Category: नेकपा एस

रुपन्देही । नेकपा एकीकृत समाजवादीका उम्मेदवार राजु गुरुङलाई बैंकिङ कसुरमा कालोसूचीमा परेको भन्दै निर्वाचन आयोगले उम्मेदवारी खारेज गरेपछि रुपन्देही क्षेत्र नं २ चर्चामा आएको छ । गुरुङ सत्ता गठबन्धनका साझा उम्मेदवार दिए ।

नेकपा एमालेका उपाध्यक्ष विष्णु पौडेलले उम्मेदवारी दिएको यो क्षेत्रमा सत्ता गठबन्धनका मुख्य उम्मेदवारको मनोनयन खारेज भएको हो । अब पौडेलको प्रतिस्पर्धी को हुने भन्ने विषयमा बहस सुरु भएको छ । गठबन्धन दलमा रहेका कांग्रेस-माओवादीका नेताहरु भने नेताहरुले समयमै बुद्धि पुर्‍याउन नसक्दा मैदान खाली भएको गुनासो गरेका छन् ।

यो क्षेत्रबाट प्रतिनिधिसभामा उम्मेदवारी दिएका १८ जनामध्ये गुरुङसँगै तीन जनाको मनोनयन आयोगले खारेज गरेको छ । अब चुनावी मैदानमा १५ जना उम्मेदवार रहेका छन् । उनीहरुमध्ये सांगठनिक रुपमा ठूला दलमा आवद्ध रहेकाहरु नभएकाले एमाले नेता पौडेललाई सहज भएको धेरैले आंकलन गरेका छन् ।

एकीकृत समाजवादीका गुरुङको उम्मेदवारी खारेज भएपछि अब गठबन्धनका दलहरुले कुन उम्मेदवारलाई समर्थन गर्छ भन्नेतर्फ चासोका साथ हेरिएको छ ।

गुरुङसँगै स्वतन्त्र उम्मेदवारीको प्रचार गरेका हाम्रो नेपाली पार्टीका तर्फबाट उम्मेदवार बनेका डा. निकोलस (कमल) भुसाल, स्वतन्त्र उम्मेदवार हिमाल बस्यालको उम्मेदवारी खारेज गरिएको छ । अब गठबन्धनले साना दलबाट उम्मेदवारी दिएकाहरूलाई समर्थन गर्न सक्ने बुझिएको छ।

सत्ता गठबन्धन भने अहिले कानूनी परामर्शमा जुटेको र गुरुङकै प्रकृतिको मुद्दा अन्य उम्मेदवारहरूको पनि रहेकोमा अरुको सदर हुँदा गुरुङको उम्मेदवारी खारेज भएपछि अदालत जाने तयारी गरिएको एकीकृत समाजवादीका केन्द्रीय सदस्य सिद्धिचरण भट्टराईले जानकारी दिए ।

आयोगको निर्णय अन्तिम भइसकेकाले अब कानूनी रुपमै उनको उम्मेदवारी खारेज भएको कानूनविद्हरुले बताएका छन् । जसले गठबन्धनको ठूलो दल कांग्रेसका नेताहरु अदालत जाने पक्षमा छैनन् ।

अब गठबन्धनले राष्ट्रिय जनमुक्ति पार्टीका केशवबहादुर थापामगर, राष्ट्रिय स्वतन्त्र पार्टीका गणेश पौडेल र स्वतन्त्र उम्मेदवार रुपसिंह थापामध्ये एकलाई समर्थन गर्ने गरी छलफल सुरु भएको एक नेताले बताए ।

सत्ता गठबन्धनका साझा उम्मेदवार गुरुङविरुद्ध कालोसूचीमा नाम चढेको भन्दै उजुरी परेको थियो । तोकिएको अवधिमा गुरुङले कालोसूचीबाट हटेको प्रमाण पेस नगरेपछि निर्वाचन कार्यालयले उनको उम्मेदवारी खारेज गर्ने निर्णय गरेको थियो । गुरुङले अन्तिम समयसम्म पैसा बुझाउने प्रयास गरे पनि ठूलो रकम भएकाले जुटाउन नसकेको बुझिएको छ । तर, सो पार्टीका नेताहरुले सेटिङमा त्यो पैसा बुझाउन नदिइएको आरोप सामाजिक सन्जालमा लगाइरहेका छन् । उनीहरुले कालोसूचीमा रहेको कम्पनी गुरुङको मात्र नभएको र उनी एक साझेदारमात्रै भएको दाबी गरेका छन् ।

गुरुङसहित एकीकृत समाजवादीका वरिष्ठ नेता झलनाथ खनालका छोरा निर्भिक चित्रकार खनालसहितका नाममा रहेको कम्पनीले वेस्ट प्रोजेक्ट कन्स्ट्रक्सन्स एन्ड सप्लायर्स प्रालिका अध्यक्ष अन्जीत विष्टलाई दिएको चेक बाउन्स भएपछि उनीहरूविरूद्ध २०७६ साउन ६ गते मुद्दा दर्ता भएको थियो ।

काठमाडौं जिल्ला अदालतले नर्थ वेस्ट नेपाल इन्फ्रा प्रालिका अध्यक्ष राजु गुरुङ र सञ्चालक निर्भिक चित्रकार खनाल, फुर्वा छिरिङ शेर्पा, सन्जीव राई र शक्तिमान डंगोलसमेतले दिएको चेक अनादरसम्बन्धी मुद्दामा २०७८ मंसिर १२ गते उनीहरूमाथि जरिवाना गर्ने फैसला गरेको थियो ।

गुरुङलगायतलाई जनही दुई हजार जरिवाना र २ करोड २५ लाख रूपैयाँको चेक काटिएको मितिदेखि २०७६ साउन ६ गतेसम्मको सयकडा १० प्रतिशतका दरले कानूनबमोजिमको ब्याजसहित भुक्तानी दिनुपर्ने फैसला गरेको थियो।

गुरुङको उक्त कम्पनीले २०७३ साल फागुन २० गते २५ लाख, फागुन ३० गते २५ लाख, चैत १५ गते २४ लाख, चैत ३० गते ५४ लाख, २०७४ वैशाख १५ गते २५ लाख, वैशाख ३० गते ३० लाख, जेठ १५ गते ३५ लाख रूपैयाँ गरी ७ वटा चेक दिएकामा बैंकमा पर्याप्त रकम नभएको भन्दै फिर्ता भएपछि उनीहरूविरूद्ध उजुरी परेको थियो ।

राजु गुरुङका सर्मथकहरु उनलाई अदालतले दोषी करार गरेको भए मुद्दा खारेज हुने, अदालतमा विचाराधीन रहेको मुद्दालाई जोडेर उम्मेदवारी खारेज गर्न नमिल्ने र अब उम्मेदवार आफैंले निर्वाचन अधिकृतविरुद्ध मुद्दा हाल्नुको विकल्प नभएको र त्यो मुद्दाको किनारा लागेपछि मात्रै चुनाव हुनुपर्ने अन्यथा अदालतले मुद्दाको फैसला गरिहाल्नुपर्ने र यदि उनी दोषी रहेको प्रमाणित भएमा चुनाव जिते नै पनि स्वतः निलम्बनमा पर्ने दाबी गर्न थालेका छन् ।

अब को-को बाँकी छन् उम्मेदवार ?

