Category: राष्ट्रिय स्वतन्त्र पार्टी

काठमाडौं । राष्ट्रिय स्वतन्त्र पार्टीका सांसद डीपी अर्यालले आफूहरूविरुद्ध फेरि मिडिया ट्रायल सुरू भएको बताएका छन् । प्रतिनिधिसभाको बैठकमा बोल्दै सहकारी प्रकरणमा पार्टी सभापति रवि लामिछानेको संलग्नता भएको भन्दै मिडिया ट्रायल गरिएको बताए ।

उनले भने्, ‘हिजो निराधार आरोपमा पाखुरा सुर्किँदै संसदीय छानबिन समितिको माग गर्नुभयो । हामी अपमानित भएरै पनि बचतकर्ताको रकम फिर्ता गर्न केही सहयोग हुन्छ भने बनाउनुहोस् भनेका छौं । आशा गरौं समितिले कुनै दबाबमा नपरी प्रतिवेदन बुझाउनेछ । तर, हिजोदेखि हाम्रैविरुद्ध मिडिया ट्रायल सुरु भएको छ । सदनमा भएको सांसदहरूलाई केही थाहा छैन । तर, सबै सूचनाहरु यही हो भनेर मिडियालाई कसरी थाहा हुन्छ ? समितिप्रति ध्यानाकर्षण गराउँछ । हिजो प्रमाण छ भनेर उफ्रने सांसदहरूले आफ्नै प्रमाण भएको कारणले उफ्रिनुभएको रहेछ । त्यो छताछुल्ल छ ।’

उनले आफूहरू सदनको गतल प्रयोग गरेर छानबिन समिति माग नगर्ने बताए ।

काठमाडौं । सहकारी ठगीका विषयमा छानबिन गर्न गठित छानबिन समितिका सदस्य शिशिर खनालले सहकारीको रकम अपचलनमा रास्वपा सभापति रवि लामिछानेको संलग्नता नपाइएको बताएका छन् ।

समितिले आज प्रतिवेदन बुझाउनुअघि पत्रकारसँग कुरा गर्दै उनले बाहिर सञ्चारमाध्यममा आएका कुराहरू गलत हल्ला मात्र भएको टिप्पणी गरे ।

खनालले भने, ‘सहकारीबाट रवि लामिछानेको नाममा कतै पनि रकम प्रवाह भएको देखिएको छैन । यही तथ्यमा टेकेर अन्तिम प्रतिवेदन बुझाउने छौँ ।’

गोर्खा मिडियामा तीन जनाको नाममा खाता रहेको विषयलाई अतिरञ्जना गरिएको उनले बताए ।

‘उहाँ गोर्खा मिडियाको प्रबन्ध निर्देशक हो । प्रबन्ध निर्देशकसहित तीन जना मिलेर खाता खोले भन्नुमा कुनै तुक छैन । यसलाई अतिरञ्जना गर्न खोजियो,’ उनले भने ।

गोर्खा मिडियामा सहकारीको रकम खर्च गरेकोमा उहाँमाथि कारबाही सिफारिस हुन्छ ? भन्ने प्रश्नमा खनालले स्पष्ट जवाफ दिएनन् ।

‘रकम आइसकेपछि पनि कस्तो उत्तरदायित्व सिर्जना हुन्छ वा हुँदैन भन्ने थप अध्ययनको विषय हुन सक्छ,’ उनले भने ।

तपाईँहरू सहमतिमै प्रतिवेदन बुझाउनुहुन्छ ? भन्ने पत्रकारको प्रश्नमा खनालले जवाफ दिए, ‘एक छिनमा थाहा हुन्छ ।’

काठमाडौं । राष्ट्रिय स्वतन्त्र पार्टीले असोज १ र २ गते हुने राष्ट्रिय भेलाको तयारी पूरा भएको जनाएको छ । भेलाको तयारीबारे जानकारी दिन आयोजित पत्रकार सम्मेलनमा कार्यवाहक महामन्त्री कविन्द्र बुर्लाकोटीले करिब १५ सय प्रतिनिधि सहभागी हुने बताए ।

उनले भने, ‘महाधिवेशको विषयमा आउने प्रश्नहरुको जवाफ हामीले राष्ट्रिय भेलामा दिन सुरु गरेका छौं । महाधिवेशन ०८२ को वैशाखमा गर्ने प्रस्ताव छ, मिति तय भएको छैन ।’

