Category: नेकपा एस

काठमाडौं । सत्तारुढ नेकपा (एकीकृत समाजवादी) केन्द्रीय परिषद् बैठक आज पनि बस्दैछ । बैठक सोमबारदेखि सुरु भएको हो ।

अध्यक्ष माधवकुमार नेपालले प्रस्तुत गरेको ३४ पृष्ठको प्रतिवेदनमाथि मंगलबार छलफल हुनेछ । बैठकले उक्त प्रतिवेदनलाई पारित गर्ने कार्यसूची रहेको प्रचार विभाग उपप्रमुख शम्भु श्रेष्ठले जानकारी दिए ।

अध्यक्ष नेपालले प्रस्तुत गरेको प्रतिवेदनमा राष्ट्रिय तथा अन्तर्राष्ट्रिय परिस्थितिदेखि आगामी कार्ययोजनासम्म समेटिएका छन् । राष्ट्रिय राजनीतिको वर्तमान चरित्रबारे व्याख्या गरिएको छ।

नेपालले एमाले नेतृत्वको शक्तिलाई ‘दक्षिणपन्थी अवसरवादी धार’ भनेका छन् । एकीकृत समाजवादीसमेत सम्मिलित पाँच दलीय गठबन्धनलाई ‘वाम(लोकतान्त्रिक धार’को रूपमा उनले व्याख्या गरेका छन् ।

काठमाडौं । नवनियुक्त मन्त्रीहरूले पद तथा गोपनीयताको सपथ लिएका छन् । नेकपा एकीकृत समाजवादीबाट नियुक्त भएका ४ मन्त्री र १ राज्यमन्त्रीले राष्ट्रपति विद्यादेवी भण्डारीसमक्ष सपथ लिएका हुन् ।

शीतल निवासमा आयोजित समारोहमा जीवनराम श्रेष्ठले संस्कृति पर्यटन तथा नागरिक उड्डयनमन्त्री, मेटमणि चौधरीले सहरी विकास मन्त्री, शेरबहादुर कुँवरले श्रम, रोजगार तथा सामाजिक सुरक्षामन्त्री , भवानी खापुङले स्वास्थ्य तथा जनसंख्या मन्त्री तथा हिरा केसीले स्वास्थ्य राज्यमन्त्रीको सपथ लिएका हुन् ।

प्रधानमन्त्री शेरबहादुर देउवाले पाँचदलीय गठबन्धन सरकारको मुख्य घटक नेकपा एसको सिफारिसका आधारमा आइतबार मन्त्रिपरिषद् पुनर्गठन गरेका थिए । सपथ लिएका नवनियुक्त मन्त्रीहरूले आजै कार्यभार सम्हाल्दैछन् ।

काठमाडौं । नेकपा एसको केन्द्रीय परिषद् बैठक आज बस्दैछ ।

कमलादीस्थित प्रज्ञा भवनमा बस्ने पहिलो बैठकमा पार्टीको सांगठानिक गतिविधि, स्थानीय निर्वाचनको समीक्षा, आसन्न प्रदेशसभा/प्रतिनिधिसभा निर्वाचनको रणनीति, समसामयिक राजनीति मुख्य एजेण्डा छन् ।

देशभरबाट झण्डै १५ सय सहभागी हुने परिषद् बैठकमा समसामयिक राजनीतिक प्रतिवेदन प्रस्तुत गरिने साथै त्यसको आधारमा पार्टीको आगामी कार्यदिशा तय गरिने एक नेताले बताए ।

परिषद् बैठकको उद्घाटन अध्यक्ष माधवकुमार नेपालले गर्नेछन् ।

रुपन्देही । नेकपा एसले मन्त्री हेरफेर गर्दा दाङका दुईजनाले अवसर पाएका छन् । नेकपा एसका पोलिब्यूरो सदस्य तथा लुम्बिनी प्रदेश अध्यक्ष मेटमणि चौधरी सहरी विकास मन्त्री बनेका छन् भने केन्द्रीय सदस्य हिराचन्द्र केसी स्वास्थ्य राज्यमन्त्री बने । नयाँ मन्त्रीहरूको सपथ आज हुँदैछ ।

चौधरी दाङको क्षेत्र नं १ बाट र केसी क्षेत्र नं ३ बाट प्रतिनिधिसभा सदस्यमा निर्वाचित भएका हुन् ।

भर्खर सकिएको स्थानीय निर्वाचनमा जिल्लाका १० पालिका र १ सय वडामध्ये एक वडाअध्यक्ष र एक सदस्यमात्रै जितेको नेकपा एसलाई नयाँ यी दुई मन्त्रीका कारण आगामी चुनावी रणनीतिमा सहयोग पुग्ने सो पार्टीका स्थानीय नेता-कार्यकर्ताले आशा जनाएका छन् ।

को हुन् मेटमणि ?

एमालेभित्र अन्तरसंघर्ष चलिरहँदा अध्यक्ष केपी ओलीका कडा आलोचकका रूपमा चिनिएका दङ्गाली नेता हुन् मेटमणि चौधरी । नेकपा एसको पोलिटब्यूरो सदस्य तथा लुम्बिनी प्रदेश अध्यक्ष रहेका उनी यसअघि नै मन्त्री बन्ने करिब निश्चित भएपनि अन्तिम समयमा फालिएका थिए ।

दाङको गढवा गाउँमा भगवतीप्रसाद चौधरी र शिवरात्रिदेवी चौधरी दम्पतीबाट २०२९ चैत १० गते जन्मेका मेटमणिको राजनीतिक इतिहास संघर्षमय छ । २०५८ सालमा खुमाकुमारी चौधरीसँग प्रेम विवाह गरेका उनीहरू दुवै राजनीतिमै क्रियाशील छन् । राजनीतिक परिवारमा जन्मकाले उनको सानै उमेदेखि राजनीतिप्रति चासो रहेको थियो । बुबा पनि राजनीति लागेकोले सानैदेखि राजनीतिमा रुचि भएको उनले बताउँदै आएका छन् ।

मेटमणिको बुबा २०५१ सालको चुनावमा उम्मेदवार बनेका थिए । उनकी ठूलो दिदी दाङको गढवा गाउँपालिका निवर्तमान उपाध्यक्ष हुन् । अर्की दिदी पार्टीको शिक्षक सङ्गठनमा छन् । राजनीतिक र सामान्य परिवारमा हुर्केको उनको राजनीति यात्रा भने विद्यार्थी राजनीतिबाट २०४६ सालपछि मात्रै सुरू भएको हो । मेटमणि दाङ देउखुरीका स्थायी बासिन्दा हुन् । उनले अनेरास्ववियू छैटौँबाट राजनीति सुरू गरेपनि पछि प्रवेश गरे ।

अनेरास्ववियूको प्रारम्भिक कमिटी अध्यक्ष, जिल्ला सदस्य, अध्यक्ष, राप्ती अञ्चल कमिटीको सदस्य, कोषाध्यक्ष, सचिव, संयोजक र केन्द्रीय सदस्य बनेर उनले विद्यार्थी राजनीतिमा काम गरेका थिए । पार्टी राजनीतिमा नेकपा एमाले दाङ क्षेत्रीय कमिटी १ को सचिवको जिम्मेवारीबाट सुरू गरेका उनी क्षेत्रीय कमिटी सचिव, अध्यक्ष हुँदै २०५५ सालमा दाङ जिल्ला कमिटी सदस्यमा निर्वाचित भएका थिए । केन्द्रीय स्कुल विभागको सदस्य हुँदै पार्टीको नवौं महाधिवेशनमा उनी केन्द्रीय सदस्यमा निर्वाचित भएपछि दाङ जिल्लाको इन्चार्ज बनेका थिए । राजनीति यात्राकै क्रममा उनी २०५९ सालमा पक्राउ परेका थिए ।

नेपालमा रहेका तत्कालीन दुई ठूला कम्युनिष्ट पार्टीको एकता भएर बनेको नेकपाको केन्द्रीय सदस्यको जिम्मेवारीमा रहेर मेटमणिले काम गरे । सानैदेखि खरो स्वभावका उनी नेकपा विभाजनपश्चात एमालेमै रहेका थिए । तर, माधवकुमार नेपालले एमाले विभाजनपछि बनाएको नयाँ पार्टी नेकपा एसमा उनी रहे ।

२०७४ सालमा दाङ १ बाट करिब १४ हजार मतान्तरले प्रतिनिधिसभामा चौधरी निर्वाचित भएका हुन् ।

मानव अधिकार जागरण मञ्च दाङको संयोजक, कमैया मुक्ति समाजको केन्द्रीय सदस्य, थारु विद्यार्थी समितिको केन्द्रीय कोषाध्यक्ष, थारू कल्याणकारी संघको केन्द्रीय सदस्यलगायत जिल्लामा रहेका विभिन्न सामाजिक संघसंस्थाहरूमा समेत संलग्न रहेर उनले काम गरेका छन् ।

