Tag: सहयोग

पोखरा । हङकङ नेपाली महासंघद्धारा आइतवार तमु धिं नेपाललाई ४ वटा अक्सिजन कन्सन्ट्रेटर हस्तान्तरण गरेको छ । कोरोनाको कहरको अवस्थामा कास्कीका स्वास्थ्य केन्द्र र अस्पतालहरुलाई वितरणका लागि महासंघका नेपाल प्रतिनीधि आकास उप्रेतीले तमु धिं नेपालका अध्यक्ष हुमबहादुर गुरुङलाई एक कार्यक्रमका बिच अक्सिजन कन्सन्ट्रेटर हस्तान्तरण गरेका हुन् ।

तमु धिं नेपालकी आजीवन सदस्य समेत रहेकी अभियानका संयोजक हङकङ नेपाली महासंघकी निवर्तमान अध्यक्ष तथा प्रमुख सल्लाहकार, रिता गुरुङका अनुसार कास्कीको ४ मध्ये २ वटा पोखरा स्वास्थ्य विज्ञान प्रतिष्ठान पश्चिमाञ्चल(गण्डकी)क्षेत्रीय अस्पताल, १ वटा पोखरा ३० मोहरियास्थित संक्रामक तथा सरुवा रोग अस्पताल र १ वटा पोखरा १६ अर्मलास्थित अर्मला स्वास्थ्य चौकीलाई हस्तान्तरण गरिने अध्यक्ष गुरुङले बताए।

कोरोनाभाइरस (कोभिड–१९) महामारीको बिषम परिस्थितीमा मातृभूमि नेपाललाई सहयोग गर्ने उद्देश्यले हङकङ नेपाली महासंघले शुरु गरेको ‘हेल्प नेपाल–फाईट कोभिड–१९ अभियान’ अन्तर्गत २०० वटा अक्सिजन कन्सन्ट्रेटरहरु सहयोग वितरण भइरहेको छ।

रिता गुरुङको संयोजकत्वमा दातृ संस्था सोअर्स एक्सनको बिशेष सहयोगमा नेपालको ७ वटा प्रदेशमा रहेका ७७ जिल्लाका नेपाल सरकारद्वारा तोकिएको प्राथमिक स्वास्थ्य केन्द्र तथा जिल्ला अस्पतालमा १० लिटर प्रति मिनेट क्षमताको २०० वटा अक्सिजन कन्सन्ट्रेटरहरु निःशुल्क वितरण हस्तान्तरण दोश्रो चरणमा जारी छ।

वितरणको पहिलो चरण अन्तर्गत नेपालस्थित हङकङ नेपाली महासंघका प्रतिनिधिहरु मार्फत् १०० वटा अक्सिजन कन्सन्ट्रेटरहरु प्रदेश नम्बर ५, ६ र ७ मा वितरण हस्तान्तरण कार्य सम्पन्न भईसकेको छ । दोश्रो चरण अन्तर्गतको थप १०० वटा अक्सिजन कन्सन्ट्रेटरहरु पनि प्रदेश नंम्बर १, २, ३ र ४ मा वितरण हस्तान्तरण अन्तर्गत साउन २३ गते शनिवार तनहुँ र लमजुङ जिल्ला र साउन २४ गते आइतवार कास्की, म्याग्दी, बाग्लुङ लगायतका जिल्लाहरुमा वितरण अन्तर्गत कास्कीका लागि ४ वटा अक्सिजन कन्सन्ट्रेटर वितरण संयोजनका लागि तमु धिं नेपाललाई हङकङ नेपाली महासंघका नेपाल प्रतिनीधि उप्रेतीसहितको टिमले अध्यक्ष गुरुङलाई हस्तान्तरण गरेका हुन् ।

आकास उप्रेतीले नेपालका ७७ वटै जिल्लामा २, २ वटाको दरले कन्सन्ट्रेटर वितरण गर्दै आएकोमा आवाश्यकताको आधारमा कास्कीलाई ४ वटा सहयोग गरिएको बताए। महासंघले ‘हेल्प नेपाल–फाईट कोभिड–१९ अभियान’अन्तर्गत हङकङमा विभिन्न चरणमा धेरै सहयोग गरिदै आएको र मातृभुमिप्रति महासंघले आफ्नो दायित्व महसुस गरी सहयोग गरेको बताए। कार्यक्रममा उप्रेतिसहित वितरण प्रतिनिधी रचना भण्डारी, गौरब मगर, जेतिन मगरको उपस्थितीरहेको थियो। कन्सन्ट्रेटर हस्तान्तरण कार्यक्रमको संचालन तमु धिं नेपालका सचिव जुमबहादुर गुरुङले गरेका थिए ।

