Tag: टप न्यूज

काठमाडौं । गत मंसिर ८ गते खेलकुद मन्त्रालयभित्रै जेनजी युवाहरुबीच लफडा भयो । युवा तथा खेलकुद मन्त्री बब्लु गुप्ताकै अगाडि ‘काउन्सिल अफ जेनजी’का मधेश प्रदेश संयोजक शिव यादव र जनकपुरका जितेन्द्रकुमार महतो वादविवादमा उत्रिएका थिए । उनीहरूलाई मन्त्री गुप्ताले थामथुम पारे ।

यादवका अनुसार महतोको टोली प्रधानमन्त्री सुशीला कार्कीलाई भेट्न नपाएपछि आक्रोशित हुँदै खेलकुद मन्त्रालयमा आइपुगेका थिए । उनीहरूलाई शान्त हुन अनुरोध गर्दा सामान्य भनाभन भएको यादवले बताए । उनले भने, ‘सामान्य विवाद, भनाभन त भइरहेकै हुन्छ । फरक फरक विचार बोकेर हिँडेपछि असहमतिहरू भइहाल्छन् । तर, मिडियामा आएजस्तो कुटाकुट नै भएको चाहिँ होइन ।’

हात हालाहाल भएको चर्चालाई महतोले पनि इन्कार गरे । मिडियामा आएजस्तो मुक्कामुक्की नभएको उनले बताए । महतोले भने, ‘हामीहरुबीच भनाभन मात्रै भएको हो । मेरा जेनजी भाइहरूलाई शिव यादवले होच्याइरहेको थियो । त्यसो गर्नु हुँदैन भनेर मैले उसलाई गाली गरेको हो ।’

आफूहरूको टोली यो सरकारले किन जेनजीको मागहरू पूरा गरिदिँदैन भन्नलाई सिंहदरबार गएको महतोले बताए । यो सरकारले केही काम नगरेको, विदेशीको इशारामा चलेको उनको आरोप छ । ‘विदेशीको इशारामा यो सरकार चलिरहेको छ । यो सरकारले विस्थापित भएका पुराना पार्टीहरूलाई पुनर्स्थापित गर्नु बाहेक कोही काम गरेन । जेनजीको मागहरू केही पनि पूरा गरेन,’ महतोले भने ।

आफूलाई पनि मन्त्री बन्ने अफर आएको आफूले अस्वीकार गरिदिएको महतोको दाबी छ । ‘सुरुवातमा मलाई पनि मन्त्री हुने अफर आएको थियो । वन तथा वातावरण मन्त्रालय र कृषि तथा पशुपक्षी मन्त्रालयको मन्त्री हुनुस् भनेर प्रस्ताव आएको थियो । मैले यो सरकारको भविष्य राम्रो देखेको थिइनँ, त्यही भएर अस्वीकार गरेँ ।’

‘तपाईँलाई कसले प्रस्ताव गर्‍यो त ?’ भन्ने प्रश्नमा महतोको जवाफ छ, ‘प्रधानमन्त्रीकै सचिवालयबाट प्रस्ताव आएको थियो । सुधन गुरुङले पनि मन्त्री बन्नलाई रिक्वेस्ट गरेका थिए । मैले मानिनँ ।’

सुधन गुरुङले मन्त्री बन्न प्रस्ताव गरे पनि आफू गुरुङको समूहमा नरहेको उनले बताए । आफ्नो कुनै बेग्लै समूह पनि नरहेको उनको भनाइ छ । अहिले देखिएका जेनजीका विभिन्न समूहहरू सरकारमा भाग खोज्नलाई बनेको भन्दै आफूलाई गुट, उपगुटमा रुचि नभएको टिप्पणी गर्दै उनले अब मिराज ढुंगानाको समूहमा मिल्ने बताए ।

प्रत्यक्ष कार्यकारी निर्वाचित प्रधानमन्त्रीदेखि २०४५ सालदेखि यताको सम्पत्ति शुद्धीकरणको मागसम्ममा आफूहरू एक ठाउँमा उभिएको र संविधान संशोधन पनि आफूहरूको मूल एजेन्डा भएको उनले बताए । उनले भने, ‘अब मिराज ढुंगानासँग मिलेर हामी ठूलो आन्दोलन गर्छौं ।’

विराटनगर । नेकपा एमालेको ११ औँ महाधिवेशनका लागि भएको प्रतिनिधि छनौटका लागि भएको निर्वाचनमा विवाद उत्पन्न भएपछि मतगणना स्थगित गरिएको छ । ओखलढुङ्गा र धनकुटामा हिजो भएको निर्वाचन नै बहिस्कार भएको थियो ।

बहिस्कारका बावजुद पनि निर्वाचन भएकाले अहिलेलाई मतगणना रोकिएको नेकपा एमाले कोशी प्रदेशका अध्यक्ष घनश्याम खतिवडाले बताए । उनका अनुसार ती जिल्लाको प्रतिनिधि छनौटका लागि भएको निर्वाचनका विषयमा छानबिन आवश्यक देखिएको छ । खतिवडाले भने, हामी अहिले ती जिल्लामा के गर्न भन्ने विषयमा छलफलकै क्रममा रहेका छौ ।

ओखालढुङ्गामा प्रतिनिधि चयनका विषयमा दुईवटा समूह तयार भएका थिए । एउटा समूहको नेतृत्व यज्ञराज सुनुवारले र अर्को समूहका नेतृत्व अम्बिरबाबु गुरुङले गरेका थिए । ओखलढुङ्गामा अम्बिर बाबु समूहले एकलौटी हिसाबले निर्वाचन गराएको सुनुवार समूहले आरोप लगाएको छ ।

सो समूहका अनुसार जिल्ला भरीका मतदाताहरूका लागि सदरमुकाम ओखलढुङ्गामा मात्र मतदान केन्द्र बनाएकाले निर्वाचन बहिस्कार गर्नु परेको दाबी गरेको छ । अम्बिरबावु समूहले भने निर्वाचन सम्पन्न भएको भन्दै प्रतिनिधिमा विजयी भएकाहरूको नाम सार्वजनिक गरेको छ । ओखलढुंगाबाट महाधिवेशनमा १२ जना प्रतिनिधि महधिवेशनमा जाने छन् ।

अम्बिर बाबु समूहले खुलातर्फ अम्बिरबाबु गुरुङ, ज्ञान बहादुर खड्का, कमल प्रसाद न्यौपाने, अशोक थापा, राजीव कटवाल र केदारबाबु बस्नेत विजयी भएको दाबी गरेको छ । यस्तै, महिलातर्फ इच्छाकुमारी गुरुङ, जुना विक, पशुपति गुरुङ र रमिला मगर श्रेष्ठ निर्वाचित भएको दाबी गरेको छ । यस्तै युवातर्फ टिकाराम धमला र दलिततर्फ ज्यानु कालिकोटे महाधिवेशन प्रतिनिधि चयन भएको सो समूहले जनाएको छ ।

धनकुटामा भनेर राजेन्द्र राई र इन्द्रमणि पराजुली समूहका बिचमा विवाद भएको हो । विवादपछि इन्द्रमणी समूहले निर्वाचन बहिस्कार गरेको छ । राजेन्द्र समूहले निर्वाचन सम्पन्न भएकाले मतगणना हुनु पर्ने बताउँदै आएको छ ।

कोशी प्रदेशमा ताप्लेजुङ, पाँचथर, इलाम, तेह्रथुम, खोटाङ र सोलुखुम्बु जिल्लामा भने सर्वसम्मत प्रतिनिधि चयन भएको छ । निर्वाचन भएका मध्ये मोरङ ३ झापा २ र सुनसरी २ मा भने मतगणना जारी रहेको छ । अन्य निर्वाचन क्षेत्रमा भने मतगणना सकिएको एमाले कोशीका अध्यक्ष घनश्याम खतिवडाले बताए ।

काठमाडौं । राष्ट्रिय स्वतन्त्र पार्टी र उज्यालो नेपाल पार्टीबीच एकता प्रयास असफल भएको छ । आज पार्टी दर्ता गर्ने अन्तिम दिनसम्म पनि कुरा मिलाउन सकिन्छ कि भनेर नेताहरू लागिरहेका थिए ।

रास्वपा उच्च स्रोतले एकता प्रयास टरेको र अब चुनावी तालमेल हुन सक्ने बतायो । कुलमान घिसिङले कार्यवाहक सभापतिमा अडान नछोडेपछि एकता हुन नसकेको रास्वपा स्रोतको दाबी छ ।

‘कुलमानजीलाई उपसभापति दिन पहिल्यैबाट तयार थियौँ । तर उहाँहरूबाट केही समयका लागि भए पनि कार्यवाहक नै चाहिन्छ भन्ने खालको कुरा आयो । एकताका नाममा पार्टी बुझाउन हामी तयार भएनौँ,’ स्रोतले भन्यो ।

यता, उज्यालो पार्टीका एक नेताले भने योभन्दा फरक दाबी गरे । उनको भनाइ अनुसार रवि लामिछानेलाई नै सभापति मानेर पार्टी एकता गर्न कुलमान तयार भएका थिए ।

ती नेताले भने, ‘कुलमानजी हदैसम्म लचक हुनुभएको थियो । रविजीलाई सभापति स्वीकार गरेर आफू सहसंयोजक बस्न तयार हुनुभएको हो । रविजी सभापति र कुलमानजी भावी प्रधानमन्त्री बन्ने गरी एकता गर्न रास्वपाकै थुप्रै साथीहरू पनि तयार हुनुहुन्थ्यो । तर, सहमति नजिक पुगेर पनि रास्वपाभित्रैबाट बिथोल्ने काम भयो ।’

रास्वपाका कार्यवाहक सभापति डीपी अर्यालले एकता गर्न नचाहेको ती नेताको आरोप छ । एकता गर्दा कुलमान हाबी हुने र आफू ओझेलमा पर्ने चिन्ताले गर्दा उनले सहमति अड्काएको उनले दाबी गरे ।

‘एकताका लागि रविजी पनि सकारात्मक हुनुहुन्थ्यो । दुई शक्ति मिल्दा आगामी चुनावमा बहुमत ल्याउन सकिन्छ र आफूले पनि न्याय पाउने वातावरण बन्छ भन्ने उहाँको धारणा हामीले पायौँ । तर, डीपी अर्यालजीले आफ्नो स्थान गुम्ने चिन्ताले गर्दा नयाँ नयाँ कुराहरू ल्याएर एकताको वातावरण बिगारेको हाम्रो बुझाइ छ,’ ती नेताले भने ।

घण्टी चुनावचिन्ह लिएर लड्न पनि कुलमान तयार थिए । पार्टीको नामकरणमा चाहिँ ‘उज्यालो’ पनि कतै मिसाउन पाए हुन्थ्यो भन्नेमा उनको जोड थियो ।

रास्वपाले उपसभापति डा. स्वर्णिम वाग्लेको नेतृत्वमा उज्यालो नेपालसँग वार्ता अघि बढाइरहेको थियो । वाग्लेले सुरुबाटै घिसिङलाई उपसभापतिमा स्वागत गर्न तयार रहेको बताएका थिए । तर, कुलमानले पार्टीको बागडोर नै खोजेपछि सहमति जुट्न नसकेको रास्वपाका एक पदाधिकारीले दाबी गरे ।

‘चुनावसम्मका लागि भए पनि पार्टीको कमान्ड कुलमानले पाउनुपर्छ भन्ने उहाँहरूको पछिल्लो शर्त थियो, यसमा सहमति जुट्न सकेन,’ ती नेताले भने, ‘तर, चुनावमा मिलेर अघि बढ्न हामी सहमत छौँ । सम्भवतः चुनावी तालमेल हुन सक्छ ।’

काठमाडौं । राष्ट्रिय स्वतन्त्र पार्टी (रास्वपा) र विवेकशील साझा पार्टीबीच आज एकता घोषणा हुँदैछ । कुनै पनि पदीय बार्गेनिङबिना निशर्तरुपमा विवेकशीलको नेतृत्व रास्वपामा समाहित हुन लागेको दुवै पक्षका नेताहरुले बताएका छन् ।

आज दिउँसो राष्ट्रिय सभागृहमा एकता घोषणा कार्यक्रम हुन लागेको हो । एकताका लागि लामो समयदेखि विभिन्न चरणमा वार्ता र छलफलहरु भएका थिए । तर, विवेकशीलको नेतृत्व रास्वपामा कसरी मर्ज हुन्छ भन्ने अहिलेसम्म सार्वजनिक गरिएको छैन । रास्वपामा समाहित भएसँगै विवेकशीलको अस्तित्व भने मेटिने छ ।

रास्वपाले गत १२ मंसिरमा भर्चुअल बैठक गरेर विवेकशील साझासँग एकीकरण प्रस्तावलाई अनुमोदन गरेको थियो । त्यससँगै पार्टीले ‘संघीय नेतृत्व मञ्च’ नामक एउटा नयाँ संयन्त्र निर्माण गर्ने प्रस्ताव पनि सो बैठकले गरेको थियो । रास्वपामा समाहित हुन आउने वैकल्पिक धारका नेताहरुलाई यो मञ्चमा समेट्ने रणनीति रास्वपाले बनाएको छ । पार्टीका प्रवक्ता मनिष झाका अनुसार यो संरचना अस्थाइ हो, जुन पार्टीको आगामी महाधिवेशनसम्म मात्रै कायम रहनेछ ।

रास्वपामा १२१ सदस्यीय केन्द्रीय समिति रहने विधानमा व्यवस्था छ । तर, अहिले केन्द्रीय सदस्य ५८ जना मात्रै छन् । महाधिवेशनअघि केन्द्रीय सदस्य थप्नु वाञ्छनीय नहुने भएकाले नयाँ संरचना निर्माण गरिएको प्रवक्ता झा बताउँछन् ।

उनले भने, ‘अब हामी महाधिवेशनसम्म नयाँ केन्द्रीय सदस्य थप्दैनौं । रास्वपामा आउने वैकल्पिक धारका नेताहरुलाई संघीय मञ्चमा समेटिने छ भने पार्टीभित्रैका केन्द्रीय सदस्य बन्न योग्य नयाँ साथीहरुलाई पनि यसमा राखिने छ ।’

संघीय नेतृत्व समितिका सदस्यहरुको केन्द्रीय सदस्य बराबर नै राजनीतिक हैसियत रहने छ । समितिमा रहेका नेताहरुले रास्वपामा आवश्यकता अनुसार विभिन्न जिम्मेवारी र भूमिका पाउन सक्नेछन् ।

स्रोतका अनुसार विवेकशील साझाबाट रास्वपामा आउने प्रमुख नेताहरुलाई संघीय नेतृत्व समितिमा स्थान दिने तयारी छ । विवेकशील साझाकी अध्यक्ष समिक्षा बास्कोटा र महासचिव रञ्जु दर्शना यसै समितिमा रहने छन् । अरु कोको नेताहरुलाई स्थान दिने भन्ने टुंगो लागिसकेको छैन ।

