Category: नेकपा एस

काठमाडौं । नेकपा एकीकृत समाजवादीले पार्टीको महाधिवेशनको दस्ताबेज तयारीमा जुटेका छ। आज बसेको सचिवालय बैठकले दस्ताबेज मस्यौदा समितिको बैठक बोलाएको हो।

उपमहासचिव जगन्नाथ खतिवडाका अनुसार दस्ताबेजको बाँकी काम पूरा गर्नको लागि भोलि र पर्सी दस्ताबेज मस्यौदा समितिको बैठक बस्नेछ।

बैठकमा महत्त्वपूर्ण राजनीतिक विषयहरूमा छलफल भएको बताए।

यस्तै, उनले समाजवादी मोर्चाको बैठकले चैत ३ गते काठमाडौंमा नेपाली विशेषताको समाजवाद नामक कार्यक्रम पनि जानकारी गराए।

यो कार्यक्रमपछि समाजवादी मोर्चा नेपालको प्रकाशन सुरु गर्नुका साथै जिल्ला जिल्लामा गतिविधि बढाउनेबारे पनि छलफल भइरहेको बताए।

काठमाडौं । नेकपा एकीकृत समाजवादीका सम्मानित नेता झलनाथ खनालले समाजवादले मुलुकलाई हर प्रकारले स्वतन्त्र, सार्वभौमिकता सम्पन्न र स्वाधीन बनाउँदै आत्मनिर्भरता तिर लाने भएकाले जबजको अर्थ नभएको टिप्पणी गरेका छन् ।

‘समाजवाद र अबको बाटो’ विषयक कार्यक्रम बोल्दै उनले दलाल पूँजीवादले मुलुकलाई अन्तर्राष्ट्रिय एकाधिकार पुँजीवादको पक्षधर बनाउँदै लाँदा मुलुकको राष्ट्रियता नै ध्वस्त हुने जिकिर गरे ।

उनले भने, ‘हो यही हो- सुखी नेपाली, समृद्ध नेपालको बाटो । यही हो नेपाली विशेषताको समाजवाद । यो समाजवादको कुनै विकल्प छैन । आज दलाल पुँजीवादको नेतृत्वमा भएको बहुदलीय जनवाद दिन प्रति दिन संकटग्रस्त आफैं बन्दैछ । बहुदलीय जनवाद भनेको पुँजीवादी जनवाद हो । त्यसले नेपाल र नेपाली जनताका आधारभूत समस्या समाधान गर्न सम्भव छैन । ती समस्याहरूको समाधानका निम्ति हामीले आजैदेखि समाजवाद प्राप्तिका निम्ति जनताको तत्कालिक र दीर्घकालीन समस्यालाई लिएर संघर्षमा अघि बढ्नु अनिवार्य छ ।’

पूँजीवादी-जनवादी क्रान्तिले अहिले मुलुकमा दलाल पूँजीवादको नेतृत्वमा बहुदलीय जनवादको सत्ता कायम गरेको छ र आम जनतामाथि हर प्रकारको शोषण, उत्पीडन, अन्याय र अत्याचार थोपरिरहेको बताए ।

उनले भने, ‘आजको बहुदलीय लोकतन्त्र आम जनताको लोकतन्त्र होइन दलाल पूँजीवादको लोकतन्त्र बनेको छ । समाजवादले यो दलाल पूँजीवादको पूँजीवादी अधिनायकत्वलाई समाप्त पार्छ र यसैमाथि टेकेर श्रमजीवि वर्गको नेतृत्वमा आम जनताको लोकतन्त्र समाजवादी लोकतन्त्रको स्थापना गर्नेछ ।’

साम्राज्यवादीहरूको बढ्दो घुसपैठ र नेपाली कम्युनिष्ट आन्दोलनलाई दीर्घकालीन हिसाबले विभाजन गर्ने षड्यन्त्रले मुलुकको दक्षिणपन्थी शक्तिहरू वामपन्थीहरूलाई विभाजित गरेर आफ्नो स्थिति बलियो बनाउन सबै शक्ति लगाइरहेको उनको टिप्पणी छ ।

कम्युनिष्ट आन्दोलनलाई क्रान्तिकारी दिशामा अघि बढाउनुपर्ने आवश्यकता रहेको बताउँदै पार्टीको राष्ट्रिय महाअधिवेशन पुनर्गठन, एकता र प्रगतिको महाधिवेशन बनाउनुपर्ने आवश्यकता रहेको बताए । उनले पार्टीको आगामी महाधिवेशन नेपाली कम्युनिष्ट आन्दोलनमा नै कोसेढुङ्गा बन्नुपर्ने जिकिर गरेका छन् ।

नेपाली कम्युनिष्ट आन्दोलनलाई व्यापक बहस, रूपान्तरण, पुनर्गठन, एकता र प्रगतितिर उन्मुख पार्नुपर्ने बताउँदै ८० को दशकलाई पुनर्गठन, एकता र प्रगतिको दशक बनाउन सकिने बताए ।

काठमाडौं । नेकपा एकीकृत समाजवादीका सम्मानित नेता झलनाथ खनालले मिटरब्याज पीडितको समस्या समाधान गर्न सरकारसँग माग गरेका छन् । मिटरब्याज पीडितहरुले थालेको आन्दोलनमा आफ्नो पार्टीको समर्थन रहेको उनले जनाएका छन् ।