प्रतिनिधिसभा निर्वाचन कार्यालय रुपन्देही क्षेत्र नं २ ले कानूनबमोजिम कायम रहेका १५ उम्मेदवारको सूची मंगलबार राति प्रकाशन गरेको छ । त्यसमध्ये ८ जना स्वतन्त्र छन् भने अन्य विभिन्न राजनीतिक दलबाट छन् ।

स्वतन्त्र उम्मेदवारी दिनेहरूमा केशव बस्याल, टोपनारायण पौडेल, तारा घिमिरे, तुल्सीराम यादव, प्रदीप ज्ञवाली, रुपसिंह थापा, विष्णु विश्वकर्मा र सुरेन्द्र भारी छन् ।

दलीय उम्मेदवारी दिनेहरुमा एमालेका विष्णु पौडेल, नेपाल मजदुर किसान पार्टीका हरिसुन्दर बासी, नेपाली कांग्रेस बीपीका नमादेवी गौतम जैसी, मंगोल नेशनल अर्गनाइजेसनका दीपक थापा, राष्ट्रिय स्वतन्त्र पार्टीका गणेश पौडेल, नेपाल दलित पार्टीका राजीव शाही र जनमुक्ति पार्टीका केशवबहादुर थापामगर रहेका छन् ।

काठमाडौं । नेकपा एकीकृत समाजवादी पार्टीले सत्ता गठबन्धनका उम्मेदवारविरुद्ध बागी वा स्वतन्त्र उम्मेदवारी दिने पार्टी नेता तथा कार्यकर्तालाई आज दिउँसो १ बजेभित्र उम्मेदवारी फिर्ता लिन निर्देशन दिएको छ ।

तोकिएको समयमा उम्मेदवारी फिर्ता नलिएमा बागी उम्मेदवार तथा उनका प्रस्ताव र समर्थक पार्टीले कारबाही गर्ने चेतावनी दिएको हाे ।

पार्टीका महासचिव बेदुराम भुसालले ले सोमबार साँझ जारी गरेको विज्ञप्तिमा भनिएको छ,‘ पार्टी निर्देशनको अवज्ञा गरी उम्मेदवारी कायम राखेमा पार्टीले कारवाही गरिनेछ ।’

काठमाडौं । सत्ता गठबन्धनमा ठूलो संघर्षपछि प्रतिनिधिसभा तर्फ १९ स्थानमा उम्मेदवारी पाएको एकीकृत समाजवादीभित्र उम्मेदवार छनौटको विवाद देखिएको छ ।

१९ क्षेत्र टुंगो लागेसँगै उम्मेदवारका नाम पनि स्वतःस्फुर्त शैलीमा सार्वजनिक हुँदा पार्टी नेतृत्व समस्यामा परेको हो । पार्टीले प्रतिनिधिसभाका टिकटको आधिकारिक रुपमा सार्वजनिक गरेको छैन ।

१९ मध्ये २ उम्मेदवारबारे जिल्लामै विवाद छ भने अर्का २ उम्मेदवार मनोनयन नगर्दासम्म ढुक्क हुन नसक्ने अवस्थामा छ ।

एमालेले भीम रावल र घनश्याम भुसाललाई उम्मेदवार नबनाएपछि उनीहरू एकीकृत समाजवादीको सम्पर्कमा आउने दाबी नेकपा एसका केही नेताको छ । भीम रावलबाट डराएका श्रम मन्त्री शेरबहादुर कुँवर शुक्रबार नै धनगढी पुगेका छन् । त्यहाँ पार्टी प्रदेश कमिटीको बैठक सिध्याएर उनी आजै अछाम पुग्दैछन् ।

रावलले यसअघि पनि गठबन्धनको समर्थनमा आफू स्वतन्त्र उम्मेदवार हुन् तयार भएको र अछाम १ छाडिदिन भनी माधवकुमार नेपाल र माओवादी केन्द्रका अध्यक्ष प्रचण्डसँग अनुरोध गरेको हल्ला नेकपा एसबाट चलेपछि कुँवर आत्तिएका हुन् ।

यसबीचमा रावल माओवादी केन्द्रका अध्यक्ष प्रचण्डसँग पनि सम्पर्कमा पुगेका चर्चा चलेको थियो । तर रावल निकट स्रोतले भने हल्लाहरुमात्र चलेको भन्दै कसैसँग कुरा नभएको जनाएको छ ।

कुँवर निकट स्रोतका अनुसार भने शुक्रबार बेलुकीदेखि नै रावलले एकीकृत समाजवादीमा प्रवेश गरी उम्मेदवार बन्न तयार भएको सन्देश माधव नेपालसमक्ष पठाएका छन् । तर, शनिबार बिहानै रौतहटतिर निस्किएका नेपालले रावलको सन्देशलाई ढिलो भयो भनी अस्वीकार गरेको नेपाल निकट स्रोतले जनाएको छ ।

तर, अछाम १ का घोषित उम्मेदवार शेरबहादुर कुँवर भने आइतबार मनोनयन दर्ता नगर्दासम्म तनावमै रहने अवस्था छ ।

‘यस्तो सूचना हामीलाई आएको थियो, तर पार्टी अध्यक्ष र सम्मानित नेतासमेत त्यो कुराका लागि तयार नभएपछि उहाँ ढुक्क भएर जिल्ला पुगिसक्नुभयो’कुँवरको सचिवालयका एक सदस्यले बताए ।

उनी जिल्ला गए पनि पार्टीको टिकट बुझ्न पत्नीलाई काठमाडौंमै छोडेका छन् ।

यस्तै त्रास छन्, रुपन्देही २ मा राजु गुरुङ । एमालेले स्थायी कमिटी सदस्य घनश्याम भुसाललाई उम्मेदवार नबनाएपछि उनी निकटस्थहरुसँग सघन छलफलमा छन् । यद्यपि, उनले माधव नेपालसँगै टिकट मागिसकेका छैनन् । कतै अन्तिम घडीमा काठमाडौंबाट टिकट रद्ध होला कि भन्ने द्विविधामा राजु परेका छन् ।

एकीकृत समाजवादीका केही नेताले एमालेको अन्तर्विरोधको लाभ लिनुपर्ने तर्क गरिरहेका छन् । यस्तो गर्दा मुख्यतः दुई उम्मेदवार शेरवहादुर कुँवर र राजु गुरुङले तनाव झेलिरहेका छन् ।

उम्मेदवारी विवाद

उदयपुर २ र कास्की २ को उम्मेदवारीलाई लिएर स्थानीय पार्टी नेतृत्वले केन्द्रसँग आपत्ति जनाएका छन् ।

उदयपुर २ बाट केन्द्रले उपमहासचिव जगन्नाथ खतिवडाको उम्मेदवारी टुंगो लगाएको छ । तर, पार्टीकै मान्छेलाई उनको विपक्षमा परिचालित गरिएको छ । त्यहाँबाट सरोजदिलु विश्वकर्मासहितका वैकल्पिक उम्मेदवारको नाम आएको समाजवादीका एक नेताले बताए । तर, खतिवडा नै उम्मेदवार बन्ने लगभग पक्का छ ।

कास्की २ मा केन्द्रबाट श्रीनाथ बरालको नाम सार्वजनिक गरिएकोप्रति जिल्ला कमिटीले केन्द्रसँग आपत्ति जनाएको छ । त्यहाँबाट बरालसहित शिवजी गुरुङ र मदन आचार्य पनि प्रस्तावित छन् ।

नाम टुंगो लगाउन शनिबार दिउँसो जिल्ला कमिटीको बैठक बस्दैछ । तर, शुक्रबार रातिबाटै श्रीनाथको नाम आउन थालेपछि जिल्लाका नेताहरू तनावमा छन् ।

 

रुपन्देही । लुम्बिनीका २६ संघीय क्षेत्रबाट गठबन्धनबाट ४ सीटमा उम्मेदारी पाएको नेकपा एकीकृत समाजवादी लुम्बिनी प्रदेशसभामा भने कुनै भागवण्डा पाउन सकेन । संघमा दाङ १, पाल्पा २, गुल्मी २ र रुपन्देहीमा भागवण्डा पाएको एसले लुम्बिनी प्रदेशका ५२ निर्वाचन क्षेत्रमध्ये कुनै पनि सिट पाएन ।

नेकपा एसका सचिव तथा लुम्बिनी प्रदेश इन्चार्ज भागवत विश्वासीले गठबन्धनको भावना विपरीत दलहरुले बनाएको भागवण्डा पार्टीलाई मान्य नहुने बताए ।‘प्रदेशमा शून्य बनाएर के को गठबन्धन हो हामीले बुझ्नै सकेका छैनौ, प्रदेशमा हामीले कम्तीमा ७ वटा चाहिने भनेका थियौं तर अन्तिम लिस्टमा त्यो देखिएन, प्रदेशमा निल बनाएर संघमा के को गठबन्धन हुन्छ र ?’ उनले नेपाल प्रेससँग भने ।

प्रदेशका ५२ क्षेत्र कसलाई कहाँ ?