संघीय नेतृत्व समितिमा ५१ जनाको आसपासमा सदस्य रहने बुझिएको छ । रास्वपाका केन्द्रीय सदस्यहरु यो समितिमा रहने छैनन् । पार्टी पदाधिकारीमध्ये एक जनालाई संयोजकको जिम्मेवारी दिइने छ ।

विवेकशीलले आफूहरुलाई यति नै भाग चाहिन्छ भनेर मागदावी गरेको छैन । यद्यपि, विवेकशीलका नेतृत्वपंतिलाई उनीहरुको क्षमता, अनुभव हेरेर सम्मानजनक स्थान दिइने रास्वपा नेताहरुले बताएका छन् । यो विषयमा तत्काल छलफल र सहमति भने हुने छैन ।

निशर्त एकता भनिएकाले तत्काली विवेकशीललाई पार्टीभित्र दिने हिस्साबारे कुनै सहमति नगरिने एक पदाधिकारीले जानकारी दिए । विवेकशीलका नेताहरुलाई तत्काल केन्द्रीय सदस्यमा मनोनित गरिने छैन ।

रुपन्देही । नेकपा एमालेको ११ औँ महाधिवेशनका लागि लुम्बिनी प्रदेशका १२ वटा जिल्लामध्ये ११ मा शनिवारै प्रतिनिधि छनौट भएका छन् भने रोल्पामा आज निर्वाचन भइरहेको छ ।

मंसिर २७ गतेदेखि २९ गतेसम्म हुने एघारौँ महाधिवेशनका लागि प्रदेशबाट १९० जना प्रतिनिधि छनौटमध्ये रोल्पाको बाहेक सबै क्षेत्रको टुंगो लागेको हो । एमाले लुम्बिनी प्रदेश अध्यक्ष राधाकृष्ण कँडेलले रोल्पाका केही क्लष्टरमा अहिले निर्वाचन भइरहेको र अन्य सबै स्थानमा सकिएको जानकारी दिए ।

लुम्बिनी प्रदेशमा एमालेका ८२ हजार १ सय ३५ सङ्गठित सदस्य छन्। तीमध्येबाट भूगोल, कमिटी र जनसङ्गठनबाट गरी १ सय ९० जना प्रतिनिधि छनौटका लागि केन्द्रबाट दिइएको समयमा नै सबै स्थानमा सकिएको र रोल्पामा मात्रै बाँकी रहेको कँडेलले जनाए ।

धेरै स्थानमा सर्वसम्मत र केही स्थानमा निर्वाचन भएको भए पनि सर्वसम्मत प्रतिनिधि चयन गरिएका दाङ र बाँकेमा विवाद बढेपछि केन्द्रमा नै उजुरी परेको छ । ती जिल्लामा प्रतिनिधि छनौटको क्षेत्राधिकार नै मिचेर गरिएकाले उजुरी दिइएको असन्तुष्ट पक्षले जनाएका छन् ।

एमालेको केन्द्रीय कमिटीमै सात जना पदाधिकारी रहेको लुम्बिनी प्रदेशमा प्रतिनिधि चयनको विषय सबैका लागि चासोको विषय बनेको हो ।
लुम्बिनीमा अहिले केन्द्रमा देखिएजस्तै गरी ओली पक्ष र ईश्वर पक्ष कसका प्रतिनिधि कति भन्ने प्रष्ट नभए पनि अधिकांश जिल्लामा धेरै प्रतिनिधि अध्यक्ष केपी ओली पक्षकै वर्चस्व देखिएको छ ।

तर, पहिले संस्थापन पक्षमा देखिएर प्रतिनिधि छानिए पनि पछि केन्द्रीय समीकरणअनुसार फेरिन सक्ने आङ्कलन पनि केही नेताहरूले गरेका छन्। पहिले एमाले उपाध्यक्ष विष्णु पौडेल र महासचिव शंकर पोखरेलको नाममा जिल्ला तहका कार्यकर्ताहरू भने समूह बनाएरै विभाजित बन्दै आएकोमा अहिले केन्द्रमै एकै समूहमा रहेकाले जिल्लामा गुट बनाउन ती पक्षका नेता कार्यकर्ताहरूलाई सङ्कट आइलागेको हो ।

लुम्बिनी प्रदेशबाट एमालेका उपाध्यक्ष विष्णु पौडेल र युवराज ज्ञवाली, महासचिव शंकर पोखरेल, उपमहासचिव प्रदीप ज्ञवाली, सचिवहरू गोकर्ण विष्ट, छविलाल विश्वकर्मा र टोपबहादुर रायमाझी (निलम्बित) रहेकाले उनीहरूमध्ये अधिकांश संस्थापन पक्षमै देखिएकाले प्रतिनिधिहरू पनि त्यही पक्षबाट धेरै आएका हुन् । तर संस्थापन पक्षले अपेक्षा गरेअनुसार सबै क्षेत्रमा कमजोर बनाउन भने नसकेका हुन्।

लुम्बिनी प्रदेश कमिटी, मजदुर, दाङ, पाल्पा, रुपन्देहीबाट अपेक्षा गरेभन्दा धेरै प्रतिनिधि आफ्नो पक्षमा आएको ईश्वर पक्षमा बोल्ने नेताहरूको आङ्कलन छ । संस्थापन पक्षमा असन्तुष्ट भएकाहरू पनि उपाध्यक्ष विष्णु पौडेलको पक्षमा रहेकाले ईश्वर पक्षमा कति खुले अझै पुष्टि नभएको उनीहरुको भनाइ छ ।

एमालेको केन्द्रीय सङ्गठन विभागले जारी गरेको सर्कुलर अनुसार लुम्बिनी प्रदेशका लागि खुलाबाट ८० जना, महिला ५३, युवा २६, दलितबाट १९, मजदुरबाट ७ र प्रदेश कमिटीबाट ५ जना गरी १ सय ९० जना प्रतिनिधि तोकिएको छ। महाधिवेशन प्रतिनिधिका लागि बिहीबार उम्मेदवारी दर्ता भएको थियो। कतिपय जिल्ला र क्षेत्रमा सर्वसम्मत रूपमा प्रतिनिधि चयन भए पनि सहमति जुट्न नसकेका जिल्ला र क्षेत्रमा निर्वाचन भएको हो।

१२ जिल्ला रहेको लुम्बिनी प्रदेशका ५ जिल्लामा सर्वसम्मत रूपमा प्रतिनिधि चयन भएका छन्। सर्वसम्मत हुन नसकेका ४ जिल्लामा निर्वाचनबाट प्रतिनिधि छनोट गरिएको छ भने रोल्पामा अहिले निर्वाचन हुँदै छ।

प्रदेशका अध्यक्ष कँडेलका अनुसार पूर्वी रुकुम, प्युठान, बर्दिया, कपिलवस्तु र गुल्मीमा सर्वसम्मत रूपमा प्रतिनिधि चयन भएका हुन्। सर्वसम्मत प्रतिनिधि चयन गरिएको भनिएको दाङ र बाँकेमा विवाद निम्तिएको छ। दाङमा निर्वाचनको प्रक्रियामै नगई विधि विपरीत एकलौटी ढङ्गले प्रतिनिधि चयन गरिएको भन्दै लुम्बिनी प्रदेश कमिटी सदस्य कृष्णप्रसाद भुसालले पार्टीको केन्द्रीय सङ्गठन विभागमा उजुरी हालेका छन्।

प्रतिनिधि चयनका लागि केन्द्रीय सङ्गठन विभागले जारी गरेको सर्कुलर विपरीत मतदाता नामावली र निर्वाचन कार्य तालिका नै प्रकाशित नगरी प्रतिनिधि छानिएको भन्दै भुसालले उजुरी हालेका हुन्। यहाँको विषयमा अरू धेरै प्रदेश कमिटी र जिल्ला कमिटीमै रहेका नेताहरूले असन्तुष्टि जनाएका छन् ।

प्रदेश कमिटी सदस्य तथा प्रचार विभाग उपप्रमुख सरिता सुवेदीले प्रतिनिधि छनौटको मापदण्ड बाहिर गएर गरिएकोले समस्या आएको जनाइन् । एमाले प्रदेश अध्यक्ष कँडेलले पनि प्रतिनिधि चयनको विषयमा दाङ र बाँकेमा विवाद देखिएकाले त्यो विषयमा तत्कालै केन्द्रमा जानकारी दिएका जनाए ।

‘बाँके र दाङको समस्याका विषयमा मैले तत्कालै केन्द्रमा जानकारी गराएको छु, कम्तीमा ती जिल्लाको नेतृत्व र त्यहाँ रहेको निर्वाचन समितिले प्रतिनिधि छनौटका आधारभूत विषयमा बुझ्नुपर्ने थियो’ उनले नेपाल प्रेससँग भने –कति वर्ष सदस्यताको समय भयो हेर्नुपर्थ्यो, प्रक्रियामै नगई प्रतिनिधि चयन गरिएको भए सङ्गठन विभागले रद्द गर्छ र समयमा भए त्यो स्थानमा अर्को प्रतिनिधि चयन हुनेछ ।’

दाङबाट २३ जना र बाँकेबाट १५ जना प्रतिनिधि सर्वसम्मत रूपमा चयन भएको त्यहाँको निर्वाचन समितिले रिपोर्ट सार्वजनिक गरेको छ । रोल्पामा भने युवा र दलित प्रतिनिधि सर्वसम्मत चयन भए पनि खुला र महिला प्रतिनिधिमा सहमति नजुटेपछि अहिले निर्वाचन हुँदै छ। रोल्पाबाट खुला २, महिला २, युवा १ र दलित १ गरी ६ जना प्रतिनिधि चयन हुनेछन्।

दुई जना खुला प्रतिनिधिका लागि तीन जना र दुई जना महिलाका लागि चार जनाको उम्मेदवारी परेपछि अहिले निर्वाचनको प्रक्रिया अगाडि बढाइएको एमाले रोल्पाका अध्यक्ष अमृत बुढाले बताए। यस्तै रुपन्देही, पश्चिम नवलपरासी, पाल्पा र अर्घाखाँचीमा भने शनिवार निर्वाचनबाट प्रतिनिधि चयन गरिएको छ।

लुम्बिनीमा सबैभन्दा बढी रुपन्देहीबाट ३४ जना प्रतिनिधि चयन भएका छन्। रुपन्देहीका क्षेत्र नं। ३ र ५ मा सर्वसम्मत रूपमा प्रतिनिधि चयन भए पनि क्षेत्र नं। १, २ र ४ मा भने निर्वाचनबाट छनोट गरिएको हो। त्यस्तै गुल्मीबाट २०, बर्दियाबाट १५, कपिलवस्तुबाट १५, पाल्पाबाट १४, अर्घाखाँचीबाट १३, पश्चिम नवलपरासीबाट ११, प्युठानबाट ८ र पूर्वी रुकुमबाट ५ जना प्रतिनिधि चयन भएका हुन्।

कैलाली । नेकपा एमालेको ११ औँ महाधिवेशनको लागि सुदूरपश्चिम प्रदेशका १५ निर्वाचनबाट ११७ प्रतिनिधि चयन भएका छन् । एमाले प्रतिनिधि सभा निर्वाचन क्षेत्रलाई एउटा क्षेत्र बनाएर प्रतिनिधि चयन गरिरहेको छ ।

सुदूरपश्चिममा १६ प्रतिनिधि सभा छन् । एउटा निर्वाचन क्षेत्र रहेको डोटी बाहेकका सबै क्षेत्रबाट प्रतिनिधि चयन भइसकेका छन् ।

कैलालीको १, ४ र ५ कञ्चनपुरको १ र ३ बाहेकका सबै क्षेत्रमा सर्वसम्मत प्रतिनिधि चयन भएका हुन् । कैलालीमा तीन जना दलित क्लस्टरमा प्रतिनिधि र प्रदेशमा कमिटीबाट प्रतिनिधि चयन भएको छैन ।

कहाँबाट को भए प्रतिनिधि ? 

कैलाली

क्षेत्र नम्बर-१ 

खुला: द्वारिका न्यौपाने र धुव्र खत्री,
महिलाः  कमला शाही
युवाः लक्ष्मी आचार्य

क्षेत्र नम्बर-२
खुलाः  कर्णबहादुर कुँवर, डेजी पाण्डे र नरबहादुर खड्का
महिला: ममता रावल र लक्ष्मी शाही
युवा:  पवित्राकुमारी माझी

क्षेत्र नम्बर-३ 
खुलाः  चुलराम चौधरी र करुण बम
महिलाः इच्छाकुमारी चौधरी
युवाः  राजबहादुर बुढा

क्षेत्र नम्बर- ४ 
खुलाः चक्रबहादुर बोहरा, नरबहादुर तामाङ र भीमबहादुर देउवा
महिलाः  रत्ना कुँवर जोशी र शान्तिदेवी सिंह
युवाः शुद्धिराम चौधरी

क्षेत्र नम्बर- ५
खुला: धर्मराज पाठक, नेपालु चौधरी, विष्णुकुमार चन्द र यज्ञराज ढुङ्गाना
महिलाः अम्बिका विष्ट र रुकमणी देवकोटा
युवाः  तीर्थराज भट्टराई

कञ्चनपुर
क्षेत्र नम्बर-१ 
खुलाः पल्लबराज भट्ट र वीरबहादुर थापा
महिलाः  कमला चौधरी र कल्पना गिरी
युवाः काशीराम बोहरा

क्षेत्र नम्बर-२
खुलाः रणबहादुर महरा र बचनबहादुर सिंह
महिलाः  लक्ष्मी बुढा र पार्वती जोशी
युवाः प्रविन बोगटी

क्षेत्र नम्बर-३
खुलाः डा. दीपकप्रकाश भट्ट र जनकराज अवस्थी
महिलाः  कल्पना गिरी
दलितः  आरपी सार्की
युवा: ओम बस्नेत

अछाममा 
क्षेत्र नम्बर-१
खुलाः केशरबहादुर साउँद, मीनबहादुर कुँवर र रामबहादुर बुढा
महिलाः बिन्दु कुँवर र अनिता खड्का
युवाः डिबी साउँद

क्षेत्र नम्बर- २ 
खुलाः चन्द्रबहादुर बोहरा, यमबहादुर बिसी, बलबहादुर कुँवर र भीमबहादुर रावल
महिलाः सरिता उपाध्याय र निर्मलाकुमारी धमाला
युवा: टोपबहादुर शाही

बाजुरा
खुलाः लालबहादुर ओली, जनककुमार बोहरा, बलदेव रेग्मी, गगन रावल, भरत थापा, मनलाल विष्ट र मेघराज शाही
महिला:  सीता थापा, देवु खाती, पार्वती थापा विष्ट र वसन्ती गुरुङ
दलितः काशी विक, गौरी सार्की, अमर विक र राजकला सार्की
युवाः नरेश रोकाया