उनले भनेका छन्, ‘मिटरब्याज पीडित किसानहरू मेची र महाकालीबाट आन्दोलनमा उत्रिन बाध्य भएका छन् । यो आन्दोलन दलाल पूँजीवाद र तिनीहरूका राजनीतिक प्रतिनिधिहरूले भूमिहीन, गरिब र मध्यम किसान जनता माथि गर्दै आएको मिटरब्याजी भनिने निर्मम, क्रूर र भयावह शोषण, अन्याय, अत्याचार र जनलुटका विरुद्ध जारी किसान आन्दोलन हो ।’

सरकारले किसानहरूका माग पूर्ति गर्न र उनीहरूलाई लुट र अत्याचारबाट मुक्त पार्ने ठोस र क्रान्तिकारी कदम उठाउन नसकेको उनले बताएका छन् ।

नेता खनालले भनेका छन्, ‘जुन कानून बन्यो, त्यसले किसानहरूलाई कुनै राहत र समाधान दिन सकेन । किसानहरूमाथि भइरहेका लुट र अत्याचार यथावत जारी रहे । त्यसले गर्दा फेरि आज मिटरब्याज पीडित किसानहरू पुनः आन्दोलनमा उभिन बाध्य भएका छन् । मिटर ब्याज पीडकहरूका विरुद्ध किसानहरूले सुरु गरेको स्वःस्फूर्त वर्ग संघर्ष हो । यो बिल्कुलै न्यायपूर्ण आन्दोलन हो ।’

किसानहरुलाई पीडाबाट पूर्ण रुपले मुक्त बनाउने ढंगले कदम चाल्न, मिटरब्याज पीडकहरुलाई कडा कारबाही गर्न र किसानहरूलाई अधिकतम न्याय दिने हिसाबले क्रान्तिकारी कदम चाल्न सरकारसँग गरेका छन् ।

काठमाडौं । नेकपा एकीकृत समाजवादीका अध्यक्ष माधव नेपाल आगामी निर्वाचन एक्लै लड्नसक्ने पार्टी निर्माण गर्न संगठन निर्माण गर्न पार्टी पंक्तिमा सर्कुलर पठाएका छन्।

हालै बसेको केन्द्रीय कमिटी बैठकको निर्णय तल्लो कमिटीमा पठाउँदै सबै पालिका, वडा र टोलसम्म कमिटी निर्माण गर्नु र बढिभन्दा बढी सदस्यता विस्तार गर्नु आवश्यक भएको उल्लेख गर्का छन्।

अपानिमा भनेका छन्( आगामी निर्वाचनहरुमा एक्लै लड्न सक्ने एउटा क्रान्तिकारी पार्टी सङ्गठनको निर्माणको आवश्यकताबारे हामीले धेरै पटक चर्चा गरेका छौँ । त्यसका लागि सबै पालिका, वडा र टोलसम्म कमिटी निर्माण गर्नु र बढिभन्दा बढी सदस्यता विस्तार गर्नु आवश्यक छ । यस अभियानले त्यस आवश्यकतालाई सम्बोधन गर्नेछ ।

यो अभियानमा पार्टीका सबै तहका कमिटीहरु परिचालित गरे लक्ष्यित परिणाम हासिल गर्नसक्ने बताएका छन्। मुलुकको समग्र राजनीति र वाम आन्दोलनमा ठुलो चुनौती रहेको उल्लेख गर्दै एउटा क्रान्तिकारी बलियो पार्टीले मात्रै ती चुनौतीको सामना गर्न सक्ने उल्लेख गरेका छन्।

अपानीमा भनेका छन्( हाम्रो पार्टीले मुलुकको राजनीतिमा असाधारण भूमिका खेल्नु पर्ने छ । आगामी महाधिवेशन वैचारिक, सैदान्तिक, राजनीतिक तथा सङ्गठनिक दिशामा नंया उँचाई प्राप्त गर्नका लागि सबैमा महत्वपूर्ण अवसर हुनेछ । अर्थात् महाधिवेशनको सफलताले हाम्रो पार्टीको भविष्य, वाम आन्दोलनको भविष्य र नेपाली राजनीतिकै भविष्यमा योगदान गर्नेछ । ती चुनौतिकको सामना गर्न र सम्भावनालाई यथार्थमा परिणत गर्न सम्पूर्ण सामर्थ्यका साथ अघि बढौँ ।’

काठमाडौं । नेकपा एकीकृत समाजवादीको सचिवालय बैठक जारी छ । पार्टी कार्यालय आलोकनगरमा ७६औं सचिवालय बैठक बसेको हो ।

बैठकमा पछिल्लो समसामयिक राजनीतिक घटनाक्रमबारे छलफल भइरहेको सचिवालयले जनाएको छ । नेकपा एसले गठबन्धनमा राष्ट्रियसभाको अध्यक्ष दाबी गर्दै आएको छ ।

कांग्रेसले कृष्णप्रसाद सिटौलालाई राष्ट्रियसभा अध्यक्षमा अगाडि ल्याउँदा माओवादीले पनि ठूलो दलको हैसियतले दाबी गर्दै आएको छ ।

कैलाली । नेकपा एकीकृत समाजवादी पार्टीकी केन्द्रीय सचिव रामकुमारी झाँक्रीले दलहरूले चुनावमा जनतालाई झूटा आश्वासन दिन बन्द गर्नुपर्ने बताएकी छन् ।