अर्थशास्त्र र राजनीति शास्त्रमा एमए गरेका चौधरीले अहिले त्रिभुवन विश्वविद्यालयबाट पीएचडी गर्दैरहेको उनको सचिवालयले जनाएको छ । चौधरीका १ श्रीमती १ छोरी र १ छोरा छन् ।

हिराचन्द्र केसीबारे संक्षिप्त जानकारी

नेकपा एसका केन्द्रीय सदस्यसमेत रहेका हिराचन्द्र केसी पनि दङ्गाली नै हुन् । दाङ क्षेत्र नम्बर ३ बाट प्रत्यक्ष निर्वाचित सांसद केसीले पनि यो पटक मन्त्री बन्ने अवसर पाएका छन् ।

गत निर्वाचनमा नेपाली कांग्रेसका प्रभावशाली नेता तथा पूर्वमन्त्री दीपक गिरीलाई पराजित गरेपछि उनी चर्चामा आएका थिए । ६ हजार ५ सय बढी मतान्तरले उनी विजयी भएका थिए । केसी एमालेको जिल्ला सचिवसमेत भए ।

युवा संघबाट राजनीतिमा आएका उनी दुई दशकयता निरन्तर एमालेमा रहेपनि एमाले विभाजनपछि नेकपा एसमा लागे । नेकपाभित्र विवाद बढ्दै जाँदा नेपाल पक्षमा रहेपनि उनले अन्तिम समयसम्म पार्टीभित्रै अन्तरसंघर्ष गर्नुपर्ने बताउँदै आएका थिए ।

दाङको तुल्सीपुर उपमहानगरपालिकाका ५ स्थायी बासिन्दा केसी प्ररायुसंघको जिल्ला अध्यक्ष र केन्द्रीय सदस्य, एमाले जिल्ला कमिटी सदस्य हुँदै विभाजनअघि जिल्ला सचिव बनेका हुन् । उनी तुलसीपुरका सुन व्यवसायीसमेत हुन् ।

क्षेत्र नं ३ मा नेतृत्वको खडेरी भएको बेला एमाले नेता शंकर पोखरेलले उनलाई ठाउँ दिएका थिए । केसी एमालेको जिल्ला सचिव हुँदा अध्यक्ष रहेका टिकाराम खड्का बल्ल तुल्सीपुरको मेयर बनेका छन् तर केसी संघीय संसद हुँदै मन्त्री बनेर फड्को मारेका छन् ।

काठमाडौं । गठबन्धन घटक नेकपा एकीकृत समाजवादीबाट थपिएका नयाँ मन्त्रीहरूको सपथग्रहण आज हुँदैछ ।

शीतल निवासमा आयोजित विशेष समारोहबीच आज राष्ट्रमन्त्री विद्यादेवी भण्डारीले नवनियुक्त मन्त्रीहरूलाई पद तथा गोपनीयताको सपथ गराउने बताइएको छ ।

आफूहरूलाई बिहान ११ बजे सपथका लागि बोलाइएको नयाँ एक मन्त्रीले नेपाल प्रेसलाई बताए ।

आइतबार प्रधानमन्त्री शेरबहादुर देउवाले जीवनराम श्रेष्ठलाई संस्कृति, पर्यटन तथा नागरिक उड्डयन, मेटमणि चौधरीलाई सहरी विकास, भवानीप्रसाद खापुङलाई बढुवा गर्दै स्वास्थ्य तथा जनसंख्या, शेरबहादुर कुँवरलाई श्रम, रोजगार तथा सामाजिक सुरक्षामन्त्री, हिराचन्द्र केसीलाई स्वास्थ्य राज्यमन्त्रीमा नियुक्त गरेका थिए ।

काठमाडौं । नेकपा एमालेको विभाजनका बेला एउटा तस्बिर आइकोनिक बनेको थियो । युवा नेतृ रामकुमारी झाँक्रीले वरिष्ठ नेता माधवकुमार नेपाललाई हातमै समातेर पार्टी दर्ताका लागि निर्वाचन आयोगतर्फ डोर्याएको दृष्य फोटोग्राफरले कैद गरेका थिए ।

उक्त तस्बिरको विभिन्न ढंगले व्याख्याहरू भए । झाँक्रीलाई समग्र युवापुस्ताको प्रतिनिधि मानियो, जसले हिम्मतसाथ पुरानो पुस्ताको नेतालाई दिशानिर्देश गरिरहेकी थिइन् ।

आलोचकहरूले चाहिँ नेपाललाई भड्खालोमा हाल्न रामकुमारीले प्रमुख भूमिका खेलेको अर्थमा उक्त तस्बिरलाई व्याख्या गरे । जे भए पनि यो दृश्यमा झाँक्रीको बोल्ड चरित्र नै झल्किएको थियो ।

झाँक्री तत्कालीन एमालेको तेस्रो पुस्ताकी नेता थिइन् । पार्टीमा उनीभन्दा सिनियर कयौँ नेताहरू छन् । तर, दोस्रो पुस्ताको अधिकांश नेताहरूले नेता नेपाललाई विभाजनमा साथ नदिएपछि झाँक्री फ्रन्टलाइनमा आइन् । उनी नेकपा एसको ‘कि फिगर’ बनिन् । पुरस्कार स्वरूप नेपालले पहिले पार्टीमा सचिव बनाए भने पछि मन्त्रीमा सिफारिस गरे ।

गत असोज २ गते शहरी विकासमन्त्री नियुक्त हुँदा औधी उत्साहित थिइन् झाँक्री । पदभार ग्रहण गर्दै गर्दा उनको अनुहारमा अनवरत हाँसो छाएको थियो । पहिलोपल्ट मन्त्री पदमा पुगेको खुसी र केही गरेर देखाउने अठोट देखिएको थियो, उनको अनुहारमा ।

शहरी विकास मन्त्रालयमा मन्त्री झाँक्रीको कार्यसम्पादन सन्तोषजनक नै थियो । पछिल्लोसमय काठमाडौंको फोहोर व्यवस्थापनमा मेयर बालेन्द्र साहसँग सहकार्य गरेर उनले आफ्नो लोकप्रियता बढाएकी थिइन् । तर, यहीबीचमा पदबाट हात धुनुपर्दा उनी मर्माहत बनेकी छन् ।

आज मन्त्रालयमा आयोजित बिदाइ कार्यक्रममा मन्त्री झाँक्रीको अर्को भावुक रूप देखियो । माधवकुमार नेपाललाई डोहोर्याएर पार्टी फुटाउने ‘साहसी’ झाँक्री आज निकै निर्बल र विक्षिप्त अवस्थामा प्रस्तुत भइन् ।

कार्यक्रममा सुरुदेखि उदास देखिएकी उनी आँशु लुकाउन सकिरहेकी थिइनन् । मन्तव्यका क्रममा त उनी बर्बरी आँशु खसालेर रोइन् । उनले पत्रकारको प्रश्नको राम्ररी जवाफसमेत दिन सकिनन् ।

मन्त्री पद आफैँमा एउटा शक्ति मात्र नभएर अवसर पनि हो । कुनै पनि राजनीतिज्ञको जीवनको अभीष्ट हो । मन्त्रीको कुर्सीमा पुगिसकेपछि कोही पनि हत्पत्ति ओर्लिन चाहँदैन । तर, यो पद कसैले पनि सँधैका लागि ओगट्न सक्दैन । मन्त्री झाँक्रीले यो यथार्थ नबुझेकी पक्कै होइनन् । तर, आफूले ‘राम्रो काम गर्दागर्दै अपमानजनक तरिकाले हटाइएको’ मा उनको चित्त दुखाइ देखिन्छ । त्योभन्दा पनि बढी जुन नेतालाई हातमा समातेर उनले पार्टी निर्माणमा डोर्‍याइन उनले नै आफूलाई मन्त्रीमा निरन्तरता दिन नचाहेकोमा झाँक्री प्रताडित बनेकी हुन सक्छिन् ।

मात्रै १० महिनाको अवधिमा रामकुमारी झाँक्रीको मनोदशामा आएको परिवर्तन तीन तस्बिरहरूले वर्णन गर्छन् । अघिल्लो तस्बिरमा उनी दृढ छिन् । फोकस्ड छिन् । दोस्रोमा उनी कमजोर छिन् । पिन्चे छिन् । विक्षिप्त छिन् ।

पत्रकार सम्मेलनमा झाँक्रीले एउटा प्रश्नको मात्रै खुलेर जवाफ दिन सकिन् । नेपाल प्रेसका संवाददाता केशव भुलले सोधेका थिए, ‘पार्टीले फिर्ता बोलाउँदा हस्ताक्षर अभियान चलाउनुभयो । आज के साइत आएर पत्रकार सम्मेलन गरेर राजीनामा दिनुपर्ने अवस्था आयो ?’

