Category: नेकपा एस

काठमाडौं । पदाधिकारी चयनका लागि नेकपा (एकीकृत समाजवादी) ले केन्द्रीय कमिटी बैठक बोलाएको छ ।

आज बिहान ११२ बजेबाट सुरु हुने बैठकले पार्टीमा रिक्त रहेका पदाधिकारीलाई पूर्णता दिनेछ ।

अर्पण बैंकेटमा बस्ने बैठकले वरिष्ठ उपाध्यक्ष, उपाध्यक्ष, उपमहासचिव, कोषाध्यक्षसहित रिक्त रहेका १८ पदाधिकारी चयन गर्ने बताइएको छ ।

पार्टीमा ३४४ सदस्यीय केन्द्रीय रहेकामा २५१ केन्द्रीय सदस्यको शपथ ग्रहण गर्न बाँकी रहेकाले सो बैठकमा उनीहरूलाई शपथ गराएर जिम्मेवारी तोकिनेछ । केही नेताहरूको जिम्मेवारी हेरफेर गरिनेछ ।

पदाधिकारीका आकांक्षी धेरै भएपछि सातै प्रदेशबाट भूगोल, क्षेत्र तथा सन्तुलन मिलाएर केन्द्रीय कमिटीको पूर्ण बैठकले पदाधिकारी चयन गर्न मापदण्ड बनाउन लागिएको छ ।

काठमाडौं । नेकपा एकीकृत समाजवादीका सम्मानीत नेता झलनाथ खनालले माओवादी केन्द्रसँग तत्काल एकताको सम्भावना नरहेको प्रष्ट्याएका छन् ।

माओवादीका अध्यक्ष प्रचण्डले सोमबार माधव नेपालसँगको भेटमा पार्टी एकताको प्रस्ताव राखेको चर्चाकाबीच नेता खनालले तत्काल सम्भावना नभएको जिकिर गरे ।

उनले भने, ‘हाम्रो पार्टीले भर्खरै महाधिवेशन गरेको छ । कतिपय कमिटी नै बनेको छैन । माओवादीसँग एकताको विषयमा छलफल भएको छैन ।’

उनले प्रचण्डबाट एकताको प्रस्ताव आउनु स्वभाविक भएको बताए ।

अहिले एउटै मोर्चामा हुनुहुन्छ, माओवादीसँग विचार मिल्यो भने एकताको तहमा पनि पुग्नसक्छ ? भन्ने नेपाल प्रेसको जिज्ञासामा उनले भने, ‘सबै कुरा मिल्यो भने त बेर पनि लाइँदैन । तर, सबै कुरा मिल्छ मिल्दैन । अहिले भन्न सकिँदैन ।’

उनले कम्युनिष्ट एकताको प्रयत्न गर्ने बताए ।

उनले थपे, ‘एमालेभन्दा बाहेकका र एमालेभित्रका पनि साँच्चैका कम्युनिष्टहरु त एकताबद्ध हुनैपर्छ । हामी बृहत्त् एकताको प्रयत्न गर्छौँ । तर, आज भोलिकै कुरा होइन ।’ उनले अहिले समाजवादी मोर्चामा भएकाहरुबीच कार्यगत एकता बलियो बनाउँदै जानुपर्ने बताए ।

प्रचण्डले अध्यक्षलाई प्रधानमन्त्री बनाइदिने शर्तसहित एकताको प्रस्ताव राख्नुभएको चर्चा छ नि ? भन्नेबारे उनले थपे, ‘अब सडकमा आएपछि चाहिँ प्रधानमन्त्री बनाउने, अहिलेसम्म के हेरेर बस्या त ? प्रधानमन्त्री बनाउने नबनाउने म जान्दिनँ । यो भन्या छलछाम र षड्यन्त्रको कुराहरु हुन् । यो प्रधानमन्त्रीतिर म लाग्दिनँ । त्यो प्रस्तावबारे थाहा पनि छैन ।’

समाजवादी क्रान्तिको लागि जति गहिराइमा जान परेपनि आफू तयार रहेको बताए । उनले एमालेभित्र पनि व्यापक उथलपुथल हुन बाँकी रहेको सुनाए ।

उनले थपे, ‘एमालेभित्र पनि अब व्यापक उथलपुथल हुन जरुरी छ । त्यो पार्टी पुनर्गठन भएर ओलीभन्दा अर्कोको नेतृत्व आउनुपर्छ । या त्यो पार्टी विभाजित हुनुपर्छ ।’ भनेपछि एमालेभित्र तत्काल उथलपुथलको सम्भावना देख्नुहुन्छ ? भन्ने जिज्ञासामा भने, ‘तत्काल होइन, क्रमशः ।’

माओवादीमा उपमहासचिव जनार्दन शर्माले नेतृत्व छाड्न सुुझाव दिएपछि प्रचण्डले अन्य दलसँग पार्टी एकताको गृहकार्य गरिरहेका छन् । तर, सोमबारको भेटमा प्रचण्डले माधव नेपालसँग पार्टी एकताको प्रस्ताव राखेपछि तत्काल त्यो पक्षमा नरहेको उनी निकट एक नेताले बताए ।

ती नेताले भने, ‘प्रचण्डजीसँग भेट हुनु स्वभाविक हो । मोर्चादेखि एकताको विषयसम्म छलफल भएका हुन् । तर, बाहिर आएरजस्तो होइन ।’

 

काठमाडौं । महाधिवेशन सकिएको एक महिनाभन्दा बढी भइसक्दा पनि नेकपा एकीकृत समाजवादीले पदाधिकारी छान्न सकेको छैन । पदाधिकारी टुंगो लगाउन पटकपटक शीर्ष नेताबीच छलफल चल्यो, तर कुरा मिलेको छैन ।