समाजवादी प्रेस संगठन कैलालीको आयोजनामा भएको पत्रकार सम्मेलनमा उनले शुक्लाफाँटा वन्यजन्तु आरक्ष क्षेत्रमा बसिरहेका नागरिकहरूको लागि दलहरूले जग्गा दिने भन्दै झूटको खेती गरिरहेको आरोप लगाएकी हुन् ।

‘त्यस्ता ठाउँमा आधारभूत सुविधा दिन मिल्दैन’, उनले भनिन् ‘चुनावका बेला सबै सुविधा दिन्छु भनेर भोट माग्छन् । त्यो गर्नु गलत हो ।’

निर्वाचनको समय आफू पनि मन्त्रीसँग शुक्लाफाँटा गएको र त्यहाँ प्रत्यक्षमा रूपमा कानूनले वञ्चित गरेकै कुराहरू पनि नेताहरूले आश्वासन बढिरहेको उनले टिप्पणी गरिन् ।

‘बफर जोनमा लालपुर्जा दिन पाइँदैन । सेन्सेटिभ जोन (सङ्कटग्रस्त क्षेत्र) कहाँ हो सबै थाहा छ । हामीले अन्तर्राष्ट्रिय कानूनमा पनि हस्ताक्षर गरेका छौं । त्यस्ता ठाउँमा झूटो बोलेर खाली भोट बैंक नबनाऔं’, उनले नेताहरूलाई आग्रह गरिन् ।

विगतमा आफूले एक व्यक्ति एक पदका विषयमा उठाएका कतिपय सवालहरू गलत रहेको उनले स्वीकार गरिन् ।

काठमाडौं । सत्तारुढ घटक नेकपा एसनिकट पत्रकारको संगठन समाजवादी प्रेस संगठनले पत्रपत्रिकाले राज्यबाट पाउँदै आएको लोककल्याणकारी विज्ञापन खोस्न लागिएको भन्दै विरोध गरेको छ ।

संगठनका अध्यक्ष विश्वमणि सुवेदीले एक विज्ञप्तिमार्फत् लोककल्याणकारी विज्ञापनबारे मिडिया काउन्सिल विधेयक मौन बसेको भन्दै गम्भीर ध्यानाकर्षण भएको जनाएका छन् ।

‘सरकारले कुनै पनि बहानामा हाल सञ्चारमाध्यमले पाउँदै आएको लोककल्याणकारी विज्ञापन र त्यसबापतको रकम खारेज गर्न हुँदैन । प्रेस काउन्सिल ऐन विस्थापन गर्ने नाममा पत्रपत्रिकाले राज्यबाट पाउँदै आएको रकम सुविधा खोस्न लागिएको भनी हालै सञ्चारमाध्यमबाट सार्वजनिक भएका छन्’, विज्ञप्तिमा लेखिएको छ, ‘पत्रपत्रिका, रेडियो, टेलिभिजनलाई मात्र होइन, त्यस्तो सुविधा अनलाइन सञ्चारमाध्यमले समेत पाउनुपर्छ भन्ने हाम्रो संगठनको प्रष्ट मान्यता छ । विज्ञापन बजार फितलो भई मिडिया संकटमा परेको बेला राज्यले अपनत्व लिई सञ्चारमाध्यमलाई अनुदान बढाउनुपर्नेमा कानून ल्याएर भइरहेकै सुविधा पनि खोस्न खोज्नु गलत र मूर्खतापूर्ण निर्णय हुनेछ ।’

प्रेस काउन्सिलमा रहेको पत्रपत्रिका वितरण संपरीक्षण समितिलाई सबै सञ्चारमाध्यम समेट्ने गरी संशोधन गर्न पनि संगठनले माग गरेको छ ।

काठमाडौं । नेकपा एकीकृत समाजवादीले अध्यक्ष माधव नेपाल र सम्मानित नेता झलनाथ खनाललाई आगामी महाधिवेशनका लागि मैदान खुल्ला गरेको छ । हिजो र आज भएको केन्द्रीय परिषद् बैठकले उमरेहद नराख्ने निर्णय गरेको हो ।

पार्टीको सबै कमिटीमा समावेशी सिद्धान्त अनुसार २० प्रतिशत युवा राख्ने निर्णय गरेको उपाध्यक्ष बेदुराम भुसालले बताए ।

उनका अनुसार सबै कमिटीका पदाधिकारी प्रत्यक्ष निर्वाचित भएर आउनेछन् । केन्द्रीय कमिटी १९९ सदस्यीय र पदाधिकारी १९ सदस्यीय हुने हुनेछन् । नयाँ केन्द्रीय कमिटी र निकाय बनाएकाले तलैबाट चुनिएर अहिलेसम्मको एतिहासिक भएको सम्मानित नेता झलनाथ खनालले बताए ।

केन्द्रीय कमिटीभित्रको संरचना केन्द्रीय कमिटी, पोलिटब्युरो र स्थायी कमिटी रहनेछ । केन्द्रीय निकायमा राष्ट्रिय महाधिवेशन, केन्द्रीय कमिटी, अनुशासन आयोग, लेखा परीक्षण आयोग, निर्वाचन आयोग, सल्लाहकार परिषद्, ज्येष्ठ कम्युनिष्ट मञ्च र केन्द्रीय परिषद् रहनेछन् ।

सबै कमिटीका पदाधिकारी तथा सदस्यहरु महाधिवेशन वा सम्बन्धित तहका अधिवशेनहरुबाट प्रत्यक्ष रुपमा निर्वाचित हुनेछन् ।

