Tag: कोभिड–१९

चितवन । निषेधाज्ञा खुकुलो बनाएपछि चितवनमा कोभिड–१९को संक्रमण उकालो लागेको छ । स्वास्थ्य कार्यालय चितवनका अनुसार २ महिना ओरालो लागेको संक्रमण असारदेखि फेरि बढेको छ ।

चितवनमा वैशाख १५ देखि असार १४सम्म पूर्ण लकाडाउन थियो । असार १५ देखि लकडाउनलाई खुकुलो पारिएको थियो । पसल, सार्वजनिक सवारी, होटल, रेष्टुरेण्ट सञ्चालनमा केही खुकुलो व्यवस्था थिए ।

‘ओरालो लागेको संक्रमण फेरी बढेको छ’, स्वास्थ्य कार्यालय चितवनका प्रमुख दिपक तिवारीले भने, ‘बैशाख भन्दा पनि बढ्ने अवस्था छ, बढ्दो संक्रमणको चेनलाई तोड्नुपर्छ ।’ भर्चुअल रुपमा गरिएको पत्रकार सम्मेलनमा उनले सक्रिय संक्रमितको संख्या बढ्नु चूनौतिपूर्ण भएको बताए ।

२०७६ चैतमा पहिलो पटक २ जना संक्रमित बनेका थिए । सो वर्ष भदौदेखि उकालो लागेको संक्रमण कार्तिकपछि विस्तारै ओरालो लागेको थियो । गत चैतमा १ सय ३४ जना संक्रमितहुँदा ३ जनाले ज्यान गुमाए ।

वैशाखमा संक्रमण उकालो लागेर ४ हजार १ सय ७७ पुगेको थियो । जेठमा ३ हजार ८ सय ८१ जना, असारमा ३ हजार ४२ जना र यो साउनमा ३ हजार ९ सय ५१ जनामा संक्रमण पुष्टी भैसकेको छ ।

चितवनमा हालसम्म २२ हजार ६० जनामा संक्रमण देखिएको छ । जसमध्ये २ हजार ३५४ जना आइसोलेसनमा छन् । १ सय ७६ जना अस्पतालमा र २ हजार १ सय ७० जना होमआइसोलेसनमा छन् ।

चितवनमा हालसम्म ३ सय ५० जनाले ज्यान गुमाइसकेका छन् । यस्तै ४ सय ३९ जनाले उपचारका क्रममा चितवनमा ज्यान गुमाएका छन् । कोभिड संक्रमणका कारण हालसम्म चितवनमा ७ सय ८९ जनाले ज्यान गुमाए । अस्पतालमा ज्यान गुमाउने ७ सय ६१ जना मध्ये ३ सय २२ जना चितवनका हुन् । २८ जनाले होमआइसोलेसनमा ज्यान गुमाए ।

यो वर्षमात्रै चितवनका २ सय ३८ जनाले ज्यान गुमाएका छन् । २० महिनाको तथ्यांक केलाउँदा गत कार्तिकमा सबैभन्दा धेरै संक्रमण देखिएको थियो । सो महिना २ हजार १ सय ५८ जना संक्रमित बनेका थिए, ४४ जनाले ज्यान गुमाएका थिए । चितवनमा असार १५ देखि लकडाउन केही खुकुलो पारिएको थियो । उनले पछिल्लो १४ दिनको तथ्यांकलाई आधार मान्दा संक्रमितको संख्या तीव्र गतीले बढेको भन्दै बेलैमा सर्तकता अपनाउन आग्रह गरे ।

२०–२९ उमेर समूह बढी संक्रमित

चितवनको २० महिनाको तथ्यांक केलाउँदा सबैभन्दा धेरै २० देखि २९ वर्ष उमेर समूहमा संक्रमण देखिएको छ । यो उमेर समूहका ५ हजार ६२ जनामा संक्रमण देखिएको छ । सबै उमेर समूहमा पुरुष बढी संक्रमित देखिएपनि ३० देखि ३९ वर्ष उमेर समूहमा भने धेरै संक्रमित महिला छन् । १९ वर्ष कम उमेर समूहमा संक्रमण कम देखिन्छ ।

तर, कम उमेर समूहमा पहिलो चरणकोभन्दा संक्रमण बढेको तिवारीले बताए । बैशाखदेखि साउन २४ सम्म चितवनमा ७४ हजार १ सय ४३ जनाको पिसिआर तथा एण्टीजेन विधिबाट संक्रमण चेकजाँच गरिएको छ ।

२३ प्रतिशतले पाए खोप

स्वास्थ्य कार्यालय चितवनका प्रमुख दिपक तिवारीले चितवनका २३ प्रतिशत जनसंख्याले कोभिड–१९ विरुद्धको खोप लगाएको जानकारी दिएका छन् । उनका अनुसार माघ १३ देखि ५ चरणमा हालसम्म १ लाख १९ हजार ९ सय ६० जनाले खोप लगाइसकेका छन् ।

जसमध्ये पूर्ण खोप लगाउने ७८ हजार ३७ जना छन् । दुबै डोज लगाउने कोभिसिल्डका १३ हजार १ सय ७२ जना, भेरोसेलका २७ हजार ५ सय ६ छन् । जोन्सन लगाउने ३७ हजार ३ सय ५९ जना छन् ।

‘चितवनमा करिब ४ लाख ५० हजार जनालाई खोप लगाउने लक्ष्य छ’, उनले भने, ‘अहिलेसम्म २३ प्रतिशतलाई लगाइसक्यौँ, यो देशभरीमै राम्रो तथ्यांक हो ।’

सिडिओ भन्छन्– भीडभाड रोक्छौँ

चितवनका प्रमुख जिल्ला अधिकारी प्रेमलाल लामिछानेले कोभिड रोकथाम गर्ने नयाँ रणनीतिबारे छलफल भैरहेको बताए ।

‘अपेक्षा गरेजस्तो नतिजा आएन, नयाँ रणनीतिबारे छलफल गर्दैछौँ’, उनले भने, ‘भीडभाडजन्य गतिविधि रोक्न केही फरक अभ्यास गर्दैछौँ ।’ उनले केही जिम्मेवार पक्षबाटै भीडभाड गरेर कार्यक्रम, विरोधसभा हुने गरेको भन्दै आगामी दिनमा हुन नदिने प्रतिवद्धता जनाए ।

‘जिम्मेवारपक्षबाट भीडभाडजन्य काम भए, तत्काल रोक्ने प्रयास भएपनि भएन’, उनले भने, ‘अब फेरी नहोस् भनेर उहाँहरुसँग छलफल गर्दैछौँ ।’ चितवनमा सोमबारमात्रै एमाले चितवनले सुकुम्बासीको पक्षमा चौविसकोठीमा विरोध प्रर्दशन गरेको थियो ।

यस्तै एमसीसी खारेजी गर्न भन्दै १२ राजनीतिक दलको समर्थनमा जिल्ला समन्वय समितिकै सभाहलमा अन्र्तक्रिया गरिएको थियो ।

