काठमाडौ । सरकारले बर्ड फ्लु पुष्टि भएको क्षेत्रबाट रोग अन्यत्र फैलन नदिई तत्काल नियन्त्रणमा लिन रोग देखिएको क्षेत्रमा रहेका टर्की तथा कुखुरा नष्ट गरेको छ । पशु सेवा विभागले काठमाडौंको किर्तिपुर नगरपालिकाको वडा नम्बर ४ र वडा नम्बर ९ तथा चन्द्रागिरी नगरपालिकाको वडा नम्बर २ का कृषकले पालेका टर्कीमा २ दिन अघि बर्ड फ्लु पुष्टि भएपछि विभागले घरपालुवा पन्छी तथा रोग सार्न सक्ने अन्य वस्तु नष्ट गरेको जनाएको हो ।
जसमा ५ सय ३५ टर्की, ४ सय ९२ स्थानीय कुखुरा, ७६ बट्टाई २० हाँस, १ सय ७८ अण्डा र ९ सय किलो दाना नष्ट गरी सुरक्षित तवरले तह लगाइसकिएको र रोग देखा परेको क्षेत्रलाई पुर्ण निःसंक्रमण समेत गरिसकिएको विभागका महानिर्देशक डा. दमयन्ती श्रेष्ठले नेपाल प्रेसलाई जानकारी दिइन । उनका अनुसार रोगको निगरानीको क्रममा देशका विभिन्न भागबाट नमूना संकलन गरी परीक्षण गर्ने कार्यलाई निरन्तरता दिइएको छ ।
गत माघ महिनापछि काठमाडौं, सुर्खेत, जाजरकोट र ललितपुरमा देखा परेको बर्ड फ्लु रोग तत्काल नियन्त्रण गरी त्यस क्षेत्रमा सघन निगरानी कार्यलाई नियमित रुपमा सञ्चालन गर्दै आएको थियो । निगरानीकै क्रममा नमूना केन्द्रीय पशुपन्छी रोग अन्वेषण प्रयोगशाला त्रिपुरेश्वरमा २ दिन अघि पीसीआर विधिबाट परीक्षण गर्दा बर्ड फ्लु रोग एचफाइभ एनएट प्रमाणित पशु सेवा विभागले एक विज्ञप्ती जारी गर्दै बुधबार साँझ जानकारी गराएको हो ।
रोग पूर्ण रुपमा नियन्त्रणमा रहेको र निगरानी कार्यलाई निरन्तरता दिइएको हुदाँ आम उपभोक्तालाई सुनिश्चित हुन अनुरोध गर्दै रोगलाई पूर्ण नियन्त्रणमा राख्ने काममा सघाउन विभागले विज्ञप्तीमार्फत अपिल गरेको छ ।