‘सम्हालिने प्रश्न गर्नुभयो’ भन्दै झाँक्रीले यस्तो जवाफ दिइन् ।

‘हामी पार्टीबाट निर्णय भएरै आएका थियौँ । साथीभाइहरूले ५–६ महिनाको काउन्ट डाउन सुरु गरेको थाहा भएपछि अध्यक्षलाई भेटेर मिडियाबाट थाहा पाउनुपर्‍यो भने रमाइलो हुँदैन, हामीलाई जानकारी गराए आफै वातावरण बनाएर छोड्छौँ भनेका थियौँ । चैततिरैको कुरा हो ।

एमसीसी फेल भए गठबन्धन के हुन्छ भन्ने स्ट्रेस थियो । केही मन्त्री बनाउने र बन्ने साथीहरूले शपथ खाएको कहिले हो रे भन्दै फोन गरे । असोज/कात्तिकतिर भनेपछि असोज कति गते भनेर सोधियो । २२ गते भन्नुपर्‍यो । अनि असोज, कात्तिक, मंसिर भनेर गनेको थाहा भएपछि काउन्ट डाउन सुरु गरेछन् भन्ने लाग्यो ।

यसबिचमा स्थानीय चुनाव भयो र बजेट आयो । अनि मेरो पार्टीले निर्वाचनको समीक्षा गर्न बैठक बोलाएको भनेर मिडियामा पढियो । तर, मन्त्री फेर्ने निर्णय भएछ । हामीलाई थाहै भएन । तर पनि बजेटमा आफ्नो कार्यक्रमको डिफेन्स गरेर छोड्छौँ भनेर आयौँ । त्यो कुरा प्रधानमन्त्रीलाई पनि भन्यौँ । बजेटसम्म डिफेन्स गर्न पाउने वा छाड्ने भन्दा प्रधानमन्त्रीले बजेटसम्म काम गर्नुस् भन्नुभयो । मुख्य सचिवलाई पनि वातावरण बनाउन निर्देशन दिनुभयो । त्यसपछि हामी काममा लाग्यौँ ।

मलाई अलिक धेरै रहर थियो आफूले गरेको कामको बारेमा व्याख्या गर्न संसद्मा । त्यसैले समय मागिएको हो । यो बीचमा अनेक अड्कलबाजीहरू भए । आज राष्ट्रियसभामा जवाफ दिएपछि साथीहरूलाई धन्यवाद भनेर हिँड्न चाहन्थेँ । त्यसैले प्रेसमिट आयोजना गरेका हौँ । भरे–भोलि मन्त्रीमण्डल पुनर्गठन होला । हामीले राजीनामा दिनुपर्दैन भन्नुभयो प्रधानमन्त्रीले ।’

राजनीतिको घामछायाँ यस्तै रहेछ रामकुमारी झाँक्री जी ।

काठमाडौं । नेकपा एकीकृत समाजवादीको सिफारिस बमोजिम प्रधानमन्त्री शेरबहादुर देउवाले मन्त्रीहरू हेरफेर गरेका छन् ।

राष्ट्रपति कार्यालयले जारी गरेको विज्ञप्ति अनुसार चार जना मन्त्री र एक राज्यमन्त्री परिवर्तन भएका छन् ।

थपिएका नेकपा एसका सबै मन्त्रीहरुको वरियता सबैन्दा तल छ ।

जीवनराम श्रेष्ठ पर्यटन, मेटमणी चौधरी सहरी विकास, भवानी खापुङ स्वास्थ्य तथा जनसंख्या र शेरवहादुर कुँवर श्रममन्त्री नियुक्त भएका छन् ।
त्यस्तै हिराचन्द्र केसी स्वास्थ्य राज्यमन्त्री नियुक्त भएका छन् ।

थपिएका नेकपा एसका सबै मन्त्रीहरुको वरियता सबैन्दा तल छ । जीवनराम श्रेष्ठ पर्यटन, मेटमणी चौधरी सहरी विकास, भवानी खापुङ स्वास्थ्य तथा जनसंख्या र शेरवहादुर कुँवर श्रममन्त्री नियुक्त भएका छन् । त्यस्तै हिराचन्द्र केसी स्वास्थय राज्यमन्त्री नियुक्त भएका छन् ।

काठमाडौं । पदबाट राजीनामा दिएकी शहरी विकासमन्त्री रामकुमारी झाँक्रीले आफ्नो मन्त्रालयका उपलब्धिबारे जानकारी दिन मन्त्रालयमा पत्रकार सम्मेलन आयोजना गरेकी छिन् ।

बालुवाटार पुगेर प्रधानमन्त्री शेरबहादुर देउवालाई राजीनामा बुझाइसकेपछि उनी पत्रकार सम्मेलनमा उपस्थित भएकी थिइन् ।

मन्त्रीका रूपमा अन्तिम पत्रकार सम्मेलनमा झाँक्री निकै भावुक देखिइन् । उनको अनुहारमा पूर्ण रूपमा उदासी छाएको थियो भने मुस्कान हराएको थियो ।

उनी लामो समयसम्म कागजमा घोत्लिँदै झोक्राएकी थिइन् । पटक पटक नेपकिनले आँखा पुछेकोसमेत देखिएको थियो । आँखामा गाजल लतपतिएको थियो ।

हेर्नुस्,मन्त्री झाँक्रीका केही तस्विरः

तस्बिरहरु : उमेश कार्की

काठमाडौं । पर्यटन मन्त्रीबाट राजीनामा दिएका प्रेम आलेले आफू जनजातिको छोरो भएकाले सिधा कुरा गर्ने बताएका छन् । काम गर्ने क्रममा बोल्न नजानेको भए त्यसलाई गलत रूपमा नलिन उनले आग्रह गरे ।

आज मन्त्रालयमा बिदाइका क्रममा आयोजित पत्रकार सम्मेलनमा आलेले भने, ‘मैले कहिले पनि दुई थरी कुरा गरेको छैन । जहिले पनि एउटै कुरा गरेँ । यदि मैले बोल्न नजानेको भए मेरो नियत थियो भन्ने नठान्नुहोला । मबाट केही त्रुटि भएको भए त्यसलाई रियलाइज गर्ने नै छु ।’

आज संसदमा एक सांसदले आलेमाथि उनले हालै एक कर्मचारीलाई तुच्छ गाली गरेको बारे प्रश्न गरेकी थिइन् । उक्त प्रश्नमा आलेले कुनै जवाफ दिएका थिएनन् । यस विषयमा पत्रकारले प्रश्न गर्दा आलेले आज त्यस्तो प्रश्न सोध्नै नमिल्ने तर्क दिए ।

‘आज यो विषय कार्यसूचीमा नै थिएन । यो घटना भएको १२/१५ दिन भइसक्यो । आजका दिनसम्म माननीय सांसदले किन कानमा तेल हालेर बस्नु भयो ? पहिल्यै सोधेको भए जवाफ दिन तयार थिएँ,’ आलेले भने ।

उनले यस घटनाबारे सचिवालयले प्रस्टीकरण दिइसकेको भन्दै थप बोलेनन् ।

काठमाडौं । पदबाट राजीनामा दिएका पर्यटनमन्त्री प्रेम आलेले आफू ९० प्रतिशत सफल भएको दाबी गरेका छन् । मन्त्री पदमा बस्दा ९ महिना बितेको पत्तो नै नपाएको उनको भनाइ छ ।

राजीनामाबारे जानकारी दिन मन्त्रालयमा आयोजित पत्रकार सम्मेलनमा आलेले आफू प्रक्रियामा भन्दा एक्सनमा विश्वास गर्दै हुर्केको बताए ।

उनले भने, ‘मैले प्रक्रियामा भन्दा परिणामलाई प्राथमिकतामा राखेँ । यदि मलाई कुनै पत्रकारले आफ्नो कामबाट कति सन्तुष्ट हुनुभयो भनेर सोधेमा मेरो उत्तर हुन्छ–९० प्रतिशत सफल भएको छु । बाँकी जनताले नै मूल्यांकन गर्नेछन् ।’

आफूलाई देश तथा विदेशमा रहेका नेपालीहरूले एक्सन मन्त्रीको उपमा दिएको भन्दै आलोले खुसी व्यक्त गजरे ।

उनले थपे, ‘असोज २२ गते यसै हलमा आयोजित स्वागत समारोहमा भनेको थिएँ– मेरो अघिपछि लागेर मलाई खुसी पार्न नखोज्नु । नभन्दै त्यस्तै अनुभव भयो । जो कागजमा मात्रै काम गर्थे, तिनीहरू सधैँ प्रेम आलेको निगरानीमा परे । मैले पीँधमा भन्दा टाकुरामा निगरानी गरेँ ।

आलेले मन्त्रीबाट हटिसकेपछि त्रिभुवन विमानस्थलमा श्रम बजारमा जाने आम नेपालीका लागि स्थापना गरेको भिभिआइपी कक्ष र दोस्रो विमानस्थल परियोजना सधैँ सम्झिने बताए ।

