Category: भिडियो

काठमाडौं । आफूलाई विधानविपरीत राप्रपाको अनुशासन समितिको अध्यक्षबाट हटाइएको भन्दै नवराज सुवेदीले दिएको उजुरीउपर निर्वाचन आयोगले अध्ययन गरेरमात्रै निर्णय गर्ने जनाएको छ ।

सुवेदीले आइतबार आफ्नो पदीय हैसियत यथावत् कायम गर्न माग गर्दै दिएको निवेदनमा आयोगका सहसचिव एवं प्रवक्ता निता पोखरेलले अध्ययन गरेर मात्रै निर्णय गर्ने जानकारी गराएकी हुन् ।

सञ्चारकर्मीलाई प्रतिक्रिया दिँदै भनिन्, ‘एक टीम आएर एउटा निवेदन दिनुभएको छ । आयोगले त्यो निवेदन लिएको छ र आयोगले अध्ययन गर्छ । त्यसमा के भएको रहेछ, कस्तो भएको रहेछ, अध्ययनपछि मात्रै भन्न मिल्छ । जस्तै निवेदनमा के माग गरिएको छ, अब त्यहाँ केही पत्रपत्रिका यताउताका माध्यमबाट कारबाही भएको भन्ने उहाँहरूको निवेदन छ । त्यो के रहेछ यथार्थ हामी हेर्छौँ । निवेदन पढ्छौँ, त्यसपछि आयोगले अध्ययन गरेर केही निर्णय गर्छ ।’

राप्रपा अध्यक्ष राजेन्द्र लिङदेनले सुवेदीलाई अनुशासन समितिको अध्यक्षबाट हटाएर रोशन कार्कीलाई नियुक्त गरेका थिए । यो कार्य विधानविपरीत रहेको भन्दै सुवेदी पार्टीको संस्थापन इतर खेमाको साथमा आयोगमा उजुरी लिएर गएका हुन् । सात बुँदे उजुरीमा अनुशासन समितिको अध्यक्ष फेरबदल गर्ने एकल अधिकार अध्यक्षलाई नरहेको उनको जिकिर छ ।

काठमाडौं । राप्रपाका महामन्त्री धवल शमशेर राणाले पार्टी अध्यक्ष राजेन्द्र लिङ्देनले अति गरेपछि बाध्य भएर निर्वाचन आयोगको ढोका ढकढक्याउन आउन बाध्य भएको बताएका छन् ।

नवराज सुवेदीसँगै निर्वाचन आयोगमा उजुरी दिन पुगेका महामन्त्री राणाले अध्यक्षले आफूलाई मन नपरेका नेताहरूलाई हटाउन थालेको आरोप लगाए ।

उनले भने, ‘सहमतिमा जाऔँ भनेर पटक पटका भनेको छु तर त्यस्तो हुन सकेन । त्यो दुर्भाग्य हो । हामी निर्वाचन आयोगमा समेत आउनुपर्ने परिस्थिति बन्यो । लामो समयदेखि पार्टीमा योगदान गरेका मान्छेहरूलाई पार्टीबाट निकाल्ने, कसैले सानो विषयमा उहाँको बारेमा लेखिदियो भने त्यसलाई पदबाट हटाइदिने, हुँदा हुँदा अनुशासन आयोगको अध्यक्षलाई समेत हटाएर अर्को मान्छे राख्ने ?’

उनले अध्यक्षको विरोधमा केही गर्नासाथ जिम्मेवारीबाट हटाउन थालेको दाबी गरे । उनले भने, ‘महाधिवेशन ६ महिनामा आइरहेको छ, महाधिवेशनअघि यस्ता मान्छेहरू यसरी हटाउने भएपछि के को महाधिवेशन गर्ने ? सबैलाई हटाइदिए भइहाल्यो नि। अति नै भयो भनेर आज यहाँ आएको हौँ।’

उनले विधान अनुसार अनुशासन आयोगका अध्यक्षलाई निकाल्न नपाउने भन्दै सुवेदीलाई जिम्मेवारी नै दिनुपर्ने बताए। उनले आफूलाई समेत पटक पटक कारबाही गरेको स्मरण गर्दै हैकमबाट नस्वीकार्ने चेतावनी दिए । उनले पार्टी फुटाउन नदिने प्रस्ट पारे ।

