Category: विश्व प्रेस

काठमाडौं । भीषण आँधीको त्राशले अमेरिकाको फ्लोरिडा राज्य अस्तव्यस्त बनेको छ । मानिसहरु आँधीबाट बच्न भागाभाग गरिरहेका छन् ।
हेलेन नामक आँधीले हिर्काएको दुई हप्ता नबित्दै अर्को आँधीले फ्लोरिडालाई अत्याएको हो ।

‘मिल्टन’ नाम दिइएको यो आँधीलाई अहिले क्याटेगोरी ५ मा राखिएको छ, जहाँ हावाको बेग १६५ माइल प्रतिघन्टासम्म हुन्छ । बुधबार राति आँधी उत्कर्षमा पुग्ने अधिकारीहरुले बताएका छन् ।

राष्ट्रपति जोइ बाइडेनले मंगलबार फ्लोरिडाका मानिसहरुले उनीहरुको जीवन मरणको अवस्था रहेको भन्दै घर छोड्न चेतावनी दिएका थिए । उक्त चेतावनीलगत्तै फ्लोरिडाका मानिसहरु कुम्लो कुटुरो बोकेर सुरक्षित स्थानतर्फ लागिरहेका छन् । राज्यले समेत मानिसहरुलाई भगाउन सहयोग गरिरहेको छ । यसअघिका आँधीमा यस्तो भागाभाग भएको थिएन ।

गभर्नर रोन डेसान्टिसले मंगलबार एक सम्बोधन गर्दै आँधीबाट जोगिन भागेकाहरुका लागि शहरबाहिर दर्जनौं सेल्टरहरु बनाइएको जानकारी दिए ।

शहरमा इन्धनको समेत अभाव सुरु भएको छ । पेट्रोल स्टेसनहरुमा लामा लामा लाइनहरु छन् । केही पेट्रो स्टेसन बन्द भइसकेका छन् ।

ह्वाइट हाउसबाट मंगलबार सम्बोधन गर्दै राष्ट्रपति बाइडेनले यो आँधी शताब्दीकै ठूलो हुन सक्ने चेतावनी दिए ।
‘तुरुन्तै आफ्नो बासस्थान छोडिहाल्नुस,’ उनले फ्लोरिडावासीलाई भने ।

आँधीको सामनामा जुट्नुपर्ने भएकाले ह्वाइट हाउसले बाइडेनको आसन्न जर्मनी र एंगोलाको भ्रमणसमेत रद्द गरेको छ । करिब दुई हप्ता अगाडिको हेलेन आँधीमा २२५ जनाको ज्यान गएको थियो भने सयौं हराइरहेका छन् ।

नेसनल हुरेकेन सेन्टरले हेलेनभन्दा मिल्टन आँधी भयानक हुन सक्ने जनाएको छ । हेलिन आँधीले सडकमा थुपारेका वस्तुहरु मिल्टनले हावामा उडाउन सक्ने र मानिसहरुलाई चोटपट लाग्न सक्ने सेन्टरको चेतावनी छ ।

आँधीहरुलाई हावाको बेगका आधारमा वर्गीकरण गरिन्छ । क्याटेगोरी ३ र त्योभन्दा माथिका आँधीहरु गम्भीर र खतरनाक प्रकृतिका मानिन्छ । तिनीहरुले ठूलो जनधनको क्षति गर्न सक्ने नेसनल वेदर सर्भिस बताउँछ ।

थुप्रै काउन्टीहरुमा मंगलबारदेखि नै भागदौड सुरु भएको थियो । वेस्टर्न र सेन्ट्रल फ्लोरिडामा पुल क्रस गर्दा लाग्ने दस्तुर मिनाहा गरिएको छ । मंगलबारबाट अधिकांस काउन्टीहरुमा स्कुलहरु बन्द गरिएका छन् । टान्पा र ओर्लान्डोमाले आँधी नसकिएसम्म उडान स्थगित गर्ने घोषणा गरेका छन् ।

नेसनल हुरिकेन सेन्टरले मिल्टन आँधी बुधबार राति अति नै खतरनाक हुने बताएको छ । यसले टाम्पा शहरको नजिक हान्नेछ जहाँको नगर क्षेत्रमा ३० लाखभन्दा बढी जनसंख्या छ । मौसमी भविष्यवाणी गर्नेहरुले भारी वर्षात र बाढीको समेत अनुमान गरेका छन् ।

काठमाडौं । भारतको जम्मु र कास्मिर क्षेत्रको चुनावी नतिजामा भारतीय राष्ट्रिय कंग्रेसको नेतृत्वको गठबन्धनको ४९ सिट आएको छ । एकल बहुमत पुग्न ४६ सिट आवश्यक हुन्छ ।