काठमाडौं । जब बिहान हुन्छ, तब हुनेवाला मन्त्रीका कार्यकर्ता, आफन्त र शुभचिन्तकले एउटै कुरा सोधिरहन्छन्, शपथ कति बजे हो ? २१ दिन भयो, मन्त्री नियुक्त हुने भनिएका नेकपा (एकीकृत समाजवादी) का चार नेताले यस्तो तनावपूर्ण समय बिताइरहेको ।

उक्त पार्टीले २२ जेठमा बहालवाला मन्त्रीलाई फिर्ता बोलाई तीन नयाँ र एक राज्यमन्त्रीलाई मन्त्री बनाउने निर्णय गरेको थियो । एक जनालाई राज्यमन्त्रीमा सिफारिस गरेको छ ।

पार्टीले भवानी खापुङ स्वास्थ्य राज्यमन्त्रीबाट फुल मन्त्री, जीवनराम श्रेष्ठ पर्यटन, शेरबहादुर कुँवर श्रम, मेटमणि चौधरी सहरी र हिराचन्द्र केसी स्वास्थ्य राज्यमन्त्री हुने गरी सिफारिस गरेको थियो ।

राज्यमन्त्री बनाउने गरी पार्टी अध्यक्ष माधवकुमार नेपालले प्रधानमन्त्रीलाई नाम बुझाउँदा हिराचन्द्र केसी दाङमा थिए ।

मन्त्री बन्ने खबर पाएको भोलिपल्टै काठमाडौं छिरेका उनी आज २१ दिनसम्म ‘अहिले होला’, ‘भरे होला’ भन्दै शपथ पर्खिरहेका छन् । त्यसो त मन्त्रीमा नाम सिफारिस नभए पनि सदन चलिरहेको कारण उनी काठमाडौं आउँथे नै, तर मन्त्री बनिहाल्ने कुराले जुन हतारोसाथ काठमाडौं छिरे, आएपछि तनावबाहेक केही पाएका छैनन् ।

फागुन २० मा राष्ट्रियसभा सदस्यको कार्यकाल सकिएपछि आगामी संसदीय निर्वाचनको तयारीका लागि शेरबहादुर कुँवर प्रायः जिल्लामै हुन्थे । तर, स्थानीय निर्वाचन लगत्तै जिल्लामा बढी आयोजना र बजेट पार्ने लविङका लागि उनी काठमाडौं आइपुगेका थिए ।

अपेक्षा गरिएजति योजना र बजेट नपरेका कारण उनी निराश भएर अछाम फर्किने तयारी गर्दै थिए । तर, पार्टीको सचिवालय बैठकले मन्त्रीका रूपमा सिफारिस गरेपछि जहाजको टिकट बुक गरेका कुँवरले टिकट रद्द गरे ।

उता, कुँवर धनगढी ओर्लिएपछि अछाम जाने व्यवस्था मिलाउँदै थिए, स्वकीय सचिव विनोद धामी । तर, कुरा उल्टो भइदियो । स्वकीय सचिव भोलिपल्टै काठमाडौं आइपुगे, कुँवर यतै रहे । २१ दिन भयो, ‘अहिले’, ‘भरे’, ‘भोलि’ भन्दै तनावपूर्ण दिन बितेको ।

पर्यटन मन्त्रीमा सिफारिस भएका जीवनराम श्रेष्ठ अहिलेको तनावपूर्ण परिस्थितिलाई सामना गर्नुबाहेक अर्को विकल्प नभएको बताउँछन् । तर, यो घटनाले मान्छेहरू चिनाएको र कतिपयको अनुहार छर्लङ्ग भएको उनले बताए । ‘साथीहरू कस्ता रहेछन् भन्ने पनि चिन्न पाइयो’, उनले भने, ‘ठिकै छ, अब भरे, भोलि त भइहाल्ला (शपथ) ।’

नेपालको संसदीय इतिहासमा थुप्रै पटक अहिलेकोजस्तो साझेदारी सरकार बनेको, तर अहिलेजस्तो एउटा दलले फिर्ता बोलाएका आफ्ना मन्त्री फिर्ता नहुने र सिफारिस गरिएका नयाँ मन्त्रीको शपथ नगराउने घटना पहिलो भएको उनी बताउँछन् । ‘संसदीय व्यवस्था र गठबन्धन संस्कृतिको जुन मर्यादा एवं संस्कार हुनुपर्थ्यो, त्यस्तो भएन’, शपथ ढिला भएकोबारे उनले भने, ‘अरूलाई के भन्नु, हाम्रै साथीहरू (बहालवाला मन्त्री) का कुरा बुझ्न सकिएन ।’

‘आँखा जुध्यो, बोलचाल भएन’

बहालवाला सहरी विकास मन्त्री रामकुमारी झाँक्री र त्यही मन्त्रालयका हुनेवाला मन्त्री मेटमणि चौधरीबीच पार्टीको पोलिट्व्युरो बैठकमा भेट भयो । उनीहरूको आँखा जुध्यो, तर कुरा भएन ।

‘म के छ कमरेड भन्न खोज्दै थिएँ, उहाँले त वास्तै गर्नुभएन’, चौधरीले भने, ‘बोलेर के बिग्रिन्थ्यो र, आखिर हामी पार्टीले जे निर्णय गर्छ, त्यहीअनुसार चल्ने न हो ।’

रमाइलो छ, आलोक नगर

१० असारदेखि पार्टी केन्द्रीय कार्यालयमा चलेको स्थायी कमिटी, पोलिट्व्युरो र केन्द्रीय कमिटीका बैठकमा बहालवाला र हुनेवाला मन्त्रीबीच प्रशस्तै जम्काभेट भए । तर, एकापसमा राम्रो बोलचाल छैन ।

खासमा दुवै पक्ष तनावमा छन् । बहालवाला मन्त्रीहरू छाड्नुपर्ने कारण तनावमा छन् भने हुनेवाला मन्त्री कहिले हुने भन्ने तनावमा छन् । छाड्नुपर्नेहरु छाड्न नपरोस् भनेर दौडधुप गर्दैछन्, हुने भनी सिफारिस भएकाहरू पार्टी निर्णय कार्यान्वयन नभएकोमा आक्रोशित छन् ।

बहालवाला श्रम मन्त्री किसान श्रेष्ठसँग पार्टीको केन्द्रीय कमिटी बैठकमा भेट हुने अपेक्षा थियो, शेरबहादुर कुँवरको । तर, मन्त्री श्रेष्ठ उक्त बैठकमा गएनन् । ‘आउनुभएको भए भेट होला भन्ने लागेको थियो, तर नदेखेपछि मैले पनि सोधखोज गरिरहने कुरा भएन’, कुँवरले भने ।

हुनेवाला सबै मन्त्रीका सचिवालयहरू करिब करिब तयार भइसकेको छ । सबैका पुरानै स्वकीय सचिवहरू छन् । अहिले ती स्वकीय सचिवहरू नेताको फोनमा शपथबारे सोधिने जवाफ दिएर हैरान छन् ।

‘कुनै नयाँ नम्बरबाट फोन आयो कि राष्ट्रपति कार्यालयबाट पो हो कि भन्ने भइसक्यो’, पार्टी केन्द्रीय सचिवसमेत रहेका जीवनराम श्रेष्ठको सचिवालय सम्हालेका पूर्व पत्रकार भीमसेन राजवाहक भन्छन्, ‘फोन गर्नेलाई हुने निश्चित हो, कहिले भनेर नसोध्नुस् भन्ने गरेको छु ।’

हाल स्वास्थ्य राज्यमन्त्री रहेका भवानी खापुङसँग अहिलेकै स्वकीय सचिव भक्त खड्का, मेटमणिका गौरव महरा, हिराचन्द्रका सन्तोष ओली, शेरबहादुरका विनोद धामीहरूको पीडा पनि उस्तै हो ।

‘बधाई दिनेहरूले दिइसके, अब शपथ लिएर बहाली हुन मात्रै बाँकी छ’, पार्टी कार्यालयमा भेटिएका एक जना हुनेवाला मन्त्रीले भने ‘मन्त्रालय, विभाग र विभिन्न निकायका कर्मचारीले बिहानैदेखि घर घेर्न थालिसके, तर शपथको अझै टुङ्गो भएन ।’

काठमाडौं । शहरी विकास मन्त्री रामकुमारी झाँक्री प्रधानमन्त्री शेरबहादुर देउवासमक्ष राजीनामा बुझाउन बालुवाटार लागेकी छन् ।

सिंहदरबारमा पत्रकार सम्मेलन आयोजना गरेकी झाँक्री पत्रकारलाई मुख नदेखाई राजीनामा बोकेर बालुवाटार हिँडेकी हुन् ।

मन्त्री झाँक्रीको सचिवालयले पौने पाँच बजे मन्त्रालयमा पत्रकार सम्मेलन गरेर राजीनामा घोषणा गरिने बताएको थियो ।

