Tag: सिरहा

सिरहा । सिरहाको धनगढी नगरपालिका–११ आँप चोकबाट एक थान ईटालियन पेस्तोलसहित प्रहरीले एक जनालाई पक्राउ गरेको छ । पक्राउ पर्नेमा सोही ठाउँ बस्ने ४२ वर्षीय ब्रमदेव यादव रहेका छन् ।

उनको साथबाट पेस्तोलसिहत सोही पेस्तोलमा लाग्ने ५ राउण्ड गोली र १ थान म्याग्जिन बरामद गरेको छ । ईलाका प्रहरी कार्यालय धनगढी सिरहाबाट खटिएको प्रहरीले जाँच गर्ने क्रममा यादवको साथबाट उक्त हतियार फेला पारी पक्राउ गरेको जिल्ला प्रहरी कार्यालय सिरहाले जनाएको छ ।

जनकपुरधाम । सिरहाको औरही गाउँपालिकाले भण्डार गरेको गहुँको बीउ लुटेको आरोपमा पक्राउ परेका किसान मिथिलेश यादव रिहा भएका छन् । उनलाई आज जिल्ला अदालत धनुषाले साधारण तारिखमा रिहा गरेको हो ।

औरही गाउँपालिकाले यादवमाथि जिल्ला प्रहरी कार्यालय सिरहामा आपराधिक उपद्रो मुद्दा दर्ता गरेको थियो । औरही गाउँपालिका-३ घर भएका उनलाई प्रहरीले पुस ६ गते पक्राउ गरेपछि डा. सीके राउत नेतृत्वको जनमत पार्टीले आन्दोलन सुरू गरेको थियो ।

चार दिनदेखि सिरहामा आन्दोलन जारी राखेपछि स्थानीय प्रशासनले निषेधाज्ञासमेत जारी गरेको छ । आन्दोलनका क्रममा पक्राउ परेका जनमत पार्टीका १८ कार्यकर्तालाई समेत प्रशासनले रिहा गर्न आदेश दिएको छ ।

सिरहाका प्रहरी प्रमुख एसपी हिराबहादुर पाण्डेले जिल्ला प्रशासन कार्यालयबाट आन्दोलनका क्रममा पक्राउ परेकाहरूलाई रिहा गर्न आदेश आइसकेको बताए । ६ दलको आग्रहमा उनीहरूलाई रिहा गर्न लागेको उनको भनाइ छ ।

गोलबजार (सिरहा) । डा. सीके राउत नेतृत्वको जनमत पार्टीको आन्दोलनलाई लक्षित गर्दै स्थानीय प्रशासनले आज र भोलि दुई दिन निषेधाज्ञा जारी गरेको छ ।

निषेधाज्ञा कार्यान्वयन गराउने नाममा प्रहरीले तरकारी व्यापारीमाथि बल प्रयोग गरेर बजार बन्द गराएको छ । आज बिहान गोलबजार राजमार्ग क्षेत्रको साप्ताहिक तरकारी बजारमा प्रहरीले व्यापारीमाथि ज्यादती गरेको पीडितहरूले बताएका छन् । राजमार्ग आसपास ५ सय मिटरभित्र निषेधाज्ञा जारी भएको भन्दै प्रहरीले जबरजस्ती बजार बन्द गराएको हो ।

सटरमा तरकारी बेच्ने किसानलाई समेत प्रहरीले दुर्व्यवहार गरे । तरकारी बिग्रिने भनेर बिन्ती गर्दै गर्दा आफूमाथि कुटपिट गरेको गोलबजार- ३ का किसान मनोज लामाले बताए । ‘सटर बन्द गर नत्र पक्रेर लान्छु भनेर चेतावनी दिँदै सडकमै घिसारे । सटर बन्द गर्न बाध्य भएँ’, उनको गुनासो छ ।

असनपुरकी सेलोदेवी महतोले प्रहरी प्रशासनले तरकारी बेच्न नदिएको गुनासो गरिन् । उनी भन्छिन्, ‘साँझमै खेतबाट टिपे । अहिले शिव मन्दिर नजिकै ४ बोरा तरकारी राखेको छु । तर, प्रशासनले बेच्न दिइरहेका छैन ।’ बिक्री गर्न नदिए तरकारी सडेपछि क्षतिपूर्ति कसले दिन्छ ? उनले प्रश्न गरिन् ।

इलाका प्रहरी कार्यालय गोलबजारको टोलीले निषेधाज्ञा पालना गर्न बजार बन्द गराउँदै हिँडेका छन् । बजार बन्द भएपछि जनजीवन प्रभावित बनेको छ । समस्या समाधानको नाममा प्रशासनले जारी गरेको निषेधाज्ञाले झन समस्या बल्झाएको छ । सीके राउतको आन्दोलनलाई नै प्रशासनले सघाएको व्यापारीहरूको आरोप छ ।