सिन्धुपाल्चोक । सेवा समाज-यूएई, सिन्धुपाल्चोक समाज-दक्षिण कोरिया र सिन्धुपाल्चोक सेवा समाज-कुवेतले बाढी प्रभावित हेलम्बुवासीलाई राहतस्वरुप आर्थिक सहायता गरेका छन् । यसअघि नै मृतकका परिवार र शैक्षिक संस्थालाई सहयोग गरिएको स्थानीय संयोजक कुमारप्रसाद लामिछानेले जानकारी दिए ।

पूर्ण प्रभावितलाई वडा कार्यालयबाट प्राप्त विवरणअनुसार सहयोग सुरु गरिएको कुवेत संयोजक हरिकृष्ण न्यौपानेले जानकारी दिए । वडा नं १ का २३, वडा नं २ का ४३, वडा नं ३ का २६ र वडा नं ६ का ९ परिवारलाई ५-५ हजार रुपैयाँका दरले सहयोग सुरु गरिएको हो ।

आर्थिक सहायता प्रदान गर्न सिन्धुपाल्चोक समाज दक्षिण कोरियाबाट पाँच लाख ४० हजार रुपैयाँ, सिन्धुपाल्चोक सेवा समाज-दुवईबाट एक लाख २६ हजार र सिन्धुपाल्चोक सेवा समाज-कुवेतबाट दुई लाख ४० हजार रुपैयाँ सङ्कलन भएको यूएईका सचिव हरि दुलालले जानकारी दिए ।

वडा नं १ का प्रभावितलाई शनिबार सहयोग हस्तान्तरण गरिएको छ भने वडा नं २ का प्रभावितलाई प्रदान गर्नका लागि वडाध्यक्ष छिरिङग्याल्बु लामालाई रकम हस्तान्तरण गरिएको छ ।

वडा नं ३ का प्रभावितका लागि प्रदान गर्न वडासदस्य दमैसिं तामाङलाई रकम हस्तान्तरण गरिएको छ । इस्ट पोइन्ट एकेडेमीका प्रधानाध्यापक दामोदर भारतीलाई शनिबार नै सहयोग रकम हस्तान्तरण गरिएको छ ।

काठमाडौं । गैरआवासीय नेपाली संघले नारायणी अस्पताललाई २२ लाख ६० हजार रुपैया आर्थिक सहयोग गरेको छ । गैरआवासीय राष्ट्रिय समन्यव परिषद् जापानले उपलब्ध गराएको उक्त रकम अस्पतालमा बाल आइसीयू बनाउन सहयोग गरेको परिषद् जापानका प्रवक्ता सिद्धार्थ श्रेष्ठले बताए ।

परिषद्ले केही समयअघि नारायणी अस्पतालसँग सहकार्य गर्न अस्पताल व्यवस्थापन समितिलाई प्रस्ताव पेश गरेको थियो । हालै सोही प्रस्तावलाई अस्पताल व्यवस्थापन समितिले स्वीकृत गरेपछि बाल आइसीयू बन्ने काम अगाडि बढेको हो ।

गैरआवासीय नेपाली संघका केन्द्रिय कोषाध्यक्ष महेश श्रेष्ठलाई संघका पूर्वअध्यक्ष भवन भट्टले उक्त रकम र अन्य स्वास्थ्य सामग्री राष्ट्रिय परिषद् जापानको कार्यलयमा हस्तारण गरेका थिए । देशमा आपत विपत पर्दा विदेशमा रहेर पनि नेपालमा निरन्तर सहयोग गर्ने गैरआवासीय नेपाली संघप्रति नारायणी अस्पतालका निमित्त प्रमुख मेडिकल सुपरिटेण्डेन्ट डा. वीरेन्द्रबहादुर प्रधानले धन्यपाद व्यक्त गरेका छन् ।

सिन्धुपाल्चोक । हेलम्बु गाउँपालिकालाई गैरआवासीय नेपाली संघ जापान तोचिगि क्षेत्रीय समितिले एक लाख ११ हजार १११ रुपैयाँ सहयोग गरेको छ ।

सो रकम हेलम्बुको राहत तथा पुनःस्थापना कोषमा सुजन दुलाल र बिमलबहादुर बिसीले जम्मा गरेको समितिका संयोजक मन्दीप क्षेत्रीले जानकारी दिए ।

