Category: माओवादी केन्द्र

काठमाडौं । नेकपा (माओवादी केन्द्र) बागमती प्रदेश समितिले प्रदेशसभा तथा प्रतिनिधिसभा सदस्य निर्वाचन क्षेत्र २०७९ को प्रत्यक्ष र समानुपातिक उम्मेदवार छनौटका लागि ११ वटा मापदण्ड तय गरेको छ ।

प्रदेश समिति अध्यक्ष सरल सहयात्रीको अध्यक्षतामा भदौ १५ मा बसेको प्रदेश समिति कार्यालयको विस्तारित बैठकले प्रक्रियाअनुसार बैठकको फोटोसहित भदौ २० गते भित्र पठाइसक्न मातहतका पार्टी कमिटीलाई निर्देशन पनि दिएको छ ।

जसमा भदौ १८ मा पालिका समितिको बैठक गर्ने, १९ गते प्रदेश र प्रतिनिधि निर्वाचन क्षेत्रीय समन्वय समितिको बैठक बस्ने र २० गते जिल्ला समन्वय समिति कार्यालयको बैठक बस्न निर्देशन दिएको समिति अध्यक्ष सहयात्रीले जानकारी दिए । उनका अनुसार बैठकले उम्मेदवार छनौट सम्बन्धी ११ आधार तय गरेको हो ।

यस्ता छन् ११ वटा आधार

काठमाडौं । माओवादी केन्द्रका उपमहासचिव वर्षमान पुन अनन्तले नागरिकता विधेयकमा राष्ट्रपतिले उठाएको विषय ठीक भएको बताएका छन् । तर ति विषय सम्बोधन गर्न संविधान संशोधन गर्नुपर्ने पुनले बताए ।

राष्ट्रपतिसँग बुधबार शीतल निवासमा भएको भेटमा अध्यक्ष पुष्पकमल दाहालसहित आफूहरुले नागरिकता विधेयकबारे पार्टीको धारणा स्पष्ट गरेको उनले बताए । उनले वैवाहिक अंगीकृत नागरिकतामा महिला र पुरुषलाई बराबरी गर्न संविधान संशोधन गर्नुपर्ने औंल्याए ।

संविधानमै नभएको विषय नागरिकता विधेयकमा आउनुपर्थ्याे भन्नु जायज नभएको उनको तर्क छ । नेपाली पुरुषले विवाह गरेर ल्याएका विदेशी महिलाले अंगीकृत नागरिकता पाउने व्यवस्था भए पनि महिलाले विदेशी पुरुष विवाह गरेर ल्याउँदा के गर्ने भन्नेमा संविधान मौन रहेको पुनले जिकिर गरे ।

अहिले बाहिर सार्वजनिक बहस भएको र राष्ट्रपतिले उठाएको सवाल सही भए पनि त्यो सम्बोधन गर्न संविधान संशोधन गर्नैपर्ने पुनले स्पष्ट पारे । ‘नेपाली पुरुषले विदेशी महिला विवाह गरेमा अंगीकृत नागरिकता पाउने व्यवस्था संविधानमा छ’, त्रिभुवन विश्वविद्यालय केन्द्रीय अर्थशास्त्र विभाग, कीर्तिपुरका विद्यार्थीलाई भिजिटिङ फ्रोफेसरका रुपमा बिहीबार कक्षा लिँदै पुनले भने, ‘नेपाली महिलाले विदेशी पुरुष विवाह गरेर ल्यायो भने के गर्ने भन्ने व्यवस्था छैन । अहिले बाहिर सार्वजनिक बहस भएको छ । संविधानमा नभएको कुरा कानूनमा ल्याउन सकिँदैनथ्यो ।’

आफूहरुले त्यस विषयमा संविधान लेखनका क्रममा कुरा उठाए पनि अन्य दलले नसुनेको स्मरण पुनले गरे । ‘राष्ट्रपतिले भन्नुभएको कमसेकम महिला र पुरुषको बराबर हुनुपर्छ भन्नेमा हामी सहमत छौं । हिजो हामीले संविधानसभामा पनि उठाएको विषय हो’, पुनले भने, ‘तर, सहमति बनेन । त्यो गर्न संविधान नै संशोधन गर्नुपर्छ ।’

उनले वैवाहिक अंगीकृतको विषयमा अनावश्यक विवाद खडा गरिएको बताए । २००९ सालदेखि हालसम्म वैवाहिक अंगीकृत नागरिकताबारे एउटै व्यवस्था रहेको उनले बताए ।

सरकारले नागरिकता विधेयक संघीय संसदमा प्रस्तुत गर्ने त्रममै राष्ट्रिय सहमति कायम गरेर अर्को विधेयक ल्याउने प्रतिबद्धता गरेकाले त्यसमा शंका गरिरहनुपर्ने अवस्था नरहेको तर्क पुनले गरे । भारतमा वैवाहिक अंगीकृतका लागि सात वर्षको समयसीमा रहेकाले नेपालमा पनि त्यही व्यवस्था राख्नुपर्ने आफ्नो दलको धारणा रहेको पुनले बताए । ‘वैवाहिक अंगीकृतको हकमा भारतमा सात वर्षको समयसीमा छ, अरुअरु देशमा विभिन्न छ । कमसेकम भारतसँग नजिक छिमेकी भएकाले हाम्रोमा पनि सात वर्ष राखौं भन्ने कुरा लजिकल छ’, उनले भने ।

फरक प्रसंगमा पुनले २००९ सालयता हालसम्म सवा चार लाखले मात्र वैवाहिक अंगीकृत नागरिकता लिएको गृह मन्त्रालयको तथ्याङ्क रहेको भन्दै ७० वर्षको इतिहास हेर्दा त्यसबाट राष्ट्रिय सुरक्षामै प्रश्न उठ्छ कि भन्ने चिन्ता गर्नुनपर्ने तर्क गरे ।

काठमाडौं । गठबन्धनको सीट बाँडफाँट कार्यदलमा बनेको मापदण्ड अनुसार रामेछापको प्रतिनिधिसभा निर्वाचन क्षेत्र नेकपा (माओवादी केन्द्र) को भागमा पर्ने निश्चित भएपछि त्यहाँ केन्द्रस्तरकै नेता उम्मेदवार बनाएर पठाउनेबारे अनौपचारिक छलफल भएको छ ।

तुलनात्मकरूपमा माओवादीको देशभरकै राम्रो मताधार भएको क्षेत्रमा रामेछाप पनि पर्छ । हालैको स्थानीय तह निर्वाचनमा वडा तहमा पाएको मतका आधारमा माओवादी २७ हजार ८२९ मतसहित तेस्रो स्थानमा छ । उसले जिल्लाका ६४ मध्ये १५ वडाध्यक्ष जितेको छ ।

जिल्लामा ३८ हजार ८६७ मत वडा तहबाट एमालेको पक्षमा आएको छ भने कांग्रेसको पक्षमा ३८ हजार ७४३ मत छ । दुवै दलले बराबरी २४/२४ वडा जितेका छन् । नेकपा एसले एउटा वडाध्यक्ष जितेको छ ।

कांग्रेस र एमालेले तीन तीनवटा पालिका प्रमुख जित्दा माओवादीले २ पालिका जितेको छ । यस हिसाबले पनि रामेछापलाई माओवादीले आफ्नो प्रभावक्षेत्रका रूपमा लिने गरेको छ । गठबन्धनमा प्रतिनिधिसभाको सीट आफ्नो भागमा नआउने बुझेरै कांग्रेसका जिल्ला नेताहरु प्रदेशसभाको टिकटका लागि दौडधूप गरिरहेका छन् ।

यता राम्रो मत रहेको रामेछापमा स्थानीय अन्तरविरोधको समेत हल हुनेगरी केन्द्रीयस्तरकै नेतालाई उम्मेदवार बनाएर पठाउनेबारे माओवादी नेताहरुबीच अनौपचारिक छलफल भएको स्रोतले जनाएको छ । पार्टीबाहिरबाट समेत रामेछापका शीर्ष तहका नेता पठाए जिताउन सकिने सुझाव आएको एक पदाधिकारीले बताए ।

