Tag: बुटवल उप-महानगरपालिका

रुपन्देही । नीति तथा कार्यक्रम र बजेटमा कृषिलाई प्राथमिकतामा राखेका स्थानीय सरकारले विपन्न समुदायलाई आत्मनिर्भर बनाउन केही नयाँ कामको शुरुवात गरेका छन् ।

बुटवल उपमहानगरपालिकाले नगरक्षेत्रका विपन्न परिवारका लागि व्यवसायिक बाख्रापालनमा आकर्षित गर्न निःशुल्क बाख्रा वितरण गरेको छ । निःशुल्क बाख्रा र पालनका लागि खोर बनाउनसमेत रकम पाएपछि आफूलाई नकै खुशी लागेको बुटवल १३ का किसान मिलन थापाले बताए ।

लगानी नहुँदा आफ्नो दैनिकी चलाउनका लागि अन्य काम गर्न नसकेको समयमा पाएको सहयोगले अब व्यवसयिक रुपमा बाख्रा पालन गर्ने हौसला मिलेको उनले बताए ।

टोलटोलमा टोली खटाएर गरिब तथा विपन्न परिवारको पहिचान गरी त्यही आधारमा टोल विकास संस्थामार्फत विपन्न परिवारलाई बाख्रा वितरण गरिएको नगर उपप्रमुख गोमा आचार्यले जानकारी दिइन् ।

बुटवलका वडा नं. १३, १६, १७ र १९ का अतिविपन्न समुदायका १९ घर परिवारलाई टोल विकास संस्थामार्फत आयआर्जनमा टेवा पुर्‍याउने र स्वरोजगार गराउने भन्दै बाख्रा वितरण गरिएको कार्यक्रम संयोजक मधुकला कुवँरले बताइन् ।

विपन्न समुदायलाई आयआर्जनमा जोड्ने, स्वरोजगार र उद्यमी बनाउने उद्देश्यले प्रति परिवार पाँच वटा बाख्रा र त्यसका लागि खोर बनाउन प्रति परिवार १५ हजारका दरले उपलव्ध गराइएको नगर प्रमुख शिवराज सुवेदीले बताए ।

सुवेदीले कृषिमा आकर्षण बढाउने, कृषिलाई व्यवसायिक बनाउन र साना साना कामबाटै उद्यमी बन्ने बाटो देखाउने उद्देश्यले यसप्रकारका कार्यक्रम गरिएको बताए ।

उपमहानगरको चालु आवको कार्यक्रम अन्तर्गत लुम्बिनी प्रदेश सरकारको सहकार्यमा साना किसानलाई बाख्रा पालन गर्ने र त्यसलाई व्यवसायिक बनाउन किसानमा हौसला बढाउने योजना थपेको उपमहानगरको भनाइ छ । बुटवल १३ की प्रेमकली गुरुङ, सोही वडाका धनबहादुर गुरुङ, कृष्णबहादुर थापा, धनमाया गुरुङ, कृष्णबहादुर विक, वडा नं. १६ का परशुराम थारु, धनमाया नेपाली, केशमाया जैशीलगायतलाई व्यवसायिक बाख्रा पालनका लागि भन्दै माउ र पाठापाठी वितरण गरिएको हो ।

लागत साझेदारीमा ५० जना किसानलाई गाई

तिलोत्तमा नगरपालिकाको वडा नं. १२ का ५० जना किसानले लागत साझेदारीमा एक/एक वटा गाई प्राप्त गरेका छन् । किसानलाई व्यवसायिक पशुपालनमा अग्रसर गराउन तिलोत्तमा नगरपालिकाले ५० प्रतिशत लागत साझेदारीमा किसानलाई गाई खरिद गर्नेगरी अनुदान उपलब्ध गराएको हो ।

संघीय कार्यक्रमअनुसार नगरपालिकाले लागत साझेदारीमा गाई प्रवद्र्धन कार्यक्रम सञ्चालन गरेको पशु विकास शाखाले जनाएको छ ।
किसान समेतको लागत साझेदारीमा कुल ४३ लाख ६० हजारको बजेटमा किसानलाई गाई खरिदमा अनुदानको अतिरिक्त पशुबीमा, आवश्यक औषधि, औजारसमेत उपलब्ध गराइएको पशु विकास शाखाले जनाएको छ । वडा नं. १२ का पाँच वटा पशुपालन समूहमार्फत् किसानले लागत साझेदारीमा गाई खरिद गरेका हुन् ।