काठमाडौं । कोभिड–१९ को महामारी समुदायस्तरमा समेत फैलिँदै जाँदा स्वास्थ्य परीक्षणको दायरामा कमी आएको एवम् नागरिकको स्वास्थ्य जोखिममा पर्न गएको अवस्थाप्रति राष्ट्रिय मानव अधिकार आयोगको ध्यानाकर्षण भएको छ । आयोगले सोमबार एक विज्ञप्ती जारी गर्दै काठमाडौं उपत्यका लगायतका केही सहरमा कोरोना संक्रमितको संख्यामा कमी आउँदै गएको भए पनि रुकुम, रोल्पा, कैलालीलगायतका ठाउँमा गम्भीर बिरामीको संख्यामा कमी नआएको जनाएको छ ।

गतवर्षदेखि नै कोभिड–१९ तथा यसको रोकथाम र नियन्त्रणका लागि नेपाल सरकारले गर्दै आएको प्रयासका सन्दर्भमा मानव अधिकारको दृष्टिकोणबाट अनुगमन गरी नेपाल सरकारलाई सिफारिस गर्दै आइरहेको आयोगका प्रवक्ता समेत रहेका सहसचिव डा. टीकाराम पोखरेलले जारी गरेको विज्ञप्तीमा भनिएको छ ।

आयोगले गरेको पछिल्लो अनुगमनबाट प्राप्त तथ्यअनुसार गाउँमा परीक्षणको दायरा नबढाइएकोले संक्रमण बढेको, समाजमा कोरोना संक्रमितलाई हेर्ने र गर्ने व्यवहार अझै नकरात्मक रहेकोले लक्षण देखिएका बिरामी समेत परीक्षण गर्न नमान्दा समुदायस्तरमा कोरोना संक्रमण फैलिएको, अक्सिमिटर र रेम्डिसीभर जस्ता स्वास्थ्य सामग्री चर्को मूल्यमा विक्री भैरहेको पाइएको जनाएको छ ।

त्यसैगरी, अहिले सरकारले प्रदान गर्दै आएको कोभिड–१९ विरुद्धको खोप लगाउने क्रममा खोप केन्दको व्यवस्थापन हुन नसक्दा संक्रमण झनै फैलिने सम्भावना देखिएको, ज्येष्ठ नागरिक खोप लगाउन लामो समय लाइनमा बस्नु परेको पाइएको छ । यस्तै कतिपय केन्द्रमा दिनभर लाइनमा बस्दा समेत खोप लगाउन नपाएको, कतिपय स्थानमा विवाद भई खोप लगाउने काम अवरुद्ध भएको र लक्षित वर्गभन्दा अन्यले पहँुचका आधारमा खोप लगाएको अनुगमनको क्रममा पाइएको छ ।

कोभिसिल्ड खोपको पहिलो डोज प्राप्त गरेकाका लागि दोस्रो डोज खोपको सुनिश्चिितता हुन नसकेको भनी आयोगमा गुनासो समेत आएको आयोगले जारी गरेको विज्ञप्तीमा भनिएको छ । यसै सन्दर्भमा आयोगले कोभिड–१९ विरुद्धको खोपको व्यवस्थापनका लागि ध्यानाकर्षण गराउँदै सोमबार नेपाल सरकार स्वास्थ्य तथा जनसंख्या मन्त्रालयलाई पत्राचार गरेको छ ।

कोभिड–१९ संक्रमणको जोखिमलाई मध्यनजर गर्दै खोप लगाउने कार्यलाई व्यवस्थित गर्न, खोपमा लक्षित वर्गको पहँुच सुनिश्चित गर्न, समुदायस्तरमा परीक्षणको दायरालाई वृद्धि गर्न, कोभिसिल्डको पहिलो डोज लगाएकालाई दोस्रो डोजको व्यवस्था मिलाउन र खोप लगाउनपर्ने सबै नागरिकलाई पर्याप्त हुने गरी कोभिड–१९ विरुद्धको खोपको व्यवस्था गर्न आयोगले सरकारसँग आग्रह गरेको छ ।

काठमाडौं । नवनियुक्त सञ्चार तथा सूचना प्रविधिमन्त्री नैनकला थापासँग न्यूनतम पारिश्रमिक निर्धारण समितिका अध्यक्ष राजेन्द्र अर्यालले कोभिड-१९ प्रभावित श्रमजीवी पत्रकारलाई राहत, उपचार र क्षतिपूर्तिको व्यवस्थाका लागि आग्रह गरेका छन् ।

निरीक्षण र ब्रिफिङका लागि आज सञ्चारग्रामस्थित समितिको कार्यालयमा पुगेकी मन्त्री थापासँगको छलफलका क्रममा अध्यक्ष अर्यालले कोरोनापीडित पत्रकारको समस्या समाधान गर्न आग्रह गरेका हुन् । उनले श्रमजीवी पत्रकार ऐनको प्रभावकारी कार्यान्वयनका लागि सम्बन्धित पक्षलाई आग्रह गर्दै ऐनको कार्यान्वयन नहुने हो भने ऐन र समितिको औचित्य नहुने भएकाले त्यस्तो अवस्थामा ऐन र समिति नै खारेज गर्न अनुरोध गरे ।

अध्यक्ष अर्यालले कोभिड भ्याक्सिन लगाउन बाँकी श्रमजीवी पत्रकारलाई तत्काल भ्याक्सिनको व्यवस्था गर्न आग्रह गर्दै संक्रमण भई अस्पतालमा उपचाररत, उपचारबाट निको भएका र ज्यान गुमाएका श्रमजीवी पत्रकार र तिनका परिवारलाई राहात वापत् उपचार खर्च उपलब्ध गराउन, लामो समय उपचार गरिएकाहरुका लागि थप राहातको व्यवस्थाका साथै कोभिड प्रभावित संचारकर्मीका लागि स्थानीय, प्रदेश र केन्द्रिय सरकारले प्याकेजकै रुपमा राहत घोषणा गरी कार्यान्वयन गर्न आवश्यक रहेकामा जोड दिए ।

सरकारले निर्धारण गरेको न्यूनतम पारिश्रमिक श्रमजीवीहरुले पाउन नसकेकोले यसका लागि सरकारले कार्यान्वयनमाा कडाइ गर्न र आगामी आर्थिक वर्ष ०७८÷७९ को बजेटमा सरकारले उल्लेख गरेको, श्रमजीवी पत्रकार ऐन २०५१ को दफा १७ अन्तर्गत र श्रमजीवी पत्रकार नियमावली २०५३ मा व्यवस्था भएको कल्याणकारी कोष स्थापनाका लागि अनिवार्य व्यवस्था गर्नुपर्ने बताए ।

