काठमाडौं । शेरबहादुर देउवालाई विश्वासको मत दिएका २२ जना सांसदले नेकपा एमालेका वरिष्ठ नेता माधवकुमार नेपाललाई दोस्रो अध्यक्षको प्रलोभनमा नफस्न सुझाव दिएका छन् ।
बुधवार नेपालले आफूलाई साथ दिएका सांसदहरूसँग सामूहिक परामर्श गरेका छन् । उनीहरूमध्ये अधिकांसले सरकारमा जान र सरकारलाई सफल पार्नेतिर माधव नेपालको ध्यानाकर्षण गराएका छन् ।
साहना प्रधान स्मृति प्रतिष्ठानको हलमा आयोजना भएको छलफलमा सहभागी सांसदहरुले कार्यदलमा रहेका माधव नेपाल पक्षबाट प्रतिनिधित्व गर्ने नेताहरुले केपी ओलीलाई सहयोग गरेको आरोप लगाएका छन् ।
सांसदहरूले दोस्रो तहका नेताहरूबाट माधव नेपाललाई धोखा भए पनि तेस्रो र चौथो तहका नेता कार्यकर्ताको साथ रहेको भन्दै खुट्टा नकमाउन आग्रह गरेका छन् । छलफलमा सहभागी एक सांसदले भने, ‘संसद जोगाउनुभयो अब सरकार जोगाएर यो संसद पूरा कार्यकाल चल्न हामीले सघाउनुपर्छ भनेर माधव नेपाललाई भनेका छौं । पार्टी एकता गर्ने हो भने पनि तत्कालै गर्नुस् तर दोस्रो अध्यक्ष भनेर केपी ओलीले फेरि हलाल गर्छन् भनेका छौं ।’