रामेछापमा उम्मेदवार बनाउने पहिलो नाम माओवादी केन्द्रका सचिव तथा प्रभावशाली नेता लीलामणी पोखरेलको आएको छ । पोखरेलले तत्कालीन एकता केन्द्र मसाल र त्यसको चुनावी मोर्चा संयुक्त जनमोर्चा नेपालको महासचिवका रूपमा रामेछापका धेरै गाउँ र वडा तहसम्म पुगेर संगठन गरेका छन् ।

पोखरेल रामेछापमा परिचित नेता हुन् । माओवादीले जितिरहेका सुनापति र दोरम्बा गाउँपालिकामा युद्धकालीन माओवादीको भन्दा जनमोर्चा समूहको मत बढी रहेको मानिन्छ । यसपटक गाउँपालिकामा साबिक जनमोर्चा समूहलाई निषेध गरेर टिकट दिइएकोले झण्डै विद्रोहसमेत भएको थियो । पूर्वजनमोर्चा समूह असन्तुष्ट बनेको थियो ।

जिल्ला संयोजक मैनकुमार मोक्तानले गाउँपालिका अध्यक्ष हार्ने भएपछि अन्तिममा कांग्रेससँग गठबन्धन गरेर माओवादीले झिनो मतान्तरले दोरम्बा गाउँपालिका जितेको थियो । प्रतिनिधिसभा निर्वाचनमा लीलामणी पोखरेललाई उम्मेदवार बनाएर पठाउँदा जिल्लाको अन्तरविरोध पनि हल हुने र पूर्वजनमोर्चा समूहको माग पनि सम्बोधन हुने आँकलन छ ।

रामेछाप (साबिक २ नम्बर क्षेत्र) मा २०४८ सालमा जनमोर्चाबाट कमल चौलागाईँले जितेका थिए । त्यसयता एमालेले २०५६ मा तत्कालीन संयुक्त जनमोर्चाका अध्यक्ष अमिक शेरचनलाई समर्थन गरे पनि जित निकाल्न सकेको थिएन । २०५६ मा लीलामणि पोखरेल सिन्धुलीबाट निर्वाचित भएक थिए ।

पोखरेलले काठमाडौं २ मा पनि दाबी गरेका छन् । तर, यहाँ झक्कु सुवेदी उम्मेदवार बन्न खोजिरहेका छन् । उनले २०६४ सालमा यहि क्षेत्रमा माधव नेपाललाई पराजित गरेका थिए । लीलामणि पोखरेलको लागि काठमाडौं २ भन्दा रामेछाप अनुकूल हुने नेताहरू बताउँछन् ।

जिल्लामा हालका सांसद श्यामकुमार श्रेष्ठ, केन्द्रीय सदस्य युवराज चौलागाई, २०६४ सालको संविधानसभा सदस्य तारानारायण श्रेष्ठ, लक्ष्मी गुरुङ, धावा लामा, डिल्लीमान तामाङलगायतका नेता प्रतिनिधिसभा सदस्यका दाबेदार छन् । एकले अर्कोलाई अश्वीकार गर्ने अवस्था रहेकाले केन्द्रबाटै नेता पठाउन कतिपयले सुझाव दिएको ती पदाधिकारीले बताए ।

त्यसो त रामेछापमा पठाउनका लागि राम कार्की र हरिबोल गजुरेलको पनि नाम आएको छ । तर, गजुरेल सिन्धुली २ छाड्ने पक्षमा छैनन् । यसअघि रामेछापमा एमाले नेताहरू ईश्वर पोखरेल, देवशंकर पौडेल (हाल नेकपा एस) लगायतको हत्या प्रयास गरेपछि सिन्धुली सरुवा भएका बाहुबली नेता राजन दाहालले गजुरेलको क्षेत्रमा दावी गरेका छन् ।

राम कार्की झापा १ बाट चुनाव नलड्ने मनस्थितिमा पुगेकाले सहज जितका लागि उनको नाम पनि रामेछापका लागि लिन थालिएको छ । पार्टीले आवश्यकता ठानेमा रामेछाप जानका लागि लीलामणी पोखरेल भने तयार देखिएका छन् ।

काठमाडौं । नेकपा माओवादी केन्द्रनिकटको अखिल क्रान्तिकारीले ‘त्रिवि बचाउ संघर्ष’ सुरू गरेको छ ।

नेविसंघको तालाबन्दी र आन्दोलनका कारण एक वर्षदेखि अस्तव्यस्त बनेको त्रिविको समस्या समाधानका लागि चौतर्फी दबाब भइरहँदा सत्तागठबन्धनकै विद्यार्थी संगठन क्रान्तिकारीले विश्वविद्यालय रुपान्तरणको लागि आन्दोलनहरूको स्वरूप बदल्ने उचित समय आएको जनाएको हो ।

संघर्षका कार्यक्रम सार्वजनिक गर्दै क्रान्तिकारीले भदौ १५ देखि २२ सम्म २४ घण्टा विश्वविद्यालय खुला रहने अभियान सुरू गरेको छ ।
क्रान्तिकारीले बिम्बात्मकरूपमा विश्वविद्यालय २४ घण्टा खुल्ला राख्ने जनाएको छ । त्यस्तै कक्षाकोठाहरू खुला राख्दै पढाइ सुचारु गर्ने र सबै तहका कार्यकक्षह खुला राख्ने बताइएको छ ।

बिम्बात्मकरुपमा बत्ती, पानीको धारा पनि खुला राख्ने क्रान्तिकारीले बताएको छ । बिम्बात्मकरूपमा विश्वविद्यालयका गेटहरू पनि खुला राख्ने भन्दै अखिल क्रान्तिकारीले मागहरू पूरा नगरे थप आन्दोलन गर्ने चेतावनी दिएको छ ।

रुपन्देही । नेकपा माओवादीका अध्यक्ष पुष्पकमल दाहाल ‘प्रचण्ड’ले आगामी निर्वाचनमा काठमाडौंका मेयर बालेन शाहजस्तै चमत्कार देखाउने नयाँ अनुहारलाई पार्टीबाट चुनावी मैदानमा पठाउनुपर्ने बताएका छन् ।

सोमबार उपत्यका विशेष प्रदेश समितिको कार्यक्रममा बोल्दै उनले अबका उम्मेदार जित्नैपर्ने आउनुपर्ने बाध्यता भएकाले र मतदाताले नयाँपन खोजेकाले बालेनजस्तै उम्मेदार खोजेको बताएका हुन् ।

‘मतदाताले नयाँपन खोजेको छ, अब परम्परागत अवस्थाबाट चुनाव जितिदैन भन्ने संकेत देखिएका छन्, नयाँ आउनुपर्नेछ, बालेनजस्तै आउनुपर्नेछ, नयाँ चमत्कार नगर्नेले अब चुनाव जित्न सकिने अवस्था छैन ।’ प्रचण्डले भने, ‘अब तपाईहरुले पनि सिफारिस गर्दा त्यही खालको अनुहार खोज्नुहोस्, यथास्थितिबाट अब चल्न चुनौती आउन थाल्यो ।’

गठबन्धन दलको बाँडफाँडमा माओवादीले संघमा कम्तीमा ६० र प्रदेशमा १२० भन्दा तल झरेर सहमति गर्नै नसकिने प्रचण्डले बताएका छन् ।

‘गठबन्धन दलमा माओवादी बलियो र निर्णायक शक्ति भएका नाताले पनि यो संख्याभन्दा कममा पार्टीभित्र चित्त बुझाउनसक्ने अवस्था छैन, यो कुरा शीर्ष नेताहरुलाई मैले बताएको छु, कार्यदलमा रहेका साथीहरुलाई पनि प्रष्ट भनेको छु’, प्रचण्डले भने ।

अबको केही दिनमा गठबन्धनमा बाँडफाँडका सबै विषय टुंगिने उनको संकेत थियो । ‘गठबन्धनबाट तीन स्टेपमा काम टुंगिन्छ, पहिलो केही दिनमा दलले पाउने केन्द्रबाट सीटको टुंगो, २० सम्म क्षेत्रको टुंगो अनि २५ सम्म पार्टीका उम्मेदवार टुंग्याउँछौं यसरी कार्ययोजना बनेको छ’, उनले भने । स्थानीय निर्वाचनमा गठबन्धनमा केही समस्या देखिएपनि अहिले त्यसो नहुने उनको भनाइ थियो ।