असार १६ देखि २० सम्म प्रज्ञा भवन कमलादीमा सम्पन्न १०औं महाधिवेशनले अध्यक्षमा माधवकुमार नेपाल, सम्मानित नेतामा झलनाथ खनाल र महासचिवमा घनश्याम भुसाललाई निर्वाचित गर्दै ९३ सदस्यीय केन्द्रीय कमिटीको नामावली घोषणा गरेको थियो । बाँकी पदाधिकारी र केन्द्रीय सदस्य चयन गर्ने अख्तियारी सोही कमिटीलाई दिने प्रस्ताव महाधिवेशनको हलबाट पारित भएको थियो ।

महाधिवेशन सम्पन्न भएको एक महिनापछि ३४४ सदस्यीय केन्द्रीय कमिटी त घोषणा गरियो, तर केन्द्रीय पदाधिकारी, सल्लाहकार, आयोग, विभाग र विभिन्न तहका इञ्चार्जको टुंगो लाग्न सकेको छैन ।

‘व्यापक र गम्भीरतापूर्वक गृहकार्य गर्नुपर्ने भएकाले पदाधिकारी टुंगो नलगाइएको हो’, महासचिव घनश्याम भुसाल भन्छन्, ‘पदाधिकारी टुंगो लाग्दा अरुले पनि आहा भन्नेखालको होस् भनेर हामीले हतार नगरेको ।’

उनका अनुसार अब बस्ने केन्द्रीय कमिटीको बैठकले पारित गर्ने गरी पदाधिकारीको नामावली तयार हुँदैछ । त्यसअघि पदाधिकारीका आकांक्षीबीचमै छलफल चलिरहेको छ, तर पदाधिकारी टुंगो लगाउने कुरामा विलम्ब हुनुका पछाडि केन्द्रीय सदस्य चयनमा भएको विवाद मुख्य कारण हो । शम्भु श्रेष्ठ, कुसुम कार्की, नागेन्द्र यादवलगायत केन्द्रीय सदस्यहरु यस पटक गुटको कोटामा परेनन् । तीमध्ये यादव एमालेमा प्रवेश गरिसकेका छन् भने कार्कीले नेकपा एस परित्याग गरेका छन् ।

केन्द्रीय सदस्यको लिस्ट माधव नेपाल, झलनाथ खनाल र घनश्याम भुसालले तयार पारेपछि काटकुट पार्ने क्रममा साविकका केन्द्रीय सदस्यहरुसमेत छुटे भने वडा कमिटी हैसियतकाहरु गुटका कारण केन्द्रीय सदस्य बने ।

‘भौगोलिक आवश्यकता, कार्यक्षमता र योग्यतालाई मापदण्ड बनाइनुपर्ने थियो’, पार्टीका नेता ताज मियाँ भन्छन्, ‘नेताहरु व्यक्ति छान्ने होडबाजीमा लाग्दा भद्रगोल भयो ।’

केन्द्रीय सदस्य चयनको विषयलाई लिएर उत्पन्न भएको व्यापक असन्तुष्टिलाई हल गरेरमात्रै बाँकी काम अगाडि बढाउनुपर्ने कारण पदाधिकारी टुंगो लाग्न अझै समय लाग्ने उनको भनाइ छ ।

‘अब नेताले खल्तीको नाम ल्याएर कोही पनि पदाधिकारी हुँदैनन्’, मियाँ भन्छन्, ‘केन्द्रीय कमिटीको बैठकमा व्यापक छलफल गरेर, उस्तै परे मतदानमै गएर पदाधिकारीको टुंगो लाग्छ ।’

पदाधिकारी टुंगो लागेपछि मात्रै सल्लाहकार, आयोग, विभाग र इञ्चार्जहरु तोकिने महासचिव भुसालको भनाइ छ । यसअघि विभागका नयाँ प्रमुख र इञ्चार्जहरु नतोकिँदासम्मका लागि अघिल्लो केन्द्रीय कमिटीले दिएको जिम्मेवारी नै यथावत रहने अन्तरपार्टी निर्देशन (अपानि) जारी भइसकेको छ ।

पदाधिकारीमा हानाथाप

महाधिवेशनले पारित गरेको विधानमा २१ पदाधिकारीको व्यवस्था छ, तर सयभन्दा बढी आकांक्षी हुँदा टुंगो लगाउन अप्ठेरो भएको एक नेता बताउँछन् ।

टुंगो लाग्न बाँकी पदाधिकारीमा एक वरिष्ठ उपाध्यक्ष, ६ जना उपाध्यक्ष, चार उपमहासचिव र ७ सचिव हुन् । यसबाहेक विधानमा आवश्यकताअनुसार वरिष्ठ नेता तोक्न सकिने भनिएको छ । उक्त पदको संख्या तोकिएको छैन ।

वामदेव गौतम, भीम रावल वा त्यो तहका नेताले पार्टी प्रवेश गरेमा उनीहरुको व्यवस्थापनका निम्ति उक्त पद राखिएको हो । सम्भवतः वामदेव सो पदमा चाँडै नै मनोनीत हुनेगरी नेकपा एसमा सामेल हुनेछन् ।

वरिष्ठ उपाध्यक्षका निम्ति राजेन्द्र पाण्डे र वेदुराम भुसालबीच महाधिवेशनकै समयदेखि रस्साकस्सी चल्दै आएको छ । यदि महाधिवेशनमा मतदान भएको भए उक्त पदमा पाण्डेले सहजै जीत हासिल गर्ने अवस्था थियो ।

अध्यक्षमा माधव नेपाल र घनश्याम भुसाल मैदानमा हुँदा वरिष्ठ उपाध्यक्षका दुबै दावेदार माधव पक्षका थिए । अहिले अध्यक्ष नेपाललाई मिलाउन सबभन्दा जटिल भएको विषय नै वरिष्ठ उपाध्यक्षमा हो ।