आजै मन्त्रालयका कर्मचारीहरू उनलाई बिदाइ गर्न स्ट्यान्डबाइ छन् । तर, पत्रकारहरूलाई मन्त्रालयमै पर्खाएर झाँक्री सुटुक्क सिंहदरबार लागेकी हुन् ।

उनले राजीनामा बुझाइ सकेर पत्रकार सम्मेलनमा उपस्थित हुने बुझिएको छ ।

काठमाडौं । नेकपा एकीकृत समाजवादीका अध्यक्ष माधवकुमार नेपालले नेकपा एमालेबाट विद्रो गर्दा आफूहरूले निकै दु:खकष्ट गरेको बताएका छन् । अनेकन तरिका लगाएर बल्लबल्ल विभाजनका लागि आवश्यक संख्या पुर्‍याएको उनले सम्झिए ।

पार्टीनिकट महिला संगठनको कार्यक्रममा बोल्दै नेपालले आफूहरूसँग तीन विकल्प रहेकोमा विद्रोह रोजेको बताए ।

उनले भने, ‘हामीसँग केपी ओलीको दास बनेर बस्ने, गेरु वस्त्र लगाएर राजनीतिबाट सन्‍न्यास लिने र विद्रोह गर्ने तीन विकल्प थिए । हामीले विद्रोह रोज्यौँ । तर, विद्रोह गर्न कम्ती गाह्रो भएको थियो ।’

नेपालले सम्झिए, ‘भदौ २ गते हामीले होटल अर्यालबाट साथीहरूलाई बसमा राखेर चन्द्रागिरीमा लगेर दुई दिन राख्यौँ । केपी ओलीले आफ्नो मान्छेहरू होटलमा पठाएर आँसु खसाल्न लगाएर रोकौंला भन्ने सोचेका थिए । तर, उनको सबै योजना फेल गरायौँ । कति कष्ट गरेर बल्लतल्ल संख्या पुर्‍यायौँ ।’

उनले सधैँ सोझो पाराले नहुने भन्दै कहिलेकाहीँ उद्देश्य र बाटो फरक हुने बताए ।

‘उद्देश्य एउटा हुन्छ, तरिका अर्को हुन्छ । कहिले पूर्व गएजस्तो, कहिले पश्चिम गएजस्तो । तर गन्तव्य एउटै,’ नेपालले भने, ‘पछिल्लो कालमा विद्रोह गर्ने बेलामा हाम्रो पक्षमा अलिकति अनुकूलता भयो र सफल भयौँ ’, नेपालले भने ।

उनले १० भाइलाइ दौडधुप गर्न लगाएर जेठ २ अगाडिको अवस्थामा फर्काउने नक्कली सर्त राखिएको बताए ।

‘तर अहिलेसम्म पनि जेठ २ गतेको अवस्थामा फर्किएको छैन । ती १० भाइले न्याय पाएनन् । जे हामीलाई लागेको थियो, त्यही भयो,’ नेपालले भने ।

काठमाडौं । नेकपा एकीकृत समाजवादीका अध्यक्ष माधवकुमार नेपालले महिला हिंसाका चर्चित मुद्दाहरूमा आफ्नो पार्टीको महिला संगठनले सक्रियता देखाउन नसकेको गुनासो गरेका छन् । उनले यस्ता मुद्दा आउनासाथ पत्रकार सम्मेलन गर्नेदेखि रत्नपार्कमा जुलुस निकाल्नेसम्मका गतिविधि गर्न महिला नेतृहरूलाई सुझाव दिए ।

पार्टीनिकट महिला संगठनको कार्यक्रममा सम्बोधन गर्दै नेपालले भने, ‘यत्रो महिला हिंसाको इस्यूमा तपाईँहरू सडकमा कतै देखिनुभएन । तपाईँहरू व्यानर लिएर सडकमा उत्रिनुपर्थ्यो । मन्त्रीकहाँ डेलिगेसन जानुपर्थ्यो । पत्रकार सम्मेलन गर्नुपर्थ्यो । मण्डला र रत्नपार्कमा जुलुस निकाल्नुपर्थ्यो । तर, तपाईँहरूले केही गर्नुभएन ।’

नेपालले भित्रभित्र भावना उम्लिए पनि त्यसलाई बाहिर नपोख्दासम्म अर्थ नहुने बताए ।

‘कोही महिलामाथि हिंसा हुँदा आफूमाथि भएको सम्झेर विरोध गर्नुपर्छ । न्यायको आवाज उठाउनुपर्छ परिवारका सदस्यलाई भेटेर सान्त्वना र साथ दिनुपर्छ,’ नेपालले सिकाउँदै भने ।

काठमाडौं । नेकपा एकीकृत समाजवादीका अध्यक्ष माधवकुमार नेपालले आउँने संसदीय चुनावमा एमालेलाई सम्पूर्णरुपले पराजित नगरेसम्म आफूहरुले गरेको विद्रोह र संघर्षको जित नहुने बताएका छन् ।

पार्टीको केन्द्रीय कमिटी बैठकमा समापन भाषण गर्दै अध्यक्ष नेपालले नेकपा एसले एमालेसँग एकता र सहकार्य गर्ने भनेर कतिपयले प्रचार गरिरहेको भन्दै त्यो सम्भावना नरहेको प्रष्ट पारेका हुन् ।

नेपालले एमालेलाई पराजित नगरेसम्म संघर्षको जित नहुने प्रष्ट पारे । उनले स्थानीय तह निर्वाचनबाट पाठ सिकेर गठबन्धनलाई अझ मजबुत बनाउँनुपर्ने बताए । उनले गठबन्धनमात्र भनेर भर परेर नबस्न र आफ्नो शक्ति बढाउँन पनि नेताहरुलाई आग्रह गरे ।

नेपालले आउँने चुनावमा पनि गठबन्धन गर्ने भनेर प्रधानमन्त्री तथा कांग्रेस सभापति शेरबहादुर देउवाले भनिसकेको र गठबन्धनबाटै एमालेलाई परास्त गर्न सकिने प्रष्ट पारे ।

बैठकमा नेपालले भने– हामी गठबन्धनमा भएका पार्टीहरुसँग छुट्टाछुट्टै छलफल गर्ने छौ , र उहाँहरुको नजरमा हाम्रो भुमिका कस्तो छ थाहा हुन्छ , त्यसपछि हामी परिस्थिति हेरेर माग गर्ने छौ, आफ्नो कुरा राख्ने छौ, त्यस्तो हुँदा हामीले धोका खादैँनौ ।

नेपालले स्थानीय तह चुनावमा नेकपा एसले ९ लाख मत पाएको दाबी गर्दै आफूहरुसँग २० लाख भन्दा बढी मत रहेको बताए । अध्यक्ष नेपालले मन्त्रिपरिषद हेरफेरको निर्णय कार्यन्वयन गर्न प्रधामन्त्रीलाई पटकपटक भनिएको भन्दै कांग्रेस र माओवादीभित्रको अप्ठेरोका कारण पनि ढिला भएको बताए ।

काठमाडौं । मन्त्री हेरफेरसम्बन्धी पार्टी निर्णयको विपक्षमा संसदीय दलको बैठक माग गर्दै दिएको निवेदनबाट हस्ताक्षर फिर्ता लिएका पर्यटन मन्त्री प्रेम आलेले नयाँ मन्त्रीहरूको सूची समावेशी नभएको भन्दै पार्टीमा अलग नाम पेस गरेका छन् ।

उनले गैर सांसद र गैर समावेशी टिमको विपक्षमा सांसदहरूको समावेशी टिमको नाम सिफारिस गरेको बताइएको छ ।

स्रोतका अनुसार हट्ने मन्त्रीहरूको तर्फबाट सिफारिस गरिएको नाममा सांसद कृष्णलाल महर्जन, निरा जैरु, धनबहादुर बुढा र हिराचन्द्र केसी छन् । त्यस्तै मुगुका सांसद गोपाल बमलाई राज्यमन्त्रीमा सिफारिस गरिएको छ ।

हट्ने भनिएका अन्य मन्त्रीले भने सो सूची आलेको एकल भएको भन्दै आफूहरू हस्ताक्षरमा कायमै रहेको बताएका छन् ।

पार्टीले जीवनराम श्रेष्ठ, मेटमणि चौधरी, भवानी खापुङ, शेरबहादुर कुँवर र हिराचन्द्र केसीको नाम सिफारिस गरेको छ ।