उनले पहिलो पटक हुन लागेको भेलामा प्रतिनिधिको चाप रहेको बताए । उनले करिब ४ सय पालिका र २ हजार वडामा पार्टीको संरचना बनिसकेको बताए ।

भेलामा राजनीतिक, सांगठानिक प्रतिवेदनका साथै सातै प्रदेशका सभापतिहरुले बेग्लाबेग्लै प्रतिवेदन पनि भेलामा पेश गर्ने बताए ।

काठमाडौं । राष्ट्रिय स्वतन्त्र पार्टीले उपसभामुख इन्दिरा रानालाई हटाउन खोज्ने सत्ता गठबन्धनमाथि नै प्रश्न उठाएको छ । सिंहदरबारमा बसेको सचिवालय बैठकपछि कार्यवाहक प्रवक्ता मनिष झाले १८ महिना अघिको कुरा अहिले ल्याएको भन्दै असन्तुष्टि जनाए ।

उनले भने- १८ महिना अघि उहाँले एउटा पत्रमा हस्ताक्षर गरेको देखियो। त्यो सम्बन्धित ठाउँमा पुगेको छैन । त्यो भिजाको लागि पनि होइन अन्तर्वार्ताको समय चाँडो गराइदिन मात्रै थियो । उहाँले १८ महिना अघि नै पत्र लेख्नु गलत थियो हामीले मान्यौँ, त्यो अहिले गलत थियो भने १८ महिना अघि पनि गलत थियो नि । आज आएर गलत भएको हो र ? त्यो कुरा। त्यसैले उहाँको दाउपेचमा हुनुहुन्छ । १८ महिनाअघि नै गलत थियो भने अहिले कि चर्चा गर्दै हुनुहुन्छ ।

उनले उपसभामुखले छानबिन र स्पष्टीकरण दिने मौका पाउनुपर्ने बताए। संवैधानिक परिषद्मा आफू अनुकुल बनाउन सत्ता गठबन्धनले यो तयारी गरेको बताए।

उनले थपे- अहिले चर्चा हो, कुनै औपचारिक कदम चालिएको छैन। हामी अहिले छलफल गरिरहेका छौँ । आगामी निष्कर्ष सुनाइहाल्नुपर्ने अवस्था आएको छैन । आज उहाँको सदनको प्रस्तुति अनुसार हामी आगामी धारणा बनाउँछौं ।

उनले उपसभामुख राना गलत व्यक्ति नभएको जिकिर गरे।

काठमाडौं । सत्ता गठबन्धनले उपसभामुख इन्दिरा रानालाई हटाउन प्रस्ताव लैजाने तयारी गरेपछि राष्ट्रिय स्वतन्त्र पार्टीले आपत्ति जनाएको छ । प्रतिनिधिसभाको बैठकमा बोल्दै प्रमुख सचेतक सन्तोष परियारले उपसभामुखलाई हटाउने प्रस्ताव लैजाने कुरा अलोकतान्त्रिक भएको बताए ।

उनले भने, ‘एउटा सम्मानित पदलाई संवैधानिक परिषद्‍मा आफ्नो बहुमत पुग्दैन भन्ने नाममा लोकतन्त्रका लागि लडेका आफूलाई मसिहा भन्ने राजनीतिक दलहरू उपसभामुखलाई हटाउने सल्लाह गर्दै हुनुहुन्छ, रास्वपाले एउटा राजनीतिक मुद्दा गुमाउला एउटा सम्मानित पद गुमाउला तर लोकतन्त्रको लागि रास्वपा सधैँ लड्नेछ ।’

उनले आज लोकतन्त्रमाथि धावा नबोल्न आग्रह गर्दै आज सहज भएपनि भोलि आफैंलाई अफ्ठ्यारोमा पर्नसक्ने भएकाले सचेत रहन आग्रह गरे । लोकतन्त्रलाई सल्लाह गरेर मार्न खाजे जनता प्रतिवादमा सडकमा आउने चेतावनी दिए ।

पोखरा । पोखरा सहकारी बचतकर्ताले राष्ट्रिय स्वतन्त्र पार्टी(रास्वपा)का सभापति तथा पूर्वगृहमन्त्री रवि लामिछानेलाई कालो झन्डा देखाएका छन् ।