सोमबार किसानलाई औषधि तथा कृषि औजार वितरण गर्दै कार्यवाहक नगर प्रमुख जगेश्वरदेवी चौधरीले अनुदान रकमको सदुपयोग गर्न किसानलाई आग्रह गरिन् । तिलोत्तमा नगरपालिका दुधमा आत्मनिर्भर रहेको र किसानलाई प्रोत्साहन गर्न नगरपालिकाले दूधमा प्रतिलिटर एक रुपैंयाँ अनुदानसमेत दिने गरेको बताउँदै उनले नगरपालिकाले उपलब्ध गराएका सेवा/सुविधा लिन किसानलाई आग्रह गरिन् ।

यस्तै वडाध्यक्ष सहदेव थारुले जनप्रतिनिधिहरु सधै किसानको पक्षमा रहेको चर्चा गर्दै व्यवसायिक पशुपालन गर्न किसानलाई आग्रह गरे । लागत साझेदारीमा गाई प्रवद्र्धन कार्यक्रम सञ्चालन समिति संयोजक कृष्णप्रसाद पौडेलले गाई खरिदका अतिरिक्त औषधि र उपकरणमा किसानलाई प्राप्त सहयोगले किसानलाई कृषि कर्ममा लाग्न अभिप्रेरित गरेको उल्लेख बताए ।

रुपन्देही । नेपालकै सबैभन्दा धेरै जनसंख्या रहेको वडाको रुपमा परिचित बुटबल उपमहानगरपालिका वडा नम्बर ११ लाई विभाजन गरी तीनवटा बनाउने प्रस्ताव नगरसभाबाट पारित भएको छ ।

उपमहानगरपालिकाको नवौं नगरसभाले वडाको संख्या बढाउने निर्याय गरेको सोही वडाका अध्यक्ष रामचन्द्र क्षेत्रीले जानकारी दिए । धेरै जनसंख्या र भौगोलिक हिसाबले समेत तिनाउ नदीले विभाजन गरेको उक्त वडाका नागरिकलाई सेवा प्रवाहमा समस्या भएको जनप्रतिनिधि र यहाँका राजनीतिक दलले प्रष्टसँग बुझेका छन् ।

उपमहानगरले पठाएको उक्त प्रस्तावलाई प्रदेश सरकारले औचित्यताका आधार र रायसहित वडा विभाजनका लागि संघीय सरकारमा पठाउने कानूनी व्यवस्था छ ।

२०६८ सालको जनगणना अनुसार बुटवलको कुल जनसंख्या १ लाख ३८ हजार ७ सय ४२ रहेकोमा वडा नं. ११ मा मात्रै ५० हजारभन्दा बढीको बसोबास छ । वडाध्यक्ष रामचन्द्र क्षेत्रीले ७० हजारभन्दा धेरैको बसोबास रहेको दावी गरे ।

इस वडामा १५ हजार घरधुरी र १६ हजार बढी मतदाता छन् । साथै वडामा ६० वटा टोल विकास संस्था गठन गरिएका छन् । सिद्धार्थ राजमार्गबाट पश्चिमतर्फको भाग समेटिएको उक्त वडाको मध्यभागबाट तिनाउ नदीले छिचोलेको र आधा जनसंख्या तिनाउ नदी पश्चिम भएका कारणले समय समयमा वडा विभाजनको दवाव पर्दै आएको थियो ।

तिनाउ नदीले विभाजन गरी नदिदेखि पश्चिमतर्फ रहेको नहरपुर, बुद्धनगर, मजुवा, श्रृजनानगर, दुर्गानगरलाई एउटा वडा प्रस्ताव गरिएको छ । सो क्षेत्रमा १० हजार बढी जनसंख्या रहेका छन् ।

त्यसैगरी सिद्धार्थ राजमार्गदेखि पश्चिम देवसिद्ध चोक, एन्फा एकेडेमी समेतबाट पूर्वतर्फ पर्ने गरी करिब १० हजार जनसंख्या पर्नेगरी थप अर्को वडा प्रस्ताव गरिएको वडाअध्यक्ष क्षेत्रीले बताए ।