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले पार्टीमा आफ्नो कुनै गुट नभएको बताएका छन् । काठमाडौं ५ द्वारा आयोजित जनजागरण कार्यक्रमलाई सम्बोधन गर्दै उनले महाधिवेशनको मिति समय आएपछि तोकिने बताए ।

अध्यक्ष लिङदेनदेखि असन्तुष्ट महामन्त्री डा. धवलशमशेर राणाको संयोजनमा संस्थापन इतर नेताहरू भेला बसेको थियो । त्यही भेलालाई लक्षित गर्दै उनले भने, ‘म सबैलाई भन्छु, पार्टीभित्र मेरो गुट छैन, मेरो पार्टीभित्र कोही विपक्षी छैन, विपक्षी को हो, जसले पार्टीलाई मुठ्ठीमा राख्न खोज्छ, नयाँ मान्छेहरू आउँदा शत्रु आए जस्तो ठान्छ । ती मानिसहरूसँग मेरो फरक मत छ ।’

नयाँ मानिसहरू नआई पार्टी ठूलो बन्दै नबन्ने भन्दै अध्यक्ष लिङदेनले कांग्रेस, एमाले, माओवादीबाट मानिसहरू ल्याउनुपर्ने बताए ।

उनले थपे, ‘अहिले महाधिवेशनमा को अध्यक्ष हुने भनेर लाग्ने बेला भएको छैन । टाइम आएपछि आआफ्नो उम्मेदवारी घोषणा गरेर साथीहरू हिँड्दा भयो । साथीहरूलाई म एक पटक फेरि आउनुपर्छ भन्ने लागे, मलाई पनि त्यस्तो लागे म पनि घोषणा गरुँला । कोही उपयुक्त भयो भने सहयोग गरेर पनि हिँडौँला । पद कसैले जीवनभर पाउने कुरा होइन ।’

उनले विधानमै एउटा व्यक्ति दुई पटक भन्दा नेतृत्वमा आउन नहुने उल्लेख गरेको बताए ।

लिङदेनले थपे, ‘मैले अब बेसी पाए एक चोटीमात्रै पाउँछु । एक चोटी म हुन पाउने सुविधा छ, तर नहुँदा मलाई कुनै पश्चाताप छैन । मैले जति सक्छु राम्रो गर्ने हो । पार्टीलाई योगदान गर्न पदमै बस्नुपर्छ भन्ने छैन । त्यसैले हामी एकताबद्ध भएर अगाडि बढ्नुको विकल्प छैन ।’

उनले राजावादी आन्दोलन आफ्नो नेतृत्वमा नभएको भन्दै सहयोगमात्रै गरेको भन्ने कुरा पार्टीकै नेताहरूले बुझ्नुपर्ने बताए ।

उनले भने, अहिले हाम्रो पार्टीभित्रका साथीहरूले राजेन्द्रले आन्दोलन तुहायो, आन्दोलन गरेन भन्नेहरूले राजेन्द्रबाट आन्दोलन हुँदैन नयाँ नेतृत्व चाहिन्छ भनेर नवराज सुवेदी दाइलाई खोजे, उहाँलाई बनाएपछि हुन्छ भने हामीले मान्दियौँ। देशभरको कार्यकर्ता हामीले उभ्यायौं । आन्दोलनको नेतृत्व गर्नेहरूले किन स्थगित भयो भन्ने भन्नुपर्‍यो नि ! मैले आन्दोलन स्थगित भनेर विज्ञप्ति निकालेका छैन ।’

अध्यक्ष लिङदेनले आजै गणतन्त्र समाप्त भएर राजालाई नारायणहिटीमा राख्ने चाहना रहेको बताए ।

काठमाडौं । नेकपा एकीकृत समाजवादीका अध्यक्ष माधवकुमार नेपालले आफूमाथि मुद्दा लगाइएकै कारण पार्टीले बिदा गरे स्वीकार्न तयार रहेको बताएका छन् ।

शुक्रबार पार्टी निकट विद्यार्थी संगठन अनेरास्ववियूको प्रथम केन्द्रीय कमिटी बैठकलाई सम्बोधन गर्दै उनले आफूमाथि मुद्दाकै आधारमा कमिटीले बिदा गरे आफू बिदा भएर जान तयार रहेको बताए ।