रास्वपा गण्डकी प्रदेश विस्तारित बैठकमा सहभागी हुन आएका लामिछानेलाई सहकारी बचतकर्ताले कालो झन्डासहित नाराबाजी गरेका हुन् ।

लामिछाने सहभागी हुने कार्यक्रमस्थलबाहिर सहकारी पीडितहरुले प्रदर्शन र नाराबाजी गरेका थिए । लामिछाने पार्टीको गण्डकी प्रदेशस्तरीय विस्तारित बैठकलाई सम्बोधन गर्न सोमबार पोखरा  पुगेका थिए ।

कार्यक्रम सुरु हुनुअघि सहकारी पीडितहरुले प्रदर्शन र नाराबाजी गरेका थिए । पीडितहरुले गाेर्खा मिडिया प्रालिमा सूर्यदर्शन सहकारीबाट लगिएको रकम फिर्ता गर्न माग गरेका छन् ।

लामिछाने गाेर्खा मिडिया प्रालिमा सूर्यदर्शन सहकारीको रकम अपचलन  गरेकाे मुद्दामा मुछिएका छन् । उनीमाथि छानविन भइरहेकाे छ ।

काठमाडौं । राष्ट्रिय स्वतन्त्र पार्टीका सभापति रवि लामिछानेले केपी शर्मा ओली नेतृत्वको सरकारको अहिलेसम्मका काम हेर्दा जनताको अपेक्षा अनुसार नभएको टिप्पणी गरेका छन्।

रास्वपा सुदूरपश्चिम प्रदेशको विस्तारित बैठकका लागि धनगढी पुगेका लामिछाने विमानस्थलमा सञ्चारकर्मीहरूसँग कुरा गर्दै आफूहरूले सरकारको निरन्तर खबरदारी गरिरहेको बताए।

उनले भने, ‘सरकारको काम अहिलेसम्म हेर्दा सन्तोषजनक देखिएको छैन। हामीले खबरदारी गरिरहेका छौँ। नियालिरहेका छौँ। जनताको जुन आशा छन् त्यो सरकारको व्यवहारबाट देखियोस् भन्ने चाहेका छौँ। तर, त्यस्तो कुनै छनक देखेको छैन। सरकार योजनामा होला सय दिनसम्म सरकारलाई सुविधा दिनुपर्छ।’

उनले भ्रष्टाचारको अनुसन्धानमा जुटिएको प्रहरीहरूको सरुवाको विषयमा बिस्तारै खुल्दै जाने बताए।

उनले भने, ‘अनुसन्धानमा लागिरहेका मानिसहरूलाई त्यहाँबाट अन्त अन्तै लगिएको भन्ने सुन्नमा आएको छ। त्यो निरन्तर प्रक्रियाले हो कि अन्य कुनै कारणले खुल्दै जाला। हामीले जुन जुन सुरू गरेका थियौँ त्यसलाई अझै जोड लगाउने समाचारहरू आएका छैनन्। ती फाइलहरू कहाँ के भए मलाई थाहा छैन।’

काठमाडौं । राष्ट्रिय स्वतन्त्र पार्टीका उपसभापति डोलप्रसाद अर्यालले रास्वपाको सफलता देखेर लखेट्ने काम भएको बताएका छन् ।

शनिबार काठमाडौंमा आयोजित एक कार्यक्रममा बोल्दै अर्यालले गत निर्वाचनदेखि चार महिना सरकारमा बसेर गरेका काम कारबाहीबाट तर्सिएर पुराना भनिएका दलहरुले लखेट्ने गरेको बताए ।

उनले रास्वपाप्रति जस्तो टीकाटिप्पणी भए पनि पार्टी स्थापनाका समयमा गरेका प्रतिबद्धतालाई नभुलेको र थप परिस्कृत भएर अघि बढेको उल्लेख गरे ।

उपसभापति अर्यालले रास्वपा अरु पार्टीभन्दा धेरै भिन्न रहेको र यसको नीति र योजना स्पष्ट रहेको जिकिर गरे ।

रास्वपाका कुनै पनि नेताले व्यक्तिगत स्वार्थ नहेरी देश र जनताका लागि योगदान दिने उनको भनाइ छ । अर्यालले देश बनाउने रास्वापको अभियान संविधानभित्र टेकेर अघि बढाइने बताए ।