बझाङ
खुल्लाः दिलबहादुर भण्डारी, एलबी रावल, दमन भण्डारी,लालबहादुर खड्का, जनकराज जोशी
महिलाः जानकी बोहरा, डोल्मा तामाङ, भागरथी सिंह
दलितः आनन्दलाल विक, शङ्कर रसाइदी
युवाः पङ्कज भण्डारी

डडेल्धुरा
खुलाः गजेन्द्रबहादुर शाही र गजेन्द्र शाही,
दलितः  चक्रप्रसाद स्नेही,
महिला: कृष्णा ओझा
युवा: ज्ञानेन्द्रसिंह भाट

बैतडी
खुलाः  सुरेन्द्रबहादुर पाल, चक्रबहादुर कार्की, नरेन्द्र विष्ट, पुष्करराज जोशी, लोकेन्द्र भण्डारी र रामसिंह पुजारा
महिलाः धाना धामी, सकुन्तला साउँद, पार्वती कार्की र सरस्वती कोली
दलितः नरेशकुमार विश्वकर्मा, सरस्वती नेपाली, बलभद्र दयाल र कालुराम सार्की
युवाः गोविन्द गिरी

दार्चुला
खुलाः  ज्ञानेन्द्र घर्ती, कृष्ण धामी, रामदत्त जोशी, जनकसिंह ठगुन्ना, धर्मानन्दसिंह मन्याल र रणबहादुर पाल
महिलाः  माधवी जोशी, ताराकेशरी कुँवर र निर्मला धामी
दलितः  लालबहादुर विक र मुरारीलाल टमटा
युवाः उमेशराज जोशी

काठमाडौं । चन्द्रदेव जोशी नेतृत्वको नेकपा (संयुक्त) र घनश्याम भुसाल नेतृत्वको नेकपा एस पुनर्गठन अभियानको एकता बैठक आइतबार बस्दैछ ।

पत्रकार सम्मेलनमार्फत एकता घोषणा गरेका दुई घटकबीचको एकताका काम सम्पन्न गर्न बैठक बस्ने भएको नेता दामोदर अर्यालले बताए । पार्टीको नाम नेकपा (संयुक्त) र चुनाव चिह्न हसिया नै रहने सहमति यसअघि नै भइसकेका कारण वैचारिक, राजनीतिक र साङ्घठनिक विषय निरुपण गरिने उनले बताए ।

हालका अध्यक्ष एवं वयोवृद्ध नेता चन्द्रदेव जोशीलाई सम्मानित नेता वा कुनै किसिमको अभिभावकीय भूमिका दिएर घनश्याम भुसाललाई पार्टीको कार्यवाहक अध्यक्ष तोक्ने तयारी रहेको पार्टीका एक नेताले बताए ।

उक्त कमिटीमा २०२८ सालको झापा आन्दोलनका नेतासमेत रहेका घनेन्द्र बस्नेतलाई पनि सम्मानित भूमिका दिइने भएको छ । त्यससँगै महाधिवेशनको मिति पनि तय गरिने भएको छ ।

बैठक सोमबारसम्म चल्ने नेता अर्यालले बताए ।

काठमाडौं ।  नेपाल प्रिमियर लिग (एनपीएल) सिजन–२ मा अनुबन्ध हुने ठूलो नाममध्येका एक हुन् दक्षिण अफ्रिकाका फाफ डु प्लेसिस ।

उनलाई विराटनगर किंग्सले अनुबन्ध गरेको हो । विराटनगरले हालम्म ५ खेल खेलिसक्यो । तर, डु प्लेसिस विराटनगरको खेलमा उपस्थित भएका छैनन् ।

डु प्लेसिसले इन्डियन प्रिमियर लिग (आइपीएल) को आगामी सिजनको अक्सनमा सहभागी नहुने निर्णय गरेसँगै एनपीएल खेल्न पनि नआउने हो कि भन्ने आशंका समर्थकमाझ परेको छ ।

डु प्लेसिसले अबुधाबी टी–१० लिग खेलिरहेका छन् । लिगमा उनी सम्मेलित टोली प्रतियोगिताबाट बाहिरिसकेका छन् । विराटनगरका म्यानेजर विजय धितालका अनुसार डु प्लेसिस विराटनगरको आगामी खेलमा उपस्थित हुनेछन् ।

एनपीएल खेल्न उनी सोमबार नेपाल आउने धितालले बताए । विराटनगरले आगामी खेल बुधबार लुम्बिनी लायन्ससँग खेल्नेछ । सम्भवतः उक्त खेलमा डु प्लेसिसले खेल्नेछन् ।

योसँगै घाइते भएका मार्टिन गप्टिलमा पनि आगामी खेलमा उपस्थित हुनेछ । सुरुआति ३ खेल खेलेका मार्टिन घाइते हुँदा त्यसपछिका दुई खेल गुमाएका थिए । मार्टिनको रेष्ट पुगेको र आगामी खेलमा सहभागी हुने विराटनगरका म्यानेजर धितालले जानकारी दिए ।

विराटनगर किंग्स ५ खेलबाट ८ अंक जोड्दै प्लेअफ नजिक छ ।

काठमाडौं । नेकपा एमालेको एघारौं महाधिवेशनमा केन्द्रीय कमिटी र पदाधिकारीको संख्या बढाउने र स्थायी कमिटीको संरचना कायम राख्नेगरी विधान संशोधन प्रस्ताव लैजान दबाब बढेको छ ।

गत भदौ तेस्रो साता सम्पन्न विधान महाधिवेशनले केन्द्रीय कमिटीको संख्या ३०१ बाट घटाएर २५१ सदस्यीय बनाएको थियो । तर जेनजी आन्दोलनपछि भएको महाधिवेशन प्रतिनिधि छनौटमा एमालेले ४० वर्षमुनीका युवाको क्लस्टर बनाएरै प्रतिनिधि छनौट गरेको छ ।

यस हिसाबले देशभरका १६५ निर्वाचन क्षेत्रका क्लस्टर र अन्य संगठन र क्लस्टरका समेत गर्दा ४० वर्षमुनीका युवाको प्रतिनिधित्व महाधिवेशनमा २० प्रतिशत हाराहारीमा हुने अनुमान छ । सो समूहको प्रतिनिधित्व केन्द्रीय कमिटीमा पनि गराउनेगरी विधान संशोधन हुने सम्भावना रहेको एमाले स्रोतले जनाएको छ ।

विधान महाधिवेशनको बेला मस्यौदा कार्यदलमा रहेका एक नेताले भने–हामीले महाधिवेशन प्रतिनिधिमै ४० वर्षमुनीको युवा प्रतिनिधिको लागि निर्वाचन क्षेत्र नै तोकिसकेको अवस्थामा उनीहरुको क्लस्टर केन्द्रीय कमिटी निर्वाचनमा पनि अनिवार्य भयो ।

त्यसो हुँदा केन्द्रीय कमिटीको आकार पहिलेकै जस्तो हुनसक्छ । अहिले पार्टीमा सबैको व्यवस्थापन गरेर जानुपर्ने दबाब बढिरहेको हुनाले पदाधिकारी पनि १९ नै पुग्ने र स्थायी कमिटी ४५ सदस्यीय कायम गर्नेगरी विधान संशोधन प्रस्तावको अनौपचारिक छलफल चलिरहेको छ ।

महाधिवेशनले विधान संशोधन गर्ने अधिकार रहेकाले अवश्य पनि हलमा गइसकेपछि पहिलेकै संरचनामा फर्किने सम्भावना देखिन्छ ।
विधान महाधिवेशनले बरिष्ठ उपाध्यक्षसहित ७ जना उपाध्यक्ष रहेकोमा त्यसलाई घटाएर ३ जना उपाध्यक्ष राखेको थियो ।

केही नेताले बरिष्ठ उपाध्यक्षसहित उपाध्यक्षको संख्या ६ वा ७ बनाउन सुझाव दिएका छन् । सचिवको संख्या ७ र उपमहासचिवको संख्या ३ कायम राखेर उपाध्यक्षमात्र बढाउने र युवा क्लस्टरको केन्द्रीय कमिटीमा प्रतिनिधित्व सुनिश्चित गर्न शीर्ष नेतृत्वलाई दबाब बढेको छ ।

अहिले विधानले हटाएको स्थायी कमिटी पुनस्र्थापित गर्दा धेरै नेताको सम्मानजनक व्यवस्थापन हुने तर्क नेताहरुले गरेका छन् । एमाले प्रचार विभागका प्रमुख राजेन्द्र गौतमले विधान संशोधन आवश्यक भएमा कमिटीले निर्णय गरेर महाधिवेशन हलमा लैजान सक्ने बताए । अहिलेसम्म त्यो ढंगले निर्णय नभएको उनको भनाइ छ ।

काठमाडौं । नेपाल प्रिमियर लिग (एनपीएल) पहिलो सिजनको विजेता जनकपुर बोल्ट्स दोस्रो सिजन भने नराम्ररी लड्खडाएको छ । टीयु मैदानमा जारी प्रतियोगितामा जनकपुरले हिजो लगातार चौथो हार व्यहोर्दै समूह चरणबाटै बाहिरने संघारमा पुग्यो ।

जनकपुरले अब प्लेअफमा स्थान बनाउन बाँकी सबै तीन खेल जितेर मात्रै पुग्ने छैन । अन्य टोलीको नतिजामा पनि भर पर्नुपर्छ । पहिलो सिजनमा सुरुआतदेखि नै विजय यात्रामा रहेको टिम दोस्रो सिजनमा यो स्थितिमा पुगने अपेक्षित होइन । आखिर किन जनकपुर यस्तो दलदलमा पर्यो त ?

जनकपुरलाई पहिलो सिजनमा विजेता बनाउन विदेशी खेलाडीहरुको अहम् भूमिका थियो । तीमध्ये एक थिए न्यूजिल्यान्डका जिम्मी निसम । आइसीसीको नियमका कारण निसमलाई चाहेर पनि जनकपुरले रिटेन गर्न सकेन । उनी दोस्रो सिजनमा पोखरा एभेन्जर्समा आवद्ध भएका छन् । पहिला सिजनमा लयमा रहेका हर्ष थाकरलाई पनि जनकपुरले रिटेन गरेन । निशम र हर्षले ब्याटिङ र बलिङ दुवैबाट जनकपुरलाई योगदान दिएका थिए ।

पहिलो सिजनमा सर्वाधिक रन बनाएका जनकपुरका ओपनर लाहिरु मिलान्था यसपटक खासै चल्न सकेका छैनन् । पहिलो खेलमा काठमाण्डु गोर्खाजविरुद्ध ७ रन बनाएका उनी दोस्रो खेलमा विराटनगर किंग्सविरुद्ध २३ रनमा आउट भए । दुवै खेलमा जनकपुर पराजित भयो । त्यसपछि उनी बाँकी दुई खेलमा प्लेइङ–११ मा अटाएनन् । जनकपुरले अनुबन्ध गरेका दक्षिण अफ्रिकाका अनुभवी बलर इमरान ताहिर अहिलेसम्म पनि आइपुगेका छैनन् ।

दोस्रो सिजनको सुरुआती चार खेल हेर्दा जनकपुरको समस्या टपअर्डर ब्याटिङमै देखिन्छ । जनकपुरले कुनै पनि खेलमा राम्रो सुरुआत गर्न सकेको छैन । पहिलो खेलमा ३४ रनमा पहिलो विकेट गुमाएको जनकपुरले त्यसपछि थप १२ रन जोड्दा महत्वपूर्ण ३ विकेट गुमायो । दोस्रो खेलमा १९ रनमा पहिलो विकेट गुमाएको जनकपुरले त्यसपछि पनि विकेट सम्हाल्न सकेन । तेस्रो खेलमा ७ रन जोड्दा पहिलो विकेट गुमाएको जनकपुरले ४३ रन जोड्दा ६ विकेट गुमाउन पुग्यो । चौथो खेलमा पनि विकेट जाने क्रम रोकिएन । ५ रन जोड्दा पहिलो विकेट गुमाएको जनकपुरले ३५ रन जोड्दा ३ विकेट गुमाउन पुग्यो ।

पावर प्लेमा रन बनाउन सकेमा त्यसपछि आउने ब्याटरलाई खुलेर खेल्न सजिलो हुन्छ । तर, जनकपुरले पावर प्लेमा धेरै विकेट गुमाइरहेको छ । ४ खेलको पावर प्लेमा मात्रै १० विकेट गुमाएको अवस्था छ । जनकपुरको टप अर्डर यसपटक फ्लप भएको छ । ओपनर आसिफ शेख एउटा खेलमाबाहेक चल्न सकेका छैनन् । अनिलको ब्याटबाट कुनै पनि खेलमा रन आउन सकेको छैन । खराब प्रदर्शनका कारण अघिल्लो म्याचमा उनी स्वयम् टिममा अटाएनन् ।

ओपनिङसहित टपअर्डर चल्न नसक्दा जनकपुरले विभिन्न प्रयोग गरिरहेको छ । तर, सफल हुन सकेको छैन । पहिलो र दोस्रो खेलमा लाहिरु मिलान्था र आसिफ शेखले ओपनिङ गरे । तेस्रो नम्बरमा कप्तान अनिलकुमार साह आए । तेस्रो र चौथो खेलमा लाहिरुलाई बेन्चमा राख्दै जनकपुरले आसिफ र माज सदाकतलाई ओपनिङमा पठायो । त्यो पनि सफल हुन सकेन । तेस्रो खेलमा तेस्रो स्थानमा शुभ कंशाकारलाई पठायो । त्यो रणनीति पनि काम लागेन । चौंथो खेलमा कप्तान अनिललाई बेन्चमा राख्दै वायन पार्नेललाई कप्तानको जिम्मेवारी दियो । चौथो खेलमा तेस्रो नम्बर पुनः परिवर्तन गर्दै मयन यादवलाई पठायो । तर हारको श्रृंखला टरेन ।

मिडल अर्डरमा कुनै खेलाडीले विकेट होल्ड गर्न कोसिस गरेपनि अन्य खेलाडीले साथ नदिँदा टोलीले ठूलो स्कोर बनाउन चुकिरहेको छ । पहिलो खेलमा ओपनर आसिफ शेखले ५४ रन बनाए । दोस्रो खेलमा मिडलअर्डरमा आएर जोन निकोल लोफ्टी इटोनले ४१ रन बनाए । तेस्रो खेलमा लोअर्डरमा आएर वायन पार्नेल चम्किए । उनले ३८ बलमा ५० रन बनाए । चौथो खेलमा सञ्जयले ३८ बलमा ५० रन बनाए । तर, लामो साझेदारी हुन नसक्दा स्कोर ठूलो बन्न सकेन । हालसम्मका कुनै पनि खेलमा जनकपुरका ब्याटरले लामो साझेदारी गर्न सकेका छैनन् । चौथो खेलमा सुदूरपश्चिम रोयल्सविरुद्ध सञ्जय र आदित्य मेहताले गरेको ५५ रनको साझेदारी नै जनकपुरको सर्वाधिक ठूलो साझेदारी हो ।

