Tag: सिन्धुली

सिन्धुली । जिल्लाको दुधौली नगरपालिकाले कोरोना भाइरस सङ्क्रमण न्यूनीकरण गर्न एक हप्ताका लागि लकडाउन घोषणा गरेको छ । यही वैशाख ९ गते बिहीबार बसेको नगर कार्यपालिकाको बैठकले नगरका तीनवटा वडामा आजदेखि लकडाउन गर्ने घोषणा गरेको नगर प्रमुख घनश्याम राउतले जानकारी दिए ।

उनले भने, ‘हामीले नगरका तीनवटा वडामा कोरोना भाइरस सङ्क्रमण बढी फैलन सक्नेतर्फ सचेत हुँदै लकडाउन गर्ने निर्णय गरेका हौँ ।’ उनका अनुसार नगरपालिकाका वडा १, २ र ४ मा वैशाख १० देखि १७ सम्म लकडाउन घोषणा गरिएको छ ।

बुधबार दुधौली नगरपालिका-१ का एक व्यक्तिमा कोरोना पोजेटिभ पुष्टि भएपछि नगरको विपद् व्यवस्थापन समितिको बैठकले लकडाउन घोषणा गर्ने निर्णय गरेको हो । लकडाउनको घोषणा भएका क्षेत्रमा अति आवश्यक सेवा एम्बुलेन्स, दमकल, स्वास्थ्य सेवा, दूध, तरकारी फलफूल, खाद्यान्न पसलबाहेक शैक्षिक संस्था, सरकारी तथा गैरसरकारी कार्यालय, वडा कार्यालय (वडा नं ४ बाहेक) बजार, होटल, यातायातका सेवा र अन्य व्यवसाय पनि बन्द रहनेछ । लकडाउनको उल्लङ्घन गरेमा कानूनबमोजिम कारबाही गरिने पनि उल्लेख गरिएको छ ।

जिल्ला प्रशासन कार्यालयले पनि जिल्लाभर सभा सम्मेलन, गोष्ठी सङ्घसंस्थाका कार्यक्रममा सरकारले तोकेको मापदण्डअनुसार २५ भन्दा बढी मानिस सहभागी नगराई सामाजिक दूरी कायम गरी कार्यक्रम नगर्न आग्रह गरेको छ । जिल्लाको गोलन्जोर गाउँपालिकाले पनि कोरोनाको सङ्क्रमण फैलनसक्ने जनाउँदै साप्ताहिक हाटबजार बन्द गर्ने निर्णय गरेको छ । कोरोनाको जोखिम हुन नदिन खनियाँखर्क, खुर्कोट, ग्वाल्टार र च्याकुटार बेँसीमा लाग्ने साप्ताहिक हाटबजार बन्द गर्ने गाउँपालिकाले जनाएको छ ।

ती क्षेत्रमा रहेका विद्यालय, सरकारी तथा गैरसरकारी सङ्घसंस्था, सम्बद्ध निकायका कर्मचारीलगायत सबैमा सेवा लिँदा–दिँदा र सामाजिक गतिविधि गर्दा स्वास्थ्य संवेदनशीलतालाई समेत ध्यानमा राख्दै सेवा आदानप्रदान निर्देशन दिइएको छ ।

सिन्धुली । सिन्धुलीमा जिप दुर्घटना हुँदा चार जनाको घटनास्लथल मै मृत्यु भएको छ । कमलामाइ नगरपालिका–७ करङडाँडामा बा १७ च १११७ नम्बरको जिप दिउँसो पौने ४ बजे सडकबाट ५० मिटर तल खस्दा चार जनाको घटनास्थलमै मृत्यु भएको हाे ।

मृत्यु हुनेमा कमलामाइ नगरपालिका ७ बाँसकटेरीका करिव ६५ वर्षका रुद्रबहादुर थापा, १८ वर्षका रीता इस्माली, १९ वर्षका दुर्गा श्रेष्ठ र उनका छोरा २ वर्षका मनिष श्रेष्ठको रहेको सिन्धुलीका प्रमुख जिल्ला अधिकारी सुरेश न्यौपानेले नेपाल प्रेसलाई जानकारी दिए ।

उनका अनुसार सिन्धुली सदरमुकाम सिन्धुलीबाट बासकटेरीतर्फ जाँदै गरेको जिप अनियन्त्रित भएर दुर्घटना भएको प्रारम्भिक अनुसन्धानबाट खुलेको हो । जिपमा ११ जना सवार रहेकोमा चार जनाको घटनास्थलमै मृत्यु भएको छ भने सात जना घाइते भएका छन्

७ जना घाइतेमा ४ जना काठमाडौं रिफर गरिएको र ३ जनाको सिन्धुली अस्पतालमा उपचार भइरहेको प्रअिज न्यौपानेले बताए । उनका अनुसार घाइतेमध्ये दुइ जनाको अवस्था गम्भिर रहेको छ । घाइते हुनेमा ३० वर्षका जिप चालक भोजविक्रम थापा, २७ वर्षका धनबहादुर श्रेष्ठ, २२ वर्षका कविता श्रेष्ठ, ५० वर्षका सुनमाया थिङ, ३० वर्षका सुकमाया पुलामी, २८ वर्षका विनिता श्रेष्ठ र दुइ वर्षका रेमन पुलामी रहेका छन् ।

जसमध्ये गम्भिर अवस्थामा रहेका चालक थापा र कविता श्रेष्ठसहित थप दुइ जना धनबहादुर श्रेष्ठ र विनिता श्रेष्ठ गरेर ४ जनालाई थप उपचारका लागि काठमाडौ रेफर गरिएको स्थानीय प्रशासनले जनाएको छ ।