काठमाडौं । सांसद विन्दबासिनी कंसाकारले तेजाव आक्रमणको दशक पछि अदालतको फैसलाबमोजिम क्षतिपूर्ति रकम उपलव्ध गराउने निर्णयप्रति सरकारलाई धन्यवाद दिएकी छन् ।

मंगलबार प्रतिनिधिसभाको बैठकको शुन्य समयमा तेजाव आक्रमणबाट ज्यान मार्ने उद्योग मुद्दाको पिडित सांसद कंसाकारले लामो समयपछि सरकारले उपचारमा खर्च भएको रकममध्ये फैसलाबमोजिम मनासिव माफिक क्षतिपूर्ति रकम उपलव्ध गराउने निर्णय गरेको भन्दै धन्यवाद दिइन् ।

त्यस्तै, उनले अपराध भोगेर पाइने शारीरिक, सामाजिक र मानसिक पिडाका साथै समयमा नै न्याय नपाउँदा हुने पिडा झनै कष्टकर हुने भएकाले अदालतले गरेको आदेश÷फैसला बमोजिम चाडो क्षतिपूर्ति पाउने व्यवस्था गर्न सरकारको ध्यानकर्षण गराइन् ।

केही दिनअघि बसेको मन्त्रिपरिषद् बैठकले तेजाव आक्रमण पीडित सांसद कंसाकारको उपचारमा खर्च भएको रकममध्ये फैसलाबमोजिम मनासिव माफिक क्षतिपूर्ति रकम उपलव्ध गराउने र उक्त रकम प्रतिवादीबाट असुलउपर गरि पीडित राहत कोषमा सोधभर्ना गर्ने व्यवस्था मिलाउने निर्णय गरेको थियो ।

काठमाडौं । नेपाली कांग्रेसका सांसद राजेन्द्र बजगाईँले गौरा पर्वको अवसरमा प्रधानमन्त्री केपी ओली र कांग्रेस सभापति शेरबहादुर देउवाविरुद्ध नाराबाजी गर्नेलाई रिहा गर्न माग गरेकोप्रति आपत्ति जनाएको छन्।

प्रतिनिधिसभाको बैठकमा बोल्दै उनले रास्वपा धार्मिक सहिष्णुता भंग गर्न उद्धत रहेको आरोप लगाए। हिजो रास्वपा सांसद हरि ढकालले बोल्दै टुँडिखेलमा विरोध गर्दा पक्राउ गरेकाहरूलाई छाड्न माग गरेका थिए।

त्यसबारेमा उनले भने, ‘टुँडिखेलमा गौरा पर्वको अवसरमा आयोजित कार्यक्रममा घुसपैठ भएको थियो भन्न सकिन्छ। तर, प्रतिपक्षमा बसेका सांसद साथीहरूले त्यहाँ प्रदर्शन गर्नेहरूका रिहाइको माग गर्नुभयो। दलका व्यक्तिहरूको पनि उपस्थिति देखिएको कुरा आएको छ। त्यो गौरा पर्वमाथि आक्रमण गरेको कि नेपाल सरकार नेपालको प्रधानमन्त्री र पूर्वप्रधानमन्त्रीमाथि आक्रमण गरेको हो ? यो धार्मिक सहिष्णुता भंग गर्ने जुन दल उद्धत छ त्यो दलमाथि प्रश्न गर्छु।’

उनले क्यानको डिजीलाई आफ्नो मान्छे भएको भन्दै जोगाउनको लागि भन्दै रास्वपाको सहमहामन्त्री आफूकहाँ आएको समेत बताए।

उनले थपे, ‘क्यानको विषयमा छलफल हुँदैछ। १३ जना सांसदहरूले यहाँ सार्वजनिक महत्वको प्रस्ताव दर्ता गराउनुभएको छ। यसै पार्टीका सहमहामन्त्री हतारिएर म कहाँ आउनुभयो। क्यानको डिजीको बारेमा उहाँ हाम्रो मान्छे, हाम्रो निर्वाचन क्षेत्रको मान्छे, रवि लामिछाने उहाँको दलको निर्वाचन क्षेत्रको मान्छे, उहाँलाई जोगाउन लाग्नुपर्‍यो भनेर अचानक म कहाँ आइपुग्नुभयो । त्यो पार्टीको सहमहामन्त्री हुनुहुन्थ्यो । म प्रश्न गर्छु यो चरित्रले देश कहाँ पुग्छ ? नयाँ पार्टीसँग हाम्रो यत्रो ठूलो आशा छ, यस्तो डबल स्ट्यान्डरले हाम्रो देशमा नयाँ पार्टीबाट हुन्छ भन्ने कल्पना गरेको थिइनँ ।’