जनपकुरलाई च्याम्पियन बनाउँदा उत्कृष्ट प्रदर्शन गरेका ललित राजवंशी र किशोर महतो यसपटक चल्न सकेका छैनन् । पहिलो सिजनमा ललित सर्वाधिक विकेट लिने खेलाडीको शीर्ष दुई र किशोर शीर्ष ४ मा थिए । मोहम्मद मोहसिन र हर्ष थाकर पनि शीर्ष १० मा अटाएका थिए । नेपाली राष्ट्रिय टिमकै भरपर्दा स्पिनर ललित यसपटक फिका देखिएका छन् । पहिलो सिजनमा १० खेलबाट १७ विकेट लिएका ललितले यसपटक पहिलो ४ खेलमा मात्र २ विकेट लिए । दुई खेलमा एकएक विकेट लिँदा दुई खेलमा उनी विकेटविहीन छन् ।

यस्तै पहिलो सिजनमा १० खेलमा १४ विकेट लिएका किशोर पनि यसपटक महंगो बनेका छन् । ४ खेलमा किशोरले मात्र एक विकेट लिए । ३ खेलमा न विकेट लिन सके न रन गतिमा नियन्त्रण गर्न । ललित र किशोर नचल्दा विदेशी बलरको अवस्था पनि त्यस्तै छ । तेस्रो खेलमा पोखरा एभेन्जर्सविरुद्ध सञ्जय कृष्णमूर्तिले ३ विकेट लिनुबाहेक अन्य बलरको प्रदर्शन खासै देखिँदैन । ब्याटरको रुपमा रहेका अनिल र अलराउन्डर रुपेश सिंहले बरु विकेट लिइरहेका छन् । जनकपुरले कुनै पनि खेलमा कडा चुनौति दिन सकेको छैन । जनकपुरविरुद्ध सबै टिमले एकपक्षीयरूपमा जितिरहेका छन् ।

यो बिन्दूबाट जनकपुरले कमब्याक गरेर प्ले अफमा स्थान बनाउन चमत्कार नै हुनुपर्छ । दक्षिण अफ्रिकाका इमरान ताहिर आइनपुग्दै उनको सान्दर्भिकता समाप्त हुन लागेको देखिन्छ ।

काठमाडौँ । नेपाली कांग्रेसका सभापति शेरबहादुर देउवाले आज आइतबार दिउँसो पार्टीका पदाधिकारी र पूर्वपदाधिकारीसँग छलफल गर्ने भएका छन् ।

उनले पार्टीभित्र चर्किएको नियमित महाधिवेशन र विशेष महाधिवेशनको मितिलाई लिएर छलफल गर्न लागेका हुन् । उपसभापति पूर्णबहादुर खड्काले गरेको प्रयास सार्थक नभएपछि सभापति देउवा आफैँले बैठक आह्वान गरेका हुन् ।

दिउँसो १ बजे आफ्नै निवास महाराजगन्जमा उनले छलफलका लागि पदाधिकारी र पूर्वपदाधिकारीलाई बोलाएका छन् ।

बैठकमा नेता डा. शेखर कोइराला, निवर्तमान गृहमन्त्री रमेश लेखकलाई पनि बोलाइएको छ ।

सभापति देउवा नै छलफलमा जुटेपछि महाधिवेशनबारे टुंगो लाग्ने अपेक्षा छ । सहमति नबन्दा कांग्रेसको बैठक पटकपटक सरिरहेको छ ।

वीरगंज । गहुँ बालीको सिजन नजिकिँदै गर्दा भारतले यस वर्ष नहरमा पानी दिन नसक्ने बताएपछि किसान हैरानीमा परेका छन् ।

भारतीय पक्षले नहरमा पानी नदिँदा नहर प्रणालीमा आश्रित पर्सा, बारा र रौतहटका किसान गहुँ बालीमा सिँचाइबाट वञ्चित हुनेछन् । यसले गहुँको उत्पादन घट्ने भन्दै नेपाली किसान चिन्तित भएका छन् ।

नारायणी सिँचाइ व्यवस्थापन कार्यालय वीरगंजका सूचना अधिकारी इञ्जिनियर सुरेशप्रसाद साहले कार्यालयले संघीय सिँचाइ विभागलाई भारतीय पक्षले यस वर्ष गहुँ बाली सिजनमा पानी दिन असमर्थता जनाएकोबारे जानकारी गराउन पत्राचार गरिसकेको बताए ।

नवलपरासीको त्रिवेणी भैसालोटनस्थित नेपाल भारत सीमामा निर्मित ब्यारेजबाट भारतीय पक्षले नहरमा पानी छोड्ने गर्छ । भारतमै ९२ किमि यात्रा गरेर यो नहर पर्साको जगरनाथपुर गाउँपालिकाबाट नेपाल प्रवेश गर्छ ।

पर्सा, बारा र रौतहटमा १५ ब्लकमा विभाजित गण्डक नहरको लम्बाइ नेपालतर्फ भने ८१ किलोमिटर छ ।

काठमाडौँ । राष्ट्रिय विपद जोखिम न्यूनीकरण तथा व्यवस्थापन प्राधिकरणका अनुसार, मंसिर ११ गते बिहान १० बजेदेखि १२ गतेको बिहान १० बजेसम्म देशभर कूल १७ वटा विपदका घटना भए । विपदमा परेर कूल ४९ लाख १८ हजार पाँच सय रुपैयाँ बराबरको क्षति भयो ।

कूल विपदका घटनामध्ये सबैभन्दा बढी १४ आगलागीका घटना थिए । त्यसदिन झापा जिल्लामा मात्रै चार आगलागीका घटना भएका थिए । कैलालीमा दुई तथा मोरङ, सङ्खुवासभा, रौतहट, बारा, काठमाडौँ, नवलपरासी पश्चिम, जुम्ला र कञ्चनपुरमा एक–एक आगलागीका घटना भएका थिए । चिसो बढ्दै गए पनि आगलागीका घटनामा बृद्धि भएको छ ।

प्राधिकरणका अनुसार, मंसिर १० गते बिहान १० बजेदेखि ११ गतेको बिहानसम्म कूल १७ वटा विपदमा घटना भए । त्यस दिन पनि १३ वटा आगलागीका घटना भएका थिए भने सप्तरी, बर्दियामा सर्पदंश र मोरङमा दुई वटा जनावर आक्रमणका घटना भएका थिए । मोरङमा तीन, सिरहा, सर्लाही, ललितपुर,कास्की, बाग्लुङ,पर्वत, कपिलवस्तु र रुपन्देहीमा आगलागीका घटना भए । त्यसदिन कूल १९ लाख ९६ हजार रुपैयाँ बराबरको क्षति भयो ।

प्राधिकरणका अनुसार, मङ्सिर नौ गते बिहान १० बजेदेखि १० गते बिहानसम्म कूल १३ विपदमा घटना भए । त्यसमा १० वटा आगलागीका मात्रै घटना भए । सोलुखुम्बुमा डढेलो, कञ्चनपुरमा सर्पदंश र पाँचथर र ताप्लेजुङमा जनावर आक्रमणका घटना भए । मोरङ, सुनसरी, दुई, झापा, ताप्लेजुङ, कास्की, दाङ र कञ्चनपुरमा आगलागीका घटना भएको प्राधिकरणले जनाएको छ । प्राधिकरणका अनुसार, विपदका कारण १८ लाख ४३ हजार रुपैयाँ बराबरको क्षति भयो ।

यस्तै, मङ्सिर ७ गते बिहानदेखि आठ गते बिहानसम्म कूल १८ वटा विपदका घटना भए । त्यसदिन झापामा सर्पदंश, सिन्धुपाल्चोक र हुम्लामा जनावर आक्रमणको घटना भएका थिए । सर्लाहीमा तीन, गुल्मीमा दुई तथा मोरङ, रौतहट, बारा, काठमाडौँ, कास्की, बाग्लुङ, कपिलवस्तु, बाँके र कैलालीमा एक एक आगलागीका घटना भए । त्यसदिन ५० लाख आठ हजार रुपैयाँ बराबरको क्षति भएको थियो ।

सुक्खा मौसम शुरु भए लगत्तै देशव्यापी रुपमा आगलागीका घटनामा वृद्धि भएकाले सावधानी अपनाउन प्राधिकरणले आग्रह गरेको छ । छिट्टै आगो टिप्ने सामग्री नराख्न, ज्वलनशील पदार्थको पहुँचबाट टाढा रहन र आगजनीबाट जोगिन प्राधिकरणले सबैलाई आग्रह गरेको छ ।

काठमाडौँ । नेपाली कम्युनिस्ट पार्टी (नेकपा)ले आज आइतबार गण्डकी प्रदेशलाई लक्ष्यित गरेर कास्कीको पोखरामा एकता सन्देश सभा गर्दैछ । पार्टीका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपाललगायतका नेताले सभामा सम्बोधन गर्ने कार्यक्रम छ ।

नेकपाले यस्तै, भोलि सोमबार कोशीको विराटनगरमा, मङ्सिर १८ गते, कर्णालीको सुर्खेतमा, २० गते मधेशको जनकपुरमा र २३ गते बागमतीको हेटौँडामा सभा गर्ने मिति सार्वजनिक गरेको छ ।

मङ्सिर २९ गते देशभरका पालिकामा एकता सन्देश सभाको तयारी नेकपाको छ ।

यसअघि नेकपाले शनिबार लुम्बिनी प्रदेशको दाङ देउखुरीमा र शुक्रबार सुदूरपश्चिमको धनगढीमा एकता सन्देश सभा गरेर प्रदेशस्तरमा पार्टीको सन्देश प्रवाह गरेको छ ।

काठमाडौँ । राष्ट्रिय स्वतन्त्र पार्टी (रास्वपा) र विवेकशील साझाको औपचारिक रूपमा आज पार्टी एकता घोषणा हुँदैछ । आइतबार दिउँसो राष्ट्रिय सभागृहमा एकता घोषणासभा आयोजना हुने रास्वपा प्रवक्ता मनिष झाले जानकारी दिए ।

असल शासन र समुन्नतिसँग सरोकार राख्ने दुई दलबीच एकीकरण हुन लागेको रास्वपाले जनाएको छ । विवेकशीलले रास्वपाको नाम, नेतृत्व र चुनाव चिह्न स्वीकार गरी निःशर्त एकतामा जाने निर्णय गरेको थियो ।

विसं २०६९ मा उज्ज्वल थापाको नेतृत्वमा विवेकशील अभियान शुरु भएको थियो । विसं २०७० मा विवेकशील नेपाली दल गठन भई चुनावी प्रतिस्पर्धामा गएको थियो । रास्वपा भने २०७९ असार ७ गते स्थापना भएको हो ।

रुपन्देही । नेपाली कम्युनिस्ट पार्टीले १५ दलको एकतापछि सबै प्रदेशमा आयोजना गर्ने सन्देश सभाका लागि लुम्बिनी प्रदेशमा दाङको लमहीलाई रोज्यो ।

यो क्षेत्र साबिक नेकपा एसका प्रभावशाली नेता मेटमणि चौधरीको हो, उनी माधव नेपालको विश्वास पात्रसँगै एमाले र केपी ओलीविरुद्ध कटु आलोचकका रूपमा चिनिन्छन् ।

एमालेमै रहँदा उनले लामो समय यो क्षेत्रमा काम गरेकाले यहाँ उनको व्यक्तिगत प्रभाव राम्रै छ त्यसकारण पनि शनिवार यहाँको उपस्थिति राम्रो भएको सहभागीले आङ्कलन गरे । त्यसो त माओवादी युद्धकै समयमा चर्चामा रहेका नेता इन्द्रजीत थारुको पनि यही क्षेत्र हो ।

मेटमणि र इन्द्रजित भएपछि जनसहभागिता जुटाउन सहज आङ्कलन र पहिलेदेखि नै माओवादीको आधार इलाका भएको रुकुम, रोल्पा, दाङका अन्य क्षेत्र, प्युठान,अर्घाखाँची र कपिलवस्तुबाट समेत यहाँ पुग्न सहजताका लागि प्रदेशस्तरीय सभाका लागि यहाँ रोजिएको हुनसक्छ । बाँके र बर्दियाका लागि पनि तुलनात्मक हिसाबले लमही नजिकमा पर्दछ । त्यो हिसाबले पनि सहभागीलाई सहज भयो ।

शनिवारको सभामा शुक्रवार धनगढीको जस्तै अधिकांश वक्ताले नेकपा एमाले र त्यसका अध्यक्ष केपी ओलीविरुद्ध आलोचनामै खर्च गरे । १५ दलको एकता के का लागि ? अबको एजेन्डा के हुने ? पार्टीको दीर्घकालीन रणनीति कस्तो बनाउने भन्ने विषयमा सहभागी नेता कार्यकर्तालाई जानकारी दिनेभन्दा बढी एमाले र ओलीकै आलोचनामा खर्चेको विश्लेषण केही सहभागीको छ ।

त्यसो त उनीहरूले अहिलेको राजनीतिक परिस्थिति ल्याउने अवस्थाको सृजना नै एमाले र केपी ओली भएकाले प्रस्ट पारेको हुनसक्ने तर्क गर्दछन् तर त्यो सँगै अबको पार्टीको एजेन्डाका विषयमा अझै प्रस्ट पार्न जरुरी भएको जनाए ।

सभामा नेपाली कम्युनिस्ट पार्टी‘का संयोजक पुष्पकमल दाहाल प्रचण्ड’ले एमालेको अहङ्कार र दम्भ अझै नहटेको  बताउँदै हेलिकप्टर चढेर भाग्नुपर्ने अवस्था कसले ल्याएको भन्दै एमाले र केपी ओलीलाई प्रश्न गरे ।

‘केपी ओलीले आजभोलि प्रचण्डले हो यो सबै गराएको भन्दै गरेका छन्। त्यो उनीहरूको कुकर्मले गर्दा यस्तो भयो भन्ने चेतना अझै उनलाई आएको छैन। त्यो अहङ्कार र दम्भ अझै हटेको छैन’ उनले भने, ‘त्यो समय ओली नेतृत्वको सरकारमा एमाले कांग्रेसको दुईतिहाई थियो, अस्तिसम्म कांग्रेस र एमालेको दुई तिहाइ थियो नि त। के नाप्यो त्यो दुई तिहाइले, हेलिकप्टर चढेर भाग्नुपर्‍यो। दुई तिहाइले पनि केही गर्दो रहेनछ। जनताको एकता नै बलियो तागत भएको बुझ्नुपर्‍यो नि ।’

उनले अब जनताको आवाज बुझ्न र कम्युनिस्ट एकता गर्न यो अभियान चलाएको बताए  । आफूले त्यतिबेला सदनमै जनता तपाईंहरुसँग रुष्ट भइसकेका छन् कुनै दिन जनताले लखेट्ने छन् भनेर भनिसकेको उनले बताए ।