‘स्थानीयमा भन्दा अहिले सजिलो होला, त्यतिबेला पनि पार्टी निर्णय विपरीत केही उम्मेदवारी भएका थिए धेरै भएकाले त्यो समस्या थियो अहिले त्यसो हुन दिइन्नँ, अहिले सहज हुन्छ, हाम्रो भागमा सबै पर्दैन, प्रत्यक्षमा ६० र प्रदेशमा १२० जनाको नाम टुंगाउन म आफै लागे पनि सक्छु’, प्रचण्डले भने ।

गठबन्धन भएपछि सबैलाई उम्मेदार हुने मन लागेर पनि नपुग्ने भएकाले पार्टी निर्णय मान्न उनको निर्देशन थियो । ‘सबैलाई पुग्दैन, विकल्पसहित २० गतेसम्म सिफारिस दिनुस्, जित्ने उम्मेदार खोज्नुसु प्राथमिकतामा महिला, दलित, जनजाति, मधेसीलाई दिनुस् तर जित्ने उम्मेदार दिनुस्,’ उनको भनाई थियो ।

अध्यक्ष प्रचण्डले पार्टी नेतृत्व सर्वसम्मत भएको पार्टी माओवादी मात्रै भएको बताएका थिए । स्थानीय तहको निर्वाचनमा विदेशी शक्तिहरुले धेरै हेपेर निकालेका विषयहरु बाहिर ल्याएको, देशकै पनि विभिन्न संस्थाले सर्वेक्षण गरेर पनि धेरै कमजोर रहेको तथ्यांक निकाले पनि माओवादीले १२२ संख्या जितेकाले अहिले पनि यस्ता गलत प्रचारबाट जोगिन उनको आग्रह थियो ।

‘हामीले त अझै बढी आउने अपेक्षा गरेका थियौ तर यो देखेर पनि प्रतिक्रियावादी अचम्ममा परेका छन्, तेस्रो भएपनि निर्णायक भएका छौं, चाबी माओवादीको हातमा आएकाले पहिलो भएको महशुस भएको छ’, उनले भने ।

सुर्खेत । कर्णाली प्रदेशमा नवनियुक्त नेकपा माओवादी केन्द्रका दुई मन्त्रीले आज सपथ लिँदैछन् ।

रुकुम पश्चिमका रातो कामी र जाजरकोटकी कृष्णा शाह आचार्यले पद तथा गोपनीयताको सपथ लिन लागेका हुन् । यो नियुक्तिसँगै कर्णाली प्रदेशमा माओवादीका सबै ११ सांसद मन्त्री भएका छन् ।

माओवादीले सबै सांसदलाई माग पुर्‍याउन आर्थिक मामिला तथा योजनामन्त्री विन्दमान विष्ट र जलस्रोत तथा ऊर्जा विकासमन्त्री गणेशप्रसाद सिंहलाई राजीनामा दिन लगाएको थियो ।

सो निर्देशनसँगै मुख्यमन्त्री जीवनबहादुर शाहीसमक्ष दुई मन्त्रीले आइतबार राजीनामा दिएका थिए । रिक्त दुई मन्त्रालयमा पालो पुग्न बाँकी दुई सांसदलाई पठाइएको हो ।

काठमाडौं । नेकपा (माओवादी केन्द्र)ले दुई महिना चुनावी मैदानमा खटिने गरी वागमती प्रदेशका निर्वाचन क्षेत्रमा चुनावी कमाण्डर तोकेको छ । आइतबार वागमती प्रदेश क्षेत्रका केन्द्रीय सदस्य र प्रदेशका पदाधिकारीको बैठकले सबै केन्द्रीय सदस्यहरुलाई प्रतिनिधिसभा र प्रदेशसभा क्षेत्र तोकेर जिम्मेवारी दिएको हो ।

वागमती प्रदेशका १३ जिल्लाका प्रतिनिधिसभा क्षेत्रमध्ये माओवादी केन्द्रका अध्यक्ष पुष्पकमल दाहाल ‘प्रचण्ड’को निर्वाचन क्षेत्र चितवन–३ को कमाण्डर रेणु दाहाललाई दिइएको प्रदेश अध्यक्ष सरल सहयात्री पौडेलले नेपाल प्रेसलाई जानकारी दिए । उनका अनुसार भरतपुर महानगरपालिकाकी प्रमुखसमेत रहेकी दाहाल नेकपा (माओवादी केन्द्र) चितवनकी इन्चार्जसमेत रहेकी छन् ।

कुन क्षेत्रका चुनावी कमाण्डर को ?

काठमाडौं १– अनिल शर्मा

काठमाडौं २– मा कुमार पौडेल

काठमाडौं ३– मा बद्री बजगाईं

काठमाडौं ४–गोविन्द बटाला

काठमाडौं ५– कल्पना शर्मा

काठमाडौं ६– हिमाल शर्मा

काठमाडौं ७– रामबाबु फुयाँल

काठमाडौं ८– सरिता श्रेष्ठ

काठमाडौं ९– शंकर दुलाल

काठमाडौं १०– अञ्जना विशंखे

ललितपुर १–गंगा पराजुली

ललितपुर २–उर्मिला लामा

ललितपुर ३–हरि दाहाल, पद्मा राई

भक्तपुर १– देवेन्द्र श्रेष्ठ र डीपी ढकाल

भक्तपुर २–दिलीप प्रजापती

चितवन १– कञ्चन खनाल

चितवन २–घनश्याम दाहाल

चितवन ३–रेणु दाहाल

मकवानपुर १– विजय गौतम

मकवानपुर २–कुमारी मोक्तान

नुवाकोट १–हितबहादुर तामाङ

नुवाकोट २–विमला सुवेदी

काभ्रेपलाञ्चोक सूर्यमान दोङ र रुकु चौलागाई,

सिन्धुपाल्चोक माधव सापकोटा र शरद दुलाल

धादिङ शालिकराम जम्कट्टेल

दोलखा देवी खड्का

रामेछाप श्यामकुमार श्रेष्ठ

सिन्धुली दीर्घराज श्रेष्ठ र वसन्त माझी

 

सुर्खेत । कर्णाली प्रदेशका दुईजना मन्त्रीले राजीनामा दिएका छन् । जलस्रोत तथा ऊर्जा विकास मन्त्री गणेशप्रसाद सिंह र आर्थिक मामिला तथा योजना मन्त्री विन्द्रमान विष्टले मुख्यमन्त्री जीवनबहादुर शाहीसमक्ष राजीनामा बुझाएका हुन् ।

नेकपा ( माओवादी केन्द्र) संसदीय दलले उनीहरूलाई फिर्ता बोलाउने निर्णय गरेसँगै आइतबार मन्त्रीद्वयले राजीनानामा बुझाएका हुन् ।

राजीनामा पत्र बुझेलगत्तै मुख्त्री शाहीले स्वीकृत समेत गरिसकेका छन् । सोमबार माओवादीकै दुई नयाँ अनुहार मन्त्रिमण्डलमा पठाउने तयारी छ ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले देशलाई दुर्घटनाबाट बचाउन गठबन्धन आवश्यक परेको बताएका छन् ।

शनिबार बुटवलमा सञ्चचारकर्मीसँग कुरा गर्दै यस्तो बताएका हुन् । उनले स्थानीय तहको चुनावमा आपसी गठबन्धन र तालमेल भनेजस्तो नभएपनि गठबन्धन दल र सरकार मिलेर चुनाव गराउनु नै ठूलो कुरा भएको जिकिर गरे । त्यस्तै प्रचण्डले स्थानीय तह चुनावको परिणाम जस्तो आएपनि देशलाई दुर्घटनाबाट बचाउन सफल भएकोले उपलब्धिमूलक मानेको धारणा राखे ।