वरिष्ठ उपाध्यक्षका निम्ति पाण्डे र भुसालबीच चलिरहेको रस्साकस्सीका बीचमा अर्का दावेदार देखिएका छन्, ललित बस्नेत । उनले पहिला ज्येष्ठ कम्युनिष्ट मञ्चमा बसेर काम गर्ने रुचि देखाएका थिए, तर महाधिवेशन हलबाटै पारित गरिएको ९३ सदस्यीय केन्द्रीय कमिटीमा नाम परेपछि अहिले वरिष्ठ उपाध्यक्षको दाबी गर्ने अवस्थामा पुगे ।

६ उपाध्यक्षका लागि १० भन्दा बढीको दाबी छ । त्यसमध्ये महाधिवेशन चलिरहेकै अवस्थामा अघिल्लो कमिटीमा सचिव रहेकी रामकुमारी झाँक्रीलाई उपाध्यक्ष बनाइने चर्चा नेताबीच चलेको थियो, तर रामकुमारी उपाध्यक्ष हुँदा अखिल पृष्ठभूमिबाट आएका, रामकुमारीभन्दा सिनियर तत्कालीन सचिव राजेन्द्र राईलाई कुन पदमा व्यवस्थापन गर्ने भन्ने अन्योल उत्पन्न भएको थियो ।

उपाध्यक्षका निम्ति घनेन्द्र बस्नेत, धर्मनाथप्रसाद साह, केशवलाल श्रेष्ठ, विरोध खतिवडा, प्रकाश ज्वाला, गंगालाल तुलाधर, प्रमेश हमाल, जयन्ती राई, बलराम बास्कोटा, हरि पराजुलीसहितका नेताको दाबी छ ।

अघिल्लो कमिटीका उपमहासचिव ज्वाला र तुलाधर उपाध्यक्ष भएमा उक्त पदका निम्ति दुई नयाँ अनुहारको व्यवस्थापन हुने अवस्था छ । अघिल्लो कमिटीका सचिवहरु जीवनराम श्रेष्ठ, राजेन्द्र राई, नागेन्द्र चौधरीमध्येबाट उपमहासचिव हुने अवस्था रहन्छ । महासचिवमा दाबी गरेका जगन्नाथ खतिवडा उपमहासचिवमै दोहोरिने सम्भावना छ ।

व्यक्ति चयनमा वरिष्ठ उपाध्यक्षपछि सबभन्दा जटिल बनेको विषय हो, सचिवको । ७ सचिवका निम्ति ५० भन्दा बढी दावेदार छन् । त्यसमध्ये विद्यार्थी नेता सुदेश पराजुलीदेखि सुनसरीका पुराना नेता धर्मराज निरौलासम्म छन् । सचिवको दाबी गर्नेमा मोरङका महेश रेग्मी, सुनसरीका केशव विष्ट, धनुषाका श्रीप्रसाद साह, हेटौंडाकी मेयर मीना लामा, पोखराका मेयर धनराज आचार्य, सुदूरपश्चिम प्रदेशका पूर्वमुख्यमन्त्री दीर्घ सोडारी, दिलकुमारी पन्त (दिलु), मदनकुमारी शाह (गरिमा) सहितका छन् ।

अन्य पदको व्यवस्थापन सहज भए पनि वरिष्ठ उपाध्यक्ष र सचिव पदका निम्ति केन्द्रीय कमिटीको बैठकमा मतदान हुने सम्भावना रहेको एक नेताले बताए ।

काठमाडौं । नेकपा एकीकृत समाजवादीले महाधिवेशन भएको एक महिनापछि पार्टीको केन्द्रीय कमिटीलाई पूर्णता दिएको छ । आकांक्षी धेरै भएपछि विधानविपरीत सदस्य संख्या बढाएर हिजो बसेको बैठकले केन्द्रीय कमिटीलाई पूर्णता दियो ।

असार १६ गतेदेखि पाँच दिनसम्म चलेको महाधिवेशनले तीन पदाधिकारीसहित ९३ सदस्यीय केन्द्रीय कमिटी घोषणा गरेको थियो । त्यसबेलामा साविक पोलिटब्युरो कमिटीमा रहेकाहरूलाई केन्द्रीय सदस्य घोषणा गर्दा प्रेम आले अटाएका थिएनन् ।

नेकपा एसमा प्रत्यक्ष निर्वाचित सांसद १० मध्ये आले पनि एक हुन्, तर हिजो २९९ बाट ३४४ सदस्यीय केन्द्रीय कमिटी बनाउँदा पनि आले कमिटीमा अटाएनन् ।

पछिल्लो समय नेतृत्वप्रति असन्तुष्ट आले पार्टीको १०औं महाधिवेशनमा सहभागी नै भएनन् । काठमाडौंमा महाधिवेशन चलिरहँदा उनी भारत भ्रमणमा थिए ।

नेकपा एसका उपाध्यक्ष राजेन्द्र पाण्डेले महाधिवेशनमा उपस्थित नभएका कसैलाई पनि केन्द्रीय कमिटीमा नल्याएको बताए । उनले अरु कुनै कारण नरहेको प्रष्ट्याए ।

तर, आले फागुन २१ गते एमाले माओवादी गठबन्धनको पक्षमा पार्टी उभिएपछि नेतृत्वदेखि रुष्ट रहेको एक पदाधिकारीले बताए ।

ती पदाधिकारीले भने, ‘फागुन २१ गते एमालेसँगको गठबन्धनको विरोधी हुनुहुन्थ्यो, त्यो गठबन्धनमा जानै हुँदैनथ्यो भन्ने उहाँको मत थियो । राजेन्द्र पाण्डेजीले खुलैरै विरोध गर्नुभएको थियो । उहाँको पनि त्यही लाइन थियो । त्यसैले उहाँ असन्तुष्ट देखिनुभएको छ ।’