काठमाडौं । नेकपा एकीकृत समाजवादी पार्टीको केन्द्रीय कमिटी बैठक आज बस्दैछ ।

बैठक काठमाडौंको बबरमहलस्थित कार्की ब्यांकेटमा बिहान ११ बजे बस्न लागेको हो ।

आजको बैठकमा राजनीति प्रतिवेदन पेश गर्ने, मन्त्रीको विषयमा केन्द्रिय सदस्यको कुरा सुन्ने, पार्टी अध्यक्ष माधव नेपालले आफ्नो भनाइ राख्ने र
अब आउने चुनावी तयारीको बारे छलफल गर्ने लगायतको ऐजण्डा रहेको पार्टी प्रचारप्रसार प्रमुख जगन्नाथ खतिवडाले बताए ।

यस्तै १३ र १४ गते केन्द्रीय परिषदको बैठक प्रज्ञा प्रतिष्ठानमा बोलाइएको उनले बताए ।

काठमाडौं । संस्कृति पर्यटन तथा नागरिक उड्डयन मन्त्री प्रेम आलेले मन्त्री हेरफेरसम्बन्धी पार्टीको निर्णय १२ घण्टाभित्र कार्यान्वयन गर्न आफूले भूमिका खेल्ने बताएका छन् ।

नेकपा एसको पोलिटब्यूरो बैठकमा बोल्दै मन्त्री आलेले पार्टीको निर्णय मान्न आफू बाधक नभएको प्रष्टीकरण दिएका हुन् ।

आलेको भनाइ उदृत गर्दै एक सदस्यले भने, ‘म पार्टीको निर्णय मान्न तयार छु । मैले पहिले नै भनेको हुँ । अब १२ घण्टाभित्र यो निर्णय कार्यान्वयन गर्नका लागि मेरो भूमिका हुन्छ, म पार्टीको पद्दति मान्छु ।’

काठमाडौं । नेकपा एकीकृत समाजवादीका अध्यक्ष माधवकुमार नेपालले कम्युनिष्ट पार्टीले देशभक्तिको भावनालाई बढी महत्व दिने बताएका छन् । पार्टीको पोलिटब्युरो बैठकलाई सम्बोधन गर्दै उनले यस्तो बताएका हुन् ।

‘कम्युनिष्ट पार्टीले देशभक्तिलाई महत्व दिन्छ । विदेशीहरूको सामु लम्पसार पर्दैन । विदेशीका सामु घुँडा टेक्तैन । विदेशीको इशारामा नाच्दैन’, उनले भने, ‘विदेशीको स्वार्थमा चल्दैन । आफ्नो देश, आफ्नो राष्ट हितको रक्षा राष्ट्रको मर्यादा नाघ्दैन ।’

यस्तै पार्टी संगठन मजबुत बनाएमात्र पार्टी बलियो हुने र देश बनाउन सकिने अध्यक्ष नेपालले बताए ।

काठमाडौं । नेकपा एकीकृत समाजवादी निकट विद्यार्थी संगठन अनेरास्ववियूका अध्यक्ष सुदेश पराजुलीले पार्टीले मन्त्रीबाट फिर्ता बोलाउँन खोज्दा अवज्ञा गरेको भन्दै आफ्नै संगठनकी पूर्व अध्यक्ष समेत रहेकी शहरी विकास मन्त्री रामकुमारी झाँक्रीमाथि प्रश्नै प्रश्न उठाएका छन् ।

पराजुलीले केपी ओलीविरुद्धको आन्दोलनमा झाँक्रीले मुखमा टेप लगाएर गरेको भाषण खोक्रो आदर्श र स्टन्टमात्र रहेछ भन्दै मन्त्री बन्नेबाहेक अन्य कुनै उद्देश्य नरहेको आरोप समेत लगाएका छन् ।

सामाजिक सन्जालबाट झाँक्रीको नाम नलिई पराजुलीले मन्त्री भएपछि माफिया दलालको सेटिङमा काम गर्ने र कमाउने बाहेक केही उद्देश्य नभएकाबाट समाजवादको अपेक्षा गर्नु नै गलत भएको टिप्पणी गरेका छन् ।

पराजुलीले भनेका छन्–हिजो मुखमा लगाएको टेप खोली खोली स्टन्ट मारी मारी गरेको भाषण त केबल खोक्रो आदर्श बोहक के हुन सक्छ त कमरेड । मन्त्री बाहेक पनि जीवन जगत छ भन्ने बुझ्ने हो कि ? एकथान मन्त्री त तपाईंले हिजो बोकेको मुल्य मान्यता रहे बाँचेमा कति हो कति धेरैपटक मन्त्री त यो भन्दा माथि प्रधानमन्त्री बन्न अवसर नै आउँछ ।

नेकपा एसका मन्त्रीले सरकारबाट फर्किन आनाकानी गरिरहेका बेला झाँक्रीले फिलिपिन्समा जस्तै महिलाहरुको अलग्गै पार्टी बनाउँने राय सुझाव मागेर स्टाटस लेखेपछि पराजुलीले यस्तो प्रहार गरेका हुन् ।

काठमाडौं । नेकपा एकीकृत समाजवादी निकट पत्रकारहरुको संगठन समाजवादी प्रेस संगठनले सरकारी सञ्चारमाध्यमलाई कांग्रेसीकरण गरिएकोआरोप लगाएको छ ।

समाजवादी प्रेस संगठनले सरकारी सञ्चारमाध्यममा भएका नियुक्ति एवं बाँडफाँडमा अधिकांश ठाउँमा सत्तासाझेदार दलमध्ये नेपाली कांग्रेसका कार्यकर्ताहरु मात्र नियुक्ति गरेर कांग्रेसीकरण गरेको भन्दै असन्तुष्टि जनाएको छ ।

सरकारी संचारमाध्यममानियुक्ति र अवसरहरुको वितरणका सन्दर्भमा समाजवादी प्रेस संगठन नेपाललाई निरन्तर उपेक्षा गरिँदै आएको बताउँदै विभेद गरिरहे प्रतिकार गर्ने चेतावनी समेत दिएको छ ।

बिहीबार एक विज्ञप्ति जारी गर्दै एकलौटी ढंगबाट अवसर वितरण र नियक्तिहरु गरिएकोभन्दै सरकारले सत्ता गठबन्धनको महत्वपूर्ण दल र त्यससँग सम्बद्ध संगठनसँग निरन्तर गर्दै आएको अपमानजनक व्यवहार निन्दनीय भएको बताएको छ ।

जारी विज्ञप्तिमा भनिएको छ,‘नेपाली कांग्रेसका सभापति शेरबहादुर देउवा प्रधानमन्त्रीमा नियुक्त भएपछि गोरखापत्र संस्थान, नेपाल टेलिभिजन, रेडियो नेपाल, राष्ट्रिय समाचार समितिसहितका संस्थामा रिक्त भएका विभिन्न पदमा नियुक्ति गरिँदा समाजवादी प्रेस संगठन नेपाल वा यस संगठनसम्बद्ध दल नेकपा (एकीकृत समाजवादी)सँग कुनै किमिसको परामर्श वा समन्वय हुने गरेको छैन ।हालसम्मका सरकारी नियुक्ति र अवसरको बाँडफाँडमा भएका विभेदपूर्ण क्रियाकलाप सच्याउनका निम्ति पहल गर्न अनुरोध गर्दछौँ ।’

काठमाडौं । नेकपा एकीकृत समाजवादी पार्टीको पोलिटब्यूरो बैठक आज बस्दैछ ।

बैठक तिनकुेनस्थित पार्टी कार्यालयमा बिहान ११ बजे बस्ने प्रचार विभाग प्रमुख जगन्नाथ खतिवडाले जानकारी दिए।

आजको बैठकमा भोलि हुने केन्द्रीय कमिटिको बैठकमा केके एजेन्डा उठाउने भन्ने बारेमा छलफल हुनेछ  ।

यस्तै भोलि केन्द्रीय कमिटी बैठक कार्की ब्याङकेटमा र १३ र १४ गते केन्द्रीय परिषदको बैठक प्रज्ञा प्रतिष्ठानमा बोलाइएको उनले बताए ।

काठमाडौं । नेकपा एकीकृत समाजवादीको सचिवालय बैठक बसिरहेको छ ।

आलोकनगरस्थित पार्टी मुख्यालयमा हिजोदेखिको बैठक आज पनि बसिरहेको हो ।

बैठकमा स्थानीय निर्वाचनको समीक्षा, संगठन र सदस्यता वितरण, आसन्न प्रतिनिधिसभा र प्रदेशसभाको निर्वाचन, सत्ता गठबन्धनलगायतको विषयमा छलफल हुनेछ ।

मन्त्री हेरफेरसम्बन्धी विषय पार्टीभित्र पेचिलो बनिरहेको बेला यसबारे पनि बैठकमा छलफल हुने बताइएको छ ।

काठमाडौं । नेकपा एकीकृत समाजवादीका मन्त्रीहरूले सरकारबाट बाहिरिन ५ बुँदे सर्त राखेका छन् । अध्यक्ष माधवकुमार नेपालको कोटेश्वरस्थित निवासमा बुधबार साँझ भएको छलफलमा मन्त्रीहरूले पार्टीको निर्णय कार्यान्वनयन गर्न तयार भएपनि नयाँ मन्त्री चयनलगायतका विषयमा असहमति जनाएका हुन् ।