निषेधाज्ञाका कारण सडकमा जनमत पार्टीका कार्यकर्ता देखिएका छैनन् । सवारीसाधन भने निर्वाध चलिरहेका छन् । राजमार्गमा पर्ने गोलबजार, मिर्चैया, बन्दीपुर, लहान, धनगढी, जिरोमाइललगायतका बजार बन्द गराइएको छ ।

औरही गाउँपालिकाले वितरणमा ढिलाइ गरेपछि गोदाममा राखेको साढे तीन सय बोरा गहुँको बीउ किसानले कब्जा गरेका थिए । अध्यक्ष सिद्धार्थ यादवले उजुरी गरेपछि प्रहरीले एक किसान पक्राउ गरेको विरोधमा सीके राउतको पार्टी आन्दोलनमा छ ।

आइतबार आमहड्ताल उल्लंघन गरेको भन्दै लाठीसहित सडकमा निस्किएका जनमत पार्टीका कार्यकर्ताले सवारीसाधन तोडफोड गरेका सो क्रममा प्रहरीले १४ जनालाई पक्राउ गरेको छ । कार्यकर्ता पक्राउको विरोधमा जिल्लाभर चक्काजाम आव्हान गरिएको थियो । आन्दोलन आन्दोलन ध्वंसात्मक बनेपछि प्रशासनले निषेधाज्ञा जारी गरेको हो ।

सोमबार साँझ सिरहाका प्रमुख जिल्ला अधिकारी लालबाबु कवारीले आज र भोलि दुई दिन बिहान ५ देखि बेलुका ७ बजेसम्म पूर्वपश्चिम राजमार्ग र सिरहा-चोहर्वा सडक खण्डमा सडक संचालनबाहेक निषेधाज्ञाको घोषणा गरेका हुन् ।

सिरहा । सिरहामा एक किशोरी बलात्कृत भएकी छन् । लहान नगरपालिका १४ की १७ वर्षीया किशोरीलाई बलात्कार गरेको आरोपमा २४ वर्षीय शिवा पासवानविरुद्ध इलाका प्रहरी कार्यालय लहानमा उजुरी परेको छ ।

पीडित किशोरीमाथि बिहीबार बलात्कार गरेको आरोपमा कारबाहीका लागि उजुरी परेको इलाका प्रहरी कार्यालय लहानका प्रमुख डीएसपी डाक्टर तपन दाहाले जानकारी दिए ।

पीडित किशोरीको स्वास्थ्य परीक्षण गरिएको र आरोपितको खाजीकार्य भइरहेको जनाको छ । घटनाबारे थप अनुसन्धान भइरहेको पनि प्रहरीले जनाएको छ ।

जनकपुरधाम । दुई किशोरीलाई बेच्न भारततर्फ लैजाँदै गरेका दुई महिलालाई सिरहा प्रहरीले शनिबार पक्राउ गरेको छ ।

पक्राउ पर्नेमा सप्तरीको कञ्चनरुप नगरपालिका ११ की २८ वर्षीया ललिता चौधरी र सिरहाको धनगढीमाई नगरपालिका १ की ३५ वर्षीया उषादेवी मलाह रहेको प्रहरीले जानकारी दिएको  छ ।

प्रहरीका अनुसार १६ र १९ वर्षीया दुई किशोरीलाई बेच्ने उद्देश्यले माडर नाकाबाट भारत लग्ने योजना पक्राउ परेकी दुबै महिलाले बनाएकी थिइन् । तर चोहर्वामै उनीहरू पक्राउ परेकी छन् ।

लहान आश्रममा मासिक ५० हजारको जागिर लगाइदिने आश्वासन दिएर दुबै किशोरीलाई महिलाहरूले लहान ल्याएकी थिइन् । लहान आइसकेपछि जनकपुरमा अझ बढी रुपैयाँ कमाउने भन्दै झुक्याएर भारततर्फ लग्न खोजेको अनुसन्धानबाट खुलेको प्रहरीले जनाएको छ ।

इलाका प्रहरी कार्यालय मिर्चैयाका प्रमुख डीएसपी राजेन्द्र श्रेष्ठले किशारीलाई भारततर्फ लान ठिक्क पारेको अवस्था दुई महिला पक्राउ परेको जानकारी दिए ।

उनले जिल्ला अदालतबाट म्याद थप गरी दुबै महिलामाथि आवश्यक अनुसन्धान अगाडी बढाएको बताए । प्रहरीले दुबै महिलामाथि मानव बेचविखन तथा ओसारपसार कसुरमा मुद्दा अगाडि बढाएको छ । उद्धार गरिएकी दुबै किशोरीलाई अभिभावकको जिम्मा लगाउने प्रहरीको भनाई छ ।

