काठमाडौं । ओमानमा जारी आईसिसी टी–२० विश्वकपको छनोटअघि नेपाल र यूएई चार देश सम्मिलित टी–२० अन्तर्राष्ट्रिय शृंखलामा भिडेका थिए। उक्त खेलमा पहिला ब्याटिङ गरेको यूएईले एक सय ९३ रनको लक्ष्य दिएको थियो, ३ विकेट गुमाएर। माथिल्लो क्रमका चिराग सुरीले ८४ र रोहन मुस्ताफाले ४९ रन बनाएका थिए। यूएईका ब्याट्सम्यान पूरा समय नेपाली बलरमाथि हावी भए। नेपालले निर्धारित २० ओभरमा पाँच विकेट गुमाएर एक सय ६७ रन मात्र जोड्न सकेपछि २५ रनले पराजित भएको थियो।
जारी ओमान भ्रमणका क्रममा नेपाली बलरहरु निरीह भएको त्यहीं एक खेल मात्र थियो। सोही टोलीविरुद्ध विश्वकपमा स्थान बनाउन नेपालले मंगलबार प्रतिस्पर्धा गर्दै छ। यूएईलाई हराउन सके नेपालले दोस्रोपटक टी–२० विश्वकप खेल्ने छ। नेपाल समूहका तीनवटै खेल जित्दै सेमिफाइनलमा पुगेको हो।
सुरुका दुई खेल जितेको युएई सोमबार बहराइनसँग २ रनले पराजित भएपछि उपविजेताका रुपमा अन्तिम चारमा पुगेको छ। यूएईका तल्लोक्रमका ब्याट्सम्यानले पनि बहराइनविरुद्ध ठूला प्रहार गरेर खेलेका थिए, अन्तिम ओभरमा २४ रन जोडेका थिए।
जारी विश्वकप छनोटमा नेपालका बलरहरु लगातार हावी भइरहेको समयमा फेरि सामुन्ने यूएई आइपुगेको हो। ओमान भ्रमणमा यूएईले टेस्ट मान्यताप्राप्त आयरल्यान्डलाई दुईपटक हराइसकेको छ। जारी छनोटमा नेपालले क्यानडालाई ८०, फिलिपिन्सलाई ८२ र ओमानलाई ७८ रनमा समेटेको थियो। यूएई र नेपाल अन्तर्राष्ट्रिय क्रिकेटका चीर प्रतिद्वन्द्वी हुन्।
एसियाली एसोसिएट क्रिकेटमा अफगानिस्तान अगाडि आउनुअघि यूएई बलियो मानिन्थ्यो। नेपालका लागि थुप्रैपटक यूएई बाधक बनेको इतिहास छ। तर पछिल्ला वर्षहरुमा उसको दबदबा घटेको थियो।
सन् २०१९ मा यूएईसँग भएको तीन खेलको टी–२० अन्तर्राष्ट्रिय शृंखला नेपालले २–१ ले जितेको थियो। जारी छनोटमा यूएईका भी अरभिन्द शानदार लयमा छन्। उनले तीन खेलमा दुई अर्धशतकसहित २ सय २१ रन बनाएका छन्।
उनी सर्वाधिक रन जोड्ने ब्याट्सम्यान हुन्। दोस्रो स्थानमा रहेका नेपालका कुशल भुर्तेलको नाममा एक सय ४ रन छ, एक शतकसहित। तेस्रो स्थानमा दीपेन्द्रसिंह ऐरी छन्, एक सय २१ रनसहित। चिराग सुरीले १ अर्धसतकसहित एक सय ७ रन बनाएका छन्।
बलिङतर्फ ३ खेलमा ८ विकेट लिएर सन्दीप लामिछाने शीर्षस्थानमा छन्। उनको बलिङ इकोनोमी ३.४१ रहेको छ। कमलसिंह ऐरीले २ खेलमा पाँच विकेट हात पारेका छन्। यूएईका खासिफ दाउदले ५ र रोहन मुस्ताफाले ४ विकेट लिएका छन्।