स्वास्थ्यमन्त्री विरोध खतिवडा, शहरी विकासमन्त्री रामकुमारी झाँक्री, पर्यटनमन्त्री प्रेम आले र श्रममन्त्री किसान श्रेष्ठले अध्यक्ष नेपाललाई भेटी ५ बुँदे सर्त राखेका हुन् । उनीहरूले संसदमा बजेट विचाराधीन हुँदा नै मन्त्री फेर्ने हल्ला गराएर पार्टीले अपरिपक्व निर्णय लिएको आरोपसमेत लगाएका छन् । सरकारमा आफूहरूको पर्फमेन्स अरु दलको भन्दा उत्कृष्ट भएको जिकिर गर्दै उनीहरूले मन्त्री फेर्ने हल्ला चलाएर कर्मचारीसामु निरीह बनाउनु पार्टी नेतृत्वको गल्ती भएको भन्दै आलोचना समेत गरेका छन् ।

छलफलका क्रममा अध्यक्ष नेपाल र मन्त्रीहरूबीच चर्काचर्कीसमेत परेको थियो । मन्त्रीहरूले अध्यक्ष नेपाल र नेता झलनाथ खनालको भूमिकाको आलोचना गरेका थिए ।

छलफलमा अध्यक्ष नेपालले पार्टीले मन्त्री हेरफेरको निर्णय गरिसकेकोले निर्णय कार्यान्वयनमा सहयोग गर्न आग्रह गरेका थिए । मन्त्रीहरूले भने नयाँ मन्त्रीको सूची समावेशी नदेखिएको, महिला नपरेको, दाङबाट मात्रै २ जनाको नाम परेको, गैरसांसदलाई पनि सिफासिरस गरिएको लगायतका विषयमा असहमति राखेका छन् । स्वास्थ्य राज्यमन्त्री भवानी खापुङलाई भने मन्त्रीमा बढुवा गर्ने निर्णयमा पनि उनीहरूको असुन्तुष्टि थियो ।

छलफलका क्रममा अध्यक्ष नेपाल र मन्त्रीहरूबीच चर्काचर्कीसमेत परेको थियो । मन्त्रीहरूले अध्यक्ष नेपाल र नेता झलनाथ खनालको भूमिकाको आलोचना गरेका थिए ।

बैठकमा सहभागी एक मन्त्रीले पार्टीको निर्णय अपरिपक्व भएको र सम्मानित नेता खनालले मिडियाबाजी गराएर आफूहरूको अपमान गराएको बताए । ‘हाम्रो अपमान गरिएको छ । मन्त्री पद छाड्नु ठूलो कुरा होइन तर माधव र झलनाथ कमरेडले जसरी निर्णय लिनुभयो त्यो गलत छ । पार्टीको निर्णय मान्छौं तर हाम्रा सर्तहरू यथावत छन्’, ती मन्त्रीले नेपाल प्रेससँग भने ।

मन्त्रीहरूले राष्ट्रियसभामा विनियोजन विधेयकबारे मन्त्रीका रूपमा जवाफ दिन बाँकी नै रहेकोले बजेट पूर्ण रूपले पारित भएपछि मात्रै निर्णय कार्यान्वयन हुनसक्ने बताएका थिए ।

बैठकमा चारमन्त्रीले अध्यक्ष नेपालसँग राखेका सर्तहरू–

१. नयाँ मन्त्रीहरू समावेशी आधारमा छानिनुपर्ने

२. गैरसांसदलाई मन्त्री बनाउन नहुने

३. एकै जिल्लाका २ जना मन्त्री बनाउन नहुने

४. राज्यमन्त्रीलाई मन्त्रीमा बढुवा गर्न नपाइने

५. राष्ट्रियसभाबाट बजेट पारित हुँदासम्म पर्खने

काठमाडौं । नेकपा एकीकृत समाजवादीले लगातार चार दिनसम्म बैठक बोलाएको छ ।

पार्टीका प्रमुख सचेतक जीवनराम श्रेष्ठका अनुसार १० असारमा पोलिटब्यूरो बैठक, ११ गते केन्द्रीय कमिटी, १३ र १४ गते केन्द्रीय परिषदको बैठक बोलाइएको छ । बैठकमा मन्त्रीहरूको हेरफेरबारे पनि छलफल हुने स्रोतले बतायो ।

बैठकमा पार्टी संगठन र आगामी प्रतिनिधिसभा र प्रदेशसभाको निर्वाचनको विषयमा छलफल हुने श्रेष्ठले बताए । एकीकृत समाजवादीले आगामी निर्वाचनसम्म गठबन्धन कायमै राख्नुपर्नेमा जोड दिँदै सिटको भागबण्डा पनि असारभित्रै टुंग्याउन दबाब दिँदै आएको छ ।

कैलाली । जेठ २१ गते नेकपा एकीकृत समाजवादीले आफ्ना पाँच मन्त्री फिर्ता बोलाउने निर्णय गर्‍यो । पार्टी कार्यालयमा बसेको सचिवालय बैठकले समाजवादीबाट सरकारमा रहेका स्वास्थ्य तथा जनसंख्या मन्त्री विरोध खतिवडा, संस्कृति पर्यटन तथा नागरिक उड्ड्यनमन्त्री प्रेमबहादुर आले, सहरी विकास मन्त्री रामकुमारी झाँक्री, श्रम, रोजगार तथा सामाजिक सुरक्षा मन्त्री कृष्णकुमार श्रेष्ठ र कानुन मन्त्री गोविन्द बन्दी लाई फिर्ता बोलाउने निर्णय गरेको थियो ।

नेकपा एसका अध्यक्ष माधव कुमार नेपालले फिर्ता बोलाउने मन्त्रीको नाम र सरकारमा सहभागी हुने नयाँ मन्त्रीको नाम पनि प्रधानमन्त्री शेरबहादुर देउवालाई बुझाए । तर, देउवाले चासो दिएनन् । पुराना मन्त्री फिर्ता बोलाएर नयाँ मन्त्री पठाउने सचिवालयको निर्णयलाई असार १ गते बसेको स्थायी कमिटिको बैठकले पनि पारित गरिसकेको छ । तर, त्यसपछि पनि प्रधानमन्त्रीले नेकपा एकीकृत समाजवादीका नयाँ मन्त्रीलाई नियुक्त गरेका छैनन् ।

नेकपा एकीकृत समाजवादीले स्वास्थ्य राज्यमन्त्री भवानी खापुङलाई मन्त्री बनाउन सिफारिस गरेको थियो । त्यस्तै सहरी विकासमा मेटमणि चौधरी, पर्यटनमा जीवनराम श्रेष्ठ, श्रममा गैरसांसद शेरबहादुर कुँवर र हीरा केसीलाई स्वास्थ्य राज्यमन्त्री बनाउने निर्णय गरिसकेको छ । पार्टीले निर्णय गरिसकेपछि मन्त्री बन्ने पक्का भएकाहरू अहिले अन्योलमा छन् । गठबन्धन सरकारले नेकपा एकीकृत समाजवादीको निर्णयलाई प्राथमिकता नदिएको उनीहरू बताउँछन् ।

आइतबार गठबन्धनको बैठकपछि फेरि प्रस्तावित मन्त्रीहरू उत्साहित भएका छन् ।

‘हिजो नेताहरू भेट्न जानु भएको थियो । एक-दुई दिनमा निर्णय कार्यान्वयन हुन्छ भन्ने सुनेका छौँ’ श्रम, रोजगार तथा सामाजिक सुरक्षा मन्त्रीमा सिफारिसमा परेका शेरबहादुर कुँवरले भने, ‘गठबन्धनको संस्कारमा पार्टीको निर्णय नै प्रधान हुन्छ । निर्णय कार्यान्वयन नहुनु राम्रो होइन ।’

निर्णय कार्यान्वयन गराउनु नसक्नु नेतृत्वको पनि कमजोरी रहेको उनको बुझाइ छ । ‘हामी व्यक्ति भनेको प्रतिनिधि पात्र हो । पार्टीले पठाउने हामी जाने कुरा हो’ उनले भने , ‘निर्णय कार्यान्वयन गराउन नसकेको कुराले त नेतृत्वमा आँच आउँछ नि ।’ आफूहरूले अहिले पनि आश्वासन पाइरहेको बताउने कुवर केही दिनमा मन्त्री बन्न पाइनेमा विश्वस्त छन् ।

उनी भन्छन् , ‘निर्णय कार्यान्वयन हुन्छ भन्ने छ । तर, कहिले हुने भन्नेमा तिथि मिति खुलाइएको छैन । अस्ति बजेट पास भएपछि हुन्छ भन्ने हामीले खबर पाएका थियौँ । व्यक्तिगत रूपमा चियो चर्चो गरिएको छैन ।’