प्रचण्डले देशलाई दुर्घटनाबाट जोगाउन गरिएको गठबन्धन आगामी चुनावमा थप बलियो हुने बताएका छन् ।
स्थानीय तहको निर्वाचनमा गठबन्धनका बीचमा सन्तोषजनक परिणाम नआएपनि आगामी निर्वाचनमा गठबन्धन बलियो हुने उनले बताएका हुन् ।
पार्टीको कार्यकर्ता प्रशिक्षणका लागि शनिबार बुटवल आएका प्रचण्डले पत्रकारहरुसंग कुराकानी गर्दै स्थानीय तह निर्वाचनको परिणाम माओवादी केन्द्रका लागि सुखद नभएपनि त्यसबाट पाठ सिकेर अगाडि बढ्ने बताए । ‘गठबन्धन र तालमेल भनेजस्तो भएन तरपनि गठबन्धन र सरकार मिलेर स्थानीय तहको निर्वाचन सफल पारेर र संघीय लोकतान्त्रिक गणतन्त्र संस्थागत गर्ने कामका लागि दोश्रो निर्वाचनको तयारी गरिएको हो, यसलाई सामान्यरुपले लिनुहुँदैन,’ प्रचण्डले भने ।

‘गठबन्धनले देशलाई ठूलो दुर्घटनाबाट बचाएको हो, देश बचाउनेमा गठबन्धनको भूमिका ठूलो छ तसर्थ स्थानीय तहको निर्वाचन परिणाम हेरेरभन्दा पनि त्यसबाट शिक्षा लिएर अगाडि बढ्ने हो’, सत्तारुढ दलका प्रमुख घटक माओवादीका अध्यक्ष प्रचण्डले भने ।

स्थानीय तह निर्वाचनमा भएको परिणाम लिएर प्रदेश र संघको निर्वाचनमा राम्रो नतिजा निकाल्ने प्रचण्डको भनाइ थियो ।

यसअघि प्रचण्डले लुम्विनी प्रदेशका अगुवाकार्यकर्ताहरुलाई आगामी निर्वाचनको तयारीबारे प्रशिक्षण दिएका थिए। उनीसँगै नेता नारायणकाजी श्रेष्ठ, वर्षमान पुन बुटवल आएका थिए ।

काठमाडौं ।नेकपा माओवादी केन्द्रकी स्थायी समिति सदस्य एवं पूर्वसभामुख ओनसर्री घर्तीले राजनीतिक दलहरुले आसन्न प्रतिनिधिसभा र प्रदेशसभा सदस्य निर्वाचनमा प्रत्यक्षतर्फ बढीभन्दा बढी महिलालाई उम्मेदवार बनाउनुपर्ने बताएकी छन् ।

हरेक पार्टीमा प्रत्यक्ष निर्वाचन लड्ने क्षमताका महिला नेताहरु रहेको भन्दै उनले टिकट वितरणमा ध्यान दिन राजनीतिक नेतृत्वलाई आग्रह गरिन् । नेताहरुमा महिलाहरु समानुपातिकका लागि मात्र हुन् भन्ने मनोविज्ञानले घर गरेको र स्वयं महिलाहरु समेत समानुपातिक पद खान लालायित हुने प्रवृत्ति देखिएको उनको भनाइ थियो ।

माओवादी जनयुद्धका कारण नेपाली महिलाहरुमा जागरण आएको तथा सिंगो समाज महिलामैत्री बन्दै गएको उल्लेख गरिन् । पुरुषहरुलाई पृतृसत्तावादी भनेर गाली गर्ने महिलाहरु आफैं त्यो मनोदशाबाट ग्रस्त भएको उनको टिप्पणी थियो । घर्तीले आफूभित्रको पृत्तसत्तावाद जबर्जस्त निकालेर फाल्न सक्नुपर्नेमा जोड दिइन् ।

महिलालाई अगाडि बढाउने विषयमा विगतको तुलनामा धेरै परिवर्तन आएको र पुरुष नेतृत्वले समन्वय गर्ने गरेको उनले बताइन् । ‘राजनीतिक पार्टीहरुमा महिलाले आफ्नो पकड निर्वाचन क्षेत्र बनाउन सक्दैनन् भन्ने पनि छ’, पार्टी संवद्ध महिला संगठन अखिल नेपाल महिला संघ क्रान्तिकारीले राजधानीमा गरेको कार्यक्रममा घर्तीले भनिन्, ‘महिलाहरु समानुपातिकमा मात्र लालायति हुँदा र प्रत्यक्ष निर्वाचन लड्न तयार नहुँदा पुरुष नेताहरुमा महिला भनेका समानुपातिकका लागि मात्र हुन् भन्ने मनोविज्ञान निर्माण भएको छ ।’

महिलाले अवसर पाए जस्तोसुकै जिम्मेवारी पुरा गर्न सक्छन् भन्ने प्रमाणित भएको भन्दै उनले त्यसको उदाहरण आफैं भएको चर्चा गरिन् । माओवादी केन्द्रका अध्यक्ष पुष्पकमल दाहाल प्रचण्डले आफूमाथि ठूलो विश्वास र भरोसा गरेर सभामुखको जिम्मेवारी दिएको स्मरण घर्तीले गरिन् । सभामुखको जिम्मेवारी पाउँदा धेरैले आफूले सम्हाल्न नसक्ने भन्दै खिसीट्युरी गरेको उनले सुनाइन् ।

‘६ महिना त म दिनमा २ घण्टा मात्र सुतें । कहिले काहीं त त्यो पनि भएन’, उनले भनिन्, ‘भोलिपल्ट बस्ने संसदमा जुन विषयमा छलफल छ त्यसबारे धेरै अध्ययन गरे जान्थें । मैले संविधानका प्रत्येक हरफ हातले डायरीमा कोरेर पढेको छु । संसद सचिवालयमा धुलोले पुरिएका किताब धुलो टक्टक्याएर पढेर बैठकमा जाने गरेको थिएँ ।’

आफू असफल हुँदा महिलाहरु शासन प्रशासन चलाउन सक्दैनन् भन्ने सन्देश प्रवाह हुने र आफूलाई नजिरका रुपमा देखाएर भविष्यमा अरु महिलालाई अवसरबाट रोक्न सक्नेतर्फ सधैं सचेत भएर काम गरेको अनुभव उनले सुनाइन् । आफूलाई सफल बनाउन सञ्चार माध्ययले खेलेको सकारात्मक भूमिका कहिल्यै बिर्सन नसक्ने पनि उल्लेख गरिन् ।

घर्तीले महिलालाई अवसर र सम्मान दिने कुरामा माओवादी नेतृत्व अरु दलको तुलनामा धेरै प्रगतिशील रहेको दाबी गरिन् । ‘महिलालाई अवसर दिने र सम्मान गर्ने संस्कार अरु पार्टीको तुलनामा माओवादीमा धेरै राम्रो छ’, उनले भनिन् । आफूहरुको आन्दोलनले नै आजका छोरीहरुलाई अधिकारप्रति सचेत गराएको र आफ्नै खुट्टामा उभिन सक्ने बनाएको दाबी घर्तीले गरिन् ।

महिलाले राष्ट्रपति, सभामुख र प्रधानन्यायाधीश चलाइसकेकाले अब प्रधानमन्त्री बन्ने पालो महिलाको आएको बताइन् । महिलाले आफूलाई राजनीतिमा स्थापित गराउन मनोबल उच्च राख्नुपर्ने उनको भनाइ थियो ।

फरक प्रसंगमा घर्तीले सांसदले नीति निर्माणको काम गर्नुपर्नेमा विकास निर्माणको काम गरिरहेको टिप्पणी गरिन् । नीति निर्माण छाडेर सांसदहरु विकास निर्माणको पर्यायबाची बनेको उनको भनाइ थियो ।

धरान । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले गठबन्धनमा केही दिनमै भागबण्डा टुंगिने बताएका छन् ।

धरानमा प्रदेश १ का पार्टी केन्द्रीय सदस्य तथा प्रदेश पदाधिकारीहरूसँगको संयुक्त बैठकमा प्रचण्डले सबै निर्वाचन क्षेत्रको दलगत अवस्था बुझ्ने काम भइरहेको जानकारी गराए । सीट बाँडफाँटको क्रममा यसअघि जहाँ जसले जितेको छ त्यो ठाउँ पहिलो हक हुने उनको जिकिर छ ।