पार्टीका सहसंयोजक माधवकुमार नेपालले केपी ओलीलाई सम्झाउन र सुधार्न चाहे पनि त्यसो हुन नसकेको सुनाउँदै आलोचनाको फेहरिस्त सुनाए । ‘अहिले पनि मति सुध्रन्छ भने स्याबास भनौँला। नानीदेखि लागेको बानी सुध्रिँदो रहेनछ। मैले केही  साथीलाई तपाईँले सक्नुहुन्छ भने सुधार्नुस् भनेको पनि छु,   तर त्यो सम्भावनाको गुन्जाइस देखिएन खै ’ उनले भने ‘हाम्रो अरू केही चाहना छैन । किन भने देशको विकास गर्ने । यो देशलाई अग्रगतिको बाटोमा लिएर जाने हाम्रो चाहना हो ।’

ओलीसँग एमाले अध्यक्षमा प्रत्याशीपछि एमाले छाडेका नेता भीम रावलले धोकेबाजहरूलाई सदाका लागि पराजित गर्न तयार हुन आह्वान गरे । ‘जनताले दिएको दुई तिहाइलाई खतम पार्दै त्यो नेकपालाई ध्वस्त गर्ने व्यक्तिको नाम थाहा छ तपाईँलाई रु’ सहभागीतर्फ उनले भने–‘अर्थात् पछिल्ला घटनामा भन्ने हो भने सिंहदरबार जलिरहेको थियो, देशको प्रधानमन्त्री हेलिकप्टर चढेर भागिरहेको थियो।

यदि त्यस्तो व्यक्तिले फेरी यो देशको नेतृत्व गर्छु भनेर भक्तपुरको कुनाबाट म कम्युनिस्ट पार्टी बनाउँछु भन्दा के तपाई पत्याउनुहुन्छ रु मलाई आश्चर्य लाग्छ सिद्धान्त नभएपछि आफ्नो पदीय मर्यादाको रक्षा गर्न नसकेपछि के भनौँ र रु अनि हामीलाई वृद्धाश्रम भनेर भनेछन् आफ्नो उमेर कति रहेछ र रु सक्ने हो भने प्रचण्डसँग बिहान घुम्न जाउन त ओलीजी।’ रावलले अधिकांश समय यसमै बिताए ।

सभामा नेपाली कम्युनिस्ट पार्टीका संयोजक तथा पूर्वपूधानमन्त्री पुष्पकमल दाहाल प्रचण्डले विभिन्न पार्टीहरूको एकता चुनाव जित्नको लागि मात्रै नभएको बताए । उटपट्याङ गर्नेहरूले राजनीतिक नेतृत्व गर्न नसक्ने भन्दै उनले विगतमा दुई तिहाइको सरकार छिनभरमा ढलेको स्मरण गराउँदै जनताको सामु दुई तिहाइ पनि काम नलाग्ने उदाहरण भएको भन्दै एमाले अध्यक्ष ओलीलाई व्यङ्ग हाने ।

उनले भने–‘मैले पहिल्यैदेखि पनि भन्दै आइरहेको थिएँ । अहिले पनि भनिरहेको छु, जनताको सामु चुनावबाट प्राप्त दुई तिहाइ पनि काम लागेन । जनताको मन नजितेर सुखै छैन ।’

नेता वामदेव गौतमले देशको यो अवस्थामा पुर्‍याउने मुख्य दोषीको सहजै उत्तर केपी ओली भएको भन्दै उस्तै आलोचना गरे । ‘केपी ओली नै यो देशलाई यो अवस्थामा पुर्‍याउने पात्र हो, नेपाली जनताले सधैँभरि यहीँ रूपमा आलोचना गर्नेछन्’ बामदेवले भने–‘यति जान्दाजान्दै लाजै नमानी पार्टीको अध्यक्ष हुने रे, प्रधानमन्त्री हुने रे के का लागि होला रु ओलीजी अब केही गर्न सक्नुहुन्न शक्तिहीन भएको किन नबुझेको रु’

उनले जेनजी आन्दोलन नेपालका राजनीतिक पार्टी र नेताहरूलाई घचघच्याउन भएको तर ओलीकै कारण शान्तिपूर्ण, संवाद गरेर समाधान गर्न नसकेर राज्य सत्ताको दम्भ, घमन्ड र कुनै पनि समस्यालाई गम्भीर रूपमा नलिने प्रवृत्ति वोकेकाले यस्तो अवस्था आएको आरोप लगाए ।

ओली र एमालेको आलोचनाबाहेक के बोले ?

नेकपा संयोजक प्रचण्डले सहभागीको भावनाअनुसार आफ्नो बोली मिलाउन पनि जानेका छन् र कमजोरी स्वीकार गर्न पनि सजिलै सक्छन् । शनिवार पनि उनले त्यो अवस्था देखाए । उनले विगतमा गरेको कमजोरीलाई आत्मलोचित हुन आएको भन्दै क्षमासमेत मागे र भने विगतमा कसको गल्ती कहाँबाट कसले ग¥यो भन्ने विषयमा सबैले ध्यान दिनुपर्ने समय आयो । प्रचण्डले ढिलो चाँडो सबै कम्युनिस्ट पार्टीमा रहेकाहरू नेपाली कम्युनिस्ट पार्टीमा जोडिने विश्वास व्यक्त गरे ।

अपेक्षा गरेभन्दा बढी सहभागी सभाको रहेको आशयमा उनले भने– ‘हामी जहाँ गएका छौ, जेएनजेटदेखि सबैले हामीलाई साथ दिनुभएको छ । उहाँहरूले हामीहरूलाई विश्वास गर्नुभएको छ उपस्थितिले पनि हाम्रो विभिन्न घटकको एकतालाई अनुमोदन गरेको छ ।’  प्रचण्डले विगतमा गरेका गल्तीको समीक्षा गर्दै कमजोरी सच्चाउन जनतामाझ आएको बताए । ‘विगतबाट पाठ सिकेर सच्चिनको लागि हामी यहाँ आएका छौ, हामी सच्चिन्छौ भनेका छौ, नसच्चिएर सुखै छैन ।’ प्रचण्डले चुनाव जित्नको लागि मात्रै एकता नभएको बताए ।

प्रचण्डले इतिहासमा योगदान नदिएका व्यक्तिहरूले सामाजिक सञ्जालबाट कमाएको साखले नेतृत्व गर्नै नसक्ने ठोकुवा गरे ।

एकता सभालाई ’आत्मालोचना सभा’ र ’सङ्कल्प सभा’ को संज्ञा दिँदै विगतका कमजोरी दोहोरिन नदिने प्रतिबद्धता प्रचण्डले गरे । उनले सुशासन, आर्थिक समृद्धि र रोजगारीको क्षेत्रमा ठोस पहल गर्न नसकेको स्वीकार गर्दै अब जनताको सेवामा समर्पित हुने र राष्ट्रिय स्वाधीनताको रक्षा गर्ने सवालमा कम्युनिस्टहरू नै सबैभन्दा भरपर्दो शक्ति भएको दाबी गरे ।

प्रचण्डले लामो सङ्घर्ष र बलिदानपछि संविधान सभाबाट संविधान जारी गरे पनि जनताको अपेक्षाअनुसार परिणाम दिन नसकेको स्वीकार गर्दै भने, ’हामीले विभिन्न समयमा राष्ट्र र जनताको पक्षमा काम गर्ने कोसिस गरे पनि भनेजस्तो परिणाम निकाल्न सकिएको थिएन। हामी बिस्तारै कहाँ त्रुटि भयो, कहाँ कमजोरी भयो भनेर समीक्षा गर्दै थियौँ।’  जेनजी आलनले आफूहरूलाई गल्ती कमजोरी सच्याएर अघि बढ्नका लागि घचघच्याएको प्रचण्डले बताए। ’

पछिल्लो ’जेनजी’ आन्दोलन वा नयाँ युवा पुस्ताको आन्दोलनबाट जसरी हामी सबैलाई घच्घच्याउने काम भयो, हामीले अझ गम्भीर रूपले आत्मसमीक्षा गर्नुपर्ने र आफूलाई सच्याउनुपर्ने आवश्यकता महसुस भयो,’ उनले भने। युवाहरूको भावना र चाहना अनुसार नेपाली जनताको आवश्यकता पुरा गर्न आफूहरू बदलिनुको विकल्प नरहेको उनको भनाइ थियो । प्रचण्डले मजदुर, किसान, दलित, महिला, मुस्लिम र थारु लगायतका उत्पीडित समुदायको हकहितका लागि फेरि एक पटक नयाँ ढङ्गले सङ्घर्ष गर्ने उद्घोष गरे। हजारौँ जेनजी युवाहरूले नेकपालाई अभिभावक मानेर भित्रिरहेको उनले दाबी गरे ।

माधव नेपालसँगको ४० वर्ष पुरानो सहकार्य

सभामा प्रचण्डले माधव नेपालसँगको सहकार्य ४० वर्ष पुरानो भएको भन्दै व्याख्यासमेत गरे ।  ‘ २०४१–०४२ सालतिर कमरेड माधवकुमार नेपाल र म लगायत धेरै पञ्चायत विरोधी आन्दोलनबारेमा सहकार्य थियो, आजको कुरा होइन, ०४६ सालसम्म रह्यो पछि जनयुद्धपछि पनि निरन्तर सहकार्य भइरहेकै थियो, कसैकसैलाई यो चमत्कार कसरी भयो, एक्कासि कसरी भयो भन्ने लाग्न सक्छ’ उनले भने ।

उनले संविधान निर्माणको प्रक्रिया, नेकपाभित्रको सङ्घर्ष र त्यसपछि पनि नियमित सहकार्य रहेको जनाए ।  कमजोर भयो भनेर समीक्षा गर्नुपर्ने उनले बताए ।

विशिष्ट अतिथि पार्टीका सहसंयोजक तथा पूर्वप्रधानमन्त्री माधव नेपालले आफूहरू पछिल्लो समय पार्टीलाई उत्पादनसँग जोडेर लैजाने क्रममा रहेको जाने बताए । उनले भने–‘पार्टीलाई उत्पादनमा लगेर जानुपर्ने सुझाव पनि आएको छ, जनताको वास्तविक समस्यालाई नियालिरहेको रहेको छांै, त्यही आधारमा रहेर पार्टीलाई उत्पादनमा केन्द्रित गर्छौ।’ आफूहरूको एकता सामान्य नरहेको भन्दै पूर्वप्रधानमन्त्री नेपालले पछिल्लो राजनीतिक घटनाक्रम अनुसार पार्टीलाई रूपान्तरण गर्दै  लैजाने प्रतिबद्धता  जनाए ।

पूर्व गृहमन्त्री बामदेव गौतमले सबै राजनीतिक दलहरू विगतबाट पाठ सिकेर सच्चिएर अघि बढ्नुपर्ने तर्क गर्नुभयो । पूर्व गृहमन्त्री भीम रावलले नेपालको राष्ट्रियताको रक्षाको लागि पार्टीले मुख्य एजेन्डा बनाउने बताए । यस्तै पूर्व अर्थमन्त्री वर्षमान पुनले लुम्बिनी प्रदेशको एकता सन्देश सभाले पार्टीको उपस्थिति हिजो र आजको मूल्याङ्कन गर्न सहज हुने विश्वास व्यक्त गरे ।

पार्टीका प्रदेशका इन्चार्ज चक्रपाणि खनालको अध्यक्षतामा भएको सभा मेटमणि चौधरी, इन्द्रजित थारु, रेखा शर्मा लगायतले बोलेका थिए ।

काठमाडौं । राष्ट्रिय प्रजातन्त्र पार्टीले राजा, राजनीतिक दल र जेनजीबीच नवीन समझदारीकालागि प्रधानमन्त्रीसामु औपचारिक प्रस्ताव राखेको छ ।

आज बालुवाटारमा प्रधानमन्त्रीलाई भेट्न गएको प्रतिनिधिमण्डलले लिखितरूपमा सो प्रस्ताव गरेको हो ।

भेटका अवसरमा राप्रपाको तर्फबाट अध्यक्ष राजेन्द्र लिङ्देनले प्रधानमन्त्री कार्कीलाई विभिन्न ५ बुँदे ज्ञापनपत्र बुझाएका थिए । सो ज्ञापनपत्रमा मुलुकको दीर्घकालीन हित र राजनीतिक निकासका लागि स नवीन समझदारीको अपरिहार्य रहेको उल्लेख छ । यसनिम्ति सर्वपक्षीय बैठकको पहल लिन राप्रपाले प्रधानमन्त्रीसँग आग्रह गर्यो ।

जवाफमा प्रधानमन्त्री कार्कीले आफू सबै पक्षसँग संवादका लागि तयार रहेको बताइन् । राजाका सन्दर्भमा भने उनले ठोस प्रतिवद्धता नजनाएको एक नेताले बताए ।

राप्रपाको प्रतिनिधिमण्डलमा अध्यक्ष राजेन्द्र लिङ्देन, वरिष्ठ उपाध्यक्ष विक्रम पाण्डे, वरिष्ठ उपाध्यक्ष रोशन कार्की, वरिष्ठ उपाध्यक्ष रबीन्द्र मिश्र, उपाध्यक्ष हेमजङ्ग गुरुङ्ग, महामन्त्री डा।धवल शमशेर राणा, महामन्त्री कुन्ती शाही, महामन्त्री राजेन्द्र गुरुङ्ग, महामन्त्री शरदराज पाठक, कोशी प्रदेश अध्यक्ष राम थापा, कोषाध्यक्ष निलकण्ठ काफ्ले, प्रवक्ता मोहन कुमार श्रेष्ठ र मुख्य सचिव केदार बहादुर अधिकारी सहभागी थिए ।

राप्रपाले पेश गरेको ज्ञापनपत्र यस्तो छ:

सम्माननीय प्रधानमन्त्रीज्यू,
प्रधानमन्त्रीको कार्यालय, सिंहदरबार काठमाडौँ।

बिषय : ज्ञापन पत्र सम्बन्धमा ।

२०८२ साल भदौ २३ र २४ गते भएको ऐतिहासिक जेनजी विद्रोह र त्यस पश्चात निर्माण भएको वर्तमान सरकार केवल २०८४ सालमा हुनुपर्ने आवधिक संसदीय निर्वाचन २०८२ सालमा गर्नको लागि मात्रै भएको र बनेको होइन भन्ने राप्रपाको दृष्टिकोण छ।

त्यसैले २०८२ फागुन २१ गते सम्पन्न हुने भनिएको आम निर्वाचन अगावै वर्तमान सरकारबाट तत्काल निम्न विषयहरूमा आफ्नो पहल प्रारम्भ हुन यो ध्यानाकर्षण प्रस्ताव प्रस्तुत गरेका छौं।

१. आगामी निर्वाचन अगावै मुलुकको वर्तमान समस्याको दीर्घकालीन र स्थायी समाधानका लागि कोही कसैले भविष्यमा आन्दोलन गर्नु नपर्ने परिस्थिति निर्माणका लागि राजा, राजनीतिक दल र जेन्जी लगायतका सम्मिलित सर्वपक्षीय सम्मेलनको आयोजनाबाट देशलाई निकास दिने काम होस्।