यही असार १ को बाढीले प्रभावित भएका हेलम्बु बासीलाई यस सहयोगले केहि राहत हुने समितिको विश्वास रहेको छ । समितिले प्रकोपबाट मृत्यु भएकालाई श्रद्धाञ्जली व्यक्त गर्दै र घाइते भएकाको शीघ्र स्वास्थ लाभको कामनासमेत गरेको छ ।

असार १ को इन्द्रावती तथा मेलम्ची खोलाको बाढीले ५ जनाको मृत्यु भएको छ भने ४०० भन्दा धेरै घर परिवार विस्थापित भएका छन् ।

काभ्रे । रामेछाप सम्पर्क समिति दक्षिण कोरियाद्वारा रामेछाप जिल्लाका सबै नगरपालिका तथा गाउँपालिकालाई ६ लाख ६९ हजार ४०० रुपैयाँ बराबरको स्वास्थ्य सामग्री सहयोग गरिएको छ ।

गत शुक्रबार, शनिबार र आइतबार गरी जिल्लाका सबै नगरपालिका तथा गाउँपालिकामा अक्सिजन कन्सन्ट्रेटर वा मिनी भेन्टिलेटर मध्ये एक/एक थान, ग्लुकोमिटर एक/एक थान, मास्क १०० थान, पञ्जा १०० थान र स्यानिटाइजर प्रत्येक नगरपालिका तथा गाउँपालिकाकामा पुगी वितरण गरिएको संस्थाका पूर्वअध्यक्ष तथा सहयोग अभियानका संयोजक भीम खड्काले बताए ।

स्वास्थ्य सामग्री खरिद गर्नुअघि प्रत्येक पालिकाका अस्पताल तथा स्वास्थ्य केन्द्रसँग समन्वय गरी आवश्यक सामग्री अनुरुप खरिद गरी सहयोग गरिएको संयोजक खड्काले बताए । कोभिड नियन्त्रणका लागि महत्वपूर्ण भूमिका निर्वाह गरेको भन्दै जिल्लाको तामाकोशी सेवा समितिद्वारा सञ्चालित तामाकोशी अस्पताललाई पनि पालिकालाई दिए बराबर स्वास्थ्य सामग्री सहयोग गरिएको छ ।

पछिल्लो समय जिल्लामा पनि कोरोनाको दोस्रो भेरियन्ट देखिएपछि कोरोनाका कारण अस्वस्थ हुने तथा ज्यानै गुमाउनेको संख्या बढ्न थालेको थियो । उक्त विपत्जन्य अवस्थालाई मध्यनजर गर्दै यहाँ रहेका जिल्लावासी तथा नेपालीसँग सहयोग सङ्कलन अभियान चलाइएको थियो । अभियानबाट ६ लाख ६२ हजार २८४ रुपैयाँ उठेको थियो ।

त्यस्तै यही अभियानमा थपिने गरी नेपालमा ३५ हजार ५३४ रुपैयाँ सङ्कलन भएको थियो । संकलित जम्मा रकम मध्येबाट ती सामग्री खरिद गरिएको हो ।यस कार्यका लागि विशेषतः रामेछाप सम्पर्क समितिका तर्फबाट दक्षिण कोरियामा रहेका नेपालीमाझ एक महिनासम्म सहयोग सङ्कलन अभियान चलाइएको थियो ।
रासस

काठमाडौं । पूर्वी नेपाल घर भई जापानमा रहेकाहरूले विराटनगरको कोशी अस्पताललाई पीपीई सहयोग गरेका छन् ।

विराटनगर महानगरपालिकाका मेयर भीम पराजुलीमार्फत ५० थान पीपीई सहयोग गरिएको हो । मेयर पराजुलीले अस्पतालका व्यवस्थापन समितिका अध्यक्ष साजेन मल्ल र मेडिकल सुपरिटेण्डेन्ट डा. चुमनलाल दासलाई ती सामग्री हस्तान्तरण गरे ।

विपदको समयमा प्रवासमा रहेर पनि आफ्नो जन्मभूमि सम्झिने सहयोगी हातलाई मेयर पराजुलीले धन्यवाद दिएका छन् ।

यसैगरी मेची अस्पतालमा समेत कोरोना महामारी रोकथाम तथा नियन्त्रणमा प्रयोग हुने सामग्री सहयोग गर्ने तयारी भइरहेको पुर्वेली सेवा समाजका संयोजक भूषण कोइरालाले जानकारी दिए ।