जनकपुरधाम । सिरहाको धनगढीमाई नगरपालिका–६ विष्णुपुरकट्टीमा विजुलीको पोल ढल्दा करेन्ट लागेर एक जनाको मृत्यु भएको छ ।

तारमा करेन्ट प्रवाह भइरहको पोल ढलेर पोखरीमा खसेपछि चौपायलाई पानी खुवाउन पुगेका बौका भनिने तुलसी यादवको घटनास्थलमै मृत्यु भएको हो । करेन्ट लागेर उनको एउटा भैंसी पनि मरेको छ ।

जीर्ण पोल नहटाउँदा दुखद् घटना भएको भन्दै स्थानीयले प्रशासनको विरोध गरेका छन् ।

घटनास्थलमा पुगेका प्रहरीले कानूनी प्रक्रिया पूरा गरी शव पोष्टमार्टमका लागि जिल्ला अस्पताल पठाएको छ ।

जनकपुरधाम । १० वर्ष लगाएर निर्माण गरिएको हुलाकी सडकअन्तर्गतको कमला पुल भासिएपछि सिरहामा आन्दोलन सुरू भएको छ ।

पुल भासिएको विषयमा छानविन गर, अविलम्ब पुल निर्माण गर, दोषीलाई कारबाही गरलगायतका नारा उल्लेखित प्लेकार्ड बोकेका युवाहरूले सिरहा सदरमुकाममा प्रदर्शन गरेका हुन् । सरकारको उदासिनताले ठेकेदार गुणस्तरहीन काम गरेको र त्यही कारण पुल भासिएको उनीहरूको भनाइ छ ।

यसैबीच, धनुषाका प्रमुख जिल्ला अधिकारी बन्धुप्रसाद बास्तोलाले भासिएको पुलको निरीक्षण गरेका छन् । उनले पुल पुन: निर्माण ठेकेदार कम्पनीलाई गर्नुपर्ने भन्दै समयमा पुल संचालन नहुनु राज्यलाई घाटा भएको उनले बताए ।

सिरहा-धनुषा जोड्ने कमला पुल निर्माणको ठेक्का २०६८ मै पप्पु-लुम्बिनी जेभीले पौने २५ करोडमा ठेक्का लिएको थियो । तर, पछि पप्पुले काम छाडेपछि लुम्बिनी बिल्डर्सले बाँकी काम गराएको छ ।

जनकपुरधाम । सिरहाको मिर्चैया नगरपालिका-५ मा एक पुरुषमाथि अज्ञात समूहले गोली प्रहार गरेका छन् । गोली लागेर सोही ठाउँका रामसागर साफी घाइते भएका हुन् ।

साँझ करिब ८ बजेतिर उनीमाथि दुई गोली हानेर अपरिचित व्यक्तिहरु भागेका छन् । साफीको हात र तिघ्रामा गोली लागेको इलाका प्रहरी कार्यालय मिर्चैयाका डीएसपी राजेन्द्र श्रेष्ठले जानकारी दिए ।

साफीको उपचार मिर्चैयाकै एक अस्पतालमा भइरहेको छ । गोली चलाउने व्यक्तिहरुको खोजी सुरु गरेको प्रहरीले जनाएको छ ।

जनकपुरधाम । निषेधाज्ञाका बेला बन्द रहेको पसलबाट रक्सी चोरेको आरोप लागेपछि जिल्ला प्रहरी कार्यालय सिरहाले असईसहित तीन प्रहरीलाई निलम्बन गरेको छ ।

इलाका प्रहरी कार्यालय लहानमा कार्यरत प्रहरी सहायक निरीक्षक नवल किशोर ठाकुर, प्रहरी जवानद्वय अन्नु कुमार राय र नरेशकुमार राय निलम्बनमा परेका हुन् । चोरीको आरोप लागेपछि तीनै जनालाई निलम्बन गरी अनुसन्धान सुरु गरिएको सिरहाका प्रहरी प्रवक्ता डिएसपी शालिग्राम शर्माले जानकारी दिए ।

लहान नगरपालिका-२३ गढिया चोकमा रहेको पूजा मदिरा पसलमा जेठ ९ मा होहल्ला भइरहेको थाहा पाएपछि प्रहरी टोली पुगेको थियो । प्रहरीलाई देखेपछि पसल सञ्चालकसहित सबै भागे । त्यसपछि तिनै प्रहरीले पसलबाट भाेड्का निकालेर चाैकी फर्किएकाे सीसीटिभी क्यामरामा कैद भएकाे थियाे । ।

पुलिसले भोड्का चोरेको भिडियो सामाजिक सञ्जालमा भाइरल भएको छ । डीएसपी शर्माले भने, ‘तीन हाफमात्र चोरेका रहेछन् । तर बर्दीमा भएको बेला पसलबाट मदिरा पकेटमा राख्नु आचरण विपरित कार्य हो । त्यसैले निलम्बन गरी अनुसन्धान थालेका छौं ।’