बैठकको निर्णय अनुसार अब नेकपा एसको सांगठानिक संरचना र संख्या यस्तो हुनेछ ।

प्रदेश कमिटीको संख्या ७५ देखि ९९ सम्मको रहनेछ । जिल्ला धेरै भएको प्रदेशमा बढी हुने र जिल्ला थोरै भएको प्रदेशमा थोरै हुनेगरी रहनेछन् ।

प्रदेश कमिटीभित्रको पदाधिकारीको संख्या ७ जनाको हुनेछ । अध्यक्ष एक, उपाध्यक्ष दुई, सचिव १ र उपसचिव ३ रहनेछ ।

जिल्ला कमिटीको संख्या ५५ एकमात्र निर्वाचन क्षेत्र भएको जिल्लामा कायम गरी एकभन्दा बढी संघीय निर्वाचन क्षेत्र भएका जिल्लाहरुमा प्रत्येक संघीय निर्वाचन क्षेत्रबाट एक महिलासहित ३ जना थप गर्नेगरी तय गरिनेछ ।

जिल्ला कमिटीका पदाधिकारीहरु सात जना हुनेछन् । अध्यक्ष एक, उपाध्यक्ष दुई, सचिव एक, उपसचिव ३ ।

पालिका कमिटीको संख्या ४५ हुनेछ । पालिकामा ५ भन्दा बढी वटा छन् भने । ५ भन्दा बढी वडा छन् भने पालिकाको प्रत्येक वडाबाट २ जना थप गर्न सकिनेछ ।

स्थानीय कमिटीका पदाधिकारीहरु पाँच जना हुनेछन् । अध्यक्ष एक, उपाध्यक्ष एक, सचिव एक र उपसचिव २ ।

वडा कमिटीको संख्या बढीमा ३५ जनाको हुनेछ ।

पार्टीका सबै कमिटीहरुमा समावेशिताको सिद्धान्तअनुसार युवाहरुको प्रतिनिधित्व २० प्रतिशत रहनेछ । सबै कमिटीहरु समावेशी हुनेछन् ।

प्रदेशमा आयोगहरू रहने छैनन् ।

महाधिवेशन र अधिवेशनका प्रतिनिधि छनोटसम्बन्धी विषय र स्थानीय कमिटीहरूको संख्या र पदाधिकारीको विषय आजैदेखि नै लागू हुनेछन् । स्थानीय कमिटीको पदाधिकारी संख्या अधिवेशन गर्दादेखि लागू हुने पार्टीले जनाएको छ ।

काठमाडौं । नेकपा एकीकृत समाजवादीका अध्यक्ष माधवकुमार नेपालले अमेरिकाले चीनलाई घेर्न लागेको बताएका छन् । चीनको बढ्दो प्रभाव रोक्न अमेरिकाले हिन्द प्रशान्त क्षेत्र रणनीति अख्तियार गरेको नेपालले बताएका छन् ।

नेकपा एसको केन्द्रीय परिषद्को दोस्रो बैठकमा नेपालले राखेका दश बुँदामा पहिलो बुँदा ‘अन्तर्राष्ट्रिय परिस्थिति’ छ ।

नेपालले आफ्नो विश्व ब्रिफिङमा बोल्दै भारत र अमेरिकाले गरेका सैन्य सम्झौतामा पनि आपत्तिको भाषा प्रयोग गरेका छन् । अमेरिकाले भारत तथा अन्य क्षेत्रीय शक्तिसँग चीन लक्षित बलियो गठबन्धन गर्ने उद्देश्य लिएको उल्लेख गर्दै अध्यक्ष नेपालल भनेका छन्, ‘भारत तथा फिलिपिन्ससँग अलग-अलग सैन्य सहयोगको सम्झौता गरेको छ । भारत र अमेरिकाबीच सैन्य, प्रविधि व्यापार र आप्रवासनसँग सम्बन्धित विषयहरुमा गम्भीर प्रकृतिका सम्झौता भएका छन् । यसले भारत र अमेरिकाबीचको सम्बन्ध मात्र होइन एसिया प्रशान्त क्षेत्र र सिंगो विश्व राजनीतिमा विभिन्न समस्या पैदा गर्ने सम्भावना छ ।’

अध्यक्ष नेपालले कस्तो खालको ‘समस्या’ भनेर किटान भने गरेका छैनन् । उनले अमेरिकी प्रभाव क्षेत्र भएको ल्याटिन अमेरिकामा एकपछि अर्को समाजवादी सरकारहरु बनिरहेको पनि बताएका छन् । यद्यपि, समाजवादी दाबी गरिएको सरकार ढलेर उग्र दक्षिणपन्थी सरकार बनेको अर्जेन्टिनाको प्रसंगमा भने नेपाल मौन छन् ।

रुसको शक्ति क्षय गर्न पश्चिमा शक्ति सक्रिय

माधव नेपालले रुसले युक्रेनमा गरेको सैन्य हमलादेखि त्यसको नेटो साइनो पनि कोट्याएका छन् । अमेरिकी नेतृत्वको पश्चिमा शक्तिलाई नेपालले ‘साम्राज्यवाद’को उपमा दिँदै उनले भनेका छन्, ‘अहिले साम्राज्यवादको अर्को ध्यान नाटोका सदस्य राष्ट्रको संख्या विस्तार गर्ने र यसको सामरिक क्षमता अभिवृद्धि गर्ने कुरामा पनि केन्द्रित छ । आफ्नो प्रभुत्वलाई कायम राख्न अमेरिका, बेलायत, अस्ट्रेलिया, क्यानडा र न्युजिल्याण्डबीच साझा जासुसी गठबन्धनको प्रयत्न शुरु भएको छ ।’

