा गरेकाहरुको सम्पत्ति शुद्धीकरण र राष्ट्रियकरण हुनुपर्यो ।
कार्कीले ध्यान दिएर सुने पनि कुनै जवाफ फर्काइनन् । मुन्टो मात्रै हल्लाइन् ।
काठमाडौँ । राष्ट्रिय स्वतन्त्र पार्टी (रास्वपा)ले प्रथम महिला प्रधानमन्त्री नेतृत्वको अन्तरिम सरकारलाई संविधान पालना, भ्रष्टाचारविरुद्ध कडा कदम, पुनर्निर्माण र आर्थिक सुधारका पक्षमा सक्रिय बन्न आग्रह गरेको छ।
महामन्त्री कवीन्द्र बुर्लाकोटीले शनिवार जारी गरेको विज्ञप्तिमा रास्वपाले कठिन संक्रमणकालीन अवस्थामा मुलुकलाई पार लगाउने जिम्मेवारी प्रधानमन्त्रीले पाएको उल्लेख गर्दै भदौ २३ गते नवयुवा जेनजी पुस्ताले गरेको निर्णायक हस्तक्षेपकै आधारमा यो परिवर्तन सम्भव भएको बताएको छ। तर, यस प्रक्रियाले संविधान पालना सम्बन्धी प्रश्न पनि उब्जाएको विज्ञप्तिमा जनाइएको छ।
भदौ २६ गते रास्वपाले सार्वजनिक गरेको प्रस्तावलाई उद्धृत गर्दै विज्ञप्तिमा भनिएको छ, ‘राष्ट्रिय सभाको स्थायी स्वरूप र गतिशीलता कायम राखी अन्तरिम सरकारले आगामी प्रतिनिधिसभाको निर्वाचन ६ महिनाभित्र गर्ने गरी ताजा मतादेशको अपरिहार्यता र आन्दोलनको म्यान्डेटबीच सन्तुलन राख्न रास्वपा उचित ठान्दछ।’
रास्वपाले यही वर्षको फागुन २१ मा तोकिएको आमनिर्वाचन सफलतापूर्वक सम्पन्न गर्नुपर्नेमा जोड दिँदै शान्तिपूर्ण सत्ता हस्तान्तरण, लोकतान्त्रिक हकअधिकारको निर्बाध उपभोग र विधि अनुसारको असल शासन सुनिश्चित गर्न सरकारप्रति अपेक्षा गरेको जनाएको छ। साथै चरम भ्रष्टाचार र दण्डहीनता विरुद्ध कडा कदम चाल्न, पुनर्निर्माण तथा आर्थिक सुधारमा प्राथमिकता दिन, सुदृढ अन्तर्राष्ट्रिय सम्बन्ध कायम गर्न र विकासमा गुणस्तरीय दूतत्व देखाउन पनि रास्वपाले अन्तरिम सरकारलाई आग्रह गरेको छ।
विज्ञप्तिमा घोषित लक्ष्यहरूबाट सरकार च्युत भए प्रतिरोध गर्ने चेतावनी दिँदै समग्र राष्ट्रिय हित, एकता र सौहार्द प्रवर्द्धनमा सधैँ सहयोगी भूमिका निर्वाह गर्ने प्रतिबद्धता व्यक्त गरिएको छ।
काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेलाई राख्न नख्खु कारागार प्रशासनले आनाकानी गरेको छ । करिब दुई घन्टा अगाडि नै पुगेका भए पनि अहिलेसम्म रविलाई जेल हालिएको छैन ।
रविलाई लिएर रास्वपा कार्यवाहक सभापति डिपी अर्याल र रविपत्नी निकिता नख्खु कारागार पुगेका थिए । अहिलेसम्म उनीहरू पनि भित्रै छन् ।
सचिवालयका कर्मचारीहरू कागज बोकेर यताउता गरिरहेका छन् । असुरक्षाको कारण देखाएर रविलाई राख्न प्रशासनले नचाहेको आशंका गरिएको छ ।
जेलभित्र अरू पनि केही कैदीबन्दीहरु आउन थालेका छन् ।
काठमाडौं । राष्ट्रपति रामचन्द्र पौडेलले कठिन प्रयत्नपश्चात् शान्तिपूर्ण निकास निस्किएको भन्दै खुसी व्यक्त गरेका छन् ।
संविधान र संसदीय प्रणाली बचेको उनको भनाइ छ ।
आफ्नो विज्ञप्तिमा पौडेलले भनेका छन् ,‘संघीय लोकतान्त्रिक गणतन्त्र कायम रहेको छ । ६ महिनाभित्र प्रतिनिधिसभाको निर्वाचन सम्पन्न गरी अझ उन्नत लोकतन्त्रको बाटोमा अघि बढ्न जनताले अवसर पाएका छन् ।’