फागुन २१ को गठबन्धनमै मिसिएका कारणले अहिले पार्टी सत्ता बाहिर पुग्ने स्थिति बनेको उनको बुझाइ रहेको ती नेताको दाबी छ ।

ती नेताले थपे, ‘त्यही (कांग्रेससँगको) गठबन्धनमा हुँदाहुँदै हाम्रै कारणले ओलीलाई कांग्रेससँग जोडाइदिने काम गर्‍यो । त्यो गल्ती भयो भन्ने उहाँको मत थियो । उहाँको विचार ठीक हो भन्नेमा अहिलेको परिस्थितिले देखाएको छ ।’

पार्टी नेतृत्वसँग असन्तुष्ट देखिए पनि पार्टी छाड्ने मूडमा भने नरहेको ती नेताको दाबी छ । महाधिवेशनको हलले ९३ जना केन्द्रीय सदस्य घोषणा गर्दा आफ्नो नाम नपरेपछि आलेले नेकपा एससँग आफ्नो कुनै साइनो नभएको मिडियामा अभिव्यक्ति दिएका थिए, तर पार्टी संसदीय दलको निर्णय भने मान्दै आएका छन् ।

कैलाली । सुदूरपश्चिम प्रदेशका मुख्यमन्त्री दीर्घ बहादुर सोडारीले राजीनामा दिएका छन् ।

२० असारमा अल्पमतमा परेका मुख्यमन्त्री सोडारीले आज विश्वासको मत लिन संसद् आह्वान गरेका थिए । उक्त संसद्मा सम्बोधन गरेर उनले राजीनामा दिएका हुन् ।

संसद्मा मार्ग प्रशस्त गरेको घोषणा गरेर मुख्यमन्त्री सोडारी राजीनामा पत्र बुझाउन प्रदेश प्रमुख कार्यालय पुगेका छन् ।

 

 

काठमाडौं । नेकपा एसको केन्द्रीय कमिटी बैठक आज बस्दै छ । बैठकले केन्द्रीय कमिटीलाई पूर्णता दिने बताइएको छ ।

विधानअनुसार बनाइएको ‘क्लष्टर’ का आधारमा कार्यदलले केन्द्रीय सदस्यको नाम प्रस्ताव गर्ने बैठकमा प्रस्तावित ती नामलाई केन्द्रीय कमिटीले अनुमोदन गर्ने जनाइएको छ ।

पार्टीमा दुई सय ९९ सदस्यीय कार्यसमिति तथा २१ पदाधिकारीको व्यवस्था गरिएको छ । हाल अध्यक्ष, सम्मानित नेता र महासचिवसहित तीन पदाधिकारी, ९० केन्द्रीय सदस्य रहेको केन्द्रीय कमिटीमा दुई सय ६ केन्द्रीय सदस्य पद रिक्त छ ।

अध्यक्ष माधव नेपाल संयोजक र सम्मानित नेता झलनाथ खनाल र महासचिव घनश्याम भुसाल सदस्य रहेको कार्यदलले केन्द्रीय सदस्य छान्ने जिम्मेवारी पाएको थियो ।

सातै प्रदेशबाट आएका नामहरूमध्ये तीन नेताले मूल्याङ्कन गर्दै नामावली तयार गरेको बताइन्छ ।

काठमाडौँ । नेपाल कम्युनिष्ट पार्टी (एकीकृत समाजवादी) को केन्द्रीय कमिटी बैठक भाेलि केन्द्रीय कार्यालयमा बस्ने भएको छ ।

पार्टी अध्यक्ष एवं पूर्वप्रधानमन्त्री माधवकुमार नेपालको संयोजकत्वमा गठित कार्यदलले सम्पन्न गरेको कार्यसम्पादनको समीक्षा तथा केन्द्रीय कमिटीलाई पूर्णता दिन बैठक आह्वान गरिएको केन्द्रीय सदस्य सोमप्रसाद पाण्डेयले जानकारी दिए ।

विधानअनुसार बनाइएको ‘क्लष्टर’का आधारमा कार्यदलले केन्द्रीय सदस्यको नाम प्रस्ताव गर्ने बैठकमा प्रस्तावित ती नामलाई केन्द्रीय कमिटीले अनुमोदन गर्ने जनाइएको छ ।

पार्टीमा दुई सय ९९ सदस्यीय कार्यसमिति तथा २१ पदाधिकारीको व्यवस्था गरिएको छ । हाल अध्यक्ष, सम्मानित नेता र महासचिवसहित तीन पदाधिकारी, ९० केन्द्रीय सदस्य रहेको केन्द्रीय कमिटीमा दुई सय छ केन्द्रीय सदस्य पद रिक्त छ ।

सम्मनित नेता झलनाथ खनाल र महासचिव घनश्याम भुसाल सदस्य रहेको कार्यदललाई पार्टीका सातै प्रदेशले केन्द्रमा पठाएको सिफारिसका आधारमा नेताहरूको मूल्याङ्कन गरी केन्द्रीय सदस्यको नामावली आज साँझसम्म तयार गर्ने समयसीमा छ ।

पार्टीमा केन्द्रीय सदस्यका लागि आकाङ्क्षी धेरै भएपछि नेताहरुको योगदान, कार्यक्षमता तथा भूगोल, क्षेत्र तथा सन्तुलन मिलाएर मनोनित गरिने नेता पाण्डेयले जानकारी दिए । बागमतीबाट सबैभन्दा धेरै र गण्डकी प्रदेशमा सबैभन्दा थोरै केन्द्रीय सदस्य मनोनित गरिने जनाइएको छ । केन्द्रीय कमिटीले पूर्णता पाएपछि पदाधिकारी छनोट गरिने छ ।

मुलुकको समसामयिक राजनीतिक विषयवस्तुमा समीक्षा गर्ने बैठकले पार्टीको भावी कार्ययोजनाबारे छलफल गर्ने जनाइएको छ ।