रुसले युक्रेनमा गरेको सैन्य हमलामा युक्रेनसँग भन्दा रुससँग समभाव राख्दै नेपालले रुसलाई कमजोर पार्न पश्चिमा शक्तिहरु लागेको बताएका छन् । रुस र युक्रेन युद्ध गम्भीर मोडमा आएको व्याख्या गर्दै उनले भनेका छन्, ‘कतिपय युरोपेली राष्ट्रहरु आफैं पनि युक्रेन युद्धमा
संलग्न हुँदै गइरहेका छन् । अत्याधुनिक क्षेप्यास्त्रलगायतका युद्ध सामग्रीहरु युक्रेन पठाएर युद्धलाई अझ लम्ब्याउने र यसलाई अझ घातक बनाउने कार्य गरिरहेका छन् । नाटो सम्बधित केही राष्ट्रहरु यस कार्यमा प्रत्यक्ष रुपमा संलग्न हुन खोजिरहँदा युद्ध अझ लम्बिने र ध्वंसात्मक हुने सम्भावना बढ्दैछ ।’

उनले थप भनेका छन्, ‘त्यतिमात्र होइन, युक्रेन-रुस मामलामा पश्चिमाहरुको नेतृत्वमा रहेको नेटोमार्फत हस्तक्षेप बढ्दै जाँदा स्थिति झनै गम्भीर बन्दै गैरहेको छ । साथै विश्व शक्ति सन्तुलनमा हलचल आउने, विश्व शान्ति र आर्थिक विकासमा बाधा पुग्न जाने देखिन्छ ।’

इजलायलले नरसंहार गरेको भन्दै दक्षिण अफ्रिकालगायतको समर्थन

इजरायलले हमासको हमलाको प्रतिक्रियामा गाजामा गरेको बमबारी र त्यसबाट मारिएका बालबालिकाको हत्याको मुद्दामा पनि नेता नेपालले बोलेका छन् । इजरायलले गाजामा नरसंहार गरेको भनेर दक्षिण अफ्रिका, इन्डोनेसियालगायतले अन्तर्राष्ट्रिय अदालतमा हालेको मुद्दामा नेपालले समर्थन गरेका छन् ।

उनले गाजा मामिलामा इजरायल, अमेरिका र युरोपियनहरुको एकमुष्ट आलोचना गर्दै भनेका छन्, ‘दक्षिण अफ्रिका, इण्डोनेशियालगायतले युद्ध र नरसंहारका विरुद्ध उठाइरहेका कदमहरुलाई हाम्रो पार्टी समर्थन गर्दछ । यसमा अमेरिका र युरोपियनहरुले गरेको भूमिका निन्दनीय छ ।’

दुई राज्य नै इजरायल र प्यालेस्टाइन समस्या हलको कारण भन्दै नेपालले भनेका छन्, ‘इजरायलले प्यालेस्टाइन राज्यको अस्तित्वलाई स्वीकार गरी दुई राष्ट्र आपसमा पारस्परिक सम्मान र सहअस्तित्वको आधारमा शान्तिपूर्ण रुपमा अघि बढून् भन्ने चाहन्छौं ।’

चीनले आफ्नै विशिष्टताको समाजवाद निर्माण गर्दै

अमेरिकासँग गरम देखिएका नेपाल चीनसँग नरम देखिन्छन् । अमेरिकासँग गरम देखिए पनि आफ्नै दलसमेत सहभागी भएर पारित भएको एमसीसीको प्रसंगमा उनी मौन छन् । बीआरआईमा भने उनी मुखर भएका छन् । चीनले आफ्नै मौलिक समाजवाद निर्माणमा सक्रियता देखाएको भन्दै नेपालले चिनियाँ राष्ट्रपति सी चिनफिङले चीनमा अत्याधुनिक, चुस्त र हरित उद्योगहरु सञ्चालनमा काम गरिरहेको बताएका छन् ।

नेपालले बीआरआई, एसियन इन्फ्रास्ट्रक्चर इन्भेस्टमेन्ट बैंक, ग्लोबल डिभेलपमेन्ट इनिसिएटिभ, ग्लोबल सिभिलाइजेसन इनिसिएटिभको प्रसंग ल्याउँदै अध्यक्ष नेपालले चीनले यस्ता कार्यक्रमहरुबाट विकासशील देशहरुसँग बहुपक्षीय तथा दुई पक्षीय सहयोग बढाइरहेको बताएका छन् ।

नेपालले विश्वको खाद्यान्न अभाव, विशाल प्रविधिक कम्पनीको आधिपत्य, वित्तीय आधिपत्यको एकाधिकारका मुद्दामा पनि आलोचना गर्दै पश्चिम एसिया क्षेत्रको पेट्रोलियम पदार्थको अर्थ-राजनीतिका तर्क पनि मन्तव्यमा अटाएका छन् ।

काठमाडौं । नेकपा एकीकृत समाजवादीले पार्टी गठनको घोषणा गरेदेखि निरन्तर अहिलेसम्म नेपालको विभाजित कम्युनिष्ट आन्दोलनलाई एकताबद्ध गर्ने मान्यता अघि सार्दै बताएको छ ।