भारतीय सत्ताधारी दल बीजेपीलाई राहत भएको छ । ९० स्थानमा भएको चुनावमा बीजेपीले २९ सिट जितेको हिन्दुस्तान टाइम्सले उल्लेख गरेको छ ।

हिन्दुस्तान टाइम्सका अनुसार सन २०१४ यताको यो पहिलो राज्य चुनाव हो ।

भारतको संविधानको धारा ३७० सन २०१९ मा खारेज गरेर कास्मिरको स्वायत्तता कमजोर पारिएको तथा जम्मु कास्मिर र लद्दाक तीन क्षेत्रमा भाग लगाइएकोमा धेरै विरोध भएको थियो।

तर, बीजेपीले जम्मु क्षेत्रका हिन्दु मतदातालाई रिझाएर मत ल्याएको छ ।

जम्मु र कास्मिर क्षेत्रमा तीन चरणको चुनाव भएको थियो।पहिलो चुनाव सेप्टेम्बर १८, दोस्रो सेप्टेम्बर २५ र तेस्रो अक्टोबर १ मा भएको थियो ।

दलको एकल सिटको आधारमा बीजेपी जम्मु कास्मिरको दोस्रो ठूलो दल भएको छ ।

बेजीपी २९ सिट ल्याएर दोस्रो हुँदा जम्मु कास्मिरको क्षेत्रीय दल जम्मु एण्ड कास्मिर नेसनल कन्फरेन्स्को एकल ४२ सिट छ ।

यो दल नेतृत्वको गठबन्धनमा जोडिएको कंग्रेसको भने ६ सिट आएको भारतीय निर्वाचन आयोगले सार्वजनिक गरेको छ ।

काठमाडौं । केन्द्रको चुनावको एक्जिट पोल जस्तै राज्यको चुनावको एक्जिट पोलमा पनि भारतीय मिडियाहरू असफल भएका छन्।

भारतीय राष्ट्रिय कांग्रेसले जित्ने र बिजेपीले हार्ने भनिएकोमा नतिजा ठीक उल्टो देखिएको छ । भारतीय मिडिया लाइभ मिन्टका अनुसार हरियाणामा बिजेपीको ४८ सिट आउँदा काङ्ग्रेस ३७ सिट आएको छ ।

सन २०१९ को चुनावमा एकल बहुमत आउन आवश्यक ४० सिट नपुगेको बीजेपीलाई यो ‘ऐतिहासिक’ सफलता भएको भारतीय मिडियाहरूले उल्लेख गरेका छन्।

भारतीय प्रधानमन्त्री नरेन्द्र मोदीले चुनावी जितपछि भनेका छन्, ‘पहिलो पटक दुई कार्यकाल सकेर हरियाणामा सरकार बनेको छ ।’

भारतीय मिडिया तथा सोसल मिडियामा भने कांग्रेसले गठबन्धनमा राम्रो मिल्न नसकेर नतिजा कमजोर भएको भन्न थालिएको छ ।

हरियाणा चुनावको सानदार विजयले गठबन्धनबाट सरकार टिकाउन बाध्य बीजेपीलाई राहत दिएको बताइएको छ ।

काठमाडौं । दक्षिणपूर्वी एसियाली देश कम्बोडियामा चिनियाँ सैन्य शिविर हुन सक्ने भन्दै अमेरिकाले चिन्ता व्यक्त गरेको छ ।

बीबीसीका अनुसार दक्षिण चीन सागरमा मात्र नभएर कम्बोडियामा सैन्य शिविर हुनुलाई अमेरिकाले चिन्ताको रूपमा लिएको छ ।

सेटेलाइट तस्बिर हेरेर बीबीसीले चिनियाँ सैन्य शिविर भएको अनुमान गरेको हो । तिनलाई हेर्दा चिनियाँ जल सेनाको शिविर हुन सक्ने बीबीसीले अनुमान गरेको छ । तर कम्बोडिया सरकारले भने आफ्नो बन्दरगाह सबै मित्रवत् देशहरूले प्रयोग गर्न सक्ने बताउँदै स्थायी शिविर भने नभएको जिकिर गरेको पनि बीबीसीले लेखेको छ ।

विश्वको सबैभन्दा ठूलो जलशक्ति चीनको छ । तर, चीनको सैनिक शिविर चीन बाहिर जिबुटीमा मात्र छ । जिबुटी अफ्रिकी देश हो । सन २०१६ मा त्यो शिविर सुरु भएको थियो। कम्बोडियामा शिविर राखिएको पुष्टि भएमा यो दोस्रो हुनेछ ।