‘गठबन्धनमा संख्या बाँडफाँटलाई मुख्य आधार बनाएर काम भैरहेको छ । जसले जहाँ जितेको हो त्यो ठाउँ उसकै पहिलो हक लाग्ने भनिएको छ । निर्वाचन क्षेत्रमा अहिले, कहाँ, कसको, कस्तो अवस्था छ बुझ्ने काम भैरहेको छ । केही दिनमा यो काम सकिन्छ’, दाहालको भनाइ थियो ।

उनले स्थानीय चुनावमा कतिपय ठाउँमा आफूलाई मन नपरेको उम्मेदवार हराइएकाले अब सचेत हुनुपर्ने बताए ।

‘पार्टीभित्र जे जस्तो भएपनि आउने संघ र प्रदेशको निर्वाचनमा पार्टी र गठबन्धनको आधिकारिक उम्मेदवारलाई जिताई छाड्ने संकल्प गर्न जरुरी छ । स्थानीय चुनावमा आफूलाई मन नपरेको उम्मेदवार हराइयो’, प्रचण्डले भने, ‘त्यहाँ व्यिक्तको आत्मातुष्टी त भयो तर पार्टीले हार्‍यो । त्यो अब नहोस् हामी सचेत बनौं । गल्ती गर्नेलाई छानबिन समितिले दिएको सुझाव अनुसार कारवाही गरिन्छ ।’

स्थानीय निर्वाचनको टिकट वितरणमा केही ठाउँमा मनोमानी भएको बताउँदै प्रचण्डले अब संस्थागतरूपमै उम्मेदवार छनौट गरिने बताए । उनले भने, ‘अब प्रदेशबाट संघ र प्रदेशको उम्मेदवार १, २, ३ गरेर ३ जना उम्मेदवारको सिफारिस संस्थागत गर्नुस् ।’

पार्टीमा दुई अतिवादी प्रवृत्ति देखा परेको प्रचण्डले गुनासो गरे ।

‘बडो क्रान्तिकारी कुरा गर्ने तर दक्षिणपन्थीसँग आत्मासमर्पण गर्न जाने, अर्को यी सबै हिँडिदिएपछि एक्लै मनपरि गर्न पाइन्थ्यो भन्ने संकीर्णतावादी प्रवृत्ति पार्टीमा देखा परेका छन् । यी प्रवृत्तिका विरुद्ध हामी लगातार लडिरहेका छौं ‘, उनले भने ।

फरक प्रसंगमा विगत घटनामा आत्माआलोचना नगरेकाले एमालेसँगको च्याप्टर क्लोज भएको प्रचण्डले बताए ।

‘एमालेले विगत घटनामा आत्माआलोचना गरेको भए, एमसीसीमा राष्ट्रिय स्वाधीनताको पक्षमा उभिन तयार भएको भए हामीले ओलीलाई प्रधानमन्त्री बनाउन तयार भएको हो । केपी त्यसको लागि तयार भएनन् । त्यो च्याप्टर क्लोज भएको छ । अब हामी यही गठबन्धनमा जान्छौं भन्ने स्पष्ट गरिसकेका छौं ।

काठमाडौं । नेकपा माओवादी केन्द्र कर्णाली प्रदेशले प्रदेशसभामा सहभागी सबैलाई मन्त्रीको भाग पुर्‍याउने भएको छ । कर्णाली प्रदेशसभामा सहभागी मन्त्रीलाई फिर्ता बोलाएर मन्त्री बन्न बाँकीलाई सरकारमा पठाउने तयारी भएको छ ।

माओवादीले हालका जलस्रोत मन्त्री गणेशप्रसाद सिंह र आर्थिक मामिला तथा योजना मन्त्री विन्दमान विष्टलाई फिर्ता बोलाएर जाजरकोटकै कृष्णा शाह र रुकुम पश्चिमका रातो कामीलाई मन्त्री बनाउने तयारीमा रहेको पूर्वमन्त्री एवम् माओवादी कर्णाली प्रदेश अध्यक्ष विमला केसीले जानकारी दिइन् ।

पार्टी केन्द्रको निर्देशनअनुसार सरकारमा रहेका दुई जना मन्त्रीहरूलाई फिर्ता बोलाएर सरकारमा सहभागी हुन बाँकी रहेका दुई जना सांसदलाई मन्त्री बनाइनेछ ।

कर्णाली प्रदेशसभामा माओवादी केन्द्रका ११ जना सांसद छन ्। तिमध्ये नौ जना सांसद सरकारमा सहभागी भइसकेका छन् । बाँकी दुई जनालाई पनि सरकारमा सहभागी गराउनका लागि माओवादी केन्द्रले सात महिनाअघि नियुक्त गरिएका सिंह र विष्टलाई सरकारबाट फिर्ता बोलाएको हो ।

काठमाडौं । नेकपा माओवादी केन्द्रका उपमहासचिव वर्षमान पुन अनन्तले एमाले पार्टी नभई कर्पोरेट हाउस भएको टिप्पणी गरेका छन् ।
एमाले राजनीतिक पार्टीको चरित्र गुमाएर कर्पोरेट हाउसजस्तो भएको र त्यसको सिइओ केपी ओली र अरु नेताहरु डाइरेक्टर र डेपुटी र डाइरेक्टरको भूमिकामा रहेको पुनले बताए ।

ओली मुख्य नेतृत्वमा आएपछि एमालेलाई नीति, विचार, सिद्धान्त र कार्यक्रमविहीन कम्पनीमा रुपान्तरण गरेको उनको भनाइ थियो । अधिकांश एमालेजन पार्टी पार्टीजस्तो नभई कर्पोरेट कम्पनी भएकोबारे जानकार भए पनि नाफाका लागि उनीहरु एमालेमै बसिरहेको उल्लेख गरे ।

‘एमाले पार्टी होइन, कर्पोरेट हाउस हो । ओली कर्पोेरेट हाउसमा सिईओ र अरु नेताहरु डाइरेक्टर, डेपुटी डाइरेक्टरजस्ता छन्’, पार्टीको बागमति प्रदेशअन्तर्गतका सबै जिल्लाका समन्वय समिति संयोजक र गाउँपालिका र नगरपालिका अध्यक्षहरुको संगठनात्मक कार्यशालालाई बुधबार साँझ राजधानीमा सम्बोधन गर्दै पुनले भने ।

एमाले विचार र सिद्धान्तमा नभई नाफा र स्वार्थका लागि चलेको आरोप उनले लगाए । ‘एमालेमा मानिसहरु बसिरहेको विचार र राजनीतिले होइन । ठूलो कार्पोरेट हाउसमा बस्दा फाइदा धेरै हुन्छ । ब्राण्ड बिक्छ, कर्पोरेटमा तलब/सुविधा बढ्छ, बोनस पाइन्छ भनेर हो’, पुनले भने, ‘कर्पोरेट हाउसमा कामदारहरु नाफाका लागि मिहेनत गर्छन्, ज्यान दिन पनि तयार हुन्छन् । एमालेका नेता कार्यकर्ता त्यस्तै भएका छन् ।’

उनले कर्पोरेट संस्कारमा हुर्किएका कारण एमाले कार्यकर्ताले केपी ओलीले दुईपटकसम्म संविधान मिचेर प्रतिनिधिसभा विघटन गर्दा र व्यवस्थामाथि नै प्रहार बोल्दा पनि बोल्न नसकेको टिप्पणी उनको थियो ।

तर, माओवादी केन्द्र भने विचार, राजनीति र सिद्धान्त आधारित समाजवादी कार्यदिशा बोकेको पार्टी भएको दाबी पुनले गरे । उनले विचारलाई बोक्न सक्ने संगठन पनि आफूहरुसँग रहेको बताए ।