पत्रकारलाई न्यूनतम पारिश्रमिक नदिने, जागिरबाट हटाउने, वेतलवी विदामा बस्न दबाब दिने, अपायक सरुवा गर्ने र कल्याण्कारी कोष स्थापना नगर्ने सञ्चार प्रतिष्ठानलाई सरकारले दिने सुविधा र लोककल्याण्कारी विज्ञापनमा रोक लगाउन पनि उनले माग गरे ।

कोरोनाका कारण रोजगारी गुमाएका श्रमजीवीका लागि सरकारले बजेट वक्तव्य मार्फत घोषणा गरेको लेखनवृत्ति कार्यक्रम प्रभावकारी ढंगले तत्काल कार्यान्वयनमा आउन सके राहत मिल्ने बताउँदै अध्यक्ष अर्यालले आमसञ्चार क्षेत्रलाई सरकारले सेवामूलक उद्योगका रुपमा मान्यता दिइसकेकोले यस क्षेत्रलाई कोभिड-१९ प्रभावित क्षेत्र अन्तर्गत पुर्नकर्जाको सुविधा उपलब्ध गराई उक्त कर्जा श्रमजीवी पत्रकार, कर्मचारी र कामदारको पारिश्रमिकमा मात्र खर्च गराउन नसक्ने गरी आवश्यक प्रबन्ध मिलाउन पनि आग्रह गरे ।

अध्यक्ष अर्यालले सरकारले उपलब्ध गराउने लोककल्याणकारी विज्ञापन वापतको रकममा कम्तिमा १५ प्रतिशतले वृद्धि गर्न, सरकारी विज्ञापन समानुपातिक ढंगले वितरण गर्न, अनलाइन सञ्चारमाध्यमलाई व्यवस्थापन र नियमन गर्दै लोककल्याणकारी विज्ञापन उपलब्ध गराउन, स–साना कामका लागि काठमाडौँ धाउनुपर्ने बाध्यता हटाउन सूचना तथा प्रसारण विभागबाट गरिने कार्यसम्पादन संचारमाध्यम दर्ता नविकरण र परिचय पत्र वितरणसम्बन्धी कार्य जिल्ला हुलाक कार्यालयबाट गर्ने गरी आवश्यक व्यवस्था गर्न जरुरी भएको उल्लेख गर्दै लोककल्याण्कारी विज्ञापन भुक्तानी प्रकृया सरल बनाउन र सञ्चारमाध्यमको वर्गीकरण तत्काल सार्वजनिक गर्न पनि उनले माग गरे ।

साथै, साना स्वरोजगारमूलक सञ्चारमाध्यमको विकास र संरक्षणका लागि आवश्यक नीति अख्तियार गर्न पनि माग गरे । मन्त्री थापा सञ्चार मन्त्रालयसँग सम्बन्धित निकायको भ्रमणका क्रममा आज समितिको कार्यालयमा पुगेका थिए ।
-रासस

काठमाडौं । कोभिड-१९ बाट संक्रमितको उपचारका लागि काठमाडौंमहानगरपालिकाले सक्रियता बढाएको छ । पछिल्लो समय काठमाडौंमा बिरामीको संख्या बढिरहेको र उपचारमा समस्या हुँदा महानगरपालिकाले अस्पताललाई आवश्यक उपकरण र कर्मचारीसमेत सहयोग गरेर उपचारका लागि सक्रियता देखाएको हो ।

शुक्रबारदेखि महानगरको अनुदान सहयोगबाट नरदेवी आयुर्वेदिक अस्पतालमा अक्सिजनसहित ५० श्ययाको आइसोलेशन सञ्चालनमा आएको छ । आइसोलेशन सञ्चालन गर्न महानगर र अस्पतालबीच गत वैशाख २७ गते सम्झौता भएको थियो । अस्पतालको क्षमता ११८ श्ययाको हो । शुरुवातमा २५ श्ययाको एचडीयू र २५ श्ययाको आइसोलेशनबाट सेवा थालिएको हो ।

महानगर प्रमुख विद्यासुन्दर शाक्यले महामारीमा जनताको जीवनरक्षाका लागि विकासका कामलाई रोकी स्वास्थ्य क्षेत्रमा लगानी बढाइएको बताए । अस्पतालले आयुर्वेदतर्फ सात कन्सल्टेन्ट र आधुनिक चिकित्सातर्फ दुई कन्सल्टेन्टसहित १२ आयुर्वेद चिकित्सक, चार मेडिकल अफिसर, २२ नर्सिङ स्टाफ, दुई फिजियो थेरापिस्ट, १५ आयुर्वेद स्वास्थ्यकर्मी, लेखा प्रशासन पाँच र सफाइ तथा सहयोगी कर्मचारी २५ लाई आइसोलेशनका लागि खटाएको छ ।

त्यसैगरी शुक्रबारदेखि नै सामाखुशीमा रहेको राधास्वामी कोभिड आइसोलेशन तथा अक्सिजन थेरापी सेन्टर पनि शुरु गरिएको छ । सेन्टर सञ्चालन गर्न विसं २०७७ कात्तिक १४ गते मन्त्रिपरिषद्ले निर्णय गरेको थियो । महानगरको आर्थिक अनुदानमा शुरु गरिएको सेन्टर नेपाली सेनाले सञ्चालन गर्नेछ । अहिले ८८ श्यया अक्सिजन र ९६ सामान्यबाट शुरु भएको हो । आवश्यकताका आधारमा ९६ श्ययालाई पनि अक्सिजनसहितको बनाउँदै लगिने बताइएको छ ।

महानगरपालिकाले अन्य ११ अस्पतालसँग सम्झौता गरी कोरोनाका बिरामीको स्वास्थ्य उपचारका लागि आवश्यक पर्ने उपकरण प्रदान गरिरहेको छ । महानगरको स्वास्थ्य महाशाखा प्रमुख हरि कुँवरका अनुसार गत शनिबारसम्म स्वाब सङ्कलनका लागि पाँच केन्द्र बनाएर काम गरिरहेको महानगरपालिकाले हरेक दिन संक्रमितको संख्या बढ्दै गएकाले आइतबारदेखि १६ वटा स्थल तोकेर परीक्षणलाई तीव्र बनाएको छ ।

महानगरका ३२ वडाबाट मात्रै अहिले हरेक दिन ६०० जनाको परीक्षण हुने गरेको र परीक्षण गरिएकामध्ये ४२० मा पुष्टि हुने गरेको महानगरपालिकाको जनस्वास्थ्य महाशाखाले जनाएको छ । महानगरपालिकाका ल्याब टेक्निसियन राधिका कुइँकेलका अनुसार परीक्षणका लागि आवश्यकताअनुरुप टोली तयारी अवस्थामा रहेका छन् । कुइँकेलले भने, ‘कोरोनाको शङ्का देखिएका र वडाले खटाएअनुसार अहिले परीक्षणको कामलाई व्यापक बनाइएको छ।’

