रुपन्देही । राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेले रुपन्देहीको प्रहरी हिरासतमा ३ दिन बिताएका छन् । जिल्ला सरकारी वकिलको कार्यालयमा बयानमा उनको २४ घण्टा व्यतित भयो ।
मंगलबार पोखराबाट जहाजमार्फत भैरहवा ल्याएर साढे १२ बजेदेखि साढे ६ बजेसम्म मौखिक बयान लिइएको थियो । बुधबार सवा १० बजेदेखि सवा ७ बजेसम्म र बिहीबार सवा १० बजेबाट ७ बजेसम्म लिखित बयान लिइयो । पहिलो दिन मौखिक २५ भन्दा बढी तथा दोस्रो र तेस्रो दिन रुपन्देही जिल्ला सरकारी वकिलको कार्यालयमा उनले ७४ वटा लिखित प्रश्नको सामना गरे । आज उनलाई पोखरा फर्काइएको छ ।
हरेक प्रश्नमा सहजै उत्तर दिएका रविले आफूमाथि लगाइएको आरोपको इन्कारी बयान दिएको अनुसन्धानमा संलगन अधिकारीहरूले बताएका छन् । सहकारीको रकम अपचलनका विषयमा सबै जानकारी जीबी राई र सागर केसीसँग हुनसक्ने भन्दै आफूले ऋणका लागि कुनै निवेदन नदिएको, आफूले कसैसँग रकम नलिएको दाबी उनले गरे ।
कास्की प्रहरीको हिरासतमा बसेको २६औं दिनमा उनलाई रुपन्देही ल्याइएको थियो । पोखराको सूर्यदर्शनसँगै रुपन्देहीको सुप्रिम सहकारीबाट गोर्खा मिडियामा गएको रकम खर्च गर्न/गराउन जिम्मेवार देखिएको भन्दै उनीमाथि अनुसन्धान गर्न संसदीय छानबिन समितिले सिफारिस गरेको थियो ।
जिल्ला अदालत रुपन्देहीले कात्तिक ८ गते लामिछाने, पूर्वडीआईजी छविलाल बन्जाडे जोशीसहित १२ जनालाई अनुसन्धानका लागि नियन्त्रणमा लिन प्रहरीलाई पक्राउ अनुमति दिएपछि लामिछानेलाई यहाँ ल्याइएको हो । बन्जाडेसँग यसअघि नै बयान लिइएको थियो ।
जिल्ला न्यायाधिवक्ता प्रेमराज पौडेल, इलाका प्रहरी कार्यालय बुटवलका डीएसपी विजयराज पण्डित, प्रहरीका अनुसन्धान अधिकारीलगायतको उपस्थितिमा ३ दिनमा रविलाई ७४ वटा प्रश्नमा सवालजवाफ भएको जिल्ला न्यायाधिवक्ता पौडेलले बताएका छन् ।
‘लामिछानेसँग ७४ प्रश्नमा सवालजवाफ भएको छ, उहाँले सहज रूपमा जवाफ दिनुभएको छ, अब, अनुसन्धान अधिकृतले अनुसन्धान पूरा गरेर अभियोजन लगाएर मुद्दा पेस गर्नेछन्, अहिलेलाई बयान सकिए पनि पछि अन्य आरोपीको बयान र तथ्यप्रमाण फेला परे पुनः बयान हुन भने सक्नेछ’, पौडेलले भने ।
इलाका प्रहरी कार्यालय बुटवलमार्फत् अनुसन्धान भइरहेको मुद्दा रविसहित सबै प्रतिवादीको बयान सकिएपछि अदालत पेस हुनेछ । मंगलबार बयान दिएर कार्यालयबाट बाहिरिँदै गर्दा लामिछानेले ‘खोरमा बाघ थुन्दैमा स्याल हुँदैन’ भन्ने अभिव्यक्ति दिएपछि प्रहरी प्रशासनले कडा सुरक्षाबीच रविलाई सरकारी वकिल कार्यालय ल्याउने र लैजाने गरेको थियो । तर, रविले समर्थक र पत्रकार देखेपछि हात हल्लाएर संकेत गर्दै खुसी अनुहारमा भित्र जाँदा र बाहिर आउँदा अभिवादन गरिरहेका थिए ।
बुटवलस्थित सुप्रिम सहकारीबाट एक करोड ९६ लाख रवि लामिछानेकै नाममा र १४ करोड २९ लाख रुपैयाँ विभिन्न व्यक्तिमार्फत लामिछानेका अतिरिक्त छविलाल जोशी र जीबी राईको समूहमार्फत गोर्खा मिडिया नेटवर्कमा पुगेको संसदीय छानबिन विशेष समिति र प्रहरीको प्रतिवेदनमा उल्लेख छ ।
रुपन्देही प्रहरीका अनुसार सहकारीका १८ सय ३१ जनाले आफूहरूको ८६ करोड बढी वचत अपचलन गरेको भन्दै प्रहरीमा उजुरी दिएका छन् । सहकारीका १० हजार ३ सय ९१ बचतकर्ताले जम्मा गरेको १ अर्ब ७ करोड रकममध्ये ८६ करोड १८ लाख २३ हजार अपचलन भएपछि अनुसन्धान प्रक्रिया अघि बढेको हो ।