बडो जुक्तिले प्राप्त अवसरको सदुपयोग गर्दै जनता रिझाउने र आफैँमा सम्हालिएर फागुन २१ मा चुनाव सम्पन्न गराउने काममा सहयोगका लागि उनले अपिल गरेका छन् ।
काठमाडौं । भारतीय प्रधानमन्त्री नरेन्द्र मोदीले नवनियुक्त अन्तरिम प्रधानमन्त्री सुशिला कार्कीलाई बधाई दिँदै उनको आगमनले नेपालको नवोदयलाई संकेत गरेको बताएका छन् ।
मणिपुरमा आयोजित एक सभालाई सम्बोधन गर्दै मोदीले कार्कीको नियुक्तिलाई महिला सशक्तीकरणको महत्वपूर्णका रूपमा व्याख्या गरेका छन् ।
हिमालयको काखको नेपाल भारतको एक घनिष्ठ मित्र भएको भन्दै उनले दुई देश साझा इतिहास र आस्थाले जोडिएको साथै मिलेर अघि बढिरहेको बताए ।
‘म आज नेपालमा अन्तरिम सरकारको प्रधानमन्त्रीको रूपमा पदभार ग्रहण गर्नुभएकोमा १४० करोड भारतबासीहरूको तर्फबाट श्रीमती सुशीलाजीलाई हार्दिक बधाई दिन चाहन्छु । मलाई विश्वास छ, उहाँले नेपालमा शान्ति, स्थिरता र समृद्धिको मार्ग प्रशस्त गर्नुहुनेछ । नेपालको पहिलो महिला प्रधानमन्त्रीको रूपमा सुशीलाजीको आगमन महिला सशक्तीकरणको एक बहुत उत्तम उदाहरण हो’, मोदीले सभामा भने ।
यस्तो अस्थिरताको वातावरणमा पनि लोकतान्त्रिक मूल्यमान्यतालाई सर्वोपरि राखेको भन्दै उनले भने, ‘नेपालमा भएको घटनाक्रममा अर्को एउटा विशेष कुरा पनि रहेको छ, जसमा मानिसहरूको ध्यान गएको छैन । पछिल्ला दुई-तीन दिनदेखि युवायुवती नेपालका सडकमा सरसफाइ र रङरोगनको मेहनत र पवित्र काममा जुटेको तस्बिरहरू सामाजिक सञ्जालमा देखेको भन्दै उनले भने, ‘यो सकारात्मक सोच, यो सकारात्मक कार्य प्रेरणादायी मात्र होइन, यो नेपालको नवोदयको स्पष्ट सङ्केत पनि हो । म नेपाललाई उसको उज्ज्वल भविष्यको लागि शुभकामना दिन्छु ।’
काठमाडौं । सामाजिक सञ्जालमा अहिले एउटा ज्यान मुद्दाको जाहेरी भाइरल बनिरहेको छ । त्यसमा कपिलवस्तुका कांग्रेस नेता अभिषेकप्रताप साहले निवर्तमान प्रधानमन्त्री केपी शर्मा ओलीविरुद्ध ज्यान मुद्दामा जाहेरी लेखेको देखिन्छ । प्रहरीको नयाँ बानेश्वर वृत्तलाई सम्बोधन गरिएको छ ।
गत भदौ २३ गतेको जेनजी आन्दोलनमा प्रहरीको गोली लागि मृत्यु भएको घटनासँग जोडेर तत्कालीन प्रधानमन्त्री ओलीविरुद्ध यो जाहेरी लेखिएको हो ।
नेपाल प्रेसले यसबारे प्रहरी वृत्त, नयाँ बानेश्वरका डीएसपी हरि खतिवडालाई सोध्यो । उनको जवाफ छ, ‘हाम्रो कार्यालय नै छैन, कहाँ दर्ता गर्नु रु जाहेरी आएको पनि छैन ।’
कांग्रेस नेता साहले जाहेरी आफैँले लेखेको, तर बुझाउने ठाउँ नपाएको बताए । यसबारे नेपाल प्रेसले सोध्दा उनले भने, ‘नयाँ बानेश्वरमा पुलिस अफिस नै रहेनछ, अनि मैले जिल्ला प्रहरी भद्रकालीको इमेल आइडीमा मेल गरेको छु ।’
उनले जिल्ला प्रशासन कार्यालय कपिलवस्तुमार्फत नेपाल सरकार, गृह मन्त्रालयले पाउने गरी पनि पठाएको बताए । ‘मैले होस् हवास र सुझबुझयुक्त रूपमै जाहेरी दिएको हो’, उनले भने ।
अभिषेकप्रताप कांग्रेसका निवर्तमान सांसद हुन् । उनले २०६४ मा तत्कालीन मधेसी जनअधिकार फोरमबाट कपिलवस्तु ३ मा चुनाव जितेका थिए । ७० सालको चुनावमा पनि फोरमबाटै जिते । २०७४ सालमा भने कांग्रेस प्रवेश गरेर फेरि त्यही क्षेत्रबाट जिते । तर, ७९ को चुनावमा भने एमालेसँग हारेका थिए । भारतसँग सीमा जोडिएको कपिलवस्तुको कृष्णनगरमा उनको घर छ ।