एन्फा एकेडेमिदेखि उत्तरतर्फ र देवसिद्ध चोकदेखि उत्तर पश्चिम क्षेत्र पर्ने देवीनगर, प्रगतिनगर, माझगाउं, पवित्रनगर, हात्तिसुंढलगायतको क्षेत्रलाई थप अर्को वडा प्रस्ताव गरी हाल रहेको ११ नं. वडालाई ३ वटा वडा बनाउने प्रस्ताव पारित गरिएकोे हो । सबैभन्दा बाक्लो बस्ती रहेको सो क्षेत्रमा ३० हजार बढी जनसंख्या रहेको छ ।

यसअघि २१ वटा वडा रहेको बुटवलमा भौगोलिक अवस्था र जनसंख्यासमेत अत्यन्त कम रहेको भन्दै घटाएर १९ वडा बनाइएको थियो ।

उपमहानगरपालिकाका प्रमुख प्रशासकीय अधिकृत शिवराज रेग्मीले नगरसभाले पारित गरेको वडा विभाजन गर्ने प्रस्तावलाई उपमहानगरपालिकाले स्वीकृतिका लागि लुम्बिनी प्रदेश सरकारमा पठाउने तयारी भएको बताए ।

रुपन्देही । विज्ञहरुले कोरोना महामारीको तेस्रो लहर अक्टोबर/नोभेम्बरदेखि सुरु हुने चेतावनी दिइसकेका छन् । यसपटक बालबालिकामा संक्रमण देखिनेतर्फ उनीहरुले पूर्वानुमान लगाएका छन् ।

बुटवल उपमहानगरपालिकाले सम्भावित तेस्रो लहरबाट वालवालिकालाई जोगाउन र सम्भावित महामारी रोक्न बालरोग विशेषज्ञहरुसँग छलफल गरेको छ । संक्रमणको तेस्रो, चौथो लहरको सम्भावित खतरा र त्यसको जोखिम क्षेत्रमा रहेकाको सुरक्षालगायतका विषयमा उनीहरुसंग छलफल गरेको हो ।

अब आउने लहरले बालबालिकालाई प्रभावित बनाउन सक्ने भन्दै स्वास्थ्य मन्त्रालयले पत्राचार गरेपछि यहाँका बालरोग विशेषज्ञहरुसँग उपमहानगरले छलफल र परामर्श गरेर कसरी संक्रमण रोक्न सकिन्छ भन्ने सुझाव विज्ञहरुसँग लिएको छ ।

महामारीको तेस्रो लहरको पूर्वतयारी स्वरुप बालरोग विशेषज्ञहरुसँग सम्भावित जोखिम न्यूनीकरण र विद्यमान जनशक्तिका बारेमा छलफल गरिएको उपमहानगरका प्रमुख शिवराज सुवेदीले बताए ।

लुम्बिनी प्रादेशिक अस्पताल, सिद्धार्थ बाल तथा महिला अस्पताल, भीम अस्पताल, युनिभर्सल मेडिकल कलेज (युसीएमएस), क्रिमसन अस्पताल, देवदह मेडिकल कलेज, गौतमबुद्ध सामुदायिक मुटु अस्पतालका बालरोग विशेषज्ञ तथा प्रतिनिधिहरुसँग उपमहानगरमा विशेष छलफल भएको हो ।

सार्वजनिक, निजी तथा सामुदायिक अस्पतालहरुलाई तयारी अवस्थामा रहन आग्रह गर्नुका साथै तीनै तहका सरकारबाट आवश्यक सहयोगका बारेमा विज्ञहरुसंगै विशेष छलफल भएको नगरप्रमुख सुवेदीले बताए ।

आम्दा अस्पताललाई मातृ र शिशु स्याहार केन्द्रका रुपमा विकास गर्नेगरी उपमहानगरले विभिन्न पक्षहरुको सहकार्यमा काम अगाडि बढाएको सुवेदीको भनाइ छ । उनले महामारीको लहरले सताउने अवस्था आएमा त्यसको सामना गर्नका लागि योजना बनाउन जिल्लामा रहेका विशेषज्ञहरुसंगै छलफलको आयोजना गरिएको बताए ।

छलफलमा सहभागी विशेषज्ञहरुले आउने लहरले बालबालिकालाई मुख्य असर पुर्‍याउने दावीको ठोष वैज्ञानिक आधार नभएकाे र खोपको पर्याप्तता नहुँदासम्म जुनसुकै उमेर समूह जोखिम कायमै रहने बताएका थिए ।