काठमाडौं । अमेरिकाको विभिन्न शहरमा बस्ने नेपालीले नेपालमा नयाँ भेरिएन्टसहितको कोरोनाको दोस्रो लहर तीव्र भइरहेका बेला गैर आवासीय नेपाली सङ्घ (एनआरएनए) अमेरिका शाखाको अधिवेशन स्थगित गर्न माग गरेका छन् ।

एनआरएनए अमेरिकाको सदस्यसमेत रहेका गैर आवासीय नेपालीले नेपालमा तीव्र संक्रमण फैलिएका बेला अधिवेशन रोकेर नेपालमा कोरोना पीडितका लागि स्वास्थ्य सामग्री एवं राहत जुटाउन सहयोग गर्न नेतृत्वसँग माग गरेका हुन् ।

अर्को साता हुने अधिवेशनका लागि प्रचारप्रसार तीव्र भएको भन्दै विज्ञप्तिमा प्रचारप्रसारको खर्च नेपालमा स्वास्थ्य सामग्री जुटाउन खर्च गर्नुपर्नेमा जोड दिइएको क्यालिफोर्नियामा रहेका नेपाली युवा महेन्द्र सुवेदीले जानकारी दिए।

नेपालमा महामारी तीव्र रुपमा फैलिएका बेला अमेरिकामामात्र नभई संसारका जुनसुकै कुनामा रहेका नेपाली र तिनका संस्था सहयोग जुटाएर नेपालीलाई बचाउने अभियानमा लाग्नुपर्नेमा जोड दिइएको उनले बताए। एनआरएनए राजनीतिक नभई सामाजिक संस्था भएकाले अहिलेको विषम परिस्थितिमा अधिवेशन गर्नुपर्ने आवश्यकता नरहेको विज्ञप्तिमा उल्लेख छ । मानवीय संवेदनशीलतालाई ध्यान दिँदै यतिबेला सबैले सहयोग जुटाउन सक्दो लाग्नुपर्नेमा विश्वभर फैलिएका नेपालीसमक्ष आह्वान गरिएको छ ।

हाललाई अधिवेशन स्थगित गरी पछि उपयुक्त समयमा गर्न एनआरएनए अमेरिकाका १० जना साधारण सदस्यले जोडदार माग गरेका हुन्। विज्ञप्ति प्रकाशित गर्नेमा सुवेदी, अशोक खड्का, विजय खड्का, रविन्द्रबहादुर सिंह, अर्जुन लामा, दिनेश लामा, दिपेन्द्र तिमल्सिना, राजेश शर्मा, आदित्य खड्का र सन्देश खड्का छन् ।
–रासस

नेपालमा कोरोनाको दोस्रो भेरिएन्टको संक्रमणबाट स्वास्थ्यसम्बन्धी उपकरणको अभावका कारण जनजीवन नराम्ररी प्रभावित भएपछि नेपाल सरकारको आह्वानअनुसार जर्मनीमा कार्यरत विभिन्न गैरसरकारी संस्था(एनजिओ)हरुले आवश्यक सहयोग गर्ने तत्परता देखाएका छन् ।

जर्मन­ नेपाल मैत्री सङ्घको संयोजनमा एनजीओ फोरम नेपालले आज आयोजना गरेको वेबिनारमा सहभागी झण्डै ६० वटा गैरसरकारी संस्थाले मानवीय सहयोगअन्तर्गत नेपाललाई आवश्यक स्वास्थ्य सामग्री तथा उपकरणहरु उपलब्ध गराउने निर्णय गरेका हुन् ।

कार्यक्रममा जर्मनीका लागि नेपाली राजदूत रामकाजी खडकाले कोरोनाको बढ्दो संक्रमणका कारण अस्पताललगायत स्वास्थ्य संस्थाहरुमा आवश्यक पीसीआर परीक्षण सामग्री, एन्टिजेन सामग्री, भ्यान्टिलेटर, आइसीयू शय्या, पोर्टेबल डिजिटल एक्स रे, थर्मल गन, अक्सिनेटर, पीपीईलगायतका उपकरण र सामग्रीहरुको अभाव हुँदा उपचारमा समस्या आएको बताए ।