काठमाडौं । प्रधानमन्त्री सुशीला कार्कीले ‘जेनजी’ आन्दोलनमा घाइते भई मीनभवनस्थित निजामती अस्पतालमा उपचाररत युवालाई भेटेर उनीहरूको स्वास्थ्य अवस्थाबारे जानकारी लिएकी छन् । प्रधानमन्त्री कार्कीले आज अपराह्न उक्त अस्पतालमा उपचाररत घाइतेहरूको स्वास्थ्य अवस्थाबारे जानकारी लिएको अस्पतालका कार्यकारी निर्देशक प्राडा मोहनचन्द्र रेग्मीले जानकारी दिए ।
‘प्रधानमन्त्रीले घाइतेको स्वास्थ्यस्थितिबारे जानकारी लिनुभयो । त्यसक्रममा उहाँहरूले आफ्नो स्वास्थ्यबारे प्रधानमन्त्रीलाई जानकारी गराउँदै आफूले देशका लागि दिएको बलिदान खेर नजाओस्, प्रधानमन्त्रीले देशलाई निकास दिनुपर्छ । पुनःअर्को पुस्ताले आन्दोलन गर्नु नपरोस्,’ डा रेग्मीले भने । प्रधानमन्त्री कार्कीले मुलुकको अवस्था परिवर्तन गर्न हरसम्भवन प्रयत्न गर्ने प्रतिबद्धता व्यक्त गरेकी थिइन् ।
कार्यकारी निर्देशक रेग्मीका अनुसार गत सोमबार यता चार सय ५७ घाइते अस्पताल पुगेकामा ४४ जनालाई अन्यत्र ‘रेफर’ गरिएको थियो । तीन सय ६४ जना उपचारपछि घर फर्किसकेका छन् । अस्पताल भर्ना भएका ४९ मध्ये ११ जना हाल उपचाररत छन् । गम्भीर घाइते एक जनाको सघन उपचार कक्षमा उपचार भइरहेको छभने ४५ जनाको शल्यक्रिया तथा सात जनाको पुनः शल्यक्रिया गरिएको छ । निजामती अस्पतालमा उपचारका क्रममा छ जनाको मृत्यु भएको थियो ।
काठमाडौं । जेन जी आन्दोलनका क्रममा उत्रिएको भीडले मधेश केन्द्रित दलका ७ नेताको घरमा लगाइदिएका छन्।
प्रदर्शनकारीले मधेशकेन्द्रित दलका ७ नेताको घर तोडफोड, लुटपाट र आगजनी गरिदिएको राष्ट्रिय मुक्ति पार्टीका नेता केशव झाले बताए।
उनका अनुसार पार्टी अध्यक्ष राजेन्द्र महतो, जसपा नेपालका अध्यक्ष उपेन्द्र यादव, नेता लालबाबु राउत, लोसपा नेताहरू सर्वेन्द्रनाथ शुक्ला, शरदसिंह भण्डारी र जनता प्रगतिशील पार्टीका अध्यक्ष हृदयेश त्रिपाठीको घर जलेको छ।
काठमाडौं । राष्ट्रिय स्वतन्त्र पार्टीका सभापति रवि लामिछाने पुनः कारागार फर्केका छन् ।
केही दिनअघि जेनजी आन्दोलनका क्रममा रिहा भएका उनले आज स्वैच्छिक गिरफ्तारी दिएका हुन् ।
रविलाई रास्वपाका कार्यवाहक सभापति डीपी अर्यालले कारागारसम्म साथ दिए। जानुअघि रविले फेसबुक लाइभमा बोल्दै आफ्नो जन्मदिनमा कारागार जान लागेको बताएका थिए ।
आफ्नो कारणले देशभरका कैदीहरु जेलबाट भागेको भनेर बदनाम गर्न खोजिएको रविको गुनासो छ ।
काठमाडौं । राष्ट्रिय स्वतन्त्र पार्टीका सभापति रवि लामिछाने पुनः कारागार फर्केका छन् ।
केही दिनअघि जेनजी आन्दोलनका क्रममा रिहा भएका उनले आज स्वैच्छिक गिरफ्तारी दिएका हुन् ।
रविलाई रास्वपाका कार्यवाहक सभापति डीपी अर्यालले कारागारसम्म साथ दिए। जानुअघि रविले फेसबुक लाइभमा बोल्दै आफ्नो जन्मदिनमा कारागार जान लागेको बताएका थिए ।
आफ्नो कारणले देशभरका कैदीहरु जेलबाट भागेको भनेर बदनाम गर्न खोजिएको रविको गुनासो छ ।