कैलाली । सुदूरपश्चिम प्रदेशका मुख्यमन्त्री दीर्घ सोडारीले यही शुक्रबार विश्वासको मत लिने भएका छन् । उनले आज प्रदेशसभा सचिवालयमा विश्वासको मत लिने उद्देश्यले बैठक आह्वान गर्न भन्दै पत्र पठाएका छन् ।

मुख्यमन्त्री तथा मन्त्रिपरिषद् कार्यालयबाट आएको पत्रअनुसार शुक्रबार साँझ ४ बजे प्रदेशसभा बैठक आह्वान गरिएको प्रदेशसभा सचिवालयका सचिव देवबहादुर बोगटीले जानकारी दिए ।

असार २० गते एमालेले समर्थन फिर्ता लिएपछि मुख्यमन्त्री सोडारी अल्पमतमा परेका थिए । उनले साउन १८ गतेभित्र विश्वासको मत लिनुपर्ने वा राजीनामा दिनुपर्ने संवैधानिक व्यवस्था छ ।
मुख्यमन्त्री सोडारीले विश्वासको मत लिने उद्देश्यले बैठक आह्वान गरिएको भए पनि उनले बैठकमा सम्बोधन गरेर राजीनामा दिने सम्भावना रहेको स्रोतले जनायो ।

मुख्यमन्त्री सोडारी अल्पमतमा परेपछि सरकारले असार १ गते ल्याएको बजेट पनि पारित हुन सकेको छैन । बजेट पारित नहुँदा अहिले प्रदेश सरकार बजेट शून्यतामा पुगेको छ ।

काठमाडौं । नेकपा एकीकृत समाजवादीको केन्द्रीय कमिटी बैठकअघि नेताहरू आन्तरिक छलफलमा जुटेका छन्।

आज बस्ने बैठकले केन्द्रीय सदस्यको टुंगो लगाउने तयारी भएकाले बैठकअघि नेताहरू छलफलमा जुटेका हुन्।

यसअघि सोमबारका लागि तय गरिएको बैठक तयारी अपुग भएको भन्दै आजलाई सारिएको थियो।

नेता सोमप्रसाद पाण्डेले पार्टीको बैठक केही समयपछि सुरु हुने बताए।

उनले भने, ‘आज केन्द्रीय कमिटीलाई पूर्णता दिने तयारी छ। विधानमा २९९ सदस्यीय कमिटी भनिएको छ। संख्या बढ्दैन विधानअनुसार नै हुन्छ।’

हालै भएको महाधिवेशनले अध्यक्षमा माधव नेपाल, सम्मानित नेतामा झलनाथ खनाल र महासचिवमा घनश्याम भुसाललाई दोहोर्‍याएको थियो। भने ९३ सदस्यीय केन्द्रीय कमिटी छानेको थियो।

पार्टीमा अझै २०६ केन्द्रीय सदस्य पद रिक्त छन्। केन्द्रीय समिति र पदाधिकारीमा धेरै नेताहरू आकांक्षी भएकाले टुंग्याउन सकस परेको छ।

सबै प्रदेशले केन्द्रमा पठाएको सिफारिसका आधारमा नेताहरूको योगदान र क्षमताको मूल्याङ्कन गरी भूगोल, क्षेत्र तथा सन्तुलन मिलाएर मनोनयन गर्ने, कमिटीलाई पूर्णता दिएपछि पदाधिकारी चयन गर्नेलगायत विषयमा छलफल हुनेछ।

कैलाली । सुदूरपश्चिम प्रदेशसभाका ठूला तीन दलले वर्तमान सरकार गैरजिम्मेवार रहेको ठहर गरेका छन् । नेपाली कांग्रेस, नेकपा एमाले र नागरिक उन्मुक्ति पार्टीले सामूहिक वक्तव्य जारी गर्दै सरकारले संसदलाई बन्दी बनाएको आरोप लगाए । प्रदेशमा विपद् आउँदा पनि सरकारले चासो नदिएको प्रमुख तीन दलको आरोप छ ।

कांग्रेस प्रमुख सचेतक विक्रमसिंह धामी, एमाले संसदीय दलका नेता राजेन्द्रसिंह रावल र नागरिक उन्मुक्ति पार्टीका सांसद रामेश्वर चौधरीले संयुक्त हस्ताक्षर गरेर जारी गरिएको विज्ञप्तिमा सरकारले विशेष अधिवेशन छलेर गैर जिम्मेवार बनेको बताइएको छ ।

‘विपद्को पूर्वतयारीमा प्रदेश सरकार चुक्यो नै त्यसपछिको उद्धार, राहत र पुन:स्थापनाको सवाललाई समेत नजरअन्दाज गर्दा आम नागरिक अभिभावकविहीनताक अवस्थामा छन् । यस्तो विषम परिस्थितिको बेवास्ता गर्दै प्रदेश सरकारले हरेक दिन प्रतिगामी कदम चाल्दै जनताका समस्याहरूको छलफल गर्ने थलो अर्थात् सदनलाई बन्दी बनाएको छ’ तीन दलले हस्ताक्षर गरेको विज्ञप्तिमा उल्लेख गरिएको छ ।

अल्पमत र नैतिकता गुमाइसकेको भन्दै सरकारले आफ्ना केही निहित स्वार्थपूर्तिका लागि हठात् सदन अन्त्यको सिफारिस गरेको विज्ञप्तिमा भनिएको छ ।