केन्द्रीय परिषद्को बैठकमा अध्यक्ष माधव नेपालले प्रस्तुत गरेको प्रतिवेदनमा पार्टी निर्माणको क्रममा अहिलेसम्म कतिपय साना घटकहरुलाई पार्टीमा एकताबद्ध गरेको उल्लेख गरेका छन् ।

प्रतिवेदनमा भनिएको छ, अहिले पनि कम्युनिष्ट क्रान्तिकारीहरु विशेषगरी समाजवादको पक्षमा तथा समाजवादी कार्यदिशा अवलम्बन गर्ने कम्युनिष्टहरुको बीचमा एकता हुनुपर्दछ भन्ने विषयमा जोड दिइरहेका पनि छौं । तर पनि तत्काल कम्युनिष्ट पार्टीहरुको बीचमा पार्टी एकता गर्ने विषयले सार्थकता पाउन सकेको छैन ।

लोकतान्त्रिक गणतन्त्रलाई सुदृढ र विकास गर्ने, समाजवादको पक्षमा रहेको मुलुकको वर्तमान संविधानलाई रक्षा, विकास र समृद्ध गर्ने, पुनरुत्थानवादी, यथास्थितिवादी, पश्चगामी र प्रतिगामीहरुको सामाजिक सद्भावलाई खलवल्याउने र मुलुकलाई प्रतिगमन र पश्चगमनको दिशामा धकेल्ने षडयन्त्र भइरहेको उल्लेख गरेका छन् ।

देशमा भएको समस्याको समाधान गर्दै कम्युनिष्ट तथा वामपन्थीहरुलाई एकताबद्ध र एकीकृत गर्न ऐतिहासिक महत्वको भूमिका खेल्ने अपेक्षा प्रतिवेदनमा छ ।

नेपाली कम्युनिष्ट आन्दोलनको वर्तमान अवस्थामा हामीले समाजवादी कार्यदिशा अँगालेर अगाडि बढ्ने अठोट गरेको छ । नेपाली विशेषताको समाजवाद निर्माणका लागि दृष्टिकोण, सिद्धान्त, कार्यक्रम र विचारको सवालहरुमा एकरुपता कायम गरी पार्टीलाई सैद्धान्तिक तथा वैचारिक जगमा एकताबद्ध गर्न आह्वान गरेका छन् ।

संघीय र सबै प्रदेशमा गठबन्धनका सरकारहरु बनेको उल्लेख गर्दै उनले दलहरुबीच आपसी समझदारीका साथ काम हुनपर्छ भन्नेमा पार्टीले जोड दिए ।

प्रतिवेदनमा भनिएको छ, ‘यतिवेला मुलुकमा राजनीतिक स्थिरता र सरकारको स्थिरताको प्रश्न पनि उठिरहेको छ । यसको मुख्य कारण सदनभित्र गणतन्त्रवादी र गणतन्त्रविरोधी, परिवर्तनकारी र प्रतिगमनकारी, अग्रगामी र पश्चगामी, संघीयता पक्षधर र संघीयताविरोधी, धर्म निरपेक्षतावादी र धर्मसापेक्षतावादी आदि विभिन्न चरित्रका राजनीतिक शक्तिहरू उपस्थित छन् । यी शक्तिहरूबीच अनेक प्रकारले द्वन्द्व चलिरहेको छ । यसरी चलिरहेको द्वन्द्वले गर्दा मुलुकमा राजनीतिक अस्थिरता पैदा गर्ने प्रयत्न एक वा अर्को ढंगले भइरहेको छ ।’

सत्ताच्युत भएर प्रमुख प्रतिपक्षमा पुगेको एमाले अत्यन्त गैरजिम्मेवार ढंगले नकारात्मक भूमिका निर्वाह गरिरहेको उनले आरोप लगाए । विभिन्न ढंगले सरकार सञ्चालनमा रहेको वर्तमान गठबन्धन तोड्न उद्यत गरेको नेकपा एसको बुझाइ छ ।

काठमाडौं । नेकपा एकीकृत समाजवादीले माघ १४ देखि १५ सम्म बस्ने केन्द्रीय परिषद् बैठकमा खाली रहेको केन्द्रीय परिषद सदस्य मनोनयन गर्ने निर्णय गरेको छ।
आज बसेको सचिवालय बैठकले खाली रहेको ठाउँमा संस्थागत निर्णय र सिफारिसका आधारमा मनोनयन गर्ने निर्णय गरेको हो।

लम्बिनी प्रदेश कमिटीका अध्यक्षसमेत रहेका सोम पाण्डेलाई रुपन्देहीको इन्चार्ज तोकिएको छ। गण्डकी प्रदेश कमिटीका अध्यक्ष रामजी शर्मालाई प्रदेश सहइन्चार्जको जिम्मेवारी तोकिएको छ।

यस्तै, गण्डकी प्रदेश कमिटीका कार्यबाहक अध्यक्ष रहेका श्रीनाथ बरालाई अध्यक्ष मनोनयन गर्ने, लुम्बिनी प्रदेश कमिटीका सचिव राजु गुरुको राजीनामा स्वीकृत गर्दै रिक्त स्थानमा अशोक कोइरालालाई चयन गर्ने निर्णय गरेको छ।