एम्बुलेन्सको आवश्यकता पर्ने बिरामीका लागि अस्पतालसम्म लैजाने र ल्याउने व्यवस्था पनि महानगरपालिकाले नै गर्दै आएको छ । यसका लागि पनि बिरामीले पैसा तिर्नु पर्दैन । सो सेवा महानगरका ३२ वडामध्ये सात स्थानबाट नागरिकले प्राप्त गर्न सक्नेछन् । कोरोनाका बिरामीले मात्रै होइन अन्य दीर्घ रोग भएका कसैलाई अस्पतालसम्म जान र आउन परेमा पनि महानगरपालिकाले निःशुल्क एम्बुलेन्सको व्यवस्था गरेको छ । त्यसका लागि आवश्यक पर्ने जो कोहीले ११८० महानगरपालिकाको हटलाइनमा सम्पर्क गर्नुपर्ने छ ।

काठमाडौं । कोभिड–१९ बाट उत्पन्न वर्तमान परिस्थितिमा आम नागरिकको स्वास्थ्योपचारको उपलब्धता तथा जीवनको अधिकारबाट वञ्चित हुनुपरेको अवस्थाप्रति राष्ट्रिय मानव अधिकार आयोगको ध्यानाकर्षण भएको छ । आयोगले एक विज्ञप्ती जारी गर्दै पछिल्लो समय अस्पतालमा शैया र अक्सिजनको अभावमा सैयौँ व्यक्तिले मृत्युवरण गर्नुपरेको आयोगलाई विभिन्न माध्यमबाट जानकारी प्राप्त भएको जनाएको हो ।

अक्सिजनको अभावमा गत बुधबार मात्रै रुपन्देहीमा ९ जना तथा नेपालगञ्जमा ६ जनाको र विहीबार काठमाडौँका वीर अस्पताल तथा ट्रमा सेन्टरमा १८ जनाको मृत्यु भएकोे सञ्चार अनुगमनबाट पाइएको आयोगका प्रवक्ता समेत रहेका सहसचिव डा. टिकाराम पोखरेलले जारी गरेको विज्ञप्तीमा उल्लेख छ । उनका अनुसार उपत्यकाका मेडिकेयर, मेडिसिटी, ओम, हेल्पिङ ह्याण्डस, दिर्घायु, करुणा, बयोधा, मध्यपुर ठिमी, स्टारलगायतका अस्पताल तथा रुपन्देहीको युनिभर्सल अस्पतालले अक्सिजनको अभाव देखाउँदै नयाँ बिरामी भर्ना गर्न नसकिने बताएको बुझिएको छ ।

महामारी शुरु भएको एक वर्ष बितिसक्दा समेत अक्सिजन आपूर्ति बढाउन नेपाल सरकारबाट सार्थक पहल नहुँदा आम नागरिकले अक्सिजनको अभावमा जीवन गुमाउन बाध्य भएको आयोगको ठहर छ । औषधि आपूर्तिको अभावमा कोभिड–१९ विरुद्धको खोपको दोस्रो मात्रा रोकिएको, भेन्टिलेटर, सघन उपचार कक्ष (आइसियु), संक्रमितलाई आवश्यक पर्ने औषधि रेम्डिसिभर लगायत मेडिकल सामग्रीको अभाव हुँदै गएको र उपलब्ध औषधि तथा मेडिकल सामग्रीको पनि बिरामीले महँगो मूल्य तिर्नु परेको आयोगले अनुगमनबाट पाएको जनाएको छ ।

निषेधाज्ञाका कारण दैनिक ज्याला मजदुरी गरी खाने श्रमिक पनि भोकै बस्न बाध्य भएको समाचार सञ्चारमाध्यममा प्रकाशन भइरहेको प्रति पनि आयोगको ध्यानाकर्षण भएको जनाइउको छ । यस विषयमा आयोगका सदस्य लिली थापा नेतृत्वको टोलीले नेपाल सरकारका उपप्रधानमन्त्री एवम् कोभिड–१९ संकट व्यवस्थापन केन्द्र उच्चस्तरीय समिति (सिसिएमसी) संयोजक ईश्वर पोखरेललाई भेटी ध्यानाकर्षण गराइसकेको प्रवक्ता पोखरेलले बताए ।

अहिलेको जटिल परिस्थितिमा कोभिड–१९ लगायत सबै गम्भीर प्रकारका बिरामीको स्वास्थ्योपचारको व्यवस्था मिलाउन, अस्पतालमा अक्सिजन सहितका थप शैयाको व्यवस्था मिलाउन आयोगले सरकारसँग आग्रह गरेको छ । यस्तै बिरामीलाई अत्यावश्यक पर्ने अक्सिजनको उत्पादन तथा आपूर्ति बढाउने सन्दर्भमा प्रभावकारी कदम चाल्न, कोभिड विरुद्धको दोस्रो चरणको खोपको तत्काल व्यवस्था गर्न, भेन्टिलेटर, सघन उपचार कक्ष (आइसियु) लगायत मेडिकल सामग्री, खाद्यान्न तथा अत्यावश्यक सेवा र वस्तुकोे सहज आपूर्तिको व्यवस्था मिलाउन पनि आयोगले सरकारको ध्यानाकर्षण गराएको छ ।

साथै, अग्रपंक्तिमा रहेका स्वास्थ्यकर्मी, सुरक्षाकर्मी लगायतको मनोवल उच्च राख्न, न्यून आर्जन भएका श्रमिक तथा ज्यालामजदुरी गरी जीवनयापन गर्ने वर्गको लागि जिविकोपार्जनका आवश्यक कार्यक्रमको व्यवस्थापन गर्न गराउन आयोगले विज्ञप्तीमार्फत नै सरकारसँग आग्रह समेत गरेको छ ।

लुम्बिनी । दाङ र बाँकेमा गरी १४ जनाको कोभिड संक्रमणबाट मृत्यु भएको छ । मृत्यु भएकामध्ये दाङका ६ र बाँकेका ८ छन् ।

कोरोनाको उपचार हुँदै आएको नेपालगञ्जस्थित भेरी अस्पतालमा ५, शिक्षण अस्पताल कोहलपुरमा२ र १ जनाको होम आइसोलेशनमा मृत्यु भएको जिल्ला कोभिड सङ्कट व्यवस्थापन केन्द्रका स्रोत व्यक्ति तेज ओलीले जानकारी दिए ।

उनका अनुसार भेरी अस्पताल नेपालगञ्जमा उपचाररत सल्यान कुमाख गाउँपालिका-१ निवासी ६७ वर्षीया महिला, बर्दिया मधुवन नगरपालिका-६ निवासी ५९ वर्षीय पुरुष, बैजनाथ गाउँपालिका-६ बाँके निवासी ३५ वर्षीया महिला, खजुरा गाउँपालिका-३ बाँके निवासी ७५ वर्षीया महिला र नेपालगञ्ज उपमहानगरपालिका-५ निवासी ६१ वर्षीया महिलाको मृत्यु भएको हो ।