‘विशेष अधिवेशनमा सरकारको अनुपस्थितिले ऊ जनताप्रति कति गैर जिम्मेवार छ भन्ने कुरा छर्लङ्ग भएको छ । संसदीय व्यवस्थाको उपहास गर्दै सदन छल्ने सरकारको यो कदम प्रतिस्पर्धा र पहलकदमी विरुद्धको क्रियाकलाप हो । विपद्को दुःखद अवस्थामा आम नागरिकको घरदैलोमा नजानु, हठात् सदन अन्त्यको सिफारिस गर्नु तथा विशेष अधिवेशन फेस नगर्ने लगायतका घोर अलोकतान्त्रिक क्रियाकलापको हामी भर्त्सना गर्दछौँ’, विज्ञप्तिमा भनिएको छ, ‘विशेष अधिवेशनको आजको बैठकमा सरकारको उपस्थिति नदेखिएपछि सदनको मूल ढोकामा ‘दिउँसै टर्च बालेर सरकार खोज्न’ हामी बाध्य भएका छौँ । अतः अल्पमतमा परी नैतिकता गुमाइसकेको सरकारलाई राजीनामा गरी मार्ग प्रशस्त गर्नका लागि पुनः आग्रह गर्दछौँ ।’

२० गतेदेखि अल्पमतमा परेका मुख्यमन्त्री दीर्घ सोडारीले अहिलेसम्म विश्वासको मत लिने मिति निर्धारण गरेका छैनन् । १८ गतेसम्म विश्वासको मत लिने वा राजीनामा दिने दुई विकल्प उनीसँग छ ।

काठमाडौं । नेकपा एकीकृत समाजवादीले केन्द्रीय कमिटीलाई पूर्णता दिने भन्दै आजको लागि बोलाइएको बैठक सारेको छ । आज बस्ने भनिएको बैठक बुधवारका लागि सारिएको प्रवक्ता जगन्नाथ खतिवडाले बताए ।

बैठकको तयारी नपुगेको भन्दै सारिएको उनको भनाइ छ ।

हालै भएको महाधिवेशनले अध्यक्षमा माधवकुमार नेपाल, सम्मानित नेतामा झलनाथ खनाल र महासचिवमा घनश्याम भुसाललाई दोहोर्याउँदै ९३ सदस्यीय केन्द्रीय कमिटी घोषणा गरेको थियो ।

अहिले २०६ केन्द्रीय सदस्य पद रिक्त छन् । आकांक्षी धेरै हुँदा पार्टीले तयार पारेको मापदण्ड अनुसार केन्द्रीय सदस्य छान्न नसकेपछि बैठक सारिएको बुझिएको छ ।

सबै प्रदेशले केन्द्रमा पठाएको सिफारिसका आधारमा नेताहरूको योगदान र क्षमताको मूल्याङ्कन गरी भूगोल, क्षेत्र तथा सन्तुलन मिलाएर कमिटीलाई पूर्णता दिएपछि मात्रै पदाधिकारी चयन गर्ने तयारी छ।

कैलाली । सुदूरपश्चिम प्रदेशका मुख्यमन्त्री दीर्घ सोडारीले भूमि, व्यवस्था कृषि तथा सहकारी मन्त्री टीका थापालाई बर्खास्त गरेका छन् ।

मुख्यमन्त्री निकट स्रोतका अनुसार सरकारले बैठकका सहभागी नहुने नीति लिएका बेला सहभागी भएको भन्दै उनलाई पदबाट हटाइएको हो ।

यस अघिको बैठकमा पनि उनी सहभागी भएकी थिइन् । आजको बैठकमा पनि मुख्यमन्त्री सोडारीले उनलाई सहभागी नहुन भनेका थिए ।

सरकारको तर्फबाट कोही पनि उपस्थित नभएर संसद् अगाडि नबढाउने मुख्यमन्त्री सोडारीको योजना रहको थियो तर आफूले जनताको आवाज उठान संसद् आएको उनले बताइन् ।

संसद्मा उपस्थित भएको भन्दै आफूलाई पदबाट हटाएको उनले बताइन् ।

काठमाडौं । नेपाल कम्युनिष्ट पार्टी एकीकृत समाजवादीको केन्द्रीय कमिटी बैठक सोमबार बस्ने भएको छ । पार्टी केन्द्रीय कार्यालय आलोकनगरमा सोमबार १:०० बजे बस्ने बैठकले केन्द्रीय सदस्य टुङ्गो लगाउने केन्द्रीय सदस्य आलोक रायमाझीले राससलाई जानकारी दिए ।

पार्टीमा २०६ केन्द्रीय सदस्य पद रिक्त छन् । हालै भएको महाधिवेशनले अध्यक्षमा नेपाल, सम्मानित नेतामा झलनाथ खनाल र महासचिवमा घनश्याम भुसाललाई दोहोर्‍याएको थियो । भने ९३ सदस्यीय केन्द्रीय कमिटी छानेको थियो । केन्द्रीय समिति र पदाधिकारीमा धेरै नेताहरू आकांक्षी भएकाले टुंग्याउन सकस परेको छ ।

सबै प्रदेशले केन्द्रमा पठाएको सिफारिसका आधारमा नेताहरूको योगदान र क्षमताको मूल्याङ्कन गरी भूगोल, क्षेत्र तथा सन्तुलन मिलाएर मनोनयन गर्ने, कमिटीलाई पूर्णता दिएपछि पदाधिकारी चयन गर्नेलगायत विषयमा छलफल हुने नेता रायमाझीले बताए ।

काठमाडौं । नेकपा एकीकृत समाजवादीको केन्द्रीय कमिटी बैठक सुरू भएको छ । पार्टीको केन्द्रीय कार्यालय आलोकनगरमा अहिले बैठक जारी छ ।

बैठकको सुरुआतमा अध्यक्ष माधव नेपालले पछिल्लो समसामयिक राजनीतिक घटनाक्रमबारे ब्रिफिङ गरेका छन् ।