२.अब हुने आम निर्वाचनमै अन्तर जिल्ला र विदेशबाट मतदान गर्न पाउने सुनिश्चितता गर्न सम्भव छ र त्यसलाई सुनिश्चित गरेर मात्रै निर्वाचन प्रक्रियालाई अगाडि बढाइयोस्।

३. जेनजी प्रदर्शनमा सहभागी भएकै कारण देशका विभिन्न भागमा भएको प्रदर्शनका सहभागीहरूलाई पक्रने, मुद्दा लगाउने जस्ता कामहरू भइरहेको छ। यसप्रकारका कार्यहरू तत्काल रोकियोस्।

४.जेनजी आन्दोलनका सहिद परिवार, घाइतेहरूको माग अविलम्ब पुरा गरियोस्।

५.सरकारसँग विभिन्न मागहरू लिएर प्रदर्शनमा रहेका र प्रधानमन्त्रीसँग भेट गर्न चाहेका जेनजीहरु माथि भइरहेको दमन र उपेक्षा उपयुक्त छैन। यसप्रकारको कार्य तत्काल बन्द गरियोस् र वार्ता संवादबाट वातावरणलाई शान्त बनाउने प्रयास होस्।

राजेन्द्र लिङ्देन

काठमाडौं । सुदूरपश्चिम रोयल्सले नेपाल प्रिमियर लिग (एनपीएल) सिजन–२ मा लगातार पाँचौं जित निकालेको छ ।

शनिबार भएको खेलमा जनकपुर बोल्ट्सले दिएको १४६ रनको लक्ष्य सुदूरपश्चिम रोयल्सले १७ ओभर ४ बलमा ४ विकेट गुमाएर पूरा ग¥यो । सुदूपश्चिमको जितका लागि इसान पाण्डेले सर्वाधिक ५६ रन बनाए । इसानले ३५ बलमा ८ चौका र एक छक्का प्रहार गरे । जोश ब्राउन ०, विनोद भण्डारी ४२ र क्रिस लिन १ रनमा आउट भए । कप्तान दीपेन्द्रसिंह ऐरी १० र हर्मित सिंह २५ रनमा अविजित रहे ।

बलिङमा जनकपुरका माज सदाकतले २ तथा सञ्जय कृष्णमूर्ति र आदित्य मेहताले एकएक विकेट लिए ।

त्यसअघि टीयु क्रिकेट मैदानमा टस जितेर ब्याटिङ गरेको जनकपुरले निर्धारित २० ओभरमा ८ विकेट गुमाएर १४५ रन बनाएको थियो । जनकपुरका लागि सञ्जय कृष्णमूर्तिले अर्थशतक प्रहार गरे । उनले ३८ बलमा २ चौका र २ छक्का प्रहार गरे ।

जोन निकोल लोफ्टी इन्र्टन ३९, माज सदक्वात १२, आसिफ शेख ०, मयन यादव ६, आदित्य मेहता १५, शुभ कंशाकार ० र वायन पार्नेल १४ रनमा आउट भए । रुपेश सिंह १ रनमा अविजित रहे ।

बलिङमा सुदूरपश्चिमका अभिनास बोहराले सर्वाधिक ४ विकेट लिए । स्कट कुइगेलेइन ३ र कप्तान दीपेन्द्रसिंह ऐरीले एक विकेट लिए ।
सुदूरपश्चिमले लगातार पाँचौं जित निकाल्दा साविक विजेता जनकपुर बोल्ट्सले लगातार चौथो हार बेहोरेको छ ।

काठमाडौं । नेपाल प्रिमियर लिग (एनपीएल) सिजन–२ मा जनकपुर बोल्ट्सले सुदूरपश्चिम रोयल्सलाई १४६ रनको लक्ष्य दिएको छ । टीयु क्रिकेट मैदानमा टस जितेर ब्याटिङ गरेको जनकपुरले निर्धारित २० ओभरमा ८ विकेट गुमाएर १४५ रन बनायो ।

जनकपुरका लागि सञ्जय कृष्णमूर्तिले अर्थशतक प्रहार गरे । उनले ३८ बलमा २ चौका र २ छक्का प्रहार गरे । जोन निकोल लोफ्टी इन्र्टन ३९, माज सदक्वात १२, आसिफ शेख ०, मयन यादव ६, आदित्य मेहता १५, शुभ कंशाकार ० र वायन पार्नेल १४ रनमा आउट भए । रुपेश सिंह १ रनमा अविजित रहे ।

बलिङमा सुदूरपश्चिमका अभिनास बोहराले सर्वाधिक ४ विकेट लिए । स्कट कुइगेलेइन ३ र कप्तान दीपेन्द्रसिंह ऐरीले एक विकेट लिए ।

काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले जेननी आन्दोलनले आफूहरूलाई गल्ती कमजोरी सच्याएर अघि बढ्नका लागि घचघच्याएको बताएका छन्।

लुम्बिनीस्तरीय एकता सभालाई सम्बोधन गर्दै युवा पुस्ताको माग र जनताको चाहनाअनुसार बदल्नुपर्ने आवश्यकता देखिएको बताए। जेनजी आन्दोलनले विगतमा आफूहरूले गरेको कामलाई समीक्षा गर्न दबाब बढाएको उनको भनाइ छ।

उनले भने, ‘हामीले समीक्षा गरेरै एकताबद्ध बनेका हौँ। यो सन्देश सभा आफ्नो कमीकमजोरी खोतल्ने र त्यसलाई सच्याउने प्रतिबद्धता गर्न आएका हौँ। यो आत्मालोचना सभा पनि हो। हामी १५ वटा पार्टी एकताबद्ध भएर नेपाली कम्युनिस्ट पार्टी बनेका हौँ।’

उनले हजारौँ जेनजी युवाहरूले नेकपालाई अभिभावक मानेर भित्रिरहेको बताए। उनले आफूहरू बदलिएर जनताको सेवामा समर्पित भएर लाग्ने प्रतिबद्धता पनि व्यक्त गरे।

काठमाडौं । नेपाल प्रिमियर लिग (एनपीएल) सिजन–२ मा जनकपुर बोल्ट्सले सुदूरपश्चिम रोयल्सविरुद्ध पहिला ब्याटिङ गर्ने भएको छ ।

टीयु क्रिकेट मैदानमा सुदूरपश्चिमविरुद्ध जनकपुरका कप्तान वायन पार्नेलले टस जितेर ब्याटिङ गर्ने निर्णय लिएका हुन् । नियमित कप्तान अनिलकुमार शाह बेन्चमा हुँदा वायनले कप्तानी गर्न लागेका हुन् ।

साविक विजेता जनकपुर जारी एनपीएलमा जितविहिन छ । सुदूरपश्चिम भने अपराजित टोली हो ।

काठमाडौं । नेपाली कांग्रेसभित्र देखिएको विवाद समाधान गर्नको लागि सभापति शेरबहादुर देउवा आफैँ सक्रिय भएपनि अहिलेसम्म सहमतिको मिलनबिन्दु भेटिएको छैन।

देउवाले बिहिबारदेखि कार्यवाहक सभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मासहित आफू निकट नेताहरूसँग निरन्तर संवाद गरिरहेका छन् ।

छलफलमा कुनै सहमति बन्न नसकेपछि देउवाले शुक्रवार आफूनिकट नेता कृष्णप्रसाद सिटौला र विमलेन्द्र निधिसँग पनि छलफल गरेका थिए। यद्यपि, देउवा विशेष महाधिवेशन पक्षधरको मागलाई सम्बोधन गर्न पुसभित्र कार्यतालिका ल्याउनुपर्नेमा सकारात्मक देखिएका छन्।

तर, महामन्त्रीद्वयले आफूहरूलाई महाधिवेशनको कार्यतालिका नभई महाधिवेशन नै चाहिएको भन्दै अडान नछाडेपछि सहमति बन्न सकेको छैन । नियमित महाधिवेशनको सम्भावना टरेको भन्दै अब विशेष महाधिवेशनको विकल्प नभएको उनीहरूको अडान छ।

महाधिवेशन विवाद चर्किँदै गएपछि देउवानिकट नेताहरू पनि विभाजित भएका छन्। अधिकांश पदाधिकारी चुनावअघिकै पक्षमा उभिँदा पूर्वपदाधिकारी विपक्षमा उभिएका छन्।

चुनावपछि मात्रै महाधिवेशन गर्नुपर्ने उभिएका मध्ये एक हुन् पूर्वउपसभापति निधि। त्यसो त पूर्वपदाधिकारीहरूले पार्टीको महाधिवेशन रोकेको आरोप छ। कांग्रेसभित्र महाधिवेशन मितिमा चलिरहेको चुनावअघि कुनै महाधिवेशन गर्न नहुने पक्षमा उभिएका निधिसँग नेपाल प्रेसले गरेको संक्षिप्त कुराकानी–

– महाधिवेशनको मितिमा कांग्रेस अल्झिरहेको छ, तपाईँहरूले किन महाधिवेशन चाहिराख्नुभएको छैन ?
हाम्रो धारणा क्लियर नै छ, फागुन २१ को लागि निर्वाचनको मिति घोषणा भएर प्रक्रिया अघि बढिसकेको छ। धेरै समय छैन। त्यसैले हाम्रो सम्पूर्ण समय र शक्ति चुनावमा नै केन्द्रित हुनुपर्छ।
महाधिवेशनतिर अलमल नगरी रुख छापलाई कसरी विजयी गराउन सकिन्छ त्यता एकताबद्ध भएर लाग्नुपर्छ भन्ने हाम्रो कुरा हो। चुनावपछि मात्रै महाधिवेशनबारे छलफल गर्नुपर्छ भन्ने हाम्रो धारणा हो।

– तपाईँहरूले चुनावपछि मात्रै महाधिवेशन भन्दा त पार्टीमा विवाद भइरहेको छ नि?
हामीले चुनावलाई प्राथमिकता दिनको लागि अहिले महाधिवेशन गर्न हुँदैन भनेका हौँ। हाम्रो अरू कुनै स्वार्थ छैन। अहिलेको चुनाव सामान्य अवस्थामा हुने प्रतिनिधि सभाको चुनाव होइन। चुनावपछि सरकार बनाउने र सत्तामा जाने भन्ने खालको यो चुनाव होइन।
अहिलेको चुनाव भनेको क्षतिग्रस्त संविधानलाई रक्षा गर्ने, ट्र्याकमा ल्याउनुपर्छ। त्यसैले यसलाई प्राथमिकता दिनुपर्छ भनेका हौँ। अब कबिर दुई महिना बाँकी छ। त्यो समयमा प्रतिनिधि सभाको १६५ क्षेत्रको लागि उम्मेदवार तय, समानुपातिकको कुरा छ। अब महाधिवेशनका लागि समय छैन। अब सबै चुनावमा नै लाग्ने हो।

– सभापतिसँग हिजोको भेटमा तपाईँहरूले के कुरा राख्नुभयो, उहाँको कस्तो जवाफ पाउनुभयो ?
हामीले महाधिवेशनको लागि समय छैन, चुनावमा लाग्नुपर्छ भन्ने कुरा राख्यौँ। उहाँले मिलेर जानुस् भन्नुभएको छ। चुनावलाई प्राथमिकता दिनुपर्छ भन्नुभएको छ।

– तपाईँहरूले महाधिवेशन हुँदैन भन्दैगर्दा महामन्त्रीहरू विशेष महाधिवेशनको विकल्प छैन भन्न थाल्नुभएको छ ?
हामी विशेष महाधिवेशनमा जान्दैनौँ। हामी अब चुनावमा जाने हो महामन्त्रीले अब विशेष महाधिवेशनको अडान छाड्नुपर्छ। छाड्नुहुन्छ।

– त्यसो भए विशेष महाधिवेशन पक्षधरको माग सम्बोधन कसरी हुन्छ ?
त्यस्तो अहिले मध्यमार्गी विकल्प भन्ने नै छैन। प्रतिनिधि सभाको निर्वाचनलाई नै सर्वोपरि महत्वको विषय मानेर केन्द्रित हुनु नै अहिलेको आवश्यकता हो। अहिले कांग्रेसको विकल्प नै त्यही हो।

– तपाईँहरू महाधिवेशन नचाहने, विशेष महाधिवेशन पक्षधर अडान नछाड्ने भएपनि पार्टी विभाजनतिर गएको हो ?
पार्टी विभाजनतिर जाँदैन, हामी जान दिँदैनौँ। विशेष महाधिवेशनका लागि हस्ताक्षर गर्ने सदस्यहरू पनि पार्टीको जिम्मेवार व्यक्ति नै हुनुहुन्छ। उहाँहरू कसैले पार्टी विभाजन चाहनुभएको छैन। पार्टी फुट्छ भन्ने कुरामा म सहमत छैन।

– तर, पार्टीभित्रको विवादमा कार्यवाहक जिम्मेवारी दिनुभएको सभापति पनि सक्रियता बढाउनुभयो ?
पूर्वराष्ट्रपति विद्या भण्डारी सक्रिय राजनीतिमा आउनुभएको छ। रामवरण यादव पनि आफ्नो ठाउँमा सक्रिय हुनुहुन्छ नै।
शेरबहादुर देउवा त अहिले पनि पार्टी सभापति नै हुनुहुन्छ। सक्रिय हुनुपनि पर्छ, देशको राजनीतिमा पनि उहाँको प्रभाव हुन्छ। पछि पनि सक्रिय रहन सक्नुहुन्छ। आगामी महाधिवेशनबाट पदीय राजनीतिमा बिदा भएपनि उहाँको सक्रियता घट्दैन।

– भनेपछि कांग्रेस सभापति देउवाकै हस्ताक्षरमा चुनावमा जान्छ ?
हो, अबको चुनावमा टिकट सभापतिकै हस्ताक्षर हुन्छ, उहाँकै हस्ताक्षर लिएर कांग्रेस चुनावमा जान्छ।

विराटनगर । नेकपा एमालेको महाधिवेशन प्रतिनिधि चयनमा एकलौटी गरिएको भन्दै धनकुटामा असन्तुष्ट समूहले निर्वाचन बहिस्कार गरेको छ।

बहिस्कार गर्नु अघि केहि निर्वाचन बुथमा असन्तुष्ट समूहले तोडफोड समेत गरेका छन् । एमालेको महाधिवेशनमा प्रतिनिधि छनौट सर्व सम्मत नभएका ठाँउमा आज निर्वाचन हुँदै छ ।

धनकुटामा राजेन्द्र राई र इन्द्रमणी पराजुली पक्ष गरेर २ वटा समूह रहेको छ । इन्द्रमणी समूहले मतदातालाई थाहा नै नदिइ एकलौटी हिसावले निर्वाचन गराएको आरोप लगाएको छ ।

पराजुलीले राई पक्षले आफूहरुलाई थाहा नदिई एकलौटी आफू निकटका निर्वाचन अधिकृत तोकेको आरोप लगाए ।