यसैगरी शिक्षण अस्पताल कोहलपुरमा कोहलपुर नगरपालिका-२ निवासी २८ वर्षीय पुरुष र कैलाली लम्कीचुहा नगरपालिका निवासी ४० वर्षीय पुरुषको मृत्यु भएको छ भने खजुरा गाउँपालिका-१ बाँके निवासी ६४ वर्षीया महिलाको होम आइसोलेशनमा मृत्यु भएको जिल्ला कोभिड सङ्कट व्यवस्थापन केन्द्रका स्रोत व्यक्ति ओलीले बताए । यससँगै बाँकेमा कोरोनाबाट मृत्यु हुनेको संख्या २२२ पुगेको छ । बाहिरी जिल्लाबाट यहाँ उपचार गराउन आउँदा १६७ को मृत्यु भएको छ ।

काठमाडौ । काठमाडौं उपत्याकाभित्रका सबै सरकारी अस्पताल तथा स्वास्थ्य मन्त्रालयसँग सम्झौता गरेर कोभिड–१९ उपचार गरिरहेका निजी अस्पतालको लागि आवश्यक अक्सिजन सिलिण्डर आपूर्तिको व्यवस्था गर्ने जिम्मेवारी स्वास्थ्य तथा जनसंख्या मन्त्रालयलाई दिइएको छ । यस्तै काठमाडौं उपत्यका बाहिरका सबै अस्पतालमा आवश्यक अक्सिजन सिलिण्डरको आपूर्तिका व्यवस्था भने अस्पतालको समन्वयमा जिल्ला कोभिड संकट व्यवस्था केन्द्र (डीसीएमसी) ले गर्ने व्यवस्था मिलाइएको छ ।

बिहिबार प्रधानमन्त्री तथा मन्त्रिपरिषद्को कार्यालय सिंहदरबारमा मुख्यसचिवको कार्यकक्षमा कोभिड–१९ को रोकथाम, नियन्त्रण तथा उपचारका सम्बन्धमा भएको छलफलले यस्तो निर्णय गरेको हो । बैठकले उपत्यकामा मन्त्रालय र उपत्यका बाहिर डीसीसीएमसीलाई ‘मेडिकल अक्सिजनको प्रयोग र आवश्यकता सम्बन्धी मापदण्ड, २०७८’ बमोजिम अक्सिजन सिलिण्डर मिलाउने जिम्मेवारी दिएको हो ।

बैठकले चिकित्सकको सिफारिस बाहेक कसैले पनि घरमा वा संस्थामा अक्सिजन सिलिण्डर नराख्न, भएका सिलिण्डर नजिकको अस्पताल र स्थानीय प्रशासनमा उपलब्ध गराउन स्वास्थ्य तथा जनसंख्या मन्त्रालयले सार्वजनिक सूचना आव्हान गर्न पनि निर्देशन दिएको छ ।

अक्सिजन सिलिण्डर सम्बन्धी सूचनामूलक सन्देश सरकारी सञ्चार माध्यमम र टेलिफोन सेवा प्रदायकले रिंग ब्याक टोनको रुपमा प्रसारण गर्ने गराउने व्यवस्था गर्न सञ्चार तथा सूचना प्रविधि मन्त्रालयलाई पनि निर्देशन दिएको प्रधानमन्त्री तथा मन्त्रिपरिषद्को कार्यालयका प्रवक्ता समेत रहेका सहसचिव किरणराज शर्माले नेपाल प्रेसलाई जानकारी दिए ।
उनका अनुसार घरमा अक्सिजन सिलिण्डर राखे नराखेको, सम्बन्धित उद्योगले अस्पताल बाहेक अन्यत्र निजी प्रयोगमा दिए नदिएको अनुगमन स्थानीय प्रशासनमार्फत गर्ने गराउने व्यवस्था गर्न गृह मन्त्रालयलाई निर्देशन दिएको छ ।

यसका लागि प्रत्येक अक्सिजन ग्यास उद्योगमा प्राप्त सिलिण्डर र वितरण भएका सिलिण्डरको अभिलेख राख्नका लागि सशस्त्र प्रहरी खटाउने र त्यसको नियमित विवरण प्राप्त हुने व्यवस्था मिलाउने व्यवस्था गर्ने पनि बैठकले निर्णय गरेको छ ।

मापदण्ड विपरित अक्सिजन सिलिण्डर प्रयोग वा वितरण गर्न कसैलाई दवाव नदिने, उद्योग र अस्पतालले पनि कुनै किसिमले मापदण्ड विपरित प्रयोग नगर्ने नगराउने निर्णय बैठकले गरेको छ ।

नेपालले भन्सरा बिन्दुबाट आफै ढुवानी गर्न सक्ने भए चीनबाट स्थलमार्गबाट अक्सिजन सिलिण्डर ल्याउन सकिने देखिएकोले त्यस बमोजिम ढुवानी गर्न सक्ने कुराको जानकारी परराष्ट्र मन्त्रालयले चिनिया पक्षलाई गराउने र ढुवानी गर्दा सुरक्षाको व्यवस्था गृह मन्त्रालयले मिलाउने तथा ढुवानी खर्च स्वास्थ्य तथा जनसंख्या मन्त्रालयले भूक्तानी दिने पनि निर्णय भएको छ ।

सबै अक्सिजन पलान्ट २४ सै घण्टा सञ्चालन हुने व्यवस्था मिलाउने, खाली अक्सिजन सिलिण्डर तत्काल प्लान्टमा पठाउने र प्लान्टले पनि तत्काल भरी फिर्ता पठाउने व्यवस्था गर्ने, यसको समन्वय र अनुगमन स्वास्थ्य तथा जनसंख्या मन्त्रालयको समन्वयमा उद्योग मन्त्रालयले गर्ने र यस कार्यमा आवश्यक सहयोग गृह मन्त्रालय र स्थानीय प्रशासनले गर्ने निर्णय बैठकले गरेको प्रवक्ता शर्माले बताए ।

बैठकमा प्रधानमन्त्री तथा मन्त्रीपरिषद्को कार्यालयका सचिव, गृह मन्त्रालयका सचिव, स्वास्थ्य तथा जनसंख्या मन्त्रालयका सचिव, उद्योग, वाणिज्य तथा आपूर्ति मन्त्रालयका सचिव र परराष्ट्र मन्त्रालयका सचिव लगायतको सहभागितामा रहेको जनाएको छ ।

काठमाडौं । कोभिड-१९ को संक्रमणका कारण बैंकर नीरज श्रेष्ठको निधन भएको छ । प्रहरी अस्पतालमा केही दिन देखी उपचार गराइरहेका श्रेष्ठको बुधबार निधन भएको हो ।

कोभिडका कारण स्वास्थ्यस्थिति जटिल बन्दै गएपछी भेन्टिलेटरमा राखेर उपचार गरिएको थियो । श्रेष्ठका श्रीमती र एक छोरी रहेका छन् ।