काठमाडौं । भारतका माओवादी प्रभावित आठ राज्यका मुख्यमन्त्रीसँग भारतीय गृहमन्त्री अमित शाहले बैठक गर्ने भएका छन् ।

भारतीय मिडियाहरूका अनुसार छत्तिसगढ, आन्ध्र प्रदेश, बिहार, मध्यप्रदेश, महाराष्ट्र, झारखण्ड, ओडिसा र तेलङ्गना राज्यका मुख्यमन्त्रीहरूसँग दिल्लीमा सोमबार बैठक गर्ने भएका छन् ।

भारतको माओवादी प्रभावित छत्तिसगढमा एकै कारबाहीमा ३१ माओवादी नेताकार्यकर्ताहरुको ज्यान गएपछि यस्तो बैठक हुन लागेको हो । त्यो घटना २४ वर्षको छत्तिसगढको इतिहासमा सबैभन्दा ठूलो माओवादीलाई भएको क्षति थियो ।

वामपन्थी अतिवादको नाम दिइएर भारतले माअ‍ोवादी विरुद्ध कारबाही गर्न थालेको हो ।

भारत सरकारको दाबी अनुसार भारतमा वामपन्थी अतिवादका घटना मोदी सरकार आएपछि ७२ प्रतिसतले घटेको छ भने सन २०२३ मा मृत्युदर पनि ८६ प्रतिसतले घटेको छ ।

अहिले भारतीय माओवादीहरूले अन्तिम लडाइ लड्दै आएको बताइन्छ ।

भारत सरकारले माओवादी प्रभावित क्षेत्रहरूमा सडक तथा मोबाइल सञ्चार बिस्तार गरिरहेको छ ।

भारतीय मिडियाहरूका अनुसार त्यस अन्तर्गत १४ हजार ४०० किलोमिटर सडक तथा ६ हजार मोबाइल टावरहरू बनाइएका छन् ।

भारतका ८०० जिल्लाहरूमा अहिले ३८ जिल्लामा मात्रै माओवादी समस्या भएको बताइएको छ ।

काठमाडौं । दश महिना अगाडि चुनाव जितेर आएका राष्ट्रपति महोमद मैजु भारत भ्रमणमा गएका छन् । उनको आज सुरु भएको भारत भ्रमण यसकारण महत्वपूर्ण छ कि उनले भारत पहिले भ्रमण गर्ने प्रचलन तोडेर पहिलो औपचारिक भ्रमणमा टर्की र पहिलो राजकीय भ्रमणमा चीन पुगेका थिए ।

भारतीय समकक्षी द्रौपदी मुर्मुको निमन्त्रणामा मैजु भारत भ्रमणमा गएका हुन् । माल्दिभ्समा रहेका भारतीय सैनिक फिर्ता गर्ने इण्डिया आउट मुद्दा लिएर चुनाव जितेका उनले भारतसँगको हाइड्रोग्राफिक सर्वे भने नवीकरण नगर्ने बेलायती विश्व च्यानल बीबीसीसँग बताएका छन् ।

पाँच दिने भारत भ्रमणमा उनले समकक्षी मुर्मुका साथै प्रधानमन्त्री मोदी र अरु उच्च अधिकारीहरु भेट्ने कार्यक्रम तय भएको माल्दिभ्सको मिडिया सनले उल्लेख गरेको छ । मैजु र मोदीबीच यसअगाडि दुई पटक भेट भइसकेको छ । दुबईमा भएको कोप २८ र मोदीको शपथग्रहण कार्यक्रममा उनीहरुको भेट भएको थियो । भारतको राजकीय भ्रमण भने यो पहिलो हो ।

इस्लामावाद । पाकिस्तानका पूर्वप्रधानमन्त्री इमरान खानका समर्थकले प्रदर्शनका क्रममा सडक कब्जा गर्ने प्रयास गरेपछि शनिबार पाकिस्तानको राजधानी इस्लामावादको सामान्य जनजीवन प्रभावित बनेको छ ।

पाकिस्तानको सत्तारूढ गठबन्धनमाथि धाँधलीको आरोप लागेको फेब्रुअरीको चुनावमा खानलाई उम्मेदवारी दिनबाट रोक लगाइएको थियो ।

निर्वाचनपछि खानविरूद्ध लगाइएका दर्जनौं कानूनी अभियोगहरूमा अदालतले खानलाई सफाइ दिएको छ, तर पूर्वप्रधानमन्त्री खानको पार्टी पाकिस्तान तेहरिक–ए–इन्साफ (