काठमाडौं । नेकपा एकीकृत समाजवादीले केन्द्रीय परिषद् बैठकमा सहभागी हुने नेताहरूले दुई बुँदे निर्देशन जारी गरेको छ। माघ १४ र १५ गते हुने परिषद् बैठकमा सहभागी हुने नेताहरूलाई महासचिव घनश्याम भुसालले निर्देशन जारी गरेका हुन् ।

बैठकमा सहभागी हुन आउनेको पार्टी सदस्यता अनिवार्य रूपमा नवीकरण हुनुपर्ने र बैठकमा सहभागिताको लागि केन्द्रीय निकाय, प्रदेश कमिटी, जिल्ला कमिटी लगायतका समयमा नै आफ्नो-आफ्नो कार्य क्षेत्रका केन्द्रीय परिषद् सदस्यहरुलाई परिषद् बैठकबारे जानकारी गराउन पनि भनिएको छ ।

बैठकले पार्टीको विधानलाई पूर्णता दिने तयारी गरेको छ । केन्द्रीय समितिको बैठकको निर्णयअनुसार अहिले विधानलाई पार्टीको तल्लो कमिटीमा छलफलको लागि पठाएको छ ।

काठमाडौं । नेकपा एकीकृत समाजवादीका अध्यक्ष माधव नेपालले आफ्नो पार्टीका नेता कार्यकर्तामा निराशा नभएको दाबी गरेका छन् । नेकपा एसनिकट भूपू सैनिक तथा प्रहरीको कार्यक्रमलाई सम्बोधन गर्दै पार्टी निर्माणको क्रममा आफूहरू लागिरहेको बताए ।

उनले भने, ‘हाम्रो पार्टीले आफ्नो ढंगले गति लिइरहेको छ । निराशा छैन । आशा र उत्साह छ । त्यसैले मैले भन्ने गर्छु फूलको आँखामा फूलै संसार काँडाको आँखामा काँडै संसार । हामीले २०६२/६३ को आन्दोलन गर्दाखेरी राजतन्त्रलाई फाल्न खोज्दा मान्छे केही निराश थिए फाल्न सकिँदैन भनेर । तर, केही मान्छेहरु फाल्न सकिँन्छ उत्साहित थिए । दुनियाँ बदल्ने उत्साह भएका हामीहरू निरन्तर लागिरहेका थियौं ।

उनले पार्टीको विधान बनाउनको लागि तल्लो तहबाट सुझाव लिन लागेको बताए । पार्टीलाई तल्लो तहसम्म जनतासँग जोड्न लाग्नुपर्नेमा जोड दिए ।

नेपालले भने, ‘हाम्रो मित्र र शत्रु को हुन् भन्ने छुट्याउन सक्नुपर्छ । आज प्रतिगामी शक्तिहरू टाउको उठाइरहेका छन् । यो व्यवस्थामाथि धावा बोल्दैछन् तर ती व्यवस्थाको रक्षाका लागि लड्नेहरू कहीँ शत्रु हुन्छन् । उनीहरूविरुद्ध लड्ने हो भने प्रतिगामी शक्तिहरूलाई फाइदा हुन्छ ।’

उनले आफ्नो पार्टीलाई एमालेका अध्यक्ष केपी ओलीतर्फ संकेत गर्दै आफूहरूलाई सिध्याउन खोजेको आरोप लगाए ।

उनले भने, ‘हामीलाई सिध्याउन खोजिरहेका छन् गठबन्धनलाई ध्वस्त बनाउन खोज्दैछन् अनि तीनिहरूको षड्यन्त्रलाई सफल बनाउने कुरा क्रान्तिकारी हुन सक्दैन । सजिलो छैन । गठबन्धनलाई मात्रै भरोसा गरेर जिताइदेलान् भनेर चल्ने होइन । आफ्नो शक्ति बनाउने हो । शाक्तिको आधारमा संगठन विस्तार गरेर चुनावमा एक्लै लड्ने आँट गर्ने हो । अरुलाई हामीले होइन हामीलाई चाहिँ अरुले माग्ने स्थिति बनाउनुपर्छ ।’

काठमाडौं । नेकपा एकीकृत समाजवादीका झलनाथ खनालले राष्ट्रिय एकता दिवसको अवसरमा देशलाई समाजवादको दिशातर्फ अघि बढाउने संकल्प लिन आह्वान गरेका छन्। राष्ट्रनिर्माता पृथ्वीनारायण शाहको ३०२ औं जन्मजयन्ति तथा राष्ट्रिय एकता दिवसको अवसरमा शुभकामना दिँदै अब मुलुकको स्वतन्त्रता र राष्ट्रियतालाई सुदृढ गर्नुपर्ने बताए।

उनले भनेका छन्, अब हामीले मुलुकको स्वतन्त्रता र राष्ट्रियतालाई सुदृढ गर्दै, सामाजिक–आर्थिक रुपान्तरण गर्ने, मानिसले मानिसलाई गर्ने शोषणबाट मुक्त पार्ने, राष्ट्रिय अर्थतन्त्र र संस्कृतिहरुलाई सुदृढ बनाउँदै समाजवादको बाटोमा अग्रसर भएर मात्र एकिकरणका योद्धाहरु, हाम्रा वीर पूर्खाहरु, महान् शहिदहरु र आम नेपाली जनताको इच्छा र आकांक्षा अनुरुपको समृद्ध नेपाल र सुखी नेपाली को सपना साकार पार्न सक्छौं ।

