Tag: बक्सअफिस

काठमाडौं । दक्षिण भारतीय फिल्म ‘मास्टर’ले विश्व बक्सअफिसमा उत्साहजनक कलेक्सन गरेको छ । पहिलो सप्ताहन्त भारतभर ९२.५ करोड भारु कमाएको फिल्मले हिन्दी भाषामा मात्र १.६ करोड कमायो ।

भारतका चार भाषामा फिल्म रिलिज भएको छ ।

डेडलाइन हलिउड म्यागजिनका अनुसार विजय स्टारर यो तामिल थ्रीलर फिल्मले भाइरस महामारीले थलिएको अन्तराष्ट्रिय बजारमा सुरुआती उछाल ल्याएको छ । अष्ट्रेलिया, सिंगापुर, न्यूजिल्यान्ड, युएई र अमेरिकामा फिल्मले राम्रो कमाइ गरेको छ ।

अष्ट्रेलियामा शनिबार ४७० हजार डलर, न्यूजिल्यान्डमा ८९ हजार डलर, सिंगापुरमा पहिलो सप्ताहन्त ७५० हजार डलरको कमाइ भयो । युएईले पहिलो दिन १.३ मिलियन डलरको टिकट बेच्यो । मंगलबार सुरु हुनु अगाडि नै अमेरिकी बक्सअफिसमा ३५० हजार डलरको टिकट एड्भान्स विक्री भएको छ ।

कोरोनाभाइरस महामारीपछि भारत र अन्तराष्ट्रिय बजारमा रिलिज भएको यो ठूलो फिल्म हो । लकडाउनले १० महिनादेखि बन्द रहेको नेपाल र भारतीय बक्सअफिसलाई यो फिल्मले उकास्ने अपेक्षा छ । नेपालमा समेत लगभग जिरो रहेको अकुपेन्सीलाई मास्टर रिलिजले राहत दिएको छ ।

लगभग शुन्य अकुपेन्सी रहेको नेपाली बक्सअफिस मास्टर रिलिजसँगै उकालो लाग्न थालेको छ । फिल्मको नेपाल वितरक मनोज राठीका अनुसार महामारीको समयमा पनि नेपालमा भएको मास्टर प्रदर्शनले राहत दिएको छ । ‘बक्सअफिस ग्राफ उकालो लाग्ने संकेत मिलेको छ’ नेपाल प्रेससँग उनले भने ।

विजय स्टारर यो फिल्मलाई समीक्षकले पनि रुचाएका छन् । एउटा जड्याहाँ प्रोफेसरले ग्याङस्टर बालबालिकालाई कसरी आशावादी र सुन्दर जीवन दिलाउँछ भन्ने कथा यसमा छ ।

सरकारी आदेशलाई अवज्ञा गर्दै नेपाली सिनेमा घरहरुले हलिउड फिल्म ‘मन्स्टर हन्टर’ रिलिज गरेका छन् । संचार मन्त्रालयले मन्त्रिपरिषद्को निर्णयविना नयाँ फिल्म रिलिज नगर्न विहिबार चलचित्र विकास बोर्डलाई निर्देशन दिएको थियो । मन्त्रालयको आदेश आएपछि फिल्म हलहरुले बक्सअफिसको सेन्ट्रल सर्भर कोड प्रयोग विनै फिल्म चलाएका हुन् । यो कोड नहुँदा कर प्रणालीमा फिल्मको सूचना जाँदैन ।

क्यूएफएक्स, मिटडाउन, बिग मूभिज लगायतका ठूला मल्टिप्लेक्सले शुक्रबार बिहानैदेखि फिल्म चलाएका हुन् । नेपाल प्रेससँग कुरा गर्दै ती हलका प्रतिनिधिले चलचित्र संघको निर्णयअनुसार फिल्म रिलिज गरेको बताए । सरकारले फिल्म रिलिज नगर्न भनेपनि व्यवसायीले एकपक्षीय रुपमा हल खोलिरहेका छन् । चलचित्र विकास बोर्डका अध्यक्ष दयाराम दाहालले आफूहरुको आदेशलाई अटेर गर्दै हलले फिल्म चलाएको सूचना पाएको बताए ।

‘यसबारेमा आइतबार सीसीमएसीको निर्णय लिएर मुख्य सचिवसँग छलफल हुनेछ’ दाहालले भने, ‘त्यसपछि के हुन्छ, त्यही अनुसार अघि बढ्नेछौं ।’ कोभिड संकट व्यवस्थापन केन्द्र (सीसीएमसी)ले चाहिँ हल र विद्यालय खुलाउनेबारे कुनै निर्णय नभएको जनाउँदै छलफलको प्रक्रियामा रहेको बताएको छ । सरकारले हल खोल्ने अनुमति नदिँदा ढुक्करुपमा फिल्मको गतिविधि संचालन हुन सकेको छैन ।

महामारीकै बीचमा पनि नेपाली फिल्मले उत्साहजनक कमब्याक गरेको छ । नौ महिना बन्द रहेका नेपाली फिल्महरु शुक्रबार खुलेका थिए र दर्शकीय उपस्थिती सन्तोषजनक पाइयो ।

मुख्य मल्टिप्लेक्स चेन क्यूएफएक्सले कोभिड–मापदण्ड पालना गर्दै सिभिल, लाबिम र छायाँ मलस्थित आफ्ना आउटलेट संचालनमा ल्याएको थियो । क्यूएफएक्स संचालन संस्था क्वेस्ट इन्टरटेनमेन्टका कार्यकारी अधिकृत रोशन अडिगाका अनुसार शुक्रबार ३० प्रतिशत अकुपेन्सी प्राप्त भयो ।

‘यो उत्साहजनक कमब्याक हो हाम्रा लागि । दर्शकहरु फिल्म हेर्न आतुर भएको संकेत मिल्छ’ नेपाल प्रेससँग उनले भने, ‘पहिलो दिनमै ३० प्रतिशत अकुपेन्सी हुनु भनेको धेरै राम्रो कुरा हो ।’ द इन्भिजिबल म्यान र ब्लडसटमा दर्शक धेरै पाइए ।

प्रशासनको हस्तक्षेप र दबाबबिनै पहिलो दिन फिल्म हल चले । काठमाडौं उपत्यकाबाहिर हल खुलेनन् । पोखराको मुख्य मल्टिप्लेक्स मिडटाउन सिनेमाज्ले शनिबारदेखि हल संचालन तयारी गरेको छ । प्रमुख निकेश द्धाले चलचित्र संघ र सरकारबीचको शुक्रबारे वार्तालाई कुरेकाले शनिबारदेखि चलाइने बताए ।

दर्शकीय फुटफल बढ्दै गएमा आफ्ना अन्य आउलेट खुलाउने तयारीमा छ क्यूएफएक्स । भक्तपुर, कुमारी, जयनेपाल र मोफसलका हल अहिलेसम्म बन्दै छन् । नौ महिनासम्म जिरोमा बसेको बक्सअफिस प्रदर्शन क्रमशः उकालो लाग्ने अनुमान गर्न सकिन्छ ।