काठमाडौं । राष्ट्रिय स्वतन्त्र पार्टीका सांसद सोविता गौतमले विधेयकहरुको मस्यौदा विचौलियाहरुले ड्राफ्ट गर्ने गरेको भन्दै आपत्ति जनाएकी छन् ।

मंगलवारको कानून, न्याय तथा मानव अधिकार समितिको बैठकमा बोल्दै उनले सो आपत्ति जनाएकी हुन् । उनले समितिमा विधायन सम्बन्धमा व्यवस्था गर्न बनेको विधेयकको दफावार छलफलका क्रममा उनले मस्यौदा बनाउने जिम्मा कानून आयोगको भएपनि साउन ३२ गते संसदमा दर्ता भएको एउटा विधेयकको ड्राफ्ट गर्ने जिम्मा पायोनेल ल अशोसिएटले गरेको पाएको भन्दै आपत्ति जनाइन् ।

‘विधायन व्यवस्थालाई व्यवस्थित गर्नुपर्ने सवालमा हामीले अहिले बनाइरहेका छौँ । कानून मन्त्रालयले अन्तिम जिम्मेवारी लिनुपर्ने हो, तर मस्यौदा गर्ने काम त कानून आयोगकै हो । साउनको ३२ गते जुन विधेयक दर्ता भएको छ संसदमा त्यो दर्ता भएको विधेयक भर्खरै थाहा भयो । त्यो बाहिर कतै ड्राफ्ट भएर आएको भन्नेकुरा छ । बनाउनुपर्ने जिम्मेवारी त मन्त्रालयको हो । मन्त्रालयले कानून आयोगसँग समन्वय गर्नुपर्ने हो, तर साउन ३२ गते संसदमा दर्ता भएको विधेयक संसदमा छलफलका लागि आयो’, उनले भनिन्, ‘त्यसमा स्पष्टसँग पायोनेल ल अशोसिएटले ड्राफ्ट गरेको भन्नेकुरा स्पष्ट छ । हाम्रा विधेयक कहाँ ड्राफ्ट हुँदा रहेछन् भन्नेकुरा महत्वपूर्ण प्रश्न हो । मस्यौदा भनेको कानून आयोगले नै गर्नुपर्छ । यसको अन्तिम जिम्मेवारी मन्त्रालयले लिने हो । तर मस्यौदा कानून आयोगले गर्नुपर्छ । बाहिर ड्राफ्ट गर्ने विचौलिया, कन्सलटेन्सी कसैलाई भन्ने काम बन्द गर्नुपर्छ । विज्ञ चाहिन्छ, कानून आयोगले लिएर आउने हो । तर कानून आयोगले नै मस्यौदा गर्नुपर्छ ।’

समितिको बैठकमा बोल्दै कानून, न्याय तथा संसदीय मामिलामन्त्री अजयकुमार चौरसियाले विधायन सम्बन्धी व्यवस्था गर्न बनेको विधेयक मस्यौदामामा छलफल जारी रहेको र परिमार्जन गर्ने सवालमा धेरै महत्वपूर्ण कुराहरु उठेको बताइन् ।

उनले भनिन्, ‘विधायन सम्बन्धी व्यवस्था गर्न बनेको विधेयक मस्यौदामा हामी छलफलमा छौँ । यस सम्बन्धमा र यसलाई परिमार्जन गर्ने सवालमा धेरै महत्वपूर्ण कुराहरु उठेको छ । अहिले छलफल चलि नै रहेकाले थप कुराहरु छलफलबाट नै सुनिश्चित हुनेकुरामा म सहमत छु ।’