विशेषज्ञहरु डा. राजु काफ्ले, डा.सन्तोष पोखरेल, डा. नेत्रबहादुर राना, डा. अजय श्रीवास्तव तथा डा. हिम श्रेष्ठलगायतका विभिन्न अस्पतालमा कार्यरत बालरोग विशेषज्ञहरुले पूर्वतयारीमा आफूहरु सतर्क र सजग भएर लागेको तर, साधन स्रोत र जनशक्तिको व्यवस्थापनमा तीनै तहका सरकारले विशेष ध्यान दिनुपर्नेमा जोड दिएका थिए ।

महामारी आइहाल्दा विद्यमान संरचना, साधन स्रोत र जनशक्तिले मात्रै थेग्न गाह्रो पर्न सक्ने भन्दै विशेषज्ञहरुले उपकरण र केही स्वास्थ्यकर्मीलाई तयारी अवस्थामा राख्न पनि आग्रह गरेका थिए ।

बलरोगसँग सम्बन्धित विशेषज्ञहरुको सञ्जाल नेपाल पेडियाट्रिक सोसाइटीमार्फत महामारीविरुद्ध बालबालिकालाई जोगाउने विषयमा विशेष पोट्रोकल समेत तयार भएको उक्त सञ्जालमा समेत आवद्ध रहनु भएका डाक्टर राजु काफ्लेले बताए ।

तत्कालै आत्तिइहाल्नुपर्ने अवस्था नरहे पनि सचेतना, सावधानी र पूर्वतयारी अत्यन्त जरुरी रहेको विशेषज्ञहरुको भनाइ छ । कोभिडका हालसम्मका लहरमा बालबालिका पनि संक्रमित भएका र उनीहरुमध्ये धेरैमा संक्रमणका लक्षण कम पाइएको र गम्भीर अवस्था पनि नभएको पाइएको विशेषज्ञहरुले बताएका छन् ।

बालबालिकामा एन्टीबोडी र भाइरसँग जुध्ने क्षमता फरक खालको हुने भएकाले पनि संक्रमितले चाँडो परास्त गर्न सकेको पाइएको विशेषज्ञ डा. सन्तोष पोखरेलले बताए ।

उपमहानगरका स्वास्थ्य जनस्वास्थ्य अधिकृत उमादेवी थापाले हालसम्म उपमहानगरमा रहेका बालबालिकामा संक्रमण नदेखिएको र केही बालबालिकामा ज्वारो आउने समस्या देखिए पनि एकदुई दिनमै ठीक भएको भन्दै रिपोर्ट आएको बताइन् ।

नेपालमा तेस्रो र चौथो लहर आउदा बालबालिकाहरुलाई जोखिम हुने भन्दै स्वास्थ्य मन्त्रालयले केही दिन अघि सबै अस्पताललाई अक्सिजनको व्यवस्थापन सहित २० प्रतिशत शैया बालबालिकाको लागि उपयुक्त हुने गरी तयारी अवस्थामा राख्न निर्देशन दिएको थियो ।

बालरोग विशेषज्ञहरुसँगको छलफलमा उपप्रमुख गुमादेवी आचार्य, विज्ञहरु बाबुराम भट्टराई, एजाज आलम, प्रमुख प्रशासकीय अधिकृत शिवप्रसाद रेग्मी तथा उपमहानगरका स्वास्थ्य, शिक्षा र जनशंख्या महाशाखा प्रमुख मित्रमसण खनाल र उपमहानगरका स्वास्थ्य शाखामा कार्यरत कर्मचारीहरुको सहभागिता थियो । विज्ञहरु भट्टराई र आलमले पूर्वतयारीलाई तीव्रता दिनुपर्ने र अफवाहलाई चिर्दै सचेतनाका कार्यक्रम सञ्चालन गर्नुपर्नेमा जोड दिएका थिए ।

उपमहानगरमा भएको छलफलमा सहभागी डाक्टरहरु डा.अरुण पोखरेल, डा.मनोज कुसवाह, डा. लक्ष्मण पौडेल, डा.किरण पन्थी, डा.नारायण पोखरेललगायतले साधान स्रोत र जनशक्तिको व्यवस्थापनमा ध्यान दिन तीनै तहका सरकारलाई आग्रह गरेका थिए ।