प्रहरी सुप्रिम सहकारीसम्बन्धमा २८ जनाविरुद्ध अदालतमा मुद्दा दायर गरेको छ । यसमध्ये ८ जना पक्राउ परेका छन् । जसमा २ जना कास्की र एक जना रुपन्देही कारागार रहेका छन् भने ५ जना धरौटीमा रिहा भएका छन् ।
सहकारीको रकम विभिन्न व्यक्ति र कम्पनीका नाममा पठाउने मुख्य आरोपी पूर्वअध्यक्ष जीबी राई र बुटवलस्थित मुख्य कार्यालयका व्यवस्थापक सागर केसीसहित १९ जना फरार छन् ।
यसैबीच रुपन्देही प्रहरी हिरासतमा तीन दिन बिताएका रवि लामिछानेले मात्रै होइन सो पार्टीका नेता तथा समर्थकहरुले रुपन्देही प्रहरीको व्यवहारबाट सन्तुष्ट भएको जनाएका छन् । आफ्ना पार्टीका नेताहरूसँगको हिरासतमै भएको भेटमा रविले न्यायिक पद्दतिमा सघाउन आएको र प्रहरीको व्यवहारप्रति सन्तुष्ट भएको जनाएका छन् ।
प्रतिशोधमा फसाउनेगरी बनाएका रणनीति सफल नहुने भन्दै उनी सरकारप्रति आक्रोशित देखिएका थिए ।
रास्वपा लुम्बिनी अध्यक्ष देवराज पाठकले प्रहरीले पोखरामा भन्दा निकै सम्मानका साथ आफ्नो जिम्मेवारी पूरा गरेको जनाए ।
‘प्रहरीले सम्मानसाथ राखेको सभापतिले पनि बताउनुभयो, हामीले पनि त्यो अनुभव गर्यौं, पोखरामा यस्तो भएको थिएन, हामीले पनि यहाँ सबै प्रदर्शन तथा अन्य कार्यक्रम शान्तिपूर्वक गर्यौं’ उनले भने ।
रुपन्देहीमा रास्वपाका उपसभापति डिपी अर्याल, सहकोषाध्यक्ष दीपक बोहोरा, संगठन विभाग सचिव शंकरकुमार श्रेष्ठलगायतका नेताहरुले तीन दिनको बीचमा रविको पक्षमा भएका प्रदर्शनमा नेतृत्व गरेका थिए ।
रास्वपा नेता गणेश पौडेलले रुपन्देही प्रहरीले गरेको सम्मानले सभापतिलाई मात्रै होइन सबै कार्यकर्तालाई खुसी बनाएको बताए ।
‘मैले आज पनि उहाँसँग भेटेर कुरा गरेँ, प्रहरीको ससम्मान व्यवहारले उहाँसहित हामी खुसी छौ, कानुनी प्रकृयाका लागि गर्नुपर्ने काममा हामीले सहयोग गर्ने भनेर सभापति बताउनुभएको छ’ उनले भने ।
नयाँ मुद्दा दर्ता प्रकृया कसरी अघि बढ्छ ?
अहिलेको बयान सकिए पनि रुपन्देहीमा अर्को मुद्दा दर्ता हुनसक्ने आंकलन गरिएको छ । प्रहरी र रास्वपाका नेताहरू नै यसो हुनसक्ने बताएका छन् । सहकारीबाट रकम निकालेर गोर्खा मिडियामा पठाएको विषय कास्की र रुपन्देहीमा मात्रै होइन चितवन, काठमाडौंमा समेत उठेको छ । कास्की र रुपन्देहीमा पक्राउ अनुमति नै पाइसकेकाले यहाँ बयान भइरहेको हो ।
एकै प्रकृतिको कसुर भए पनि जिल्ला र संस्था फरक-फरक भएकाले सम्बन्धित जिल्लामा लामिछानेविरुद्ध छुट्टाछुट्टै मुद्दा दर्ता हुन सक्ने अनुसन्धान अधिकृतको भनाइ छ । रुपन्देही प्रहरी प्रमुख प्रहरी उपरीक्षक रञ्जितसिंह राठौरले एकै प्रकृतिको कसुरमा एकै चरणमा अनुसन्धान भए पनि दुवै सहकारीको मुद्दा एकैठाउँ गाभ्न नमिल्ने भएकाले सुप्रिम सहकारीको विषयमा रुपन्देहीमा मुद्दा दर्ता हुनसक्ने संकेत गरेका छन् ।
बयान र प्रमाणको आधारमा लामिछानेविरुद्ध मुद्दा चलाउने या नचलाउने भन्नेबारे सरकारी वकिलको कार्यालयको प्रतिवेदनले निर्धारण गर्ने जनाइएको छ । रुपन्देहीका जिल्ला न्यायाधिवक्ता प्रेमराज पौडेलले अनुसन्धान अझै बाँकी रहेकोले अनुसन्धान प्रतिवेदनका आधारमा मुद्दा चलाउने कि नचलाउने भन्ने विषयमा निर्णय हुने जनाएका छन् ।