उनले परिमार्जनका लागि छलफल नै उपयुक्त माध्यम हुने पनि बताए ।

काठमाडौं । राष्ट्रिय स्वतन्त्र पार्टीले गौरा पर्वको अवसरमा आयोजित कार्यक्रममा प्रधानमन्त्री केपी शर्मा ओली र कांग्रेस सभापति शेरबहादुर देउवाको विरोध गरेकै आरोपमा युवाहरूलाई पक्राउ गरेकोप्रति असन्तुष्टि जनाएको छ । प्रतिनिधिसभाको बैठकमा सांसद हरि ढकालले युवाहरूलाई समातेर सरकारले गलत गरेको बताए ।

उनले भने, ‘गौरा पर्वको अवसरमा आयोजित कार्यक्रममा युवाहरूले विरोध भाषणा गरे, यसलाई अराजकता अनेक अनेक बहाना लगाएर भिडिओ फुटेजहरु हेरेर युवा साथीहरूलाई हिरासतमा राख्न थालेको रहेछ । यो गलत भएको छ । विरोधका बोलीहरु त्यो पनि युवाले राखेको छ । राज्यले सुन्नसक्ने धैर्यता राख्नसक्नुपर्छ ।’

स्वदेशमा रोजगारी र अवसरबाट वञ्चित बनाइएका युवाहरूले सिंहदबारभित्रको बेमानहरूलाई खबरदारी गर्दै गर्दा समाउन नपाइने उनको तर्क छ ।

उनले थपे, ‘ती युवाहरूको तत्काल रिहाको माग गर्छु । स्टाटस लेखेकै भरमा युवाहरूलाई समेतको कुरा आएको छ, कमिलाको उड्ने बेलामा प्वाँख पलाउँछ त्यस्तो नहोस्, हामी पनि यो विषयमा संवेदनशील छौं तर सरकारले यो रवैया देखायो भने कमिलाको प्वाख पलाएको जस्तो छ ।’

उनले क्यामेरामा देखिएको युवामात्रै नभएर टुँडिखेलाभरीका सबैलाई समातेर देखाउन गृहमन्त्रीलाई चुनौती दिए ।

काठमाडौं । राष्ट्रिय स्वतन्त्र पार्टी (रास्वपा)ले राष्ट्रिय भेलामा १४ सय प्रतिनिधि सहभागी हुने जनाएको छ।

पार्टी कार्यालयमा बसेको केन्द्रीय समितिको बैठकले बैठकले असोज १ र २ गते हुने भेलामा सहभागी हुने प्रतिनिधिको टुंगो लगाएको कार्यवाहक प्रवक्ता मनिष झाले बताए।

उनले भने, राष्ट्रिय भेलामा १४ सय जना आधिकारिक प्रतिनिधि सहभागी हुने। अनौपचारिक रूपमा त्यसभन्दा धेरैको अपेक्षा गरेका छौँ।

उनले आजको बैठकले १५ वटा उपसमिति गठन गरेको पनि बताए । रास्वपाले यसअघि नै काठमाडौंमा राष्ट्रिय भेला गर्ने निर्णय गरेको थियो ।

यस्तै, बैठकमा स्थानीय छाया सरकार सम्बन्धी कार्यविधि कार्यवाहक महामन्त्रीले पढेर सुनाएको उनले बताए।

उनले भने, ‘आजको बैठकमा कार्यविधि प्रस्तुत भएको छ। त्यसमा अध्ययन गरेर अर्को बैठकबाट निर्णय गर्नको लागि स्थानीय छाया सरकार कार्यविधि अध्ययनको लागि उहाँले समय उपलब्ध गराउने र अर्को बैठकमा छलफल गरेर निर्णयार्थ प्रस्तुत हुन्छ।’

काठमाडौं । राष्ट्रिय स्वतन्त्र पार्टी (रास्वपा) ले निलम्बित महामन्त्री मुकुल ढकाललाई साधारण सदस्यसमेत नरहने गरी निकालेको छ । आज पार्टी कार्यालयमा बसेको केन्द्रीय समिति बैठकले ढकाललाई पार्टीबाट हटाएको हो ।

ढकालमाथि पार्टीको हितविरूद्ध गतिविधि गरेको आरोप छ । यसअघि पार्टीले पटक-पटक स्पष्टीकरण सोध्दा पनि ढकालले पार्टी सभापति रवि लामिछानेमाथि नै अनेक लाञ्छना लगाउँदै जवाफ फर्काएका थिए ।