उनले भने,‘पार्टी कार्यालय निर्वाचन केन्द्रमा फर्जी मत हालेको भेटिएपछि विरोध स्वरुप मत पेटिका फालिएको छ । हामीले तालाबन्दी समेत गरेका छौँ ।’

धनकुटामा लामो समयदेखि राजेन्द्र राई पक्षधरको वर्चस्व रहदै आएको छ। धनकुटामा हिजो साँझ ९/४ को सहमति भएको पराजुलीले बताए । उनका अनुसार ९ जना राई पक्ष बाट र ४ जना इतर समूहबाट प्रतिनिधि पठाउने सहमति भएको थियो ।

सहमति अनुसार ४ जना बाहेकले मनोनयन फिर्ता लिएपछि आज बिहानबाट निर्वाचन प्रक्रिया शुरु भएको पराजुलीले दावी गरे । राजेन्द्र राईले भने सर्वसम्मत प्रतिनिधि छनौट हुन नसकेपछि निर्वाचन प्रक्रिया शुरु भएको बताए । उनले पराजय हुने निश्चित भएपछि अराजकता मच्चाएको बताए ।

काठमाडौं ।  नेपाल प्रिमियर लिग (एनपीएल) सिजन–२ मा लुम्बिनी लायन्सले पोखरा एभेन्जर्समाथि रोमाञ्चक जित निकालेको छ ।

पोखराले दिएको १५१ रनको लक्ष्य लुम्बिनीले २ बल बाँकी छँदा ७ विकेट गुमाएर पूरा गर्‍यो । लुम्बिनीका लागि कप्तान रोहित पौडेलले सर्वाधिक ४० रन बनाए ।

रोहितले निरोधन डिक्वेलासँग तेस्रो विकेटका लागि ५४ रनको साझेदारी गरेका थिए । डिक्वेला ३७ रनमा आउट भएका थिए । डार्सी सर्ट ७, सुमित महर्जन ०, दिलिप नाथ १०, गुल्बदिन नाइब १७ र रुवेन ट्रम्पल्यान १७ रनमा आउट भए । सन्दीप जोरा २५ रनमा अविजित रहे ।

बलिङमा पोखराका विपिन खत्री, म्याट टेयलर र सागर ढकालले दुईदुई विकेट तथा जिम्मी निशमले एक विकेट लिए । त्यसअघि टीयु क्रिकेट मैदानमा टस हारेर ब्याटिङको निम्तो पाएको पोखराले निर्धारित २० ओभरमा ५ विकेट गुमाएर १५० रन बनाएको थियो । पोखराका लागि ओपनर एडम वासिङटन र जिम्मी निशमले उत्कृष्ट ब्याटिङ गरे ।

एडमले ६३ बलमा ८१ रन बनाए । ३३ रनमा ४ विकेट गुमाएको पोखराको ब्याटिङलाई एडम र जिम्मी निशमले उकासेका थिए । जिम्मीले अर्धशतक प्रहार गरे । उनी ३२ बलमा ५१ रनमा अविजित रहे । दिनेश खरेल ७, कप्तान कुशल भुर्तेल ०, सुमित वर्मा ०, तिर्थ दास १ रनमा आउट भए ।

किरणकुमार ठगुन्ना एक रनमा अविजित रहे । बलिङ लुम्बिनीका शेर मल्ल र तिलक भण्डारीले दुईदुई विकेट लिए । गुल्ददिन नाइवले एक विकेट लिए । लुम्बिनीले लगातार तेस्रो हारपछि जित निकालेको छ । पोखराले भने एनपीएलमा तेस्रो हार बेहोरेको छ ।

विराटनगर । नेकपा एमालेको महाधिवेशनका लागि मोरङमा प्रतिनिधि छनोटकाे विषयमा विवाद हुँदा धक्कामुक्की भएको छ ।

पार्टी कार्यालय विराटनगर मोरङ क्षेत्र नम्बर ६ को प्रतिनिधि चयनमा विवाद हुँदा हात हालाहाल भएको हो ।

मोरङमा सस्थापन पक्षा र इतर समूहकाे बीचमा प्यानल भिडन्त छ । सर्व सम्मत प्रतिनिधि छनाेट हुन नसकेपछि आज भइरहेको निर्वाचनमा डबल मत हालेको भन्दै विवाद भएको हो । विवाद पछि केहिबेर मतदान स्थगित समेत भएको थियो ।

काठमाडौं । नेपाली कम्युनिस्ट पार्टीले वाम, समाजवादी, लोकतान्त्रिक तथा देशभक्त शक्तिहरुलाई एकता र सहकार्यको प्रक्रियामा सहभागी हुन आह्वान गरेको छ।

१५ समूहको गणितीय जोड मात्र नभएर विभाजित अवस्थामा रहेको कम्युनिष्ट आन्दोलन, लोकतान्त्रिक आन्दोलन र राष्ट्रिय स्वाधीनताको आन्दोलनलाई एकतावद्ध गर्दै समाजवादको दिशामा अघि बढ्ने अर्को ऐतिहासिक प्रक्रियाको थालनी भएको भन्दै एकता प्रक्रिया आउन अपिल गरेको हो।

यस्ताे छ नेकपाकाे अपिल

नेपाली कम्युनिष्ट पार्टीको अपील
आदरणीय जनसमुदाय,
सात दशकभन्दा लामो कम्युनिष्ट आन्दोलनभित्रको विचारधारात्मक र राजनीतिक संघर्षको आरोह अवरोहसँगै पार्टी एकता, संघर्ष, विभाजन र पुनएकीकरणका शिक्षाहरुलाई आत्मसात गर्दै, पूँजिवादी जनवादी क्रान्तिको उपलब्धिकारुपमा रहेको संघीय लोकतान्त्रिक गणतन्त्रको रक्षा, राष्ट्रिय स्वाधिनताको रक्षा, सुशासन, सामाजिक न्याय र आर्थिक सामाजिक रुपान्तरण गर्दै समाजवादी क्रान्तिको लक्ष्य पुरागर्ने उद्देृश्यमा आधारित रहँदै विभिन्न १५ कम्युनिष्ट र समाजवादी पार्टीहरुबीचको एकीकरणबाट नेपाली कम्युनिष्ट पार्टी निर्माण गरिएको छ । पछिल्लो जेन जी आन्दोलनसमेतको पृष्ठभूमिमा पुनर्गठित नेपाली कम्युनिष्ट पार्टीको तर्फबाट पार्टी पंक्ति र समर्थक शुभचिन्तकसहित आम न्यायप्रेमी जनसमुदायलाई हार्दिक अभिवादन गर्दछौं ।
यस अवसरमा हाम्रो पार्टी संघीय लोकतान्त्रिक गणतन्त्रसहित आमूल परिवर्तन, सामाजिक न्याय र राष्ट्रिय स्वाधिनताका लागि नेपाली जनताद्वारा सञ्चालित ऐतिहासिक जनयुद्ध, संयुक्त जनआन्दोलन, मधेश आन्दोलनलगायत उत्पीडित वर्ग, समुदायको मुक्ति आन्दोलन र पछिल्लो जेनजी आन्दोलनका क्रममा प्राणोत्सर्ग गर्ने सम्पूर्ण ज्ञात अज्ञात सहीदहरुप्रति हार्दिक श्रद्धाञ्जली अर्पण गर्दछ । साथै वेपत्ता योद्दाहरुप्रति उच्च सम्मान प्रकट गर्नुका साथै घाइते अपांग योद्दाहरुप्रति सम्मानसहित सिघ्र स्वास्थ्यलाभको कामना गर्दछ ।
आन्तरिक अर्थराजनीतिक समस्या र नयाँ भूराजनीतिसमेतका कारण देशको राजनीतिक परिस्थिति निकै गम्भीर र संवेदनशील रहेको छ । जनक्रान्तिबाट स्थापित नयाँ राजनीतिक व्यवस्था र पुरानो उत्पादन प्रणालीबीच अन्तर्बिरोधका कारण जनताको अवस्थामा अपेक्षित परिवर्तन हुन सकिरहेको छैन । यो स्थितिमा एकातर्फ प्रतिगामी यथास्थितिवादी शक्तिहरुबाट जनक्रान्तिका उपलब्धिहरुमाथि धावा बोल्ने प्रयास हुँदै आइरहेको छ भने अर्कोतर्फ जनक्रान्तिका उपलब्धिहरुको रक्षासहित सुशासन र आर्थिक सामाजिक रुपान्तरणको जनचाहना विभिन्न रुपमा प्रकट हुँदै आइरहेको छ ।
आज राष्ट्रिय स्वाधिनता र नेपाली जनताको आत्मनिर्णयको अधिकारको प्रश्न थप संवेदनशील बन्दै गइरहेको छ । राष्ट्रिय सहमति निर्माण गर्दै संवैधानिक बाटोबाट जनआकांक्षालाई सम्बोधन गर्न जिम्मेवार पहल आजको आवश्यकता बन्न पुगेको छ ।
परिस्थितिको यो गाम्भीर्यतालाई मनन गर्दै राष्ट्रिय सहमतिको वातावरण निर्माण गर्न र जन आकांक्षालाई मूर्तरुप दिन हामी प्रयत्नशील रहँदै आयौं । सरकारमा रहँदा हाम्रा तर्फबाट सुशासन, सामाजिक न्यायसहितको आर्थिक विकास एवं समृद्धिको अभियान सुरु गरिएको थियो । प्रतिगामी यथास्थितिवादी शक्तिहरुले उक्त अभियानलाई रोक्न सरकार परिवर्तनको अस्त्र प्रयोग गरे । प्रतिपक्षीय मोर्चामा रहँदा समेत सडक र सदनबाट सरकारलाई निरन्तर खबरदारी गरि नै रह्यौं । कांग्रेस एमालेको सरकारको गतिविधिका कारण लोकतन्त्रमाथि नै संकट आउन सक्ने र जनअसन्तुष्टि सडकमा विष्फोट हुनसक्ने अवस्थाप्रति हाम्रो तर्फबाट लगातार सचेत गराउँदै आएका थियौं । सरकारले हाम्रो खबरदारीको गाम्भीर्यता र संवेदनशीलतालाई पटक्कै बोध गरेन । दुई तिहाईको अहंकार र दुईदलीय तानाशाहीको मीठो सपनाबाट सरकार ब्यूझन सकेन ।
फलतः अर्थराजनीतिक समस्या र तत्कालिन सरकारका जनविरोधी क्रियाकलापबाट संगठित हुँदै गएको जनअसन्तुष्टि जेनजी आन्दोलनका रुपमा प्रकट हुन पुग्यो । जनताको असन्तोष र आक्रोशलाई आफ्नो निहित स्वार्थमा उपयोग गर्न प्रतिगामी र प्रतिक्रियावादी शक्तिहरुका लागि यो उपयुक्त अवसर बन्न पुग्यो । गत भदौ २३ गते शान्तिपूर्णरुपमा सुरु भएको जेनजी प्रदर्शन नरसंहारमा रुपान्तरित हुन पुग्यो । भदौं २४ गते देशका प्रमुख ऐतिहासिक सम्पदाहरु सहित सार्वजनिक कार्यालय, लोकतान्त्रिक दलका नेताहरुको निवास, बैंक, वित्तिय संस्था, मिडिया तथा व्यवसायहरुमा भीषण आगजनी, लूटपाट, तोडफोड गरिनुका साथै भौतिक आक्रमण समेत गरियो । जुन नियोजित र योजनावद्ध थियो । त्यसका वावजूद जेनजी आन्दोलन बस्तुतः राजनीतिक दलहरुलाई खबरदारी, सुशासन, सामाजिक न्याय र अझ उन्नत लोकतन्त्रप्रति नयाँ पुस्ताको चाहना र आकांक्षाको अभिव्यक्ति थियो ।
जेन जी आन्दोलनको यो भावनालाई एकथरिले बुझ्नै चाहिरहेका छैनन् । अर्को एकथरिले आफ्नो निहित स्वार्थ र प्रतिगामी उद्देश्यपूर्तिको साधन बनाउने कोशिस गरिरहेका छन् । यसप्रकारका प्रवृत्तिहरुप्रति सचेत रहँदै संवैधानिक प्रक्रियाबाट सुशासन, सामाजिक न्याय र समृद्धिको मार्गमा दृढतापूर्वक अघि बढन जेनजीलगायतका नवयुवाहरुमा हाम्रो पार्टी विशेष आग्रह गर्दछ ।

