काठमाडौं । सिन्धुपाल्चोकको बलेफी गाउँपालिका अध्यक्ष केदार क्षेत्री कांग्रेस प्रवेश गरेका छन् ।
क्षेत्रीसहित एमाले सिन्धुपाल्चोकका जिल्ला सदस्य कृष्ण क्षेत्री, एमाले नेता विष्णु तिमल्सिनासहित दर्जनौं नेता कार्यकर्तालाई कांग्रेस सभापति एवं प्रधानमन्त्री शेरबहादुर देउवाले मंगलबार बिहान पार्टी कार्यालय सानेपामा पार्टी सदस्यता दिएर पार्टी प्रवेश गराएको कांग्रेस नेता प्रेमध्वज लामाले जानकारी दिए ।
सो अवसरमा कांग्रेस उपसभापति पूर्णबहादुर खड्का, केन्द्रीय सदस्य मोहनबहादुर बस्नेतलगायत उपस्थित थिए ।
सिन्धुपाल्चोक । सिन्धुपाल्चोकको बलेफी गाउँपालिकाले सरकारविरुद्ध आन्दोलनमा सहभागी हुन नगरबासीलाई आह्वान गरेको छ । जुरे पहिरोपीडितले राहत पाउनुपर्ने भन्दै गाउँपालिकाले नगरबासीलाई आन्दोलनमा उत्रन आह्वान गरेको हो ।
गाउँपालिका अध्यक्ष केदार क्षेत्रीले प्रेस विज्ञप्ति जारी गरेर पीडितको पक्षमा सरकारविरुद्ध आन्दोलन गर्न आह्वान गरेका हुन् । गाउँपालिकाको कार्यपालिका बैठकले नै निर्णय गरेर फागुन ८ गते दिउँसो १२ बजे काठमाडौंको माइतीघरमा धर्ना बस्न जान गरिएको विज्ञप्तिमा उल्लेख छ ।
पीडितको नाममा जम्मा भएको २ करोड २४ लाख रुपैयाँ अझै बाँडफाँट नभएकोप्रति आपत्ति जनाउँदै गाउँपालिकाले आन्दोलन उत्रन नगरबासीलाई आग्रह गरेको हो ।
पालिका अध्यक्षद्वारा जारी विज्ञप्तिमा भनिएको छ– पहिरो गएको ७ वर्ष हुदा सम्म पीडितहरुको लागि संकलन भएको रकम प्रदान नहुनु केन्द्रीय सरकारको चरम लापरवाही र पीडितहरुको भावनमा चरम खेलवाड भएको हाम्रो ठहर छ । पीडितहरुको नाममा जम्मा भएको रकम पीडितहरुलाई वितरण गर्नका लागि अब सशक्त आन्दोलन गर्नुको विकल्प देखिएन । त्यसैले बलेफी गाउँपालिकाको कार्यपालिकाको बैठकले नै जुरे पहिरो पीडितहरुको नाममा जम्मा भएको रकम पीडितहरुलाई प्रदान गर्ने व्यवस्थाका लागि पहिरो चरणमा केन्द्रीय सरकारको विरोध राजधानीको माइतीघरमा यही फागुन ८ गते धर्ना दिने कार्यक्रम रहेको यसै विज्ञप्ति मार्फत सबैमा जानकारी गराउँदछौ ।