बैठकपछि कार्यवाहक प्रवक्ता मनिष झाले भने, ‘अनुशासन आयोगले यसअघि नै यथेष्ट प्रमाणहरू बुझाइसक्नुभएको थियो उहाँलाई कारबाही गरियोस् भनेर। तर, पार्टीले उहाँलाई स्पष्टीकरणको मौका दिएका थियौँ। उहाँको स्पष्टीकरणमाथि पनि छलफल गर्‍यौँ। पार्टीको विधान र राजनीतिक दलसम्बन्धी नियमलाई टेकेर कारबाही गरेका छौँ।’

काठमाडौं । राष्ट्रिय स्वतन्त्र पार्टीका सांसद हरि ढकालले नेपाल विद्युत प्राधिकरणलाई महसुल उठाउने विषयमा निर्देशन दिन राजनीतिक दलहरु हच्किएको बताएका छन् ।

सार्वजनिक लेखा समितिमा बोल्दै ढकालले १५ दिनभित्र उठाउन निर्देशन दिए आगामी चुनावमा व्यापारीले चन्दा नदिने डरले महसुल उठाउन कडाइ गर्न नसकेको आरोप लगाए ।

उनले भने, ‘आज निर्णय गरौं यो महसुल उठाउन विद्युत प्राधिकरणलाई नै दिउँ । १५ दिनभित्र उठाउन निर्देशन दिऔं । पहिला पैसा उठाउँ अनि कुलमानको विषयमा प्रश्न उठाऔं । मिटर लगेर जडान गरेको पैसा तिर्नुपर्छ । यो पैसा तिराइदिएपछि चुनावमा चन्दा पनि दिदैँन । अनि चुनाव लड्न रमाइलो हुन्छ । ’

‘नागरिकले बैंक तथा वित्तिय संस्थाबाट लिएको ऋण समयमै तिरेन भने धितोजवानीले पत्रिकामा छापेको नोटिससहितको पैसा तिर्नुपर्छ । यो नौ वर्षमा यस्ता मिटिङ बस्दा कति खर्च हुन्छ त्यो खर्च र २२ अर्बको व्याजसहित तिराऔं,’ ढकालले भने ।

लेखा समितिमै उपस्थित अर्का सांसद अर्जुन नरसिंह केसीले नयाँले जथाभावी नबोलौं भनेको भन्दै आक्रोशित भएका ढकाल समितिमै जंगिएर केसीको अभिव्यक्तिको कडा प्रतिवाद गरेका छन् ।

ढकालले भ्रष्टाचारका मुद्दा उठाउँदा जथाभावी नहुने र नयाँले तथ्यमा टेकेर बोल्ने बताए ।
‘९ सय जना नागरिकलाई गैर नागरिक बनाएर बोल्दा जथाभावी नहुने तर तिर्नुपर्ने पैसा उठाउनुपर्छ भन्दा कसरी जथाभावी हुन्छ’ भन्दै जंगिए ।

काठमाडौं । राष्ट्रिय स्वतन्त्र पार्टीका उपसभापति डीपी अर्यालले आफ्नो पार्टीले देशमा युवालाई रोक्नसक्ने कार्यक्रमहरु अघि सार्दै आइरहेको बताएका छन् । पार्टीको ‘आत्मनिर्भर नेपाल अभियान’ सुरु गर्दै रास्वपाले हरेक सुरुवात केही नयाँ कामबाट गरिरहेको बताए ।

उनले भने, ‘हामीले हरेक सुरूवात केही न केही नयाँ, नेपालीको आवश्यकता आजको युवा पुस्तालाई कसरी यो देशमा रोक्न सकिन्छ प्रयास गरिरहेका छौं । रास्वपाले केका लागि राजनीति गरिरहेको छ, जनताको आवश्यकता र देशले खोजेको जस्तो राजनीति गर्दैछ कि नेता बन्न ? अहिलेसम्म देशमा भएको जस्तो राजनीति गर्दैछ । यो कुरा सबैले बुझ्नुपर्छ ।’

रास्वपाले आजबाट आत्मनिर्भर नेपाल अभियान सुरु गरेको छ । अभियानको उपसभापति अर्यालले पार्टी कार्यालयबाट घण्टी बजाएर सुरु गरेका हुन् ।