Nepal Press

Tag: समीक्षा

  • मन्त्रालयको समीक्षा गर्न तारे होटलमा तामझाम, खाना–खाजामै प्रतिव्यक्ति १६ सय खर्च

    मन्त्रालयको समीक्षा गर्न तारे होटलमा तामझाम, खाना–खाजामै प्रतिव्यक्ति १६ सय खर्च

    सुर्खेत । चालु खर्च कटौति गर्ने कर्णाली प्रदेश सरकारको घोषित नीतिलाई लत्याउँदै  एउटा मन्त्रालयले तारे होटलमा कार्यक्रम गरेको छ । मन्त्रालयको चौमासिक समिक्षाजस्तो सामान्य कार्यक्रमका लागि तारे होटलमा खाना–नास्तासहितको तामझाम गरिएको हो ।

    कर्णाली प्रदेश सरकारले चालु आर्थिक वर्षमा खर्च कटौतीको प्रस्ताव ल्याएको थियो । चालु खर्च बढी भएको भन्दै प्रदेश सभामा सांसदहरुले बजेट पारित नगर्ने चेतावनी दिएपछि सरकारले बजेटमै भारी कटौति गर्ने गरी संसदसँग सम्झौता गर्‍यो ।

    यो वर्ष सरकारी कर्मचारी कर्मचारी र अरु कसैले पनि भत्ता लिन नपाउने घोषणा सरकारको नीति तथा कार्यक्रममा गरिएको छ । तर, त्यसको खिल्ली उडाउँदै उद्योग, पर्यटन वन तथा वातावरण मन्त्रालयले खर्चिलो समिक्षा गरेको हो ।

    मन्त्रालयले स्थानीय शुभ होटलमा चैत १३ र १४ गते दोश्रो समीक्षा गोष्ठी आयोजना गरेको थियो । सरकारी भवन र हलहरु पर्याप्त भएपनि तारे होटलमा कार्यक्रम गर्दा कतिपय कर्मचारी नै असन्तुष्ट छन् ।

    ‘हामीले आर्थिक मामिला तथा अन्य कुनै सरकारी हलमा नै समीक्षा कार्यक्रम गरौं भनेर प्रस्ताव राखेका हौं, तर कसैले हाम्रो कुरा सुनेनन्,’ मन्त्रालयका एक कर्मचारी भन्छन्, ‘सरकारी हलमा कार्यक्रम गरेको भए खासै खर्च पर्ने थिएन ।’

    कार्यक्रममा खाना र नास्ताको खर्च मन्त्रालयले व्यहोर्ने गरी व्यवस्थापन गरिएको थियो । खाना र नास्ताको प्रतिव्यक्ति १६ सय रुपैयाँभन्दा बढि खर्च भएको छ । कर्णालीका २० वटा जिल्ला कार्यालयबाट दुइ जनाका दरले ४० जना र मन्त्रालयबाट गरी ५० भन्दा बढी कर्मचारीहरु कार्यक्रममा सहभागी थिए ।

    मन्त्रालयका अर्का कर्मचारी भन्छन्, ‘बजेट कार्यान्वयनका विभिन्न कानूनहरु देखाउँदै आलटाल गर्ने गर्छन्,’ ती कर्मचारी भन्छन् , ‘तर यस्ता कार्यक्रम गर्न उनीहरु दिल खोलेर तयार हुन्छन् ।’

    मन्त्रालयले कर्मचारीलाई भत्ता नदिए पनि ती सबै कर्मचारीले सम्वन्धित कार्यालयबाटै भत्ता बुझ्नेछन् । यो कुरा मन्त्रालयका सूचना अधिकारीले पनि स्वीकार गरेका छन् ।

    कम्तिमा एक दिनको भत्ता १८०० भन्दा बढिको दरमा कर्मचारीले कार्यालयबाटै बुझ्नेछन् । दुइ दिन कार्यक्रम भएका कारण कम्तिमा पाँच दिनको टीएडीए कर्मचारीले भर्ने छन् भने होटलमा बसेको बिल पनि सम्वन्धित कार्यालयबाटै व्यहोर्ने भनिएको छ । यसमा कुल खर्च कति भयो भन्ने विवरण मन्त्रालयमा आइसकेको छैन ।

    मन्त्रालयका सूचना अधिकारी शेरबहादुर रोकायाले धेरै कर्मचारी धेरै भएका कारण शुभ होटलमा कार्यक्रम आयोजना गरिएको दाबी गरे ।
    उनले भने, ‘हामीले यहाँबाट भत्ता दिँदैनौं, होटलको भाडा पनि सम्वन्धित कार्यालयबाटै भुक्तानी हुन्छ,’ उनले भने, ‘यहाँको विहानको नास्ता र खानाको मात्रै मन्त्रालयले व्यहोर्नेछ ।’

    उनले भनेअनुसार सम्वन्धित कार्यालयबाट हुने भुक्तानी पनि सरकारी कोषकै पैसाबाट जाने हो । मन्त्रालयको बजेट खर्च अवस्था निकै दयनीय छ । मन्त्रालयले चालु आर्थिक वर्षको फागुन मसान्तसम्म दुई अर्व २७ करोड ७४ लाख ८० हजार बजेट खर्च गर्न अख्तियारी पाएकोमा ३५ करोड १४ लाख १८ हजार ५३७ रुपैंया मात्रै खर्च गरेको छ ।

