काठमाडौं । सिता परियार दलित महिलाबाट पहिलो प्रमुख जिल्ला अधिकारी बनेकी छन् । नेपाल सरकारको राजपत्रांकित द्धितिय श्रेणी अर्थात उपसचिव सरहकी परियारले हुम्लाको प्रमुख जिल्ला अधिकारीको जिम्मेवारी पाएसँगै दलित महिलाबाट पहिलाे प्रमुख जिल्ला अधिकारी बन्ने अवसर प्राप्त गरेकी हुन् ।
बिहीबार गृहमन्त्री बालकृष्ण खाँणले मन्त्रीस्तरीय निर्णय गर्दै परियारलाई हुम्लाको प्रमुख जिल्लाको जिम्मेवारी दिएका छन् । परियार यसअघि भक्तपुरको सहायक प्रमुख जिल्ला अधिकारीको जिम्मेवारीमा थिईन । दलित महिलाबाट सहायक प्रमुख जिल्ला अधिकारी बन्ने अवसर पनि उनैले पाएकी थिईन ।
करिव ६ महिना गत भदौ महिनादेखि उनले भक्तपुरको सहायक प्रमुख जिल्ला अधिकारीको जिम्मेवारी सम्हालदै आएकी थिईन । परियारसँग उपसचिव भइसकेपछि तीनवटा उपमहानगरपालिका तथा नगरपालिकाको प्रमुख प्रशासकीय अधिकृतको जिम्मेवारी सम्हालेको अनुभव छ ।
परियार यसअघि धनुषाको जनकपुरधाम उपमहानगरपालिका, काठमाडौंको किर्तिपुर नगरपालिका र चन्द्रागिरी नगरपालिकाको प्रमुख प्रशासकीय अधिकृत थिइन् । जनकपुरधाम उपमहानगरपालिकाको प्रमुख प्रशासकीय अधिकृतको जिम्मेवारीमा आउनुअघि उनले संवैधानिक आयोगका रुपमा रहेको मुस्लिम आयोगको प्रशासन शाखा प्रमुख तथा सूचना अधिकारीको जिम्मेवारी सम्हालेकी थिइन् ।
प्रमुख प्रशासकिय अधिकृतको जिम्मेवारीमा रहनुअघि उनले महिला, बालबालिका तथा जेष्ठ नागरिक मन्त्रालयको बालसंरक्षण तथा विकास शाखाको प्रमुखको रुपमा काम गरेकी थिइन् । संघीय संरचनाअघि भने परियार तत्कालीन जिल्ला विकास समिति भोजपुरको स्थानीय विकास अधिकारी थिइन् । उनी नेपालमा निजामती सेवाको इतिहासमा नेपाल सरकारको राजपत्रांकित द्वितीय श्रेणी अर्थात उपसचिवसम्म पुग्ने पनि पहिलो दलित महिला हुन् ।
परियार शाखा अधिकृतबाट उपसचिव बढुवा भएको ८ वर्ष पुगेको छ । रुपा गाउँपालिका १ कास्की स्थायी घर भएकी परियार शाखा अधिकृतबाट निजामती सेवामा छिरेको १० वर्ष पुरा भएको छ ।