उनले भने, ‘हामीले थप प्रष्ट मापदण्ड तयार गर्नुपर्ने हुन्छ । हामीले एउटा मापमण्ड बनाइसकेका छौं त्यसले पुगिरहेको छैन । त्यसैले त्यसमा अरु कुरा जोडेर भएपनि मापदण्डहरु परिमार्जन गर्न आवश्यक छ । यो विषयमा पनि छलफल गछौं । सहमतिको साथ हुन सकेको अवस्थामा हामी नाम ल्याउँछौं होला तर त्यो परिस्थिती बनिरहेको छैन ।’

उनले प्रदेश अध्यक्ष र इन्चार्जहरूले छलफल र परामर्श आफ्नो प्रदेशमा सहमतिको प्रयास गर्नुपर्नेमा पनि जोड दिए ।

आजको बैठकले केन्द्रीय कमिटीलाई पूर्णता दिन कार्यविधि तथा मापदण्ड बनाउने प्रवक्ता जगन्नाथ खतिवडाले बताए ।

केन्द्रीय कमिटीलाई पूर्णता दिएपछि मात्रै पदाधिकारी चयन गर्ने तयारी छ ।

केन्द्रीय सदस्यका लागि सबै प्रदेशले केन्द्रमा पठाएको सिफारिसका आधारमा नेताहरूको योगदान र क्षमताको मूल्यांकन गरी सन्तुलन मिलाएर मनोनयन गर्ने तयारी छ ।

पार्टीमा २०६ केन्द्रीय सदस्य पद रिक्त छन् । सबै जिल्लाको पहुँच केन्द्रीय नेतृत्वमा पुर्‍याउन तथा भौगोलिक सन्तुलन कायम गर्न प्रत्येक जिल्लाबाट कम्तीमा एकजना सदस्यको प्रतिनिधित्व सुनिश्चित गरिएको छ ।

समावेशीकरणको सिद्धान्तअनुसार महिला र खुला समूह निर्धारण गरी २५ देखि ४५ वर्षको उमेर समूह र खुला उमेर समूह निर्धारण गरिएको छ । केन्द्रीय समिति र पदाधिकारीमा धेरै नेताहरू आकांक्षी भएकाले टुंग्याउन सकस परेको छ ।

हालै भएको महाधिवेशनले अध्यक्षमा नेपाल, सम्मानित नेतामा झलनाथ खनाल र महासचिवमा घनश्याम भुसाललाई दोहोर्‍याएको थियो । भने ९३ सदस्यीय केन्द्रीय कमिटी छानेको थियो।

कैलाली । प्रदेश प्रमुख नजिर मियाँले आह्वान गरेको सुदूरपश्चिम प्रदेशको विशेष अधिवेशनमा नेकपा एकीकृत समाजवादीका कुनै पनि सांसद उपस्थित भएनन् ।

४ गते प्रदेश प्रमुख मियाँसमक्ष २१ जना सांसदहरूले विपद्का विषयमा सरकारलाई निर्देशन दिन आवश्यक रहेको भन्दै अधिवेशन आह्वान गर्न लिखित आग्रह गरेका थिए ।

प्रदेश प्रमुखले प्रदेशसभाको अधिवेशन चालू नरहेको वा बैठक स्थगित भएको अवस्थामा अधिवेशन वा बैठक बोलाउन वाञ्छनीय छ भनी प्रदेश सभाको सम्पूर्ण सदस्य सङ्ख्याको एक चौथाइ सदस्यहरूले लिखित अनुरोध गरेमा त्यस्तो अधिवेशन वा बैठक बस्ने मिति र समय तोक्ने संविधानको धारा १८३ मा व्यवस्था रहेको छ ।

उक्त व्यवस्था अनुसार प्रदेश प्रमुख मियाँले आज २ बजेको लागि बैठक आह्वान गरेका थिए । प्रदेश प्रमुखले तोकेको समय र मितिमा बैठक आह्वान गरे पनि नेकपा एकीकृत समाजवादीका कोही पनि सांसद बैठकमा उपस्थित भएनन् । सुदूरपश्चिममा नेकपा एसका चार सांसद छन् । संसदीय दलका नेता दीर्घ सोडारी मुख्यमन्त्री छन् भने प्रमुख सचेतक माया पन्त उद्योग वाणिज्य पर्यटन तथा संस्कृति मन्त्रालयको जिम्मेवारीमा छन् ।

ती बाहेक अन्य दुई सांसद प्रकाश रावल र नरेश शाही पनि बैठकका उपस्थित थिएनन् । मुख्यमन्त्री सोडारीले आफ्ना केही सांसदहरूलाई बैठकमा सरकार सहभागी नहुने सन्देश दिएका थिए ।

मुख्यमन्त्री सोडारीको सोही योजना अनुसार सोडारी र पन्त बैठकका आएनन् । अन्य दुई नेताले भने प्राविधिक कारणले आफू संसद्मा उपस्थित हुन नपाएको जनाएका छन् ।

‘म उपचारको निम्ति काठमाडौँ छु त्यो भएको हुँदा बैठकमा जान पाइन’ नेकपा एसका उपनेता रावलले भने ‘ बैठकमा उपस्थित हुने वा नहुने भन्ने विषयमा त्यस्तो विमर्ष भएको होइन ।’

मुख्यमन्त्री सोडारीले सरकारका मन्त्रीहरूलाई भने बैठकका उपस्थित नहुने बताएका थिए । बजेट पारित गर्न नसकेपछि सरकारले अध्यादेश ल्याउने तयारी गरेको थियो तर, त्यो भन्दा पहिले नै एक चौथाइ सांसदले लिखित रूपमा प्रदेश प्रमुखलाई बैठक आह्वान गर्न भनेर बैठक आह्वान भएपछि अध्यादेश ल्याउने मुख्यमन्त्रीको तयारीमा ब्रेक लागेको थियो ।

