सिन्धुपाल्चोक । अधिवेशन उद्घाटनको ५ महिना बितिसक्दा पनि नेकपा एमाले बाह्रविसे नगर कमिटीको नेतृत्व चयन हुन सकेको छैन । गएको चैत २८ गते बागमती प्रदेश इञ्चार्ज राजन भट्टराईले नगर अधिवेशनको उद्घाटन गरेका थिए ।
बन्द सत्रमा प्रवेश नै नगरी अधिवेशन स्थगित भएको थियो । ११ स्थानीय तह कमिटीमा नयाँ टीम आएपनि बाह्रविसेको नगरपालिकामा भने दुइ पक्ष बिचको विवादले नयाँ नेतृत्व छनोट हुन नसकेको हो । एमाले सिन्धुपाल्चोकको प्रतिनिधि परिषदको बैठक समेत भदौ ३ गते मेलम्चीमा हुँदैछ ।
बाह्रविसे नगरपालिकामा संगठित सदस्यको विवाद हुँदै आएको छ । नक्कली सदस्य बनाएको भन्दै पूर्वमेयर निमफुञ्जो शेर्पासहितको टीमले एमाले जिल्ला र प्रदेश कार्यालयमा उजुरी हालेको थियो ।
वडा कमिटीको सहमतिबिना नै सदस्यता थपेको भन्दै अध्यक्षहरूले विरोध गरेका छन् । बन्द सत्रमा सहभागी हुने प्रतिनिधि भने छनोट नै भएको छैन ।
‘प्रतिनिधि नै छनोट भएको छैन, बन्द सत्र कसरी हुन्छ र नयाँ नेतृत्व चयन हुन्छ ?’, शेर्पाले प्रश्न गरे ।
बाह्रविसे नगरमा देखिएको समस्या समाधानका लागि एमाले केन्द्रीय सदस्य सरेश नेपाल, प्रदेश सदस्य निमफुञ्जो शेर्पा, जिल्ला कमिटी उप-सचिव सुशिला पाख्रिन र नगर अध्यक्ष ज्ञानेन्द्र राउत रहेको कार्यदल बनाइएको थियो । तर, समाधान गर्न नसकेको पाख्रिनले जानकारी दिइन् ।
एकै पटक ६०० बढी सदस्य थपिए
सिन्धुपाल्चोकको १०औं जिल्ला अधिवेशनसम्ममा बाह्रविसे नगरपालिकाभित्र संगठित सदस्यको संख्या ७६६ थियो । तर, अधिवेशनपछि सदस्य संख्या एकैपटक १३ सय बढी पुगेको सुप्पा श्रेष्ठ बताउँछन् । नगरको नेतृत्व आफ्नो पक्षमा पार्न जिल्ला अध्यक्षको सहमतिमा नक्कली नाम खडा गरेर फारमसमेत नभरेकाहरूको सदस्यता कायम गरिएको श्रेष्ठको आरोप छ ।
‘नक्कली सदस्यता छानबिन गर्न सबैतिर उजुरी दिएका छौं, तर सुनुवाइ भएन । जिल्ला अध्यक्षलाई नयाँ सदस्यहरुले भरेको फाराम हेर्न खोज्दा कार्यालयमा नभएको जवाफ दिनुभयो’, उनले भने ।
वडा नम्बर ३ र ७ बाट नयाँ सदस्य बढी थपिएको भन्दै उनले ६ को भने नयाँ सदस्य नवीकरण र त्यसको शुल्क बुझाए पनि हालसम्म नवीकरण नभएको श्रेष्ठले बताए ।
अधिवेशनमा ढिलाइ र नेताहरुको दबाबले अध्यक्ष नै कांग्रेसमा प्रवेश
लामो समय बन्द सत्र नभएपछि नगरका नेता कार्यकर्तामा निराश देखिएका छन् । सदस्यतामा अनावश्यक दबाब दिएपछि नगर कमिटी-४ का अध्यक्ष कृष्ण न्यौपाने एमाले छाडेर कांग्रेस प्रवेश गरिसकेका छन् । केन्द्रीय नेतृत्व र जिल्लाका नेताहरूले नक्कली संगठित सदस्यको पक्षमा बोल्न अनावश्यक दबाब दिएपछि उनले पार्टि छाडेको न्यौपानेनिकटका एमालेका एक नेताले जानकारी दिए ।
शेर्पालाई घेराबन्दी गर्ने प्रयास
यहाँ पूर्वमेयर एवं प्रदेश सदस्य निमफुञ्जो शेर्पा र गत प्रदेश सभा चुनावमा उठेका डीबी लामाको बेग्लाबेग्लै समूह छ । लामाको समुहलाई जिल्ला इञ्चार्ज सरेश नेपाल, जिल्ला अध्यक्ष होमनारयण श्रेष्ठलगायतको साथ छ ।
साविककै संगठित सदस्य कायम हुँदा शेर्पा समूहको पल्लाभारी हुने भएकाले लामा समूहले प्रदेश र जिल्ला नेतृत्वको सहयोगमा सदस्यतामा आफूखुसी थपेको आरोप लाग्दै आएको छ । शेर्पाले पार्टीविरोधी गतिविधि गरेको भन्दै केही महिनाअघि प्रदेश कमिटीले स्पष्टीकरण समेत सोधेको थियो ।
नगर भित्रका ९ वडामध्ये अधिकांश वडा अध्यक्ष शेर्पा समूहमा छन् । बाह्रविसे कांग्रेस केन्द्रीय सदस्य मोहन बस्नेतको गृहपालिका समेत हो ।
‘लड्नुपर्ने र प्रतिस्पर्धा कांग्रेससँग छ, तर हाम्रा नेताहरु मलाई नै सिध्याउन लागिरहेका छन्, मलाई घेराबन्दी गरेर नेकपा एमाले कसरी बलियो हुन्छ ?’ शेर्पाले प्रश्न गरे ।
एमाले सिन्धुपाल्चोकका सचिव कृष्णगोपाल तामाङ भने केन्द्र र जिल्लाका नेताहरू बसेर विवाद समाधन गर्ने र छिटो नयाँ नेतृत्व चयन गरेर बाह्रविसेमा एमालेलाई एकताबद्ध गरेर लैजाने दाबी गर्छन् ।
‘संगठित सदस्यमा केही समस्या देखिएको छ, हामी अहिले जिल्ला प्रतिनिधि परिषदको बैठकमा छौं, यो सकिएपछि छिट्टै निकास दिने योजनामा छौं,’ सचिव तामाङले भने ।