  • प्रधानमन्त्री ओलीको दाबी-अर्को वर्ष आर्थिक वृद्धि १० प्रतिशत पुग्छ

    प्रधानमन्त्री ओलीको दाबी-अर्को वर्ष आर्थिक वृद्धि १० प्रतिशत पुग्छ

    काठमाडौं । प्रधानमन्त्री केपी शर्मा ओलीले आर्थिक वृद्धि अर्को वर्ष १० प्रतिशत पुग्ने दाबी गरेका छन्। सोमबार सरकारको तीन वर्षको प्रगति सार्वजनिक गर्दै प्रधानमन्त्री ओलीले भने, ‘तीन वर्षको औसत आर्थिक वृद्धि साढे ५ प्रतिशत रह्यो । अर्को वर्ष १० प्रतिशत आर्थिक वृद्धि हुने देखिएको छ ।’

    ओलीले आफूले सरकार सम्हालेको एक वर्षमै अर्थतन्त्रले लय समातेको दाबी गरे। ‘सरकार सम्हाल्दा अर्थतन्त्र ध्वस्त थियो’ उनको भनाइ छ, ‘ एक वर्षमै लय समात्न सरकार सफल भयो । एक वर्ष ७ प्रतिशत आर्थिक वृद्धि भयो । ७ वटै प्रदेशमा आर्थिक वृद्धि ६ प्रतिशत रह्यो ।’

    संघीयता कार्यान्वयनमा समेत आफ्नो सकारले तीन वर्षमा उलेख्य काम गरेको प्रधानमन्त्रीको दाबी छ। ‘अहिले प्रदेश र स्थानीय तह धेरै सक्षम भइसकेका छन्’ उनको भनाइ छ, ‘ प्रदेश मन्त्रालय कति थिए ? कस्तो संरचना बनाउने भन्नेमा अलमल थियो । तीन वर्षपछि त्यसमा धेरै सुधार आएको छ ।’

    ‘सरकारले कसैले नसोचेको कोभिड १९ को महामारीको चपेटमा फसेकोमा समयमा समेत नेपालको आर्थिक वृद्धि दर नकारात्मक नभएको प्रधानमन्त्रीको जिकिर छ ।

    ‘यसले विश्व अर्थतन्त्रको संरचना नै भत्कायो केही मुलुकहरू आर्थिक वृछि नकारात्मक रह्यो कतिपय मन्दीको चपेटामा परे । हाम्रो पनि आर्थिक वृद्धिदर त घट्यो तर सरकारको सुझवुझ , नीतिगत स्पष्टता र पूर्व सक्रियताका कारण नेपाली अर्थतन्त्र मन्दीको चपेटामा परेन । तिन वर्षको औषत वृद्धि ५ प्रतिशतको हाराहारीमा रह्यो, ओलीले भने ।’

    कोभिडको असर कम हुँदै जादा नेपालको अर्थतन्त्र पुरानै लयमा फर्कन थालेको प्रधानमन्त्री दावी छ । चालु आर्थिक वर्षको ६ महिनाको तथ्याङ्कले पनि नेपालले पुन: उच्च आर्थिक वृद्धिको बाटो समातेको प्रधानमन्त्री ओलीको भनाई छ ।

    ‘अर्को वर्ष १५ औं योजनाले लिएको १० प्रतिशतको आर्थिक वृद्धिको लक्ष्य हासिल गर्ने प्रवल सम्भावना वढेको छ । यसै आर्थिक वर्षको पहिलो ६ महिनामा शोधान्तर बचत १ सय २४ अर्ब रहेको छ । अघिल्लो वर्षको सोही अवधिका उक्त वचत २४ अर्व मात्रै छ ।’

    वार्षिक विन्दुगत आधारमा उपभोक्ता मुल्यमा आधारित मुद्रास्फिर्तीको सूचाङ्क ३.५ प्रतिशत रहेको , आयात ४.८ प्रतिशतले घटेको तथा निर्यात ६.१ प्रतिशतले वढेको ओलीले बताए ।

    ९ लाख भन्दा वढी नागरिक निरपेक्ष गरिबीबाट माथि उक्सिए

    प्रधानमन्त्रीले ओलीले आफ्नो तीन वर्षे कामको समिक्षामा सम्वोधन गर्दै ‘कोभिड नभएको १५ लाखभन्दा वढी नागरिकलाई निरपेक्ष गरिबीको रेखाबाट माथि उकास्न सकिने’ दाबी गरे ।

    संयुक्त राष्ट्र संघको मानव विकास प्रतिवेदनले ५ प्रतिशतको विन्दुगत सूचाङ्कले पनि कोभिड १९ को चेपेटमा पर्दा पनि नेपालमा गरिबी नवढेको, भोकमरी नरहेको देखाएको प्रधानमन्त्रीले वताए ।