मुख्यमन्त्री सोडारी त्यसपछि रुष्ट भएका थिए । आजको बैठकमा पनि उनले सहभागी नहुने बताएका थिए । हिजोको कार्य व्यवस्था परामर्श समितिमा पनि सरकारको तर्फबाट कोही सहभागी भएका थिएनन् ।

सरकारका कोही पनि बैठकमा सहभागी नहुन भनिए पनि कृषि तथा भूमि सुधार मन्त्री टिका थापा बैठकमा सहभागी भएकी थिइन् । उनी नागरिक उन्मुक्ति पार्टीबाट मन्त्री भएकी हुन् । नागरिक उन्मुक्ति पार्टी संसदीय दलका नेता घनश्याम चौधरीले पनि उनलाई बैठकमा आउन भनेका थिए ।

‘मैले पनि उहाँलाई प्रदेश सभा बैठकमा आउन भनेको थिए ’ संसदीय दलका नेता चौधरीले भने ‘बैठकमा नआउने कुरा ठिक होइन भन्ने उहाँलाई पनि लागेको होला उहाँ आउनु भयो ।’

मन्त्री थापाले आफूलाई केही दिन पहिले मुख्यमन्त्री सोडारीले केही दिन काठमाडौँमै बस्न भनेको तर, प्रदेश सभा बैठक आह्वान भएपछि बैठकका सहभागी भएको बताइन् । उनले संसदीय दलको नेताले पनि आफूलाई बैठकमा आउन भनेको बताइन् ।

‘मुख्यमन्त्रीले केही दिन पहिले काठमाडौँ हुँदा केही दिन उतै बस्नुहोला भन्नु भएको थियो त्यो बेला कुरा प्रस्ट भन्नुभएन आज बैठकका अन्य कुनै पनि मन्त्री उपस्थित हुनुहुन्थेन’ उनले भनिन्, ‘प्रदेश सभा बैठक आह्वान भएपछि म गएको हो । दलको नेताले पनि खबर गर्नु भएको थियो । ’

सरकारको तर्फबाट एक मन्त्री उपस्थित भएपछि सभामुख भीम भण्डारीले बैठक सुरु गरेका थिए । उनले प्रदेश प्रमुख मियाँले पठाएको पत्र पढेर सुनाएका थिए । त्यस लगत्तै सभामुख भण्डारीले अनिश्चितकालसम्मको लागि बैठक स्थगित भएको जानकारी गराएका थिए ।

काठमाडौं । नेकपा एकीकृत समाजवादीको असार १६ देखि २० गतेसम्म काठमाडौंमा भएको दशौँ राष्ट्रिय महाधिवेशनले सर्वसम्मत नेतृत्व चयन गर्ने नाममा अपूरो कमिटी घोषणा गरेर टुंग्यायो ।

महाधिवेशन सकिएको १० दिनभित्र पार्टीले नयाँ नेतृत्व पाउने भनिएपनि त्यो सफल हुन सकेको छैन । महाधिवेशनले अध्यक्षमा माधव नेपाल, सम्मानित नेतामा झलनाथ खनाल र महासचिवमा घनश्याम भुसाललाई नै दोहोर्‍याएको थियो ।

केन्द्रीय कमिटीलाई पूर्णता दिने म्याण्डेट सचिवालयलाई दिइयो । महाधिवेशनले ९३ सदस्यीय केन्द्रीय कमिटीमात्रै घोषणा गरेको थियो । अहिले नेताहरूलाई नयाँ जिम्मेवारी नतोकेसम्म पुरानै जिम्मेवारी सम्हाल्न भनिएको छ ।

महाधिवेशनलगत्तै बसेको बसेको पहिलो केन्द्रीय कमिटीको बैठकले प्रदेश इन्चार्ज र सचिवहरूसँग केन्द्रीय कमिटी सदस्यको नाम मागेको नेता जीवनराम श्रेष्ठले बताए ।

उनले भने, ‘हामीले सबै प्रदेश र जिल्लाबाट क्लस्टर मिलाएर केन्द्रीय सदस्यका लागि नाम सिफारिस गर्न भनेका छौं । अब केन्द्रीय कमिटीले पूर्णता पाएपछि मात्रै पदाधिकारी चयन प्रक्रियामा जान्छौं ।’

उनले केन्द्रीय सदस्यहरूको नाम आउने क्रममा रहेकाले चाँडै पूर्णता दिने तयारी रहेको बताए । नेकपा एसमा २१ पदाधिकारीसहित २९९ सदस्यीय केन्द्रीय कमिटी बनाउने तयारी छ ।

वरिष्ठ उपाध्यक्षमा राजेन्द्र पाण्डे, बेदुराम भुसाल र प्रमेश हमालको बलियो दाबी छ । त्यसमध्ये पाण्डको सम्भावना रहेको एक नेताले बताए ।

ती नेताले भने, ‘केन्द्रीय सदस्य छानिसकेपछि पूर्ण केन्द्रीय कमिटीले पदाधिकारी चयन गर्ने भनिएको छ । पदाधिकारीमा आकांक्षी धेरै छन्, त्यसैले अझै मिलाउन केही समय लाग्ला ।’

पदाधिकारीमा आकांक्षी धेरै भएकाले पुरानैमा केही हेरफेर गरेर त्यही टीम आउनसक्ने बताइन्छ ।

नेकपा एसमा वरिष्ठसहित ७ उपाध्यक्ष, ४ उपमहासचिव र ७ सचिव चयन गर्नुपर्नेछ । त्यसो त आवश्यकताअनुसार वरिष्ठ नेता पद पनि सिर्जना गर्नसक्ने नेकपा एसको निर्णय छ ।

त्यो पद एमालेबाट डिलमा धकेलिएका भीम रावलको लागि सिर्जना गरिन लागेको चर्चा छ । रावललाई पार्टीमा भित्र्याउनबारे छलफल भइरहेपनि सकारात्मक जवाफ नआएको एक नेताले बताए ।