अझै पार्टी बनाउने आँट रहेको र विभिन्न चुनौतीको सामना गरेर अघि बढ्ने नेपालको भनाइ थियो ।

जीवनमा एक पैसा पनि घुस नलिएको भन्दै कुनै डर नरहेको उनले दोहोर्‍याए । मन्त्रिपरिषद्को नीतिगत निर्णयमाथि अख्तियारले छानबिन गर्न नपाउने व्यवस्था संविधानमा हुँदा हुँदै आफूमाथि प्रतिशोधपूर्ण ढंगले मुद्दा चलाइएको नेपालले दाबी गरे ।

‘अहिले ममाथि प्रतिशोध साँध्नेहरू पछि आफूले खनेको खाल्डोमा आफैँ पर्न सक्छन्’, उनले भने ।

ललितपुर । प्रधानमन्त्री केपी शर्मा ओलीले सरकार, युवा र महिला उद्यमी मिलेर मुलुकको समृद्धिका लागि केही गर्नुपर्ने बताउनुभएको छ।

महिला उद्यमी महासङ्घले आयोजना गरेको अन्तर्राष्ट्रिय महिला नेतृत्व सम्मेलन, २०८२ को उद्घाटन गर्दै प्रधानमन्त्री ओलीले समृद्धिका लागि सँगै काम गरेर सफलता हासिल गर्नुपर्नेमा जोड दिनुभएको हो ।

“हामीले उद्यमशीलताको विकासबाट समृद्धि हासिल गर्नुपर्नेछ । सरकारले युवा र महिला उद्यमशीलतालाई उच्च महत्व दिएको छ । यस सम्मेलनबाट आउने निष्कर्षले सरकारको प्राथमिकता पूरा गर्न सघाउने छ ।”, प्रधानमन्त्री ओलीले भन्नुभयो, “हामीले महिलाको सशक्तिकरणका लागि संविधान र व्यवहारमा व्यवस्था गर्दै आएका छौँ । तीनै तहमा कम्तीमा ३३ प्रतिशत जनप्रतिनिधि सुनिश्चित गरेका छौँ । विद्यालयमा छात्राहरुको सङ्ख्या छात्रहरुको भन्दा बढी छ । नतिजामा पनि छात्राहरुको राम्रो हुँदै गएको छ । हामीले अझै प्रगति हासिल गर्दै जानुपर्नेछ ।”

काठमाडौं । सत्तारुढ दल नेपाली कांग्रेसका प्रमुख सचेतक श्याम घिमिरेले रास्वपा र राप्रपामा राजनीतिक संस्कार र समन्वय गर्ने क्षमताको अभाव देखिएको टिप्पणी गरेका छन् । प्रतिनिधिसभाको बैठकमा बोल्दै भिजिट भिसा प्रकरणको अख्तियार र छानबिन समितिले पनि काम गरिरहेको बताए ।

उनले भने, ‘संसद्‍मा नोकझोक, वादविवाद पनि हुन्छ । सहमति र असहमति पनि हुन्छ । तर, अन्त्यहीन विरोध कहिले पनि हुँदैन । उहाँहरू हिँडेको बाटोमा अब फेस सेभिङ र सहज अवतरणको अवस्था पनि बन्न गाह्रो बन्नेछ । के मानव बेचबिखन भनेको ? कहाँ भयो ?’

उनले रास्वपा र राप्रपा हिँडेको बाटोले भोलि उनीहरूलाई नै गाह्रो हुने बताए । रास्वपा सभापति रवि लामिछानेले भिजिट भिसामा अमेरिका गएर नागरिकता लिएको घिमिरेको जिकिर थियो ।

मुख्य सचेतक घिमिरले रवि लामिछाने आफैं भिजिट भिसामा गएर अमेरिकाको नागरिकता लिएको भन्दै रास्वपाको स्थापना नै भिजिट भिसा र सहकारी ठगीबाट भएको बताए । उनले रास्वपामा भिजिट भिसामा विदेशमा लुकेर अवसरका लागि फर्किएकाहरुको बाहुल्य रहेको दावी समेत गरे ।