जनयुद्धका बेला पार्टीले सेना र संयुक्त मोर्चाको नेतृत्व गरेको भन्दै उनले आजको प्रतिस्पर्धात्मक राजनीतिमा समाजवादको आधार निर्माण गर्ने पार्टी चाहिएको बताए । ‘समाजवादको आधार निर्माणका लागि क्रान्तिकारी पार्टी चाहिन्छ । जुझारु कार्यकर्ता र जनताको समर्थन चाहिन्छ’, पुनले भने, ‘समाजको क्रान्तिकारी परिवर्तन र जनता तथा आफ्नै जीवनमा परिवर्तनका लागि पनि पार्टी चाहिने भन्दै सडकमा खबरदारी गर्ने, सदनमा जनताको आवाज बोल्न सक्ने र सरकारमा रहँदा जनताको पक्षमा काम गर्ने पार्टी चाहिएको छ ।’

पार्टीका हरेक कमिटीका अध्यक्ष वा मुख्य नेतृत्वलाई पियानो बाधकको संज्ञा दिँदै पुनले समितिको मुख्य नेता, मुख्य संगठक र मुख्य व्यवस्थापकका हैसियतले अध्यक्षहरुले पियानो बजाउँदा दुवै खुट्टा र दसवटै औंला चलाउनुपर्ने बताए । आफ्नो समितिका सदस्यहरुलाई विचारले नेतृृत्व गर्ने, भावनात्मक रुपले एकताबद्ध गर्ने र संगठनात्मक रुपले एकीकृत गर्नुका साथै जनतासँग जोडिएर जनभावनाअनुसार काम गर्ने गुण नेताहरुमा हुनुपर्ने चर्चा गरे ।

फरक प्रसंगमा पुनले गठबन्धन आवद्ध अरु दललाई बाँडेर बाँकी रहेको सिटमध्ये ६० प्रशितमा काँग्रेस र ४० प्रतिशत स्थानमा माओवादीले लिने गरी एकरदुई दिनभित्रै सिट बाँडफाँटको टुंगो लाग्ने बताए । केपी ओलीको दक्षिणपन्थी प्रवृत्ति र प्रतिगमनलाई निर्वाचनमार्फत पराजित गरिने भन्दै उनले आफूहरुले देशलाई राजनीतिक स्थायित्व र समृद्धिको दिशामा अघि बढाउने प्रतिबद्धता जनाए ।

काठमाडौं। नेकपा माओवादी केन्द्रका अध्यक्ष पुष्पकमल दाहाल प्रचण्ड चुनावको छेको पारेर चितवन लागेका छन् । प्रतिनिधिसभाको चुनावमा चितवनको क्षेत्र नम्बर ३ बाट उम्मेदवारी दिने तयारी गरेका अध्यक्ष प्रचण्ड आज बिहान चितवन पुगेका हुन् ।

चितवन पुग्नुअघि उनको कार्यतालिका सार्वजनिक भएको छ । तालिका अनुसार उनी आज एकै दिन ५ वटा कार्यक्रममा सहभागी हुनेछन्, जसमध्ये तीन वटा शिलान्यास कार्यक्रम छन् ।

आजै पुल उद्घाटन तथा पार्टी प्रशिक्षण कार्यक्रम पनि राखिएको छ । प्रचण्डले बरुवाबजार भैरवपुर पर्साचोक बैदार चिन्द्रेनी अजिंगरे सहिदपुर गंगटे सडक शिलान्यास, हुलाकी सडक अन्तर्गत पर्ने रतनी खोला पुलको उद्घाटन, र माडी ठोरी सडक खण्डको उद्घाटन गरिसकेका छन् ।

यस्तै टमटा खोला तटबन्धन शिलान्यास कार्यक्रम पनि आजै छ । भरतपुरमा आयोजित प्रशिक्षण कार्यक्रमको प्रमुख अथितिको रुपमा प्रचण्ड सहभागी हुनेछन् ।

केही दिनअघि जापान भ्रमणमा रहेका बेला प्रचण्डले आफू चितवनको क्षेत्र नम्बर ३ बाट उम्मेदवारी दिने घोषणा गरेका थिए । उनी आजै कार्यक्रम सकाएर गठबन्धनको बैठकका लागि काठमाडौं फर्कदैछन् ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले नागरिकता विधेयकलाई राष्ट्रघाती भन्नु नै पाखण्डीबाहेक केही नभएको बताएका छन् ।

बुधबार बिहान भरतपुर विमानस्थलमा संचारकर्मीहरुसँग कुुरा गर्दै अध्यक्ष प्रचण्डले नागरिकता विधेयक राष्ट्रिय सभाबाट पारित भएर फेरि राष्ट्रपतिकोमा जाने बताउँदै अहिले नागरिकता विधेयकको गलत उदेश्यको निम्ति प्रचार गरिएको बताए ।

उनले आमाबुबा दुबै नेपालको नागरिक भएका छोराछोरीले नागरिकता पाउने विधेयकको सार भएको बताए ।

उनले भने,‘ यसलाई गलत उदेश्यको निम्ति प्रचार गरिएको छ । दुई वटा कारणले एउटा त आमाबुबा दुबै नेपालको नागरिक भएका छोराछोरीले नागरिकता पाउने कुरा मात्रै हो अहिलेको विद्येयकको सार हो । ७ लाख मान्छेहरु नागरिकता विहिन भएका छन् । सबै अवसरबाट बञ्चित भयो त्यो स्थितिको अन्त्य गर्ने विद्येयक हो । त्यसकारण यसलाई राष्ट्रघाती भन्नु नै पाखण्ड बाहेक केही हुदैन ।

नागरिकता विधेयक संसदमा ल्याउँदा एमालेले राष्ट्रघाती भन्नु बेइमानी र अनैतिकताबाहेक अरु केही नभएको उनले बताए ।

‘यो त्यही विद्येयक हो जो केपी ओली प्रधामन्त्री हुँदा अध्यादेशमार्फत लगिएका थियो । जसले यो विद्येयक अध्यादेश मार्फत पोहोर साल लगेका थिए । यही विद्येयक राष्ट्रघाती भन्नुभन्दा बेइमानी अनैतिकता अरु केही हुनै सक्र्दैनन् । ’ प्रचण्डले भने ।

उनले एमालेले राष्ट्रवादको मखुन्डो लगाएर भोट बटुल्छौं भन्ने दुरुत्साह गरेको आरोप समेत लगाए ।

‘ यो ७ वर्षे वैवाहिक अंगिकृतको व्यवस्था राज्य व्यवस्थाबाट पारित भएर गएको थियो । म पनि नेकपाको अध्यक्ष थिए । शशी श्रेष्ठ राज्य व्यवस्था समितिको अध्यक्ष हुनुहुन्थ्यो म त्यतिबेला सदस्य थिए ।राज्य व्यवस्थाको त्यो प्रस्ताव सदनमा लैजाउँ भन्दा नमान्ने केपी ओली र एमाले गुट नै हो । र अध्यादेशबाट अहिले जे लगिएको छ त्यो लैजाने पनि केपी ओली नै हो । यति छरलंग कुरालाई पनि नेपालका जनता बुद्धि नभएका छन् । भ्रम दिन सकिन्छ, राष्ट्रवादको मुकुन्डो लगाएर भोट बटुल्न सकिन्छ भन्न ठान्ने दुस्साहस जो भएको छ । मलाई लाग्छ नेपाली जनता समेत भइसके ।’

रुपन्देही । लुम्बिनी प्रदेशका मुख्यमन्त्री कुलप्रसाद केसीले सचिवालयमा मात्र नभई कार्यकाल सकिन केही महिना मात्रै बाँकी हुँदा अन्य निकायमा पनि परिवारका सदस्यलाई ‘सेटल’ गर्न थालेका छन् ।

पछिल्लो पटक ज्वाइँलाई सञ्चार रजिस्टार बनाउन कानुन नै संशोधन गरेपछि सत्तागठबन्धनमा रहेका दल र स्वयं उनकै पार्टीबाट विरोध भएको छ । कुनै राजनीतिक नियुक्ति पार्टीको प्रदेश कमिटीबाट निर्णय वा सल्लाह नगरिएको भन्दै उनकै पार्टीका नेताहरूले विरोध गर्न थालेका छन् ।

मुख्यमन्त्रीका काइला दाइ मानबहादुर केसीका ज्वाइँ रोहित केसीलाई उनले रजिस्टार बनाउने तयार गरेको स्रोतले बताएको छ । रोहित र उनकी श्रीमती दिया अहिले पनि मुख्यमन्त्रीकै सचिवालयमा छन् ।