जेन जी आन्दोलनसँगै उत्पन्न गम्भीर परिस्थितिमा गैर दलीय सरकार बनेपछि तत्कालको अनिश्चयपूर्ण तुँवालो केही हटेपनि जनक्रान्तिका उपलब्धिहरु र राष्ट्रमाथिको संकट पूर्णरुपले हटिसकेको छैन । बिभिन्न बहानामा अराजकता फैलाउने, संविधान खारेज गर्ने, लोकतान्त्रिक दलका नेता तथा कार्यकर्ताहरुलाई हतोत्साहित गर्ने, सभा सम्मेलन गर्न अवरोध सिर्जना गर्ने, निर्वाचनलाई कुनै बहानामा बिथोल्ने या निर्वाचन परिणामलाई अनुकुल बनाउन प्रतिगामी तथा प्रतिक्रियावादी चलखेलका सम्भावनाहरु अझैपनि विद्यमान छन् । तथापि मुलुकलाई संवैधानिक बाटोबाट परिवर्तनको मार्गमा हिँडाउन घोषित मितिमा निर्वाचन सम्पन्न गराउनु पर्ने कुरामा नेपाली कम्युनिष्ट पार्टी दृढ रहँदै आएको छ । हाम्रो पार्टी संविधान, लोकतन्त्र, सामाजिक न्याय र राष्ट्रिय स्वाधीनताको रक्षाका पक्षमा साझा पहलकदमीका लागि सम्पूर्ण वामपन्थी, लोकतान्त्रिक र देशभक्त शक्तिहरुसँग विशेष अपील गर्दछ । राष्ट्रिय स्वाधीनता र लोकतन्त्रमाथि चुनौतीहरु थपिँदै गएको वर्तमान सन्दर्भमा वामपन्थी, लोकतान्त्रिक र राष्ट्रिय स्वाधीनताको आन्दोलनलाई एकीकृत गर्दै नेतृत्व प्रदान गर्नुपर्ने वस्तुगत आवश्यकतालाई आत्मसात गर्दैै समाजवादी मोर्चामार्फत् पार्टी एकतामा रुपान्तरण गर्ने ऐतिहासिक निर्णयमा पुगेका छौं । यो एकता जनक्रान्तिका उपलब्धिहरुको रक्षा गर्दै मुलुक र वामपन्थी लोकतान्त्रिक आन्दोलन सामु देखिएका नयाँ अवसर र चुनौती सम्बोधन गर्ने ऐतिहासिक संकल्प हो । एकताको यो पहल केवल १५ समूहको गणितीय जोड मात्र नभएर विभाजित अवस्थामा रहेको कम्युनिष्ट आन्दोलन, लोकतान्त्रिक आन्दोलन र राष्ट्रिय स्वाधीनताको आन्दोलनलाई एकतावद्ध गर्दै समाजवादको दिशामा अघि बढ्ने अर्को ऐतिहासिक प्रक्रियाको थालनी हो । सही विचार, राजनीतिक कार्यक्रम र सबैखाले अनुभव र उर्जाको संकेन्द्रण पार्टी एकताको सार हो । श्रमजीवी वर्गको मुक्तिको वैचारिक अस्त्र मार्क्सवाद–लेनिनवाद हाम्रो पार्टीको मार्गनिर्देशक सिद्धान्त हो । मार्क्सवादी लेनिनवादी सिद्धान्तको आलोकमा एक्काइसौं शताब्दीका नवीन विशेषता, विगतका प्रतिक्रान्तिका अनुभव, नेपाली पूँजिवादी जनवादी क्रान्तिका मौलिक विशेषता र नेपाली समाजको विशिष्टताका आधारमा तयार गरिएको नेपाली विशेषताको समाजवाद हाम्रो रणनीतिक कार्यक्रम हो । यही मार्गनिर्देशक सिद्धान्त र कार्यक्रमको आलोकमा सुशासन, सामाजिक न्याय र समृद्धिको माध्यम हुँदै समाजवादको दिशामा अघि बढ्ने संकल्प हाम्रो एकताका मुख्य आधारहरु हुन । श्रमजीवी सर्वहारा वर्ग र उत्पीडित वर्ग समुदायको पहिचान र हितको प्रतिनिधित्व गर्ने लोकतान्त्रिक मूल्यसहितको संघीय समाजवादी राज्य, सहभागितामूलक समावेशी र समानुपातिक शासनप्रणाली, उत्पादनका साधनमाथि सार्वजनिक, सामुदायिक र नीजि स्वामित्व भएको उत्पादन प्रणालीसँगै सबैखाले प्रतिक्रियावादी हस्तक्षेप र शोषणका रुपहरुको अन्त्य गर्ने आर्थिक नीति, शिक्षा र स्वास्थ्यमा मूलतः राज्यको दायित्व बढाउँदै समाजमा विद्यमान सबैखाले असमानता र विभेदको अन्त्य गर्ने सामाजिक सांस्कृतिक नीति, स्वतन्त्र, सन्तुलित, असंलग्न परराष्ट्र नीति नेपाली विशेषताको समाजवादका आधारभूत पक्ष हुन । थप छलफल र अन्तक्रिया गर्दै पार्टीको एकताको राष्ट्रिय महाधिवेशनबाट यसलाई थप समृद्ध तुल्याइनेछ । यो प्रक्रियामा आ आफ्नो ठाउँबाट सकारात्मक भूमिका निर्वाह गर्न पार्टीका सम्पूर्ण पंक्ति, समर्थक शुभचिन्तकहरुमा आग्रह गर्दछौं । – स्वतन्त्रता (जनवाद) र अनुशासन (केन्द्रीयता) को समुचित सन्तुलनमा आधारित जनवादी केन्द्रीयता पार्टीको संगठनात्मक सिद्धान्त र विधि हुनेछ । नेपाली विशेषताको समाजवादद्वारा निर्देशित वैचारिक मूल्यहरुबाट जनवादी केन्द्रीयताको संगठनात्मक सिद्धान्तलाई थप समृद्ध गरिनेछ । आदरणीय जनसमुदाय, विद्यमान राष्ट्रिय परिस्थिति, आवश्यकता र जनअपेक्षालाई दृष्टिगत गर्दै पुनर्गठित नेपाली कम्युनिष्ट पार्टीको नेतृत्वमा सुरु भएको एकता, ध्रवीकरण र सहकार्यको यो प्रक्रियामा सहभागी हुन सम्पूर्ण वामपन्थी, समाजवादी, सच्चा लोकतन्त्रवादी र देशभक्त शक्तिहरुलाई आव्हान गर्दछौं ।

सुर्खेत । वीरेन्द्रनगरमा गए राति भएको सवारी दुर्घटनामा पत्रकार वीरेन्द्र आचार्यको ज्यान गएपछि आज बिहानैदेखि स्थानीय क्षेत्र तनावपूर्ण बनेको छ।

आचार्यका आफन्त र स्थानीयले सडक अवरुद्ध गर्दै घटना ‘सन्दिग्ध’ भएको दाबी गर्दै छानबिन कडा माग गरेका छन्।

मुलपानी चोक, एरिचोकलगायतका स्थानमा प्रदर्शनकारीले टायर बालेर अवरुद्ध गरेपछि सवारी आवागमन प्रभावित बनेको छ ।

घटना शुक्रबार राति वीरेन्द्रनगर–२ को वडा कार्यालय अगाडिको सडकमा भएको हो । मुलपानीबाट भुरेली जाँदै गरेको यामबहादुर शाहीले चलाएको मोटरसाइकल र पत्रकार आचार्य चढेको स्कुटर एक–आपसमा ठोक्किँदा आचार्य गम्भीर घाइते भएका थिए। अस्पताल पुर्‍याएपछि चिकित्सकले उनलाई मृत घोषणा गरेका थिए।

दुर्घटनामा मोटरसाइकल चालक शाही पनि घाइते छन्। उनको टाउको र शरीरका विभिन्न भागमा चोट लागेको र अवस्था मध्यम रहेको प्रहरीले जनाएको छ।

तर आचार्यका आफन्तलाई घटनास्थलमै गम्भीर त्रुटि भएको शंका छ। प्रहरीले रातारात प्रमाण नष्ट गर्ने गरी काम गरेको, मुचुल्का नउठाई पानी खन्याएको जस्ता आरोप उनीहरूले सार्वजनिक गरेका छन्। यही कारण शनिबार बिहानदेखि उनीहरूले सडकमै उत्रिएर आवाज उठाएका हुन्।

यता, जिल्ला प्रहरी कार्यालय सुर्खेतका निमित्त सूचना अधिकारी दीपक मगरातीले गम्भीर घाइतेलाई तुरुन्त उपचारमा पठाएकाे हुँदा अहिले उल्टै आरोप लगाएकाे बताएका छन् ।

मृतक आचार्य रेडियो तिला आवाज कालिकोटका स्टेसन म्यानेजर र प्रेस सेन्टर कालिकोटका अध्यक्ष समेत थिए ।

काठमाडौं । नेपाल प्रिमियर लिग (एनपीएल) सिजन–२ मा पोखरा एभेन्जर्सले लुम्बिनी लायन्सलाई १५१ रनको लक्ष्य प्रस्तुत गरेको छ । टीयु क्रिकेट मैदानमा टस हारेर ब्याटिङको निम्तो पाएको पोखराले निर्धारित २० ओभरमा ५ विकेट गुमाएर १५० रन बनायो ।

पोखराका लागि ओपनर एडम वासिङटन र जिम्मी निशमले उत्कृष्ट ब्याटिङ गरे । एडमले ६३ बलमा ८१ रन बनाए । ३३ रनमा ४ विकेट गुमाएको पोखराको ब्याटिङलाई एडम र जिम्मी निशमले उकासेका थिए । जिम्मीले अर्धशतक प्रहार गरे ।

उनी ३२ बलमा ५१ रनमा अविजित रहे । दिनेश खरेल ७, कप्तान कुशल भुर्तेल ०, सुमित वर्मा ०, तिर्थ दास १ रनमा आउट भए । किरणकुमार ठगुन्ना एक रनमा अविजित रहे । बलिङ लुम्बिनीका शेर मल्ल र तिलक भण्डारीले दुईदुई विकेट लिए । गुल्ददिन नाइवले एक विकेट लिए ।

काठमाडौं । राष्ट्रिय स्वतन्त्र पार्टी (रास्वपा)ले विवेकशील साझा पार्टीद्वारा राष्ट्रिय स्वतन्त्र पार्टीसँग एकीकरण गर्ने सर्वसम्मत प्रस्तावको सहर्ष स्वागत गरेको छ।

केन्द्रीय समितिको विशेष बैठकले मंसिर १४ गते आइतबार राष्ट्रिय सभागृहमा एकता घोषणासभा आयोजना गर्ने निर्णय गरेको समेत गरेको प्रवक्ता मनिष झाले बताए।

असल शासन, सुशासन र समुन्नति प्रवर्द्धन गर्ने उद्देश्यसहित विभिन्न परिवर्तनकामी तथा सुसंस्कृत राजनीतिक शक्तिहरूसँग संवाद र सहकार्यलाई थप सुदृढ गर्ने निर्णय गरेको छ।

उनले भने, ‘असल शासन र समुन्नतिसँग सरोकार राख्ने सबै सुसंस्कृत एवं परिवर्तनकामी राजनीतिक शक्तिहरूसँग मुद्दागत र साङ्गठनिक सहकार्यका पृथक् विधिहरू अवलम्बन गर्दै संवाद प्रक्रियालाई घनिभूत बनाउन राष्ट्रिय स्वतन्त्र पार्टीको उच्च संवाद समितिलाई केन्द्रीय समितिले दिएको निर्देशन अनुरूप पार्टी सचिवालयले गठन गरेको संयन्त्र सङ्घीय नेतृत्व मञ्च अनुमोदित भएको छ।’

काठमाडौं । नेपाली कांग्रेसका सभापति शेरबहादुर देउवाले आज पनि पार्टीका शीर्ष नेताहरूसँग छलफल गर्दैछन्। पार्टीभित्रको विवाद समाधान गर्नको लागि दिउँसो २ बजे महाराजगन्जस्थित निवासमा छलफल गर्न लागेको एक नेताले बताए।

आजको छलफलमा कार्यवाहक सभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा सहभागी हुँदै छन्। देउवाले बिहिबारदेखि नै निरन्तर खड्का र महामन्त्रीद्वयसँग छलफल गरिरहेका छन्। यद्यपि कुनै सहमति जुट्न सकेको छैन।

हिजोको छलफलमा चुनावअघि महाधिवेशनको विपक्षमा उभिएका आफूनिकट नेताहरू कृष्णप्रसाद सिटौला र विमलेन्द्र निधिलाई पनि बोलाएर छलफल गरेका थिए।

महाधिवेशनको मितिमा सहमति नजुट्दा कांग्रेसको केन्द्रीय समिति बैठक पटक पटक सार्दै आइरहेको छ। अब अर्को बैठक भोलि दिउँसो २ बजेका लागि बोलाइएको छ।

काठमाडौं । नेकपा एमालेका सचिव गोकर्ण विष्टले पार्टी पुनर्गठन गरेर अघि बढाउने गरी प्रतिनिधि चयनमा जिम्मेवार पूर्ण भूमिका खेल्न पार्टीपङ्क्तिमा आह्वान गरेका छन्।

मंसिर २७ गतेबाट सुरु हुने महाधिवेशनका लागि देशभर अहिले प्रतिनिधि चयनको काम भइरहेको छ। नेतृत्वमा केपी ओलीको विकल्प खोज्नुपर्ने पक्षमा उभिएका विष्टले देशमा देखा परेको विषम परिस्थितिलाई सम्बोधन गर्नसक्ने नेतृत्व चाहिने बताएका हुन्।

उनले भनेका छन्, ‘हामीले यति बेला देशमा देखा परेको विषम परिस्थितिलाई सम्बोधन गर्ने र पार्टीलाई थप गति, ऊर्जा, एकताका साथ जनताको विश्वास आर्जन गर्नेगरि बलियो बनाउनु पर्नेछ । यसका लागि समयको माग अनि आम जनता र कार्यकर्ताको चाहना अनुसार पार्टीलाई पुनर्गठन गरेर अघि बढाउने गरी प्रतिनिधि चयनमा जिम्मेवार पूर्ण भूमिका खेल्नुहुनेछ भन्ने विश्वास राखेको छु ।’

वीरगञ्ज (पर्सा) । चालू आर्थिक वर्षको चार महिनामा वीरगञ्ज नाका भएर ५४ अर्ब १२ करोड मूल्य बराबरको पेट्रोलियम पदार्थ आयात भएको छ ।

डिजेल, पेट्रोल, लिक्विफाइड पेट्रोलियम ग्यास (एलपिजी), एभिएसन टर्बाइन फ्युल (एटिएफ) र मट्टितेल आयातबाट २२ अर्ब ९० करोड राजस्व सङ्कलन भएको छ । वीरगञ्ज भन्सार कार्यालयका अनुसार गत आवको चार महिनाको तुलनामा चालू आवको सोही अवधिमा रकमको आधारमा पाँच थरिका पेट्रोलिम पदार्थको आयातमा २ अर्ब ९३ करोडले बढी हो ।

जबकी गत आवको चार महिनाको अवधिमा भने ५१ अर्ब १९ करोड मूल्य पर्ने पेट्रोलियम पदार्थको आयात हुँदा २० अर्ब ८९ करोड राजस्व सङ्कलन भएको छ । वीरगञ्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले चालू आवको चार महिनामा पेट्रोलियम पदार्थको आयातमा केही वृद्धि भएको जानकारी दिए ।

‘गत आवको चार महिनाको तुलनामा चालू आवको सोही अवधिमा पेट्रोलियम पदार्थको आयातबाट प्राप्त हुने राजस्वमा समेत ९ दशमलव ६० प्रतिशतले बढेको छ,’ उनले भने ।

कात्तिक मसान्तसम्म २४ अर्ब ४० करोड मूल्य पर्ने दुई लाख ६८ हजार ६७६ किलोलिटर डिजेल आयात भएको छ । जसबाट १० अर्ब ७३ करोड राजस्व सङ्कलन भएको छ । जबकी गत आवको सोही अवधिमा भने २१ अर्ब ८३ करोड मूल्य पर्ने डिजेल आयात भएको थियो । सोबाट ९ अर्ब ७८ करोड राजस्व सङ्कलन भएको थियो ।

चालू आवको ४ महिनामा १४ अर्ब २७ करोड मूल्य पर्ने एक लाख ६६ हजार ६६३ किलोलिटर पेट्रोल आयात भएको छ । सो पेट्रोल आयात हुँदा ९ अर्ब ४३ करोड राजस्व सङ्कलन भएको छ । जबकी गत आवको चार महिनामा भने १२ अर्ब ४३ करोड मूल्य पर्ने पेट्रोल आयात हुँदा ८ अर्ब ११ करोड राजस्व सङ्कलन भयो ।

त्यस्तै यो अवधिमा ९ अर्ब ७७ करोड मूल्य पर्ने नौ करोड ७३ लाख ९६ हजार ४७२ किलोग्राम एलपी ग्यास आयात भएको छ । सो आयातबाट १ अर्ब ८३ करोड राजस्व सङ्कलन भएको छ ।

गत आवको सोही अवधिमा भने ११ अर्ब १० करोड मूल्य पर्ने १० करोड तीन लाख ५९ हजार किलोग्राम एलपी ग्यास आयात भएको थियो । सो आयातबाट २ अर्ब आठ करोड राजस्व सङ्कलन भएको थियो ।