गुल्मी क्षेत्र नम्बर १ अन्तर्गत प्रदेशसभा क माओवादी केन्द्रको भागमा परेको छ भने ख कांग्रेसको भागमा परेको छ । त्यस्तै क्षेत्र नम्बर २ अन्तर्गत क कांग्रेस र ख माओवादीको भागमा परेको छ ।

पाल्पा क्षेत्र नम्बर १ अन्तर्गत प्रदेशसभाका दुवै क्षेत्र कांग्रेसले पाउँदा क्षेत्र नम्बर २ अन्तर्गत क नेपाली कांग्रेस र ख माओवादी केन्द्रको भागमा परेको छ । क्षेत्र नम्बर २ अन्तर्गत क नेपाली कांग्रेस र ख माओवादी केन्द्रको भागमा परेको छ ।

त्यस्तै अर्घाखाँचीमा प्रदेशसभाका दुईवटा क्षेत्र काँग्रेस र माओवादी केन्द्रले बाँडेका छन् । रुपन्देही १ मा प्रदेशसभाका दुवै क्षेत्र कांग्रेसले पाएको छ भने क्षेत्र नम्बर २ अन्तर्गत प्रदेशसभातर्फ क मा नेपाली कांग्रेस र ख मा माओवादी केन्द्रलाई छुट्टयाइएको छ । रुपन्देही–३ को प्रदेशसभामा क लोसपा र ख कांग्रेसको भागमा परेको छ ।

रुपन्देही क्षेत्र नम्बर ४ मा प्रदेशसभाका दुवै क्षेत्र कांग्रेले पाएको छ भने ५ को क मा माओवादी केन्द्र र ख मा कांग्रेसले पाएको छ ।कपिलवस्तु क्षेत्र नम्बर १ र २ को प्रदेशसभा कांग्रेसको भागमा परेको छ । क्षेत्र नम्बर ३ को क मा माओवादी केन्द्र र ख मा कांग्रेसका लागि छुट्टयाइएको छ ।

रुकुमपुर्वमा प्रदेशसभाका दुवै क्षेत्र माओवादीको भागमा परेका छन् । रोल्पामा भने क माओवादी केन्द्र र ख कांग्रेसले पाएका छन् । प्यूठानमा प्रदेशसभातर्फ क माओवादी केन्द्र र ख कांग्रेसको भागमा परेको छ ।

दाङ १ को प्रदेशसभा क मा माओवादी केन्द्र र ख कांग्रेसको भागमा परेको छ भने क्षेत्र नम्बर २ मा प्रदेशका दुवै क्षेत्र काँग्रेसले पाएको छ । दाङ ३ मा प्रदेशतर्फ क कांग्रेस र ख माओवादी केन्द्रले बाँडेका छन् ।

बाँके १ को प्रदेशसभातर्फ क माओवादी केन्द्र र ख कांग्रेसको भागमा परेको छ भने बाँके २ को प्रदेशसभा क खाली राखिएको छ भने ख कांग्रेसको भागमा परेको छ ।

बाँके ३ मा प्रदेश क तर्फ माओवादी केन्द्र र ख कांग्रेसको भागमा परेको छ । बर्दिया १ को प्रदेश क तर्फ कांग्रेस र ख माओवादी केन्द्रको भागमा परेको छ । बर्दिया २ मा क काँग्रेस र ख माओवादी केन्द्रले पाएको छ ।नवलपरासी पश्चिम–१ को प्रदेशतर्फ क कांग्रेस र ख माओवादीको भागमा परेको छ । नवलपरासीपश्चिम–२ को प्रदेशतर्फ क माओवादी केन्द्र र ख कांग्रेसको भागमा परेको छ ।

जनकपुरधाम । नेकपा एकीकृत समाजवादीका सचिवालय सदस्य तथा पूर्वमन्त्री रामचन्द्र झा टिकटबाट बञ्चित भएका छन् ।

धनुषा क्षेत्र नम्वर २ बाट उम्मेदवार बन्ने आकांक्षा झाले राखेका थिए । पार्टीबाट सर्वसम्मत उम्मेदवार सिफारिस पनि भएका झा अन्ततः टिकटबाट बञ्चित भएका हुन् ।

सत्ता गठबन्धनको सिट बाँडफाँडमा धनुषा क्षेत्र नम्वर २ नेपाली कांग्रेसको भागमा परेको छ । का‌ंग्रेसबाट पूर्वमन्त्री रामकृष्ण यादव टिकट पाउने लगभग निश्चित छ ।

झा केहिदिन अगाडी मात्र नेकपा माओवादी केन्द्र परित्याग गरी एकीकृत समाजवादीमा प्रवेश गरेका थिए । लामो समय एमालेमा विताएका झा माओवादी र नयाँ शक्ति हुँदै पुनः माओवादीमै फर्केका थिए । तर पछि पुनः माओवादी छाडेर एकिकृत समाजवादीमा पुगे ।

एमालेबाट ०५१ को संसदीय निर्वाचन र ०६४ को संविधानसभा सदस्यमा झा निर्वाचित भएका थिए । संविधानसभा सदस्य रहेका बेला उनी माओवादी अध्यक्ष प्रचण्ड नेतृत्वको सरकारमा स्थानीय विकास मन्त्री भएका थिए ।

काठमाडौं । नेकपा एकीकृत समाजवादी पार्टीले प्रत्यक्षतर्फ निर्वाचन लड्ने १९ जना उम्मेदवार टुंग्याएको छ।

शुक्रबार राति बसेको सत्तारुढ गठबन्धनको बैठकले सिट बाँडफाँट टुंगो लगाएपछि समाजवादीले पनि प्रतिनिधिसभा तर्फका आफ्ना उम्मेदवार टुंग्याएको हो।  जसमा एकीकृत समाजवादीले २० सिट मात्र पाएकाे थियाे ।  २०  सिट मध्ये  १९ जना उम्मेदवार टुंग्याएको छ भने थप एक  उम्मेदवार  टु‌ंगाे लगाउन बाँकी  छ ।

१. इलाम क्षेत्र न. १ – झलनाथ खनाल
२. उदयपुर क्षेत्र न.२ – जगन्नाथ खतिवडा
३. रौतहट क्षेत्र न. १ – माधवकुमार नेपाल
४. बारा क्षेत्र न.४ – कृष्णकुमार (किसान) श्रेष्ठ
५. काठमाडौं क्षेत्र न. ८-  जीवनराम श्रेष्ठ
६. ललितपुर क्षेत्र न. २ – कृष्णलाल महर्जन
७. धादिङ क्षेत्र न. १ – राजेन्द्रप्रसाद पाण्डे
८. मकवानपुर क्षेत्र न. २ – विरोध खतिवडा
९. कास्की क्षेत्र न. २ – श्रीनाथ बराल
१०. गुल्मी क्षेत्र न. २ – रामकुमारी झाँक्री
११. पाल्पा क्षेत्र न. २ – सोमप्रसाद पाण्डे
१२. रुपन्देही क्षेत्र न. २ – राजु गुरुङ
१३. दाङ क्षेत्र न. १ – मेटमणि चौधरी
१४.सल्यान – प्रकाश बुढाथोकी (ज्वाला)
१५. डोल्पा – धनबहादुर बुढा मगर
१६. दैलेख क्षेत्र न. १ – अम्बरबहादुर थापा
१७. अछाम क्षेत्र न. १ -शेरबहादुर कुवँर
१८. बझाङ – भानुभक्त जोशी
१९. डोटी – प्रेमबहादुर आले

काठमाडौं । नेकपा एकीकृत समाजवादीका अध्यक्ष माधव कुमार नेपालमाथि केही नेताको व्यवस्थापन गर्नुपर्ने दबाब छ । तर जुन जुन नेता व्यवस्थापन गर्नु पर्ने हो त्यहि ठाउँमा माओवादीको सशक्त दाबी र मापदण्डबाट समेत माओवादीले पाउने भएपछि नेकपा एसमा निराशा र अशन्तोष छाएको छ ।