स्टाडर्ड चार्टड बैंकबाट सन १९८९ बाट आफ्नो बैकिङ करिअर सुरु गरेका श्रेष्ठ माछापुच्छ्रे बैंकका प्रमूख कार्यकारी अधिकृत भएर काम गरेका थिए । उनी सनराइज बैंकको सिइओ समेत नियुक्ती भएपनि बैंकको सञ्चालक समितिभित्रको बिबादका कारण उनले नियुक्ती लिएनन् ।

नेपालको बैंकिङ क्षेत्रमा राम्रो र स्वच्छ छवी भएका श्रेष्ठको निधनले यस क्षेत्रलाई अपुरणिय क्षति पुगेको बैंकर्सहरुले बताएका छन् ।

काठमाडौं । सञ्चार तथा सूचना प्रविधिमन्त्री पार्वत गुरुङले कोभिड-१९ बारे अफवाह फैलाउने गरी भ्रामक समाचार प्रकाशन/प्रसारण नगर्न आमसञ्चारमाध्यमलाई आग्रह गरेका छन् ।

मन्त्रालयद्वारा  बिहीबार आयोजित छलफलमा सरकारका प्रवक्ता गुरुङले पछिल्ल्लो समयमा मिडियामा जनतालाई आतङ्कित गर्ने गरी समाचार आउने गरेको बताउँदै सत्यतथ्य मात्र समाचार सम्प्रेषण गर्न अनुरोध गरे ।

सरकारका प्रवक्ताले भने,‘यो बेला भनेको सकारात्मक सोचका साथ काम गर्ने बेला हो तर कोभिडबारे नकारात्मक सन्देश बढी आयो, मानवीय हिसाबले सकारात्मक सन्देश दिनुहोस्’, मन्त्री गुरुङले गोरखापत्र, राष्ट्रिय समाचार समिति, रेडियो नेपाल र नेपाल टेलिभिजनलाई कोरोनाबारे सन्देशमूलक र सकारात्मक समाचार र कार्यक्रम सम्प्रेषण गर्नसमेत निर्देशन दिएका छन् ।

उनका अनुसार मन्त्रालयले कोरोनाबारे जनचेतनामूलक समाचार र कार्यक्रमबारे योजना बनाउन सम्बन्धित संघसंस्थाको सहभागितामा सचिवालय गठन गर्ने भएको छ । मन्त्री गुरुङले कोभिडबारे सकारात्मक भूमिका निर्वाह गर्न प्रेस काउन्सिल नेपाल र सूचना तथा प्रसारण विभागलाई निर्देशन पनि दिएका छन् ।

कोभिड-१९ न्यूनीकरणबारे नीति बनाउन सञ्चारमाध्यमसँग पनि छलफल गरिने उनको भनाइ थियो । मन्त्री गुरुङले वर्तमान समयमा आमसञ्चारमाध्यमलाई बढीभन्दा बढी कोभिड केन्द्रित हुन अनुरोध पनि गरे ।

सो अवसरमा सञ्चार मन्त्रालयका सचिव हरिप्रसाद बस्यालले आमसञ्चारमाध्यमले सरकारले गरेका सकारात्मक कार्यभन्दा पनि हुँदै नभएका भ्रामक र असत्य समाचार सम्प्रेषण गरिरहेको जनाउँदै त्यसो नगर्न सम्बन्धित सबैमा आग्रह गरे ।

काठमाडौं । मुलुकभरका ७७ जिल्लामध्ये दुइ तिहाई जिल्लामा निषेधाज्ञा जारी भएको छ । सोमबार साँझसम्म ४५ जिल्लामा निषेधाज्ञा जारी भएकोमा आज थप ६ जिल्लामा निषेधाज्ञा जारी भएसँगै निषेधाज्ञा जारी हुने जिल्लाको संख्या दुइ तिहाइ पुगेको हो ।

गृह मन्त्रालयका अनुसार मंगलबारबाट रोल्पा, मुगु, बारा, र सिरहामा पुर्ण तथा तनहुँ र म्याग्दीमा आंशिक निषेधाज्ञा जारी भएसँगै निषेधाज्ञा जारी हुने जिल्लाको संख्या ५१ पुगेको हो । अहिलेसम्म ३९ जिल्लामा पुर्ण तथा १२ जिल्लामा आंशिक निषेधाज्ञा जारी भएको मन्त्रालयका प्रवक्ता समेत रहेका सहसचिव जनकराज दाहालले नेपाल प्रेसलाई जानकारी दिए ।

गत १३ वैशाखको मन्त्रीपरिषद वैठकले काठमाडौं उपत्यका र तराईका जिल्लामा ५ सयभन्दा बढी तथा पहाडी र हिमाली जिल्लामा २ सयभन्दा बढी सक्रिय संक्रमितको संख्या भए प्रमुख जिल्ला अधिकारीले निषेधाज्ञा जारी गर्नसक्ने निर्णय गरेको थियो । मन्त्रिपरिषद बैठकले १५ दिनसम्म निषेधाज्ञा जारी गर्न सक्ने अधिकार जिल्ला स्तरीय कोभिड–१९ संकट व्यवस्थापन केन्द्र (डीसीसीएमसी) लाई दिएपछि यसैका आधारमा विभिन्न जिल्लाले निषेधाज्ञा जारी गरेका हुन् ।

काठमाडौं । कोभिड–१९ संक्रमणको रोकथाम तथा जोखिम न्यूनीकरणका लागि नेपाल प्रहरीले सञ्चालन गरेको तपाईंको मास्क खोई ? कार्यक्रम अन्तर्गत पछिल्लो २४ घण्टामा २३ हजार ४ सय ३७ जनालाई निःशुल्क मास्क वितरण गरेको छ । नयाँ भेरियन्ट सहितको कोभिड–१९ को संक्रमण बढ्दै गएक बेला यसबाट सिर्जना हुन सक्ने समस्या र चुनौतीलाई ध्यान दिदैँ प्रहरीले यो अभियान सञ्चालन गरिरहेको छ ।

संक्रमण रोक्न तोकिएको सुरक्षा मापदण्डलाई दुरुस्त रुपमा कार्यान्वयनका लागि प्रहरीले देशव्यापी रप्मा ‘संक्रमणबाट आफू बचौँ र अरुलाई पनि बचाऔँ’ भन्ने नारा सहित ‘तपाईंको मास्क खै रु’ लगायतका विभिन्न सचेतनामूलक कार्यक्रमलाई अभियानकै रुपमा सञ्चालन गरेको हो । अभियानको क्रममा पछिल्लो २४ घण्टामा मास्क नलगाई हिँडडुल गर्ने १३ हजार ६ सय २१ जनालाई केही समय होल्डिङ गरेर सम्झाई बुझाई छोडेको प्रहरी प्रवक्ता प्रहरी बरिष्ठ उपरीक्षक (एसएसपी) बसन्त बहादुर कुँवरले नेपाल प्रेसलाई जानकारी दिए ।