उनले यस्तो विपद्को अवस्थामा आवश्यक सहयोग गरिदिन नेपाल सरकारले सबै मित्र राष्ट्र तथा दातृसंस्थाहरुसँग आग्रह गरेको उल्लेख गर्दै जर्मनीमा कार्यरत संस्थाहरुबाट पनि विगतमा जस्तै यसपटक पनि सहयोग रहने विश्वास व्यक्त गरे । राजदूत खडकाले जर्मनीबाट उपलब्ध हुने सहयोगलाई नेपाल सरकारले विमानस्थलमा आवश्यक समन्वय गर्ने र सम्बन्धित निकायलाई उपलब्ध गराइनेछ भने ।

सो अवसरमा नेपालका लागि जर्मनीका राजदूत रोल्याण्ड सेफरले नेपालमा हाल कोरोनाको संक्रमण व्यापकरुपमा फैलिएकाले अक्सिजनलगायत अन्य स्वास्थ्य सामग्रीको अभावका कारण धेरैले ज्यान गुमाउनु परेको अवस्थाका बारेमा अवगत गराएका थिए।

उनले जर्मनी नेपालको एक असल मित्र राष्ट्र भएकाले यस विषम समयमा पनि विगतमा जस्तै गैरसरकारी संस्थाहरुले एकमुष्ट सहयोग उपलब्ध गराउन आवश्यक रहेको बताए । राजदूत सेफरले नेपालको अर्थतन्त्रमा कुनै असर नहुने गरी हप्तामा एक÷दुईवटा उडानको प्रबन्ध मलाउन आग्रह गरे ।

मैत्री सङ्घका अध्यक्ष तथा जर्मनीका लागि नेपाली महावाणिज्यदूत रामप्रताप थापाले नेपालमा उत्पन्न स्वास्थ्य समस्याका कारण सिर्जित विकराल अवस्थामा नेपालमा सहयोग गर्दै आएका जर्मनीका गैससहरुबीच समन्वय गरी आवश्यक सहयोग जुटाउन वेबिनार आयोजना गरिएको जानकारी दिए ।

गैरआवासीय नेपाली सङ्घ(एनआरएन) फाउण्डेशनका अध्यक्ष जीवा लामिछानेले एनआरएनले विश्वभरि रहेका आफ्ना च्याप्टरहरुमार्फत सहयोगको आह्वान गरिसकिएको र चीन, ओमानलगायत केही देशबाट स्वास्थ्य उपकरणहरु ल्याइएको उल्लेख गरे ।

कार्यक्रममा सहभागी विभिन्न गैससका प्रतिनिधिहरुले कोरोनाका बिरामीको उपचारमा आवश्यक सामग्रीहरु एकमुष्ठरुपमा उपलब्ध गराउन आफूहरु तयार रहेको र ती सामग्री पठाउन हवाइ उडानको प्रबन्ध मिलाउन आग्रह गरेका थिए । कतिपयले यसअघि नै व्यक्तिगत र संस्थागत रुपमा पनि नेपालका केही स्वास्थ्य संस्थाहरुलाई सहयोग गरिसकेको जानकारी दिएका थिए ।

लन्डन । नेपालमा कोरोनाभाइरस संक्रमणको अवस्था भयावह बनेको भन्दै सहयोगका लागि बेलायतसँग आग्रह गरिएको छ ।

लन्डन बरो अफ बार्टेनका उपमेयर काउन्सिलर लक्ष्य गुरुङले डा. म्याथ्यू अफोर्डलाई एक पत्र लेख्दै ब्रिटिस सरकारसँग सहयोगका लागि आग्रह गरेका छन् ।

गुरुङले भारतमा बढिरहेको नयाँ भेरिएन्टले नेपाललाई पनि प्रभावित गर्ने र नेपालमा बिरामीले भरिएका अस्पताल र अक्सिजन अभावले मृत्यु भएको परिस्थितीबारे ध्यानाकर्षण पनि गराएका छन् ।

बेलायती प्रधानमन्त्री बोरिस जोन्सनले संक्रमण बढेपछि भारतलाई सहयोग पठाएको र कठिन अवस्थामा निरन्तर सहयोग गर्ने प्रतिवद्धता व्यक्त गरेको गुरुङको पत्रमा उल्लेख गरिएको छ ।

कोभिड संक्रमण तीव्ररुपमा फैलिएसँगै बेलायत सरकारले नेपाल र भारतलाई रेड लिस्टमा राखेको स्मरण गराउँदै उनले नेपालले कोरोना महामारी नियन्त्रण गर्न अन्तर्राष्ट्रिय उडानमा प्रतिबन्ध र निषेधाज्ञा लगाएको पनि अवगत गराएका छन् ।