आफ्ना नेता व्यवस्थापन गर्नुपर्ने बाध्यता माओवादीले नबुझिदिएको भन्दै प्रचण्डसँग माधव नेपालको खटपट समेत भएको छ । दैनिकजसो छलफल भए पनि निष्कर्षमा नेताहरु पुग्न सकेका छैनन् । माधव नेपालको बाध्यता बुझेर शेरबहादुर देउवाले भने ती क्षेत्रमा दाबी छाडेका छन् ।

वार्ता टोलीका एक सदस्यका अनुसार नेकपा एसका नेताहरु राजेन्द्र पाण्डे,जगन्नाथ खतिवडा,प्रकाश ज्वाला,शेरवहादुर कुँवर,भानुभक्त जोशी र शिव भण्डारीको लागि माधव नेपालले अडान छाडेका छैनन् । अन्य सीटमा भने लगभग सहमति छ ।

राजेन्द्र पाण्डे उम्मेदवार बन्ने धादिङ २ मा माओवादीका शालिकराम जमरकट्टेलको सशक्त दावी छ । जमरकट्टेल भावी मुख्यमन्त्रीको ग्यारेन्टी नभएसम्म प्रतिनिधिसभा छाड्ने पक्षमा छैनन् । जबकी मुख्यमन्त्रीका लागि कांग्रेसका प्रदेश सभापति इन्द्र बानिया प्रदेश सभाको उम्मेदवार बन्दैछन् ।

त्यस्तै उपमहासचिव प्रकाश ज्वालाका लागि नेकपा एसले सल्यानमा अडान राखेको छ । तर माओवादीले जितिराखेको क्षेत्र मापदण्ड अनुसार पनि उसैको भागमा पर्ने भएकाले शीर्ष तहमा वार्ता चलिरहेको छ । प्रकाश ज्वालाले कर्णालीमा माओवादी सरकार टिकाउन सांसद पद माया मारेर आफ्नै पार्टीमा विद्रोह गरेका थिए ।

आफूहरुको योगदानको मुल्यांकन हुनुपर्ने नेकपा एसका नेताहरुको भनाइ छ । केन्द्रमा केपी ओलीलाई ढाल्न र प्रदेश सरकारहरुबाट एमालेलाई सबैतिर हटाउन आफूहरु निर्णायक भएकाले त्यसको मुल्यांकन हुनुपर्ने नेकपा एसको भनाइ छ ।

नेकपा एसका अर्का उपमहासचिव जगन्नाथ खतिवडाको व्यवस्थापन माधव नेपालको अर्को बाध्यता हो । सो क्षेत्रमा नेकपा माओवादी केन्द्रका सुरेशकुमार राई निर्वाचित भएका थिए । माओवादीले त्यहाँ पनि छाड्न मानेको छैन ।

माओवादीले छाड्न नमानेको अर्को क्षेत्र दोलखा पनि हो । दोलखामा माधव नेपालले पूराना नेता शिव भण्डारीलाई व्यवस्थापन गर्न खोजेका छन् । कांग्रेसले रामेछाप लिएर दोलखा माओवादीले लिने चर्चा चलेका बेला नेकपा एसले दोलखाको प्रतिनिधिसभा सीट दावी गरेको छ ।

श्रममन्त्री शेरवहादुर कुँवरको व्यवस्थापन माधव नेपालको अर्को बाध्यता हो । अछाम १ मा कुँवरको दावी छ । तर माओवादीले सोही क्षेत्रमा पाउने हुँदा कुँवर बाहिरिनेछन् । उनले बन्द कोठाका षड्यन्त्र नमान्ने भन्दै कलम चिन्ह लिएर जनताबीच आउने बताइसकेका छन् ।

त्यसो काठमाडौं २ माधव नेपालले छाडेपछि ९ नम्बर क्षेत्र उपमहासचिव डा।बिजय पौडेलको लागि नेकपा एसले अडान लिएको छ । तर सो क्षेत्रमा माओवादीका हितमान शाक्य उम्मेवार बन्ने गरी माओवादीले आफ्नो भागमा पार्न लागेको छ ।

बझाङमा भानुभक्त जोशीको सन्दर्भमा भने लगभग सहमति भएको बताइएको छ । कांग्रेसले उल्लेखित सीटहरुमा नेकपा एसका लागि सकारात्मक भए पनि माओवादी नमानेपछि प्रचण्ड माधवबीच खटपट भएको स्रोतले जनाएको छ ।

काठमाडौं । सत्ता गठबन्धनको दलले आज अनि सिट बाँडफाँडको टुङ्गो लगाउन सकेन । गठबन्धनका दलहरूबीच सहमतिका क्षेत्रहरू बढ्दै गए पनि पूर्ण रुपमा सहमति जुट्न नसकेको पूर्वप्रधानमन्त्री तथा नेकपा एकीकृत समाजवादीमा सम्मानित नेता झलनाथ खनालले जानकारी दिए ।

‘हण्ड्रेड प्लसमा सहमति भइसकेको छ । आज त्यो भन्दा पनि केही बढेको छ’, उनले भने, ‘थप छलफल भोलि हुन्छ । ’सूर्यबहादुर थापाको आत्मकथा विमोचन समारोहमा गएको हुँदा गठबन्धनको बैठक ढिलो सुरु भएको उनको भनाइ थियो । केही समय मात्रै भएको छलफलमा केही थप क्षेत्रमा कुरा मिलेको खनालले बताए ।

राष्ट्रपतिको विषयमा केही कुरा भयो त भन्ने प्रश्नमा खनालले भने, ‘उनले घनघोर ढङ्गबाट संविधानको उन्लंघन गरिन् । त्यस बापत उत्पन्न परिणाम त उनले भोग्नु पर्ने भइगो नि त ।’

सडक आन्दोलन गर्नेबारेको जिज्ञासामा सरकारमा भएकाले आन्दोलन गर्न नमिल्ल्ने उनले तर्क गरे । खनालले सडकमा जनताको कुरा भएको भन्दै भने, ‘सरकारमा बसेका मान्छेले सडक आन्दोलन गर्ने कुरा । जनतासँग भएको अधिकार त संविधान भन्दा पनि त धेरै छ नि त ।’

काठमाडौं । नेकपा एकीकृत समाजवादीका अध्यक्ष माधवकुमार नेपालले विगतमा आफूले दक्षिण एसियाका पूर्वप्रधानमन्त्रीहरुलाई संगठित गर्ने प्रयास असफल भएको स्मरण गरेका छन् । भारतीय पूर्वप्रधानमन्त्री डा. मनमोहन सिंहका कारण आफ्नो प्रयास अधुरो बनेको उनको गुनासो छ ।

भुतपूर्व प्रधानमन्त्री सूर्यबहादुर थापाको आत्मकथा विमोचन कार्यक्रममा बोल्दै नेपालले सुरुमा नेपालका पूर्वप्रधानमन्त्रीहरुलाई समेट्न खोजेको बताए । आफू प्रधानमन्त्रीबाट हटेलगत्तै सो प्रयास थालेको उनले जानकारी दिए ।

नेपालको स्मृति यस्तो छ:

मैले सूर्यबहादुर थापाजीको पुस्तकमा त्यो प्रसंग छ कि भनेर सरसर्ति हेरेँ तर भेटिनँ । मैले प्रधानमन्त्रीबाट बाहिर आएपछि सोचेँ कि यति अनुभव छ हामीसँग, जनाले विश्वास र आशा गरेका छन् । अब हामीले के गर्नु उपयुक्त होला ? त्यसपछि एउटा भुतपूर्व प्रधानमन्त्री क्लव बनाउनुपर्यो भन्ने सोचेँ ।