प्रधानमन्त्रीलाई समाजवादीका तर्फबाट मन्त्री भएकाहरूले नै अहिले सरकारबाट नहटाउन दबाब दिएका कारण पार्टीको निर्णय कार्यान्वयनमा ढिलाइ भइरहेको धेरैको बुझाइ छ । तर, कुँवर भने पार्टीभित्र निर्णयको विरुद्धमा कोही नभएको दाबी गर्छन् ।

‘पार्टीभित्र निर्णयको विरुद्धका कोही बोलेका छैनन् । प्रधानमन्त्रीलाई देखिने गरी लबिङ कसैले गरेको छैन । अदृश्य कुरा त हामीलाई थाहा भएन’ उनले नेपाल प्रेसलाई भने ।

स्वास्थ्य तथा जनसंख्या मन्त्री विरोध खतिवडाको स्थानमा जान लागेका नेकपा एकीकृत समाजवादीका सचिव समेत रहेको प्रमुख सचेतक जीवनराम श्रेष्ठ पार्टीको निर्णय सरकारले कार्यान्वयन नगर्नु गलत रहेको बताउँछन् । यसले गठबन्धन प्रति असन्तुष्टि बढिरहेको उनको भनाइ छ ।
‘पार्टीले निर्णय गरिसकेपछि कार्यान्वयन गर्नु पर्ने हो । ढिलासुस्ती नगर्नु पर्ने हो’ उनले भने , ‘स्थायी कमिटी र सचिवालयले निर्णय गरेर पठाइसकेको विषयलाई गठबन्धनको नेतृत्वले कार्यान्वयन नगर्ने, ढिला सुस्ती गर्ने कुराले असन्तुष्टि बढिरहेको छ । ’

उनी पनि मन्त्रीहरू हेरफेर गर्ने पार्टीको निर्णय केही दिनमा कार्यान्वयन हुनेमा विश्वस्त छन् । आफ्नै पार्टीका मन्त्रीले लबिङ गरेका कारण पार्टीको निर्णय कार्यान्वयनमा ढिलाइ भएको कुरामा उनी विश्वस्त छैनन् । तर, भन्छन् ‘संसदीय व्यवस्थामा कुनै मन्त्रीको लबिङले पार्टीको निर्णय कार्यान्वयनमा ढिलाइ भएको हो भने त्यो गलत हो ।’

‘निरीह’ नेपाल

जेठ २१ गते मन्त्री फिर्ता बोलाउने र नयाँ मन्त्री पठाउने निर्णय गर्नुभन्दा अघि नै अध्यक्ष माधवकुमार नेपालले प्रधानमन्त्री शेरबहादुर देउवालाई मन्त्री फेरबदल गर्नु पर्ने कुरा सुनाएका थिए । सुरूमा आनाकानी गरेका देउवा पछि नेपालको निर्णयमा सहमत भएका थिए ।

‘सुरूमा अहिले हतार नगर्नुहोस् पनि भन्नु भएको थियो पछि नेपालले निर्णय गर्नै पर्ने अवस्था आएको बताएपछि गर्नुहोस् भन्नुभयो’ नेपाल निकट स्रोतले भन्यो ‘देउवाको ग्रीनसिंलन पछि नेपालले सचिवालयबाट निर्णय गराउनु भएको हो ।’

देउवाकै सल्लाहमा पुराना मन्त्री फिर्ता बोलाउने र नयाँ मन्त्री नियुक्त गर्ने निर्णयमा पुगेमा नेपालले अहिले देउवाले नै उक्त निर्णय कार्यान्वयनमा चासो नदेखाए पनि रुष्ट बनेका छन् । आफ्नै मन्त्रीहरूको दबाबमा आएर पार्टीको निर्णय कार्यान्वयन नगरेको नेपालको बुझाइ छ ।

आइतबार सम्पादक तथा पत्रकारहरूसँग भएको छलफलमा पनि नेपालले मन्त्रीहरूको विषयमा टिप्पणी गर्न आनाकानी गरे । ‘सन्तुष्ट छु भनौँ, त्यो पनि समस्या । सन्तुष्ट छैन भनौँ भोलिको समाचार त्यही बन्छ ’, उनको भनाइ थियो ।

किन भइरहेको छ ढिलाइ ?

प्रधानमन्त्री शेरबहादुर देउवाले नेकपा एसको सचिवालय र स्थायी कमिटी बैठकको निर्णयलाई कार्यान्वयनमा नलैजानुमा धेरै कारणहरू रहेको नेकपा एकीकृत समाजवादीका नेताहरू बताउँछन् । पार्टीको निर्णय सरकारले कार्यान्वयन नगरेको विषय पार्टीका नेताहरूले पनि गम्भीर रूपले लिएका छन् ।

‘निर्णय हामीले गरेका हौँ । कार्यान्वयन गर्ने तह अर्को हो । कार्यान्वयन गर्ने तहबाट भइरहेको ढिलाइ क्षम्य होइन’ पार्टीका उपमहासचिव डा. गंगालाल तुलाधरले भने, ‘हामीले यसलाई गम्भीर रूपले लिएका छौँ ।’ ‘तपाइहरूले फिर्ता बोलाएका मध्ये केही मन्त्रीले प्रधानमन्त्रीलाई लबिङ गरेका कारण पार्टीको निर्णय कार्यान्वयनमा ढिलाइ भएको चर्चा छ नि ?’ उनले भने , ‘प्रमाण नभए सम्म त्यो भन्न मिलेन । तर, तपाईँले सुनेको कुरा मैले पनि सुनेको छु । त्यति प्रेसर थाम्न नसक्ने प्रधानमन्त्री अहिले हुनुहुन्न जस्तो लाग्दैन । ’ गठबन्धनले देउवालाई सबै भन्दा बलियो प्रधानमन्त्री बनाएको उनले दाबी छ ।

उनले भने, ‘दुई-चार जना मन्त्री थर्काउँदैमा वा प्रेसर दिँदैमा उहाँ गल्नुपर्ने जस्तो धेरै कमजोर धरातलमा हुनुहुन्छ जस्तो लाग्दैन ।’ सुरूमा ६ महिनाका लागि भन्दै सरकारमा पठाएको बताए पनि ८ महिनापछि फिर्ता बोलाउँदा पनि निर्णय कार्यान्वयन नहुनुमा पार्टीबाटै केही कमजोरी भएको उनी स्वीकार गर्छन् । सरकारमा रहेका मन्त्रीहरूले बजेट सम्म कुर्न आग्रह गरे पनि पार्टीले उनीहरूलाई फिर्ता बोलाउन केही हतार गरेको उनको बुझाइ छ ।

‘बजेटसम्म कुरिदिन उनीहरूले मसँग पनि आग्रह गरेका थिए । मन्त्रालयको बजेटमा जवाफ दिएर हामीलाई फिर्ता बोलाएको भए राम्रो हुने थियो । उनीहरूले पनि भनेका थिए’ तुलाधरले सुनाए ‘त्यो मानवीय कोणबाट हेर्दा त्यो जायज पनि छ ।’ पार्टीले त्यो विषयमा छलफल नगरेको उनी बताउँछन् ।

‘हिजो ६ महिनाको लागि बनाएका मन्त्रीहरू दुई महिना थप बितिसक्दा तपाइहरू फर्किनुहोस् भन्दा त्यो आपत्ति आउँला जस्तो लागेको थिएन। तर, हामीले थप छलफल गरेको भएर राम्रो हुनेथ्यो भन्ने देखियो’, तुलाधरले थपे । उनका अनुसार अहिले निर्णय कार्यान्वयन हुनुमा आफ्नो मात्रै कारण रहेको कुरा उनी स्वीकार गर्दैनन् ।

कांग्रेसभित्रैको समस्याले आफूहरूको निर्णय कार्यान्वयन हुन नसकेको उनको ठहर छ ।

‘मन्त्री हुन जानेहरू र मन्त्री भएर फर्किनेहरूको अन्तर विरोध नेपाली कांग्रेसमा तीब्र छ तर, त्यो बाहिर देखिँदैन । त्यो भन्दा चर्को माओवादीमा छ । त्यस्तै जसपामा छ’, उनले भने, ‘यी सबै कारणले हाम्रो निर्णय कार्यान्वयनमा ढिलाइ भइरहेको हो ।’ ६ महिनामा मन्त्रिपरिषद् पुनर्गठन गर्ने सहमति भएको उनले बताए ।

‘सहमतिमा ६ महिनामा सबै पार्टीले मन्त्री फेरबदल गर्ने सहमति भएको हो अरू पार्टीमा विवाद छ । सबै एकैपटक नियुक्त गर्ने भन्ने विषय ढिलाइ भएको हो ’ उनले भने । पार्टीको निर्णय कार्यान्वयन गर्न सरकारले चासो नदेखाएकोमा सरकारप्रति असन्तुष्टि रहेको उनको भनाइ छ ।