प्रवक्ता कुवँरका अनुसार तोकिएको मापदण्ड उल्लंघन गर्ने ९ सय ७ जनालाई संक्रामक रोग ऐन, २०२० बमोजिम जरिवाना र यसै क्रममा देशभर संचालित सचेतनामूलक कार्यक्रममा ३० हजार ६ सय ९० जना सहभागी भएका छन् । कार्यक्रम अन्तर्गत नेपाल प्रहरीले विभिन्न स्थानमा कोभिड–१९ को जोखिम न्यूनीकरणको लागि सचेतनामूलक सन्देश सहितको माइकिङ, सवारी साधनको जाँच, सचेतनामूलक प्लेकार्ड प्रदर्शन लगायतका कार्यक्रम गरिरहेकाे छ ।

कार्यक्रममार्फत भीडभाड नगर्न, अनावश्यक रुपमा घर बाहिर हिँड्डुल नगर्न, स्वास्थ्य सुरक्षाका मापदण्ड पालनाका लागि मास्क तथा स्यानिटाइजरको सहि प्रयोग र नियमित मास्क लगाउन सबैमा अनुरोध गर्दै आएको छ । कार्यक्रमलाई थप प्रभावकारी र सफल बनाउन नेपाल प्रहरीले अन्य सुरक्षा निकाय लगायतका सरोकारवालासँग आवश्यक समन्वय, सहकार्य गरी अनुगमनलाई समेत तिब्रता दिएको छ ।

काठमाडौं । आइतबार साँझसम्म ४१ जिल्लामा निषेधाज्ञा जारी भएकोमा आज थप ४ जिल्लामा निषेधाज्ञा जारी भएको छ । गृह मन्त्रालयको विवरण अनुसार आजबाट महोत्तरी, डोल्पा, डोटी र नवलपरासी पूर्वमा निषेधाज्ञा जारी गर्ने निर्णय जिल्ला स्तरीय कोभिड–१९ संकट व्यवस्थापन केन्द्र (डीसीसीएमसी)ले गरेका हुन् ।

ति मध्ये महोत्तरीमा २२ गते बुधबार साँझ ६ बजेदेखि ३१ गते राती १२ बजेसम्म, डोल्पा र डोटीमा भोलि मंगलबार राती १२ बजेदेखि ३१ गते राती १२ बजेसम्म र नवलपरासी पूर्वमा पनि भोलि २१ गते मंगलबार राती १२ बजेदेखि जेठ ४ गते राती १२ बजेसम्म लागू हुनेछ ।

मन्त्रालयका प्रवक्ता जनकराज दाहालका अनुसार अहिलेसम्म ४५ जिल्लामा निषेधाज्ञा जारी भएकोमध्ये ९ जिल्लामा मात्र आंशिक, बाँकी ३६ जिल्लामा पूर्ण रुपमा निषेधाज्ञा जारी भएको छ । आवश्यकता अनुसार जिल्ला स्तरीय कोभिड–१९ संकट व्यवस्थापन केन्द्र (डीसीसीएमसी)ले निषेधाज्ञा बढाउन सक्ने प्रवक्ता दाहालले नेपाल प्रेसलाई बताए ।

गत १३ वैशाखको मन्त्रीपरिषद वैठकले काठमाडौं उपत्यका र तराईका जिल्लामा ५ सयभन्दा बढी तथा पहाडी र हिमाली जिल्लामा २ सयभन्दा बढी सक्रिय संक्रमितको संख्या भए प्रमुख जिल्ला अधिकारीले निषेधाज्ञा जारी गर्नसक्ने निर्णय गरेको थियो । मन्त्रिपरिषद बैठकले १५ दिनसम्म निषेधाज्ञा जारी गर्न सक्ने अधिकार जिल्ला स्तरीय कोभिड–१९ संकट व्यवस्थापन केन्द्र (डीसीसीएमसी) लाई दिएपछि यसैका आधारमा विभिन्न जिल्लाले निषेधाज्ञा जारी गरेका हुन् ।

काठमाडौं । मुलुकको आन्तरिक हवाई उडान पूर्वनिर्धारित उडान तालिकाअनुसार सोमबार दिनभर जारी रहने हवाई सेवा प्रदायक कम्पनीले जनाएका छन् ।

कोभिड-१९ महामारी जोखिम नियन्त्रणका लागि सरकारले यही वैशाख १६ गतेदेखि काठमाडौँ उपत्यकासहित विभिन्न स्थानमा लागू गरेको निषेधाज्ञा तथा महामारीको जोखिमलाई दृष्टिगत गर्दै सरकारले आज रातिदेखि आन्तरिक उडान स्थगित गर्ने निर्णय गरेको थियो । यात्रुको सुविधालाई दृष्टिगत गर्दै आजका लागि तोकिएका उडान दिनभर यथावत् रुपमा सञ्चालन हुने कम्पनीले जनाएका छन् ।

यती एयरलाइन्सले आफ्नो कोटामा परेका १० उडान यथावत् सञ्चालनमा रहेको कम्पनीका प्रवक्ता सुदर्शन बर्तौलाले जानकारी दिए । बुद्ध एयरले पनि आफ्ना निर्धारित उडान सञ्चालन भइरहेको जनाएको छ । बुद्ध एयरका सूचना अधिकारी दीपेन्द्रकुमार कर्णले आज २५ उडानमार्फत २ हजार ५०० भन्दा बढी यात्रुले सेवा लिने बताए । यात्रु सङ्ख्याका आधारमा निर्धारित उडान मर्ज हुने सम्भावना रहेको पनि उनले जानकारी दिए ।

सरकारले आज रातिबाट आन्तरिक तथा यही वैशाख २२ गते मध्यरातिदेखि अन्तरराष्ट्रिय उडान स्थगन गर्ने निर्णय गरेको थियो । त्रिभुवन अन्तरराष्ट्रिय विमानस्थलबाट आन्तरिकतर्फ १० हेलिकोप्टरसहित २० तथा अन्तरराष्ट्रियमा तीन नेपालीसहित २० हवाई सेवा प्रदायक कम्पनीले उडान भर्दै आएका छन् ।

–रासस

काठमाडौं । सरकारले सोमबार काठमाडौंमा कोभिड-१९ उपचारका लागि थप १ हजार शय्या थप गर्ने बताएको छ ।

स्वास्थ्य तथा जनसंख्या मन्त्री हृदयेश त्रिपाठीले भिडियो सन्देश जारी गर्दै सरकार नागरिकको स्वास्थ्यप्रति संवेदनशील रहेको बताए ।

मन्त्री त्रिपाठीले कोभिड उपचारका लागि आवश्यक पर्ने औषधीसहरु दुईतीन दिनमै ल्याइने जानकारी दिए । भारतमा संकट गहिरिँदा अक्सिजन आपूर्तिमा समस्या भएपनि आतंकित हुनपर्ने अवस्था नरहेको बताए ।