मेरो निवासमा २०७९ सालको असोजमा पहिलो बैठक भयो । त्यसपछि सबै प्रधानमन्त्रीको निवासमा पालैपालो गर्ने भनेर शेरबहादुर देउवा, सूर्यबहादुर थापा, लोकेन्द्रबहादुर चन्दको निवासमा पनि भयो । त्यसमा पुष्पकमद दाहाल र झलनाथ खनाल पनि सहभागी हुनुहुन्थ्यो । त्यसबेला डा. बाबुराम भट्टराई प्रधानमन्त्री हुनुहुन्थ्यो । उहाँले म पनि वैठकमा आउँछु भन्नुभएको थियो । तर, मैले तपाईं आउने होइन, तपाई.वर्तमान प्रधानमन्त्री हो, यो पूर्वप्रधानमन्त्रीको क्लब हो भनेर रोकेँ । मैले तत्कालीन मुख्यसचिव माधवप्रसाद घिमिरेको सहयोगमा एउटा अवधारणापत्र पनि तयार गरेका थिएँ, जसमा ६ वटा एजेन्डा थिए । तर, विभिन्न कारणले यो क्लव अगाडि बढ्न सकेन ।

त्यसपछि एकचोटि म पाकिस्तान जाँदा बेला त्यहाँका पूर्वप्रधानमन्त्रीसँग भेट भयो । उहाँलाई पनि मैले आफ्नो सोच सुनाएँ । उहाँले ‘ग्रेट आइडिया’ भनेर प्रशंसा गर्नुभयो । अनि साउथ एसियाकै स्तरमा पूर्वप्रधानमन्त्रीको क्लव बनाउन सकिने बताउनु भयो । मलाई पनि ठिक लाग्यो र त्यसको जिम्मा मैले नै लिएँ । अरु सबै देशका पूर्वप्रधानमन्त्रीलाई मोटिभेट गरेर तयार पनि गरेँ । त्यसपछि भारतका पूर्वप्रधानमन्त्री डा. मनमोहन सिंहलाई फोन गरेँ । सिंहले भने स्वीकार गर्नुभएन । अहिलेको प्रधानमन्त्रीले हुन्छ नभनेसम्म आइ क्यान नट पार्टीसिपेट भन्नुभयो । भारतका पूर्वप्रधानमन्त्री नभइ क्लब बन्दैन । त्यसैले त्यो अघि बढ्न सकेन ।

काठमाडौं । नेकपा एकीकृत समाजवादीले पार्टीका पदाधिकारीमध्ये तीनजनालाई समानुपातिकको बन्द सूचीमा समावेश गरेको छ ।

माधव नेपाल निर्वाचित भएको काठमाडौं २ मा चुनाव लड्ने भनिएका उपाध्यक्ष प्रमेश हमाल समानुपातिकमा परेका छन् ।

त्यस्तै धादिङ २ का सम्भावित उम्मेदवार उपमहासचिव डा.गंगालाल तुलाधार पनि समानुपातिक सूचीमा परेका छन् । उनी २ पटक धादिङ २ बाट निर्वाचित भएका थिए भने २ पटक पराजित भएका थिए ।

नेकपा एसका सचिव नागेन्द्र चौधरी पनि समानुपातिकमा समेटिएका छन् । उनी यसअघि एमालेमा पनि समानुपातिकबाट संविधानसभा सदस्य भएका थिए । पार्टीले समानुपातिकमा पुनः अवसर नदिने नीति बनाए पनि चौधरीका हकमा भने लागु भएन ।

रुपन्देही । नेकपा एकीकृत समाजवादीले सत्ता गठबन्धनभित्र लुम्बिनीमा ६ वटा प्रतिनिधिसभा र १८ प्रदेशसभा सीटमा दाबी गर्दै आएको छ । यहाँ प्रतिनिधिसभातर्फ २६ र प्रदेशसभातर्फ ५२ सीट छन् ।

पहिलो चरणको प्रतिनिधिसभाको क्षेत्र बाँडफाँटमा नेकपा एसलाई ३ वटा सीट दिन गठबन्धन तयार भएको थियो । तर, अन्य क्षेत्रमा पनि दाबी गरेकाले भागबन्डा टुंगिन सकेको छैन ।

प्रतिनिधिसभामा सीट दाबी गरेका क्षेत्रमा स्थानीय तह निर्वाचनमा उसको मत कमजोर रहेकाले गठबन्धनका अन्य दल उसलाई मागेअनुसार सीट दिन तयार छैनन् । नेकपा एसका लुम्बिनीका प्रदेश इन्चार्ज भागवत विश्वासीले गठबन्धनमा पार्टीको प्रतिनिधिसभामा ६ र प्रदेशसभामा २४ सीट दाबी रहेको बताएका थिए ।

एसका प्रतिनिधिसभामा दाङ १ बाट मेटमणि चौधरी, ३ बाट हीराचन्द्र केसी, पाल्पा २ बाट सोमप्रसाद पाण्डे र र गुल्मी २ बाट समानुपातिकमा रामकुमारी झाँक्री सांसद छन् । उनीहरुमध्ये झाँक्री पार्टी विभाजनपछि मन्त्री बनिन् । अहिले चौधरी र केसी मन्त्री छन् । प्रदेशसभामा पाल्पाकी समानुपातिक सांसद रमा घर्तीमात्रै छिन् । उनी प्रदेशमा मन्त्री छिन् ।

नेकपा एसले चार सांसदको क्षेत्रसहित रुपन्देही २ मा राजु गुरुङ र बाँके ३ मा हीरालाल सुनारलाई व्यवस्थापन गर्ने गरी प्रतिनिधिसभामा ६ सीट दाबी गर्दै आएको हो । गठबन्धनभित्र नेकपा एसबाट दाङ १ मा चौधरी, पाल्पा २ मा पाण्डे र गुल्मी २ मा झाँक्रीलाई सीट दिने करिब निश्चित जस्तै छ । रुपन्देही २ भने टुंगिसकेको छैन ।

पार्टी अध्यक्ष माधवकुमार नेपाल तथा सम्मानित नेता झलनाथ खनालले यहाँ जसरी पनि केन्द्रीय सदस्य तथा प्रदेश सचिव राजु गुरुङलाई टिकट दिने अडानमा छन् । उनीहरुले गुरुङलाई सीट खाली गरे एमाले उपाध्यक्ष विष्णु पौडेललाई हराउन सकिने दृढता व्यक्त गर्दै आएका छन् । तर, यहाँ कांग्रेसले दाबी गर्दै आएको छ ।

नेता गुरुङले बुटवलबाट चुनावमा उठ्ने घोषणा गर्दै अहिले प्रचारप्रसारसमेत अघि बढाएका छन् । दाङ ३ का हीराचन्द्र केसी र बाँके ३ हीरालाल सुनारको क्षेत्र कांग्रेसलाई छोड्न नेकपा एस सहमत भइसकेको छ ।

नेकपा एस छोड्ने बढ्दो

निर्वाचन नजिकिएसँगै नेकपा एस पार्टी छोड्ने नेता तथा कार्यकर्ताहरु बढिरहेका छन् । पार्टीका केन्द्रीय सदस्य एवं केन्द्रीय अर्थ विभाग उपप्रमुख डा. बालकृष्ण चापागाईं एमालेमै फर्किएका छन् । प्रदेशसभामा उम्मेदवार सिफारिस डा. चापागाईंले पार्टी कांग्रेस र माओवादीको पुच्छर बनेकाले पुरानै घरमा फर्किएको बताए ।

त्यसैगरी एसले दावी गरेको गुल्मी क्षेत्र नं २ मा पनि पार्टी गुल्मीको नेतृत्व तह एमालेमा समाहित भएको छ । एसका सचिव झाँक्रीले एमालेलाई जसरी पनि यो क्षेत्रबाट हराउने उद्घोष गरिसकेकी छन् । गठबन्धन दलले पनि उनलाई टिकट दिने ग्रिन सिग्नल दिइसकेका छन् । तर उनकै क्षेत्रका जिल्ला नेतृत्वले पार्टी छोडेका छन् ।

एमाले उपमहासचिव प्रदीप ज्ञवाली र सचिव गोकर्ण विष्टको उपस्थितिमा पार्टी एकता घोषणा गरी केन्द्रीय सदस्य एवं जिल्ला इन्चार्ज गणेश खनाल र केन्द्रीय सदस्य एवं जिल्ला अध्यक्ष नरेश भण्डारीसहित जिल्ला नेतृत्व एमाले प्रवेश गरेका थिए ।