काठमाडौं । नेपाली कांग्रेसका सांसद राजेन्द्र बजगाईँले चीनले तिब्बतमा ड्याम निर्माण योजना बनाएको भन्दै त्यसले हिमाली तलतिरको जीवनलाई थप जोखिममा पार्ने बताएका छन् । प्रतिनिधि सभाको बैठकमा बोल्दै भोटेकोसी बाढी पनि सम्भवतः हिमताल फुटेर आएको हुनसक्ने बताए ।

उनले भने, ‘२०२५ संयुक्त राष्ट्रसंघद्वारा ग्लेशियर संरक्षण वर्ष घोषणापछि, विश्वभर देखा परेको वातावरणको चेतावनी भन्न मिल्छ । भोटेकोसी बाढी आएको बाढी जो सम्भवतः हिमताल फुटेर आएको थियो । फ्रेण्डशिप पुल, सयौँ गाडीहरू र दर्जनौँ जीवन बगायो। चीनले तिब्बतमा ड्याम निर्माण योजना बनाएको समाचार छन् । जसले हिमाली तलतिरको जीवनलाई थप जोखिममा पार्नेछ ।’

विज्ञहरूले अन्तर्राष्ट्रिय हिमनदी केन्द्र स्थापना गर्न सुझाव दिएको भन्दै त्यसले वैज्ञानिक अनुसन्धान, नीति, र प्रकोप व्यवस्थापनका ग्लेशियर संरक्षणलाई तापक्रम सीमित गर्ने उपायसँग जोड्नु अत्यावश्यक रहेको बताए ।

उनले भने, ‘हामीले २०० भन्दा बढी मानिस हेलिकप्टरबाट ल्याएका छौँ । तर, हेलिकप्टर उड्ने प्रतिबन्ध र राजनीतिका बदमास पात्रद्वारा उद्धार प्रयासहरूमा गतिरोध पैदा गराई रहन्छन् भने सैनिक विमान उद्धार महँगो भयो यहाँ अनुदानको प्रबन्ध गर्नु प¥यो। अन्यथा गरिब मर्ने भए । निषेधित क्षेत्रको अनुमति प्रक्रियामा विलम्ब हुन्छ ।’

पशुपतिनाथमा सुरक्षाको कमजोरी भएको विषय पनि बैठकमा राखे ।

उनले भने, ‘एक नामजारी सांसद पूर्व मन्त्री, आफ्ना सुरक्षा कर्ता सहित नियमित रूपले प्रश्नोत्तरभित्र आइरहनुको साथै बन्दुक लिएर आउने गरेका छन्, जसले मन्दिर सुरक्षामा ठुलो जोखिम ल्याएको छ ।’ संसद्लाई विधि निर्माणमा सक्रिय बनाउने आवश्यकता आवश्यक रहेको पनि बताए ।

उनले थपे, ‘नेपालका सांसदहरू मस्यौदा विधिहरूमा सहभागी हुँदैनन्, सांसदहरू सावधानीपूर्ण अध्ययन र जबाफदेही स्वभावका छन् । जबकि अमेरिकाको विधायी सल्लाहकार र बेलायतको संसदीय सल्लाहकार जस्ता संरचनाहरूले विधि प्रक्रियामा निर्णायक भूमिका खेल्छन् । हामीले नेपालको संसद्मा पनि यस्ता समिति गठन गर्नुपर्ने माग उठाएका छौँ । यो ‘संवैधानिक परिषद् विधेयक’ विरुद्धको प्रचार–प्रसारले देखाउँछ कि हामीले यसलाई पढेर विरोध गरेका थियौँ ।’

काठमाडौं । सत्तारुढ दल नेपाली कांग्रेसका सांसद रामहरि खतिवडाले संसद् भवनभित्र ड्रोन बसेको विषय प्रतिनिधि सभाको बैठकमा राखेका छन् ।

आजको बैठकमा बोल्दै असार २३ गते बेलुका ९ देखि ९ः३० बजेसम्मको समयतिर संसद्को बायाँतिर ठूलो ड्रोन आएर खसेको समाचार आएको बताए ।

उनले भने, ‘कहाँबाट? के का लागि आएको थियो ? संसद्मा आएर खस्दासम्म संसद्ले थाहा पायो पाएन ? अन्तर्राष्ट्रिय रूपमा आतङ्कवादी गतिविधि बढिरहेको बेलामा ड्रोनबाट के भएको हो ? यस्तो गम्भीर विषयमा संसद्लाई जानकारी गराइयोस् ।’