अघिल्लो सरकारको पालामा रजिष्टारका लागि कानुन वा पत्रकारितामा एमए गरेको प्रावधान थियो । तर, रोहितले व्यवस्थापन पढेकाले उनैको मापदण्ड पुग्ने गरी कानुन संशोधन गर्दा वा थपेर जुनसुकै विषयमा स्नातक गरेको भए पुग्ने बनाइएको जानकारहरू बताउँछन् । काउन्सिलको अध्यक्ष, रजिस्टारसहितका पदमा आफन्त र दलका कार्यकर्ता राख्नका लागि मुख्यमन्त्रीले कानुन संशोधन गराएको आरोप छ । यसका लागि कर्मचारीले पनि आफ्नो स्वार्थ घुसाएका छन् । कानुन संशोधन गर्दा कर्मचारी पनि बस्न पाउने गरी कानुन सचिव राजेन्द्र थापा र श्रीकृष्ण सुवेदीले मिलाएका छन् । केसीले सुरुमै रोहितलाई प्रेस सल्लाहकार राख्न खोजेपनि पार्टीभित्र विरोध भएर रोल्पाका मानसिंह विकलाई राखेका थिए ।

माओवादीका शीर्ष नेताहरूले यो पदमा माओवादीमै रहेर पत्रकारिता गरेकालाई व्यवस्थापन गर्न धेरैपटक आग्रह गरेका थिए । माओवादी नेता कृष्णबहादुर महरा, बलदेव खनाल, गोविन्द आचार्यलगायतले सोही पार्टीको पत्रकार संगठनमा रहेका वसन्त गिरीलाई राख्न दबाब दिइरहेका छन् । गिरीलाई राख्न कांग्रेसबाट मन्त्री भएका डिल्ली चौधरी, जसपाबाट मन्त्री भएका सहश्रराम यादवलगायतले दबाब दिएपनि मुख्यमन्त्री ज्वाइँलाई नै नियुक्ति दिने अडानमा छन् । माओवादीका प्रदेश अध्यक्ष सुदर्शन बरालले उनीनिकट पत्रकार रुद्रहरि कुँवरलाई राख्न माग गरेका थिए तर मुख्यमन्त्रीले मानेन् ।

केही दिनअघि मात्र मुख्यमन्त्रीले प्रदेश प्राविधिक विश्वविद्यालयको रजिष्टारमा पनि नातामा भाइ पर्ने रेग भण्डारीलाई नियुक्त गरेका छन् । उनी यसअघि आइटी विज्ञको रूपमा सचिवालयमा थिए । सचिवालयमा कार्यकाल सकिन लाग्दा भण्डारीलाई ५ वर्षे नियुक्ति दिइएको हो ।

यसअघि मुख्यमन्त्रीको १८ सदस्यीय सचिवालय यसैपनि आलोचित छ । सचिवालयमा छोरी मानवी केसीलाई दोभासेको नियुक्ति दिएर मासिक ३७ हजार ९ सय ९० तलबभत्ता भुक्तानी दिइराखिएको छ । जनसम्पर्क सल्लाहकार, प्रमुख राजनीतिक सल्लाहकार, प्रेस संयोजक, फोटोग्राफर, स्वकीय सचिव पनि नियुक्त छन् । सचिवालयमा २१ हजारदेखि ८० हजार रूपैयाँसम्म तलब खाने मान्छे छन् ।

केसीका प्रमुख राजनीतिक सल्लाहकार दाङका अमरबहादुर डाँगीलाई सञ्चार, अतिथि सत्कारसहित ८० हजार ८ सय ४० रुपैयाँ मासिक सेवा-सुविधा दिएका छन् । डाँगी एमालेका पूर्वप्रदेशसभा सदस्य हुन् । केसीलाई मुख्यमन्त्री बनाउन उनले प्रदेशसभा सदस्यबाट राजीनामा दिएर सहयोग गरेका थिए । त्यही गुन तिर्दै डाँगीलाई प्रमुख राजनीतिक सल्लाहकार बनाइएको छ ।

त्यस्तै रोल्पाको घर्ती गाउँका रमेशबहादुर वली क्षेत्रीलाई जनसम्पर्क सल्लाहकार बनाएका छन् । उनको सेवा-सुविधा मासिक ६४ हजार ८ सय रूपैयाँ छ । मासिक ४२ हजार ३ सय ८० दिएर खरिन्द्र विकलाई स्वकीय सचिव बनाइएको छ । रोल्पाकै मानसिंह विक प्रेस संयोजक छन् । उनको तलब ३७ हजार ९ सय ९० छ । प्रमुख राजनीतिक सल्लाहकार, जनसम्पर्क सल्लाहकारका नाममा एकजना कम्प्युटर अपरेटर, कार्यालय सहयोगी र हलुका सवारी चालक पनि नियुक्त गरिएको छ ।

प्रमुख राजनीतिक सल्लाहकारदेखि क्यामेरामेन र कार्यालय सहयोगीसम्मले पाउने सुविधाअनुसार मुख्यमन्त्री केसीको सचिवालयले मात्र प्रदेश सरकारको मासिक ५ लाख २९ हजार ६० रुपैयाँ थप व्ययभार बढाएको छ । धेरै सुविधा लिने प्रमुख राजनीतिक सल्लाहकार डाँगी र वली प्रायः मुख्यमन्त्री कार्यालयमा भेटिँदैनन् । उनीहरूले सल्लाह दिने भनेको टेलिफोनमै हो । नियमित कार्यालय जान नपर्ने र आवश्यक पर्दा टेलिफोनमा पनि सम्पर्क भइरहने राजनीतिक सल्लाहकार डाँगीले बताए ।

मन्त्रीहरूको सचिवालय ३ देखि ५ जनासम्मको छ । त्यसले प्रदेश सरकारको राज्य कोषबाट मासिक २१ लाख रूपैयाँभन्दा बढी थप खर्च भइरहेको छ । लुम्बिनीमा १७ सदस्यीय मन्त्रिपरिषद् छ । १३ मन्त्री र ४ राज्यमन्त्री छन् ।

प्रदेशसभा लेखा समिति सभापति विष्णु पन्थी चुनावको मिति तोकिसकिएकाले सरकारले धमाधम कानुनविपरीत नियुक्ति गर्नु गलत भएको बताउँछन् ।

‘जे-जे भनेर नियुक्त गरे पनि यो आफन्त र कार्यकर्ता पाल्ने खेलोमेलो मात्र हो, चुनावको मिति घोषणा भएपछि यस्तो काम गर्नु गैरजिम्मेवारी हो, त्यस्ता अनावश्यक खर्चलाई निरुत्साहित गर्नु जरुरी छ ’, उनले नेपाल प्रेससाग भने ।

सरकारका प्रवक्ता एवं आन्तरिक मामिला, कानुन तथा सञ्चारमन्त्री तिलकराम शर्माले सरकारले कार्यविधि बनाएको र त्यहीअनुसार नै नियुक्ति भएको दाबी गरे ।

काठमाडौं । नेकपा (माओवादी केन्द्र)को भातृ संगठन योङ कम्युनिष्ट लिग (वाईसीएल)को अध्यक्षमा सुवोध श्रीपाइली चयन भएका छन् । काठमाडौंमा सम्पन्न वाइसीएलको राष्ट्रिय भेलाले श्रीपालीलाई अध्यक्षमा चयन गरेको हो ।

यस्तै महासचिवमा गणेश शाही चयन भएका छन् । वाइसीएलको पदाधिकारीमात्रै ६१ जनाको बनेको छ भने केन्द्रीय समिति ३ सय ५१ सदस्यीय घोषणा भएको छ । पदाधिकारीमा उपाध्यक्ष, महासचिव, सचिव, कोषाध्यक्षलगायतको पद सिर्जना गरिएको छ ।