नेता भण्डारीले कांग्रेसको नेतृत्वमा गठबन्धन गरेर पार्टीले असफल यात्रा तय गरेकाले साथ दिन नसकी पुरानो पार्टीमा फर्किएको बताए । जिल्ला नेतृत्व नै एमालेमा फर्किएपछि कांग्रेस र माओवादीभित्र गुल्मी २ नेकपा एसलाई दिन नहुने दबाब बढ्न थालेको छ ।

त्यस्तै एसको नवलपरासी (बर्दघाट-सुस्ता पश्चिम) जिल्ला उपाध्यक्ष कृपाललाल यादव, अनेमसंघ जिल्ला अध्यक्ष सरिता पौडेल, प्रदेश सदस्य खगेश्वर पन्थीसहित एउटा टीम एमालेमै फर्किएको छ । पाल्पा, अर्घाखाँची, बाँकेमा पनि पार्टी छाड्ने क्रम जारी छ ।

पार्टीका प्रभावशाली नेताहरू महासचिव डा. बेदुराम भुसाल, उपमहासचिव डा. विजय पौडेल, सचिवहरु रामकुमारी झाँक्री, भागवत विश्वासी, पोलिटब्युरो सदस्य तथा प्रदेश अध्यक्ष सोमप्रसाद पाण्डे, संघीय सांसदहरु मेटमणि चौधरी र हीराचन्द्र केसी लुम्बिनी प्रदेशकै नेताहरु हुन् । पार्टी विभाजनमा ठूलो शक्ति नआएको, सबै तहमा पार्टी कमिटी नबनिसकेको र जनाधार तयार नभइसकेको अवस्थामा एकीकृत समाजवादीका लागि आउँदो निर्वाचन कठिन परीक्षा हुने देखिएको छ ।

तर, नेकपा एसका प्रदेश अध्यक्ष सोमप्रसाद पाण्डेले स्वार्थका लागि आएकाहरूले पार्टी छाड्नु अस्वाभाविक नभएको प्रतिक्रिया दिए ।

एसले दावी गरेका क्षेत्रमा कति छ जनमत ?

नेकपा एसले लुम्बिनीमा दाबी गरेका ६ वटै क्षेत्रमा स्थानीय तह निर्वाचनको जनमत निकै कमजोर छ । यद्यपि गठबन्धनमा अहिलेसम्म ३ वटा क्षेत्र दिन सकिने र थप एक क्षेत्रमा सम्भावना रहेको बुझिएको छ ।

स्थानीय निर्वाचनमा पाँचौं र छैटौं शक्तिका रुपमा रहेको एसलाई आफ्नो सबै मत खन्याएर जिताउन समस्या हुने गठबन्धनका अन्य दल बताइरहेका छन् । स्थानीय तह निर्वाचनमा दलका वडा अध्यक्ष उम्मेदवारले पाएका मतअनुसार नेकपा एस सबैतिर कमजोर नै देखिन्छ ।

१) सोमप्रसाद पाण्डेको क्षेत्र : पाल्पा २
एमाले – ३०,५६६
कांग्रेस – २९,०३९
माओवादी – ४,३१३
एकीकृत समाजवादी – ४३३
राप्रपा – ३३६

२) मेटमणि चौधरीको क्षेत्र : दाङ १
कांग्रेस – २९,७५७
एमाले – २७,०२५
माओवादी – १९,२७६
राप्रपा – २,३५०
एकीकृत समाजवादी – २,३४१
जसपा – ८०७

३) रामकुमारी झाँक्रीको क्षेत्र : गुल्मी २
एमाले – ३१,२५३
कांग्रेस – २९,८२१
माओवादी – १,८४१
एकीकृत समाजवादी – ६५८
राप्रपा – १०१

४) राजु गुरुङको क्षेत्र : रूपन्देही २
कांग्रेस – ३४,९५९
एमाले – ३३,१८७
राप्रपा – ३,९२०
माओवादी – ३,१८८
एकीकृत समाजवादी – १,३८२
जसपा – १८३

५) हीराचन्द्र केसीको क्षेत्र : दाङ ३
एमाले – ३८,६५८
कांग्रेस – ३०,९८९
माओवादी – १२,८८०
एकीकृत समाजवादी – १,९३८
राप्रपा – १,४४४
जसपा – १८२

६) दलबहादुर सुनारको क्षेत्र : बाँके ३
कांग्रेस – २५,६८९
एमाले – २२,१५९
माओवादी – १४,८१८
राप्रपा – ४,६४१
जसपा – ४,१९९
एकीकृत समाजवादी – २३४८
लोसपा – १०३७

काठमाडौं । नेकपा एकीकृत समाजवादीका सम्मानित नेता झलनाथ खनालले नेकपा एमालेका अध्यक्ष केपी शर्मा ओलीले संविधानमै नभएको विशेषाधिकार प्रयोग गर्न खोजेकाले समस्या उत्पन्न भएको बताएका छन् ।

चालू प्रतिनिधिसभाको आज चलिरहेको अन्तिम बैठकलाई सम्बोधन गर्दै उनले यस्तो बताएका हुन् । ‘तपाई कुन देशतिर जानुभो, कुन धारातिर जानुभो कुन दिशा तिर जानुभो अझै हामीलाइृ बुझ्न मन लागेको छ । अझै पढ्न मन लागेको छ,’ उनले भने, ‘कता लान खोज्नुभाथ्यो देश ? बडा गम्भीर प्रश्न छ ।’

वर्तमान व्यवस्था पार्टी व्यवस्था रहेकाले पार्टीबाहिर कोही नहुने बताउँदै नेता खनालले ओलीले अहंकारले समस्या निम्तिएको बताए । ‘यो पार्टी व्यवस्था हो, बहुदलीय व्यवस्था हो । जुनसुकै सरकारपनि पार्टीको सरकार हो । पार्टीले बनाएका नीति र दृष्टिकोणका आधारमा सरकार चल्छ । पार्टीबाहिर कोहीपनि हुनसक्दैन्,’ उनले भने । अहिले पाँचदलको सरकार पनि पाँचदलको साझा धारणाभन्दा बाहिर नजाने उनले दाबी गरे ।

यो व्यवस्थामा प्रधानमन्त्री ‘अल इन अल’ नरहेको पनि उनले बताए । बेलायतमा पनि प्रधानमन्त्रीको विशेषाधिकार छिन्नेगरी ऐन ल्याइसकेको बताउँदै त्यही कुराबाट सिकेर नेपालको संविधानले संसद विघटनको अधिकार प्रधानमन्त्रीबाट हटाएको बताए ।

‘प्रधानमन्त्री अल इन अल भन्ने हुनैसक्दैन् । त्यो व्यवस्था त पार्लियामेन्टरी एक्ट ल्याएर २०११ देखि प्रधानमन्त्रीको विशेषाधिकार बेलायतले पनि समाप्त गरिसक्यो,’ उनले भने, ‘हिजोजस्तो प्रधानमन्त्रीले विशेषाधिकार प्रयोग गरेर संसद विघटन गर्ने अधिकार बेलायतमा पनि छैन् । त्यसपछि क्यानडा र अस्ट्रेलियाले पनि समाप्त पा¥यो । त्यही कुरालाई ध्यानमा राखेर हामीले २०१५ मा संविधान बनायौं ।’

नेपालजस्तो देशमा प्रधानमन्त्री कस्तो आउछ त्यो भन्न नसकिने उनले बताए । ‘हाम्रोजस्तो देशमा प्रधानमन्त्री अलि सन्किने प्रधानमन्त्री आउनसक्छ, अलि घमण्डी प्रधानमन्त्री आउनसक्छ, आत्मकेन्द्रित प्रधानमनत्री आउनसक्छ आकाशे खुर्सानीजस्तो प्रधानमन्त्री आउनसक्छ । र उल्ले तल भुईं हेर्न बिर्सनसक्छ, पार्टी हेर्न बिर्सन्छ, देश हेर्न बिर्सन्छ, यस्तो सम्भावना हुन्छ हाम्रो देशमा,’ उनले भने । यही कारण संविधानमा यस्तो व्यवस्था गरेको उनले बताए ।