‘सबै जिम्मा सरकारले लिएको छ । सरकार प्रतिबद्धता पुरा गर्न कटिबद्ध छ’ मन्त्री त्रिपाठीले भने ‘बाहिर प्रचार भएजस्तो सरकारले हातखुट्टा छाडेको छैन । जिम्मेवारीका साथ सरकार कर्तव्यपालनमा अघि बढेको छ ।’

भ्याक्सिन र अक्सिजन जोहो गर्न सरकार दत्तचित्त भएर लागेको जानकारी दिँदै मन्त्री त्रिपाठीले व्यवस्थापनमा भएको त्रुटिको नैतिक जिम्मेवारी मन्त्रीको हिसाबले आफूले लिने बताए ।

संक्रमणको दरलाई घटना निषेधाज्ञा महत्वपूर्ण रहेको बताउँदै उनले यसमा सहयोग गर्न आग्रह गरे ।

काठमाडौं । कोरोना नियन्त्रणका लागि भन्दै देशका विभिन्न स्थानमा निषेधाज्ञा जारी गर्ने क्रम जारी छ । गृह मन्त्रालयको अहिलेसम्मको विववरण अनुसार शनिबार साँझसम्म मुलुकका ७७ जिल्लामध्ये २२ जिल्ला पूर्णरुपमा र ७ जिल्ला आंशिक रुपमा बन्द गर्ने जिल्ला स्तरीय कोभिड–१९ संकट व्यवस्थापन केन्द्र (डीसीसीएमसी) ले निर्णय गरिसकेका छन् ।

मन्त्रालयका अनुसार अहिलेसम्म बाँके, सुर्खेत, काठमाडौं, ललितपुर, भक्तपुर, कास्की, कैलाली, पर्सा, दाङ, कञ्चनपुर, पाल्पा, चितवन, रुपन्देही, सुनसरी र प्यूठान गरेर १५ जिल्लामा निषेधाज्ञा जारी भइसकेको छ भने आज शनिबार राति १२ बजेबाट जाजरकोट र गुल्मी गरेर २ जिल्लामा निषेधाज्ञा जारी हुदैँछ । यस्तै भोलि आइतबार बिहान ६ बजेबाट सल्यान, रुकुम पश्चिम, डडेल्धुरा र आइतबार राति ८ बजेदेखि उदयपुर र राति १२ बजेदेखि झापा गरेर थप ५ जिल्लामा निषेधाज्ञा जारी हुने मन्त्रालयका प्रवक्ता सहसचिव जनकराज दाहालले नेपाल प्रेसलाई जानकारी दिए ।

यस्तै बागलुङको बागलुङ नगरपालिकाका वडा नम्बर १२, १३ र १४ साविक अमलाचौर, पैयुपाटा र नारायणस्थान गाविसमा निषेधाज्ञा जारी भइसकेको छ । बर्दियाको गुलरिया नगरपालिकास्थित ५ र ६ नम्बर वडाका सबै क्षेत्र, बाँसगढी नगरपालिकाको बाँसगढी बजार क्षेत्र, बारबर्दिया नगरपालिकाको जयनगर र कतर्निया बजार क्षेत्र, मधुवन नगरपालिकाको लाली बजार ओराली बजार क्षेत्र, ठाकुरबाबा नगरपालिकाको बगनाहा, भूरीगाउँ र ठाकुरद्वारा बजार क्षेत्र, राजपुर नगरपालिकाको राजापुर र मानपुर टपरा बजार क्षेत्र, बढैयाताल गाउँपालिकाको भोलागौडी, मैनापोखर र शीतला बजार क्षेत्र र गेरुवा गाउँपालिकाको शान्तिबजार र पशुपतिनगर बजार क्षेत्रमा निषेधाज्ञा जारी गरिएको छ ।

यस्तै दार्चुुलाको मार्मा गाउँपालिका र व्यास गाउँपालिका वडा नम्बर ६, शैल्यशिखर नगरपालिकाको वडा नम्बर १ को बलाँज बजार क्षेत्र, वडा नम्बर २ को देथला बजार क्षेत्र, वडा नम्बर ३ को कर्कले बजार क्षेत्र, वडा नम्बर ५ को महाकाली लोकमार्गमा पर्ने बजार क्षेत्र र वडा नम्बर ९ को गोकुलेश्वर बजार, कठपते, गाँजरी, नायल र घट्टीगाड क्षेत्रमा निषेधाज्ञा जारी भइसकेको छ भने महाकाली नगरपालिकामा भोलि आइतबार बिहान ६ बजेबाट निषेधाज्ञा जारी हुदैँछ ।

यस्तै मोरङको बिराटनगर महानगरपालिका, बुढीगंगा गाउँपालिका, जहँदा गाउँपालिका, कटहरी गाउँपालिका वडा नम्बर १, २, ३, ४ र सुनसरी तथा भातसँग सीमा जोडिएका क्षेत्रमा आज शनिबार राति १२ बजेबाट निषेधाज्ञा जारी हुदैँछ भने गोरखाको भिमसेनथापा गाउँपालिका वडा नम्बर ७ र ८ मा पनि आज शनिबार राति १२ बजेदेखि निषेधाज्ञा जारी हुदैँछ ।

काभ्रेपलाञ्चोकको अरनिको राजमार्गको साँगादेखि बनेपा बजार–सदरमुकाम धुलिखेल–पाँचखाल बजार क्षेत्र हुँदै दोलालघाटसम्म सडकको दायाँ–बायाँ ५ सय मिटर, बनेपा तीनदोबाटोदेखि नाला भगवतीस्म्मको सडकको दायाँ–बायाँ ५ सय मिटर, बनेपा–पनौती–खोपासी सडकको ५ सय मिटर दायाँ–बायाँ क्षेत्र विपी राजमार्गको धुलिखेल चोकदेखि काभ्रेभञ्ज्याङ–भकुण्डे हुँदै मंगलटारसम्म सडकको दायाँ–बायाँ २ सय मिटरको क्षेत्र र पाँचखाल नगरपालिकाको जिरोकिलोदेखि कुन्तावेशीसम्म सडकको दायाँ–बायाँ २ सय मिटर क्षेत्रमा भोलि आइतबार राति १२ बजेदेखि निषेधाज्ञा जारी हुदैँछ ।

बाजुराको हिमाली गाउँपालिकामा पनि भोलि आइतबार बिहान ५ बजेदेखि निषेधाज्ञा जारी हुदैँछ । गत १३ वैशाखको मन्त्रीपरिषद वैठकले काठमाडौं उपत्यका र तराईका जिल्लामा ५ सयभन्दा बढी तथा पहाडी र हिमाली जिल्लामा २ सयभन्दा बढी सक्रिय संक्रमितको संख्या भए प्रमुख जिल्ला अधिकारीले निषेधाज्ञा जारी गर्नसक्ने निर्णय गरेको थियो । यसैका आधारमा विभिन्न जिल्लाले निषेधाज्ञा जारी गर्दै आएका छन् ।