शुक्रबार वाईसीएलको राष्ट्रिय भेलाको उद्घाटन पार्टी अध्यक्ष पुष्पकमल दाहाल ‘प्रचण्ड’ले गरेका थिए । त्यसपछि बन्दसत्र सम्पन्न भए पनि निर्वाचन प्रक्रिया सुरु भएपछि सर्वसम्मत रुपमा श्रीपाली अध्यक्ष चयन भएका हुन् । यसअघि श्रीपाली वाईसीएलको सहसंयोजक थिए भने सुमन देवकोटा संयोजक थिए । देवकोटाको ४० वर्षे उमेर हद कटेपछि श्रीपाइलीले नेतृत्व गर्ने मौका पाएका हुन् ।

यसअघिको सम्मेलनमा सुमन देवकोटा र श्रीपालीबीच नेतृत्व लिनेबारे विवाद भएपछि पार्टीले देवकोटालाई संयोजक र श्रीपालीलाई सहसंयोजक बनाइएको थियो । तर, देवकोटाको ४० वर्षे उमेरहद पूरा भएपछि श्रीपालीलाई नै अध्यक्ष बनाइएको हो । यस्तै वाईसीएलको महासचिवका लागि ज्ञानबहादुर गुरुङ, गणेश शाही र मिङमा डण्डु शेर्पा गरेर ३ जनको दाबी रहे पनि छलफल पछि शाहीले बाजी मारेका हुन् ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाली राजनीतिका वौद्धिक व्यक्तित्व वरिष्ठ समाजवादी चिन्तक एवं नेपाली कांग्रेसका नेता प्रदीप गिरिको निधनले स्तब्ध बनाएकोबताएका छन् ।

गिरिको निधनबाट समकालिन नेपाली राजनीतिमा एक गहिरो अभावको अनुभूति भएको भन्दै श्रद्धाञ्जली व्यक्त गरेका छन् ।उनले सामाजिक संजाल फेसबुकमा शोक सन्तप्त परिवारजनप्रति समवेदना प्रकट गरेका छन् ।

उनले लेखेका छन्,’नेपाली राजनीतिका वौद्धिक व्यक्तित्व वरिष्ठ समाजवादी चिन्तक एवं नेपाली काँग्रेसका नेता प्रदीप गिरीको निधनले स्तब्ध बनाएको छ । गिरीको निधनबाट समकालिन नेपाली राजनीतिमा एक गहिरो अभावको अनुभूति गर्दै उहाँप्रति हार्दिक श्रद्धाञ्जली व्यक्त गर्दछु । शोक सन्तप्त परिवारजनप्रति समवेदना प्रकट गर्दछु ।’

 

काठमाडौं । महाधिवेशन सम्पन्न भएको करिब ८ महिनापछि नेकपा माओवादी केन्द्रका अध्यक्ष पुष्पकमल दाहाल प्रचण्डले २० जना पदाधिकारी प्रस्ताव गर्दा स्थायी कमिटी बैठकले ताली बजाएर अनुमोदन गर्‍यो । प्रचण्डलाई यसअघि नै महासचिव लगायत मुख्य पदका आकांक्षी नेताहरुले जसको नाम प्रस्ताव गरे पनि मान्ने वचन दिइसकेका थिए ।

पार्टीभित्र नेताहरुलाई लडाए, जुधाएर र अन्तिममा सबैको साझा नेताका रुपमा सबैको व्यवस्थापन गरेर ३५ वर्षदेखि निर्विकल्प नेतृत्व गर्दै आएका प्रचण्डले यसपटक पनि आफूलाई अप्ठेरो पर्ने कामबाट सहज पार पाएका छन् । महासचिव पदका प्रमुख दाबेदार वर्षमान पुन र जनार्दन शर्मामध्ये एक छान्नु उनका लागि सहज थिएन, त्यसैले उनले सहज विकल्पमा रुपमा देव गुरुङ निकाले ।

पार्टीमा जनयुद्धकालीन वरिष्ठता र शान्ति प्रक्रियापछिको एकीकरणका धाराहरुसमेत समेटेर उनले २० जना पदाधिकारी छाने । यसो गर्दा वरिष्ठताका आधारमा नारायणकाजी दोस्रो वरियतासहित वरिष्ठ उपाध्यक्ष र कृष्णबहादुर महरा एकल उपाध्यक्ष भए । उपाध्यक्षमा अरु नेताहरु व्यवस्थापन गर्नुभन्दा उनले महासचिव र उपाध्यक्षका दाबेदारहरुलाई उपमहासचिवमा सेटल गरे ।

यसबीचमा उनले हरिबोल गजुरेल र पम्फा भुसालमध्ये एकजनालाई महासचिव बनाउने योजना पनि सुनाएका थिए । तर एकाएक पछिल्लो पटक उनले महरापछिको वरियतासहित देव गुरुङलाई छाने । यद्यपी वरिष्ठताकै आधारमा हो भने गुरुङभन्दा हरिबोल सिनियर हुन् । उपमहासचिव राखिएकोमा उनी सन्तुष्ट छैनन् ।

महासचिवको दावी गरेका वर्षमान पुन, जनार्दन शर्मा, गिरिरामणी पोखरेल, शक्ति बस्नेत, पम्फा भुसाल, मात्रिका यादव जस्ता नेता उपमहापसचिवमा समेटिँदा स्थायी कमिटीका सिनियर सदस्यबाट छानेर ९ जना सचिव बनाइएको छ ।

सचिवमा उमेर तथा राजनीतिक जीवनका हिसाबले समेत अवकाश भइसकेका दिनानाथ शर्माजस्ता पाका नेतासमेत समेटेर प्रचण्डले ९ जनाको नाम पेश गरेका थिए । चक्रपाणी खनाल, देवेन्द्र पौडेल, लिलामणी पोखरेल, गणेश साह, हितमान शाक्य, हितराज पाण्डे, डिलाराम आचार्य र राम कार्कीलाई सचिव बनाइएको छ ।

कोषाध्यक्ष पदमा भने लो प्रोफाइलका नेता श्रीराम ढकाल चयन भएका छन् । उनी लामो समयदेखि कार्यलय सचिव थिए । चाँडै नै पार्टीको विधान महाधिवेशन आयोजना गर्ने भएकाले अहिलेको पदाधिकारी टिम तदर्थ प्रकारको रहेको पाध्यक्ष कृष्णवहादुर महराले बताए । उनले चुनावलाई केन्द्रित गरेर अस्थायी प्रबन्ध गरिएको बताए ।

प्रचण्डले चलाखीपूर्वक पेश गरेको पदाधिकारी सूचीमा शान्ति प्रक्रियापछि पार्टी एकतामा जोडिएका तत्कालीन एकता केन्द्रका नारायणकाजी श्रेष्ठ, गिरिराजमणी पोखरेल र लिलामणी पोखरेललाई समेटेका छन् । त्यस्तै, नेकपा मसालबाट जोडिएका डिलाराम आचार्य पनि सचिवमा समेटिएका छन् ।

नेकपा संयुक्तबाट पार्टी एकतामा जोडिएका गणेश साह समेत पदाधिकारीमा समेटिँदा जनयुद्धकालीन पृष्ठभूमिका नेताहरुले बाँकी जिम्मेवारी पाएका छन् । नेता व्यवस्थापनका नाममा आउटडेटेड व्यक्तिको भारीभर्कम पदाधिकारी बनाउँदा क्षमतावान युवा पुस्ता छुटेको टिप्पणी भइरहेको छ ।

त्यस्तै २१ सदस्यीय पदाधिकारीमा दलितको प्रतिनिधित्व छैन भने महिला एकजनामात्र छन् ।

माओवादीले बनाएको यो पदाधिकारी टिमलाई चुनाव केन्द्रित भनिएको छ । त्यसैले यो बैठकले सबैको चित्त बुझाउन खोज्दा सोही बमोजिमका नेताको व्यवस्थापन गरिएको छ । बैठकले भदौ ७ गतेसम्म गठबन्धनले सिट बाँडफाँटको टुंगो लगाउने अनुमान गर्दै त्यसपछि सातै प्रदेशमा सन्देशमूलक भेला तथा प्रशिक्षण सन्चालन गर्ने निर्णय समेत गरेको छ । सोही बैठकले १२५ सदस्यीय पोलिटव्युरो र ४१ सदस्यीय स्थायी कमिटीको टुंगो लगाएको छ ।