तत्कालिन राजा पृथ्वीनारायण शाहको नेतृत्वमा शुरु भएको राज्य विस्तारको प्रक्रियाले उपत्यका एकिकृत भएपछि नेपालको ऐतिहासिक एकिकरणको अभियानको रूप लिएको उल्लेख गरेका छन्।

उनले अगाडि भनेका छन्, त्यहि क्रममा नेपालका पूर्व पश्चिम, हिमाल, पहाड र तराईमा रहेका ६० भन्दा बढी स–साना राज्यहरुलाई एकिकरण गर्दै हाम्रा वीर पुर्खाहरूको साहस, पराक्रम र सौर्यको परिणाम स्वरुप हाम्रो मातृभूमि नेपाल एउटा स्वाधिन, अखण्ड र सार्वभौम मुलुकका रुपमा तथा बहुजातिय, बहुभाषिक, बहुसांस्कृतिक र बहुधार्मिक राष्ट्रका रुपमा विकसित भएको छ ।

कैलाली । नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालले मुलुकमा राजतन्त्र फर्काउने गरी गतिविधि भइरहे पनि अब राजतन्त्र फर्किने सम्भावना नरहेको बताएका छन् ।

कैलालीको टीकापुरमा आजबाट सुरु भएको नागरिक उन्मुक्ति पार्टीको महाधिवेशनमा बोल्दै उनले राजतन्त्र फर्किन सक्ने सम्भावना नरहेको प्रस्ट पारेका हुन् ।

‘गणतन्त्रका विरुद्धमा, हराइसकेको, बितिसकेको कामै नलाग्ने अवस्थामा पुगेको संस्थाको विषयमा आवाज उठ्न थालेको छ’, उनले भने, ‘केही मान्छेले खुट्टा उचालिरहेका छन् । राजतन्त्र इतिहास भइसकेको छ, अब त्यो सम्भव छैन ।’

उनले पार्टी व्यवस्थाभन्दा निर्दलीय, निरङ्कुश र अधिनायकवाद काम नलाग्ने जिकिर गरे । उनले भने, ‘एउटा वंशको हातमा शासन लगेर सबैलाई दास बनाउने व्यवस्था काम लाग्दैन । फेरि दास बनाउने गरी कोही आउन थालेको छ भने त्यो स्वीकार्य हुँदैन ।’

उनले पार्टीले निर्वाचित जनप्रतिनिधिलाई निगरानी राख्नु पर्नेमा जोड दिए । ‘कुनै पार्टी र नेताले गल्ती गरेको भन्दैमा सबै नेता खराब, सबै पार्टी गलत भन्न मिल्दैन’, नेपालले भने ।

नेपालले रेशम चौधरी घटनामा प्रत्यक्ष रुपमा नरहेको बताएका थिए ।

‘सबै समुदायको बीचमा सम्मानको व्यवहार गर्नुपर्छ । यो देशको आफ्नो पहिचानलाई जोगाउनु पर्नेछ’, नेपालले भने, ‘हाम्रा युवाहरू विदेश पलायन भइरहेका छन्। त्यो संख्या कम गर्नु पर्छ । तीनै तहको सरकारको ध्यान दिनु पर्छ ।’

आफ्नो पहलमा सुदूरपश्चिम प्रदेशमा विभिन्न विकासका कामहरू अगाडि बढेको समेत बताए । सेती लोक मार्ग, रानीजमरा कुलरिया सिचाइ आयोजना, सुदूरपश्चिम विश्वविद्यालय, गेटामा मेडिकल कलेज आफ्नै पहलमा सुरु भएको बताए ।

काठमाडौं । नेकपा एकीकृत समाजवादीमा १७५ सदस्यीय केन्द्रीय कमिटी बनाउने प्रस्ताव भएको छ । माघ १४ र १५ मा पार्टीको केन्द्रीय परिषद्को बैठकले विधान टुंग्याउनेगरी भइरहेको छलफलमा केन्द्रीय समिति घटाउने प्रस्ताव भएको हो ।

हिजो बसेको केन्द्रीय समितिको बैठकले पार्टीको जिल्ला तहबाट सुझाव लिएर विधानलाई पूर्णता दिने निर्णय गरेको थियो ।

नेकपा एसका सचिव जीवनराम श्रेष्ठका अनुसार वैकल्पिकसहित १७५ सदस्यीय हुनेछ । केन्द्रीय समितिमा एक तिहाइ महिला हुने उनले बताए ।

उनका अनुसार १९ सदस्यीय स्थायी कमिटी र ५७ सदस्यीय पोलिटब्युरो बनाउन प्रस्ताव आएको छ ।

उनले भने, पदाधिकारीमा विभिन्न प्रस्ताव आएका छन्, कसैले उपाध्यक्ष ९ जना चाहिन्छन् भनेका छन् कसैले दुई, कसैले सचिव नै जना भनेका छन् । त्यसैले पदाधिकारीको विषयमा अब तल्लो तहबाट आएको सुझावपछि मात्रै टुंग्याउँछौं ।

नेकपा एसमा अहिले २४ पदाधिकारीसहित ३५१ सदस्यीय केन्द्रीय कमिटी रहेको छ । त्यसो त उनले पार्टीभित्र बहसमा रहेको ७० वर्षे उमेरहद नराख्न सुझाव आएको समेत बताए ।

अध्यक्ष माधव नेपाल र सम्मानित नेता झलनाथ खनाललाई आगामी महाधिवेशनमा नेतृत्वमा दोहोरिन नेकपा एसले उमेरहद नराख्ने तयारी गरेको छ ।