वर्तमान सरकारको उपलब्धिमा संसद र संविधान बचाएको नेता खनालले बताए । उनले भने, ‘यो संसद नबचाएको भए प्रमुख प्रतिपक्षी दलको नेताले आजजस्तो मज्जाले भाषण कहाँ गर्न पाउनुहुन्थ्यो । झापा गएर त हुँदैनथ्यो । संसद बचाएर हो ।’

इटहरी । गठबन्धनमा सीट बाँडफाँटको सकस भइरहेका बेला मापदण्ड अनुसार आफूले पाउने प्रतिनिधिसभाको निर्वाचन क्षेत्र छाडेर साटफेर गर्न नेकपा एस तयार भएको छ ।

गठबन्धनले बनाएको मापदण्ड अनुसार हाल प्रत्यक्ष निर्वाचित सांसद जुन पार्टीका छन् त्यो क्षेत्र आमरुपमा सोही पार्टीले पाउने समझदारी छ । त्यसो हुँदा स्वास्थ्यमन्त्री समेत रहेका तेह्रथुमका सांसद भवानी खापुङ नेकपा एसबाट उम्मेदवार बन्न मापदण्डले रोक्दैन ।

तर, मन्त्री खापुङको सो क्षेत्र नेकपा एसले कांग्रेसले दिने समझदारी भएको कार्यदलका एक सदस्यले बताए । त्यसो गर्दा नेकपा एसले सुनसरी क्षेत्र नम्बर २ मा दावी गरेको छ । मापदण्ड अनुसार सुनसरी २ मा नेपाली कांग्रेसका सिताराम मेहता सांसद रहेकाले सोही पार्टीको दाबी छ ।

तेह्रथुममा जिल्ला समन्वय समितिको प्रमुख लिने बेलामै नेकपा एसले प्रतिनिधिसभाको सीटमा दाबी नगर्ने समझदारी बनेको थियो । सो समझदारी अनुसार प्रतिनिधिसभामा नेपाली कांग्रेसकी सीता गुरुङ उम्मेवार बन्ने र प्रदेशमा माओवादी केन्द्रका दुर्गा चापागाईँ र नेकपा एसका कृष्ण चोङबाङलाई उठाउने तयारी छ ।

तेह्रथुम र सुनसरी २ साट्ने नेकपा एसको प्रस्तावमा कांग्रेसको प्रतिक्रिया आइसकेको छैन । नेकपा एसबाट सुनसरी २ मा पितान्बर तिम्सिना उम्मेदवार बन्ने तयारीमा छन् । राखेपका पूर्व उपाध्यक्ष समेत रहेका तिम्सिना केही समयअघि एमाले छाडेर नेकपा एसमा लागेका थिए ।

गठबन्धन बैठकमा अध्यक्ष माधव नेपालले समेत सुनसरी २ मा अडान कायम राखेका छन् । सुनसरीका ४ निर्वाचन क्षेत्रमध्ये जसपाले अशोक राईका लागि १ नम्बर क्षेत्र मागेको छ । मापदण्ड अनुसार बाँकी तीनवटै क्षेत्र नेपाली कांग्रेसको भागमा पर्छन् ।

त्यस्तै २ नम्बर नेकपा एसले लिएर ३ र ४ मा कांग्रेसले पाउने सम्भावना रहेको बताइएको छ । नेकपा एसले प्रदेश १ बाट इलाम र तेह्रथुम मापदण्ड अनुसार नै पाउने भए पनि तेह्रथुमसँग सुनसरी २ साट्न खोजिएका सो पार्टीका नेताहरूले बताएका छन् ।

यसबाहेक नेकपा एसले प्रदेश १ मा भोजपुर र खोटाङमध्ये एक सीट, उपमहासचिव जगन्नाथ खतिवडाको लागि उदयपुर २ मा सशक्त दाबी गरेको छ ।

काठमाडौं । गठबन्धनमा ४० सीट दाबी गरेर २३ सीटलाई बटमलाइन बनाइरहेको नेकपा एकीकृत समाजवादीले काठमाडौं उपत्यकाका तीन जिल्लाका १५ मध्ये ६ सीट दाबी गरेको छ । उसले भक्तपुरमा प्रदेशसभामा मात्रै दाबी गरेको छ ।

प्रतिनिधिसभातर्फ नेकपा एसले उपत्यकाका तीन सीटमा मापदण्डबाटै पाउनेछ । काठमाडौं २ मा माधव नेपाल, ८ मा जीवनराम श्रेष्ठ र ललितपुर २ मा कृष्णलाल महर्जन हाल नेकपा एसका सांसद छन् । माधव नेपाल रौतहटबाट चुनाव लड्ने निश्चित भइसकेको छ ।

नेकपा एसले माधव नेपालले छाडेको काठमाडौं २ मा उपाध्यक्ष प्रमेश हमाललाई उम्मेदवार बनाउन खोजेको छ । गठबन्धनको कार्यदल र शीर्ष बैठकमा समेत काठमाडौं २ माधवले छाडे पनि नेकपा एसले नछाड्ने अडान लिएको कार्यदलका एक सदस्यले बताए ।

प्रमेश हमाल अहिलेसम्म प्रत्यक्ष चुनाव नलडेका नेता हुन् । उनी एकपटक बेल्जियमको लागि राजदूत थिए । नेकपा एसका अध्यक्ष नेपाल नलड्ने हो भने सो क्षेत्र कांग्रेसले नछाड्ने अडान लिएको छ । वडाको मतका आधारमा कांग्रेस पहिलो पार्टी छ ।

त्यस्तै क्षेत्र नम्बर ५ मा कांग्रेसले सशक्त दाबी नगरेपछि अनेरास्ववियूका अध्यक्ष सुदेश पराजुलीका लागि नेकपा एसले बल गरेको छ । कांग्रेस प्रवक्ता प्रकाशशरण महत काठमाडौं ५ मा यसपटक चुनाव लड्न इच्छुक छैनन् । उनले नुवाकोटबाट चुनाव लड्न खोजेका छन् । यहाँ गठबन्धनभन्दा एमाले बलियो भएकाले कांग्रेस पछि हटेको छ ।

काठमाडौं ७ मा नेकपा एसले बागमती प्रदेशका मन्त्री बसन्त मानन्धरको लागि दाबी गरेको छ । मानन्धर सोही क्षेत्रबाट प्रदेशसभा सदस्य छन् । यद्यपि यहाँ जसपाले मन्त्री राजेन्द्र श्रेष्ठका लागि दाबी गरेर श्रेष्ठले प्रचारप्रसार गरिसकेका छन् । तर, कांग्रेसले भने आफ्नो दाबी गरेको छ ।

काठमाडौं ८ मा नेकपा एसबाट पर्यटनमन्त्री जीवनराम श्रेष्ठ नै निरन्तर हुने निश्चित छ । यहाँ ठूलो विवाद पनि छैन । नेकपा एसले उपमहासचिव डा. विजय पौडेलका लागि काठमाडौं ९ दाबी गरेको छ । पौडेल सोही क्षेत्रबाट उम्मेदवार बन्न प्रयासरत छन् । सो क्षेत्रमा नेकपा माओवादी केन्द्रले पनि हितमान शाक्यको लागि दाबी गरेको छ ।

नेकपा एसले ललितपुर क्षेत्र नम्बर २ मा सशक्त दाबी गरेको छ । यसअघि एमालेबाट निर्वाचित सांसद कृष्णलाल महर्जन अहिले नेकपा एसमा छन् । त्यसैले उनको लागि नेकपा एसले सो क्षेत्रमा दाबी गरेको हो ।

यीबाहेक भक्तपुरमा २ र ललितपुरमा तीन प्रदेशसभा सदस्य मागिएको नेकपा एसले जनाएको छ । त्यस्तै काठमाडौंमा १० वटा प्रदेशसभा सीटमा नेकपा एसले दाबी गरेको छ । तीमध्ये तीनजना अहिले निर्वाचितहरु नेकपा एसमै छन् ।

अन्यत्र कति ?

