काठमाडौं । पोखरामा वायु प्रदूषण बढेको छ । पोखराको गण्डकी माध्यमिक विद्यालय क्षेत्रमा राखिएको स्टेशनले प्रदूषणको मापन दर अत्याधिक देखिएपछि वातावरण विभागको टोलीले त्यस क्षेत्रको निरीक्षण गरेको छ ।
निरीक्षणको क्रममा सेती नदी किनारमा जलाइएका शवको धुवाँले प्रदूषण बढेको टोलीको निष्कर्ष छ । ‘आर्यघाटनको शवदाहको धुवाँले बढी प्रदूषण देखिएको छ । त्यसलाई रोक्न हामीले योजना सुरू गरेका छौं’, विभागका प्रवक्ता शंकरप्रसाद पौडेलले जानकारी दिए ।
यसअघि तराईका मुख्य सहरमा वायु प्रदूषण उच्च हुने भए पनि पोखराको प्रदूषण यसरी बढेको थिएन । विभागको तथ्यांकअनुसार पोखरामा पार्टिकुलेट म्याटर २.५ आकारको धुलोको प्रदूषण २४ घण्टामा २०५ माइक्रोग्राम प्रति घनमिटर पुगेको छ । यसअघि २३० सम्म पुगेको थियो ।
यो प्रदूषणले मानव शरीरमा असर पुग्ने विज्ञको भनाइ छ । प्रदूषण वृद्धि हुनुमा चिसो छल्न दाउरा बढी जलाउने गर्नाले बढी प्रदूषण हुने गरेको विभागले जनाएको छ ।
वायुको गुणस्तर स्वास्थ्यका लागि अतिहानिकारक तहमा पुगेको भन्दै वातावरण विभागले आवश्यकताबिना बाहिरी क्षेत्रमा हिँड्डुल नगर्न अनुरोध गरेको छ । सरकारले २४ घण्टामा वायुको गुणस्तरलाई ४० माइक्रोग्राम प्रति घनमिटरसम्मलाई राष्ट्रिय मापदण्ड तोकेको छ ।