नेकपा एसले ४० सीट दाबी गरे पनि २३ सीटलाई बटमलाइन बनाएको छ । यद्यपि गठबन्धनमा भने बढीमा १६ देखि १८ सीट नेकपा एसलाई दिन सकिने भनेर छलफल भइरहेको स्रोतले जनाएको छ ।

नेकपा एसले दाबी गरेका ४० निर्वाचन क्षेत्र निम्नानुसार छन्ः

प्रदेश १

इलाम – १

झापा- २

मोरङ – ३

सुनसरी – २

भोजपुर/खोटाङमध्ये एक

उदयपुर – २

मधेस प्रदेश

सिरहा – ४

धनुषा – २

सर्लाही – १ वा ३

रौतहट – १

रौतहट – ३

बारा – ४

पर्सा – कुनै एक

बागमती प्रदेश

दोलखा/काभ्रे १

काठमाडौं – २

काठमाडौं – ५

काठमाडौं – ७

काठमाडौं – ८

काठमाडौं – ९

ललितपुर – २

धादिङ – २

मकवानपुर – २

चितवन – १

गण्डकी प्रदेश

कास्की – २

तनहुँ – १

बागलुङ – १

लुम्बिनी प्रदेश

रुपन्देही – २

पाल्पा – २

गुल्मी – २

दाङ – १

दाङ – ३

बाँके – ३

कर्णाली प्रदेश

डोल्पा

मुगु

दैलेख – १

सल्यान

सुदूरपश्चिम प्रदेश

कैलाली – ४

डोटी

बझाङ

अछाम – १

रुपन्देही । नेकपा एसकी सचिव तथा पूर्वमन्त्री रामकुमारी झाँक्री गुल्मी- २ बाट एकल सिफारिसमा परेकी छन् । नेकपा एसले सो क्षेत्रमा गठबन्धनमा आफूले पाउनुपर्ने दाबी गरेको छ ।

यसअघि नेकपा एमालेबाट समानुपातिक सांसद बनेकी झाँक्रीले पार्टी विभागजनमा माधव नेपाललाई साथ दिएकी थिइन् ।

क्षेत्र नम्बर १ मा भने प्रमेश पोखरेललाई प्रतिनिधिसभा सदस्यको उम्मेदवार सिफारिस गरिएको छ ।

यसैबीच पार्टीको जिल्ला भेलाले श्रीराम महतको अध्यक्षतामा जिल्ला कमिटी पुनर्गठन गरेको छ । केही दिनअघि एकीकृत समाजवादी गुल्मीका अध्यक्ष नरेश भण्डारी र इन्चार्ज गणेश खनालसहितको टोली नेकपा एमालेमा प्रवेश गरेपछि जिल्लाको कमिटी पुनर्गठन गरिएको हो । क्षेत्र नं १ मा उम्मेदार बनाइएका पोखरेल यसअघि वामदेव गौतम नेतृत्वको नेकपा एकता अभियानका केन्द्रीय सदस्य थिए ।

अहिले उनलाई गुल्मी जिल्लाको इन्चार्ज बनाइएको छ । सहइन्चार्जमा गणेश विश्वकर्मा रहेका छन् ।

सो क्षेत्रमा नेकपा एमालेका सचिव गोकर्ण विष्ट, नेताहरू राजेन्द्र अर्याल, शेषकान्त गौतम सिफारिस भएका छन् भने नेपाली कांग्रेसबाट चन्द्र केसी, डा. दामोदर भुसाल तथा नेकपा माओवादीबाट भीमकान्त भण्डारी, वीरबहादुर कार्की र नुमकान्त पाण्डेको नाम सिफारिस भएको छ ।

काठमाडौं । संस्कृति, पर्यटन तथा नागरिक उड्डयनमन्त्री जिवनराम श्रेष्ठले पशुपति क्षेत्र विकास कोषका कार्यकारी निर्देशक घनश्याम खतिवडालाई तीन दिनभित्र स्पष्टीकरण पेस गर्न निर्देशन दिएका छन् ।

उनले भदौ २१ गते मन्त्रीस्तरीय निर्णय गर्दै कोषका कार्यकारी निर्देशक खतिवडालाई ४ वटा आरोपसहित ३ दिन भित्र स्पष्टीकरण पेस गर्न निर्देशन दिएका हुन् ।

पशुपति क्षेत्र विकास कोषका कार्यकारी निर्देशक खतिवडाले प्रचलित कानुन बमोजिमको पदीय जिम्मेवारी पुरा गर्न नसकेको, शैक्षिक योग्यताको विषयमा महालेखापरीक्षकको कार्यालयको प्रतिवेदनमा प्रश्न उठेको र ठेकेदारको निवदेनको आधारमा स्वार्थ बाझिने गरी सुपरिवेक्षण परिवर्तन गरेको, आर्थिक वर्ष २०७७/०७८ को परामर्श सेवा खरिद कार्यमा कार्य सम्पन्न नहुँदै आगामी आर्थिक वर्ष साउनमा कार्य सम्पन्न गर्ने शर्तमा अघिल्लो आर्थिक वर्षको असारमा भुक्तानी दिएको स्पष्टीकरण सोधिएको पत्रमा उल्लेख गरिएको छ ।

यस्तै, पशुपति क्षेत्र विकास कोषका कार्यकारी निर्देशकले पशुपति क्षेत्र विकास कोष, कर्मचारी सेवा शर्त सुविधासम्बन्धी नियमावली, २०४५ ले दिएको जिम्मेवारी पनि पुरा गर्न नसकेको र यस्ता विषमा अख्तियार दुरुपयोग अनुसन्धान आयोगबाटसमेत उजुरी आउने गरेको मन्त्रालयले जनाएको छ ।

रुपन्देही । नेकपा एसकी केन्द्रीय सचिव एवं पूर्वमन्त्री रामकुमारी झाँक्रीले मुलुकको समस्या समाधान गर्न गठबन्धन बनेको र यसैबाट देशले निकास पाउने दाबी गरेकी छन् ।

नेकपा एमालेको अहंकारलाई परास्त गर्न यो गठबन्धन बनेको र अगामी निर्वाचनमा यसले आफ्नो तह निर्धारण गरेर एमालेलाई साइजमा ल्याउने उनको जिकिर थियो ।

बिहीबार बुटवलमा रिपोटर्स क्लबले आयोजना गरेको पत्रकार भेटघाट कार्यक्रममा झाँक्रीले मुलकको हितको लागि दीर्घकालीन नीति र एजेण्डा स्थापना गर्नुपर्ने र त्यसको लागि गठबन्धनको जित अनिवार्य आवश्यकता रहेको बताइन् ।

झाँक्रीले राजनीतिक दलले मोलमोलाई गरी उम्मेदवार चयन गर्दा इमान्दार, सक्षम र निष्ठावान नेता कार्यकर्तालाई मार परेको उल्लेख गरिन् ।
आफू गुल्मी क्षेत्र नम्बर २ बाटै उठ्ने बताउँदै उनले भनिन्, ‘स्थानीयस्तरका जनतामा नैरश्यता, अशिक्षा, गरिबीलगायतका थुप्रै समस्या लामो समयदेखि रहँदै आएका छन् । जतिपटक निर्वाचन जिते पनि जनस्तरसम्म काम गर्ने नेता नपाउनु र पटकपटक जिताएको अनुहारलाई भन्दा नयाँ अनुहार गुल्मी २ ले खोजेको छ त्यसकारण म चुनाव जित्छु ।’

एमालेले सत्तामा रहँदा र बाहिर रहँदा फरक-फरक कुरा गरेर जनतालाई झुक्याएको आरोप उनको छ । झाँक्रीले आगामी निर्वाचनमा जनताले पार्टी मात्रै नहेरी व्यक्ति र जनतासँग जोडिएका एजेण्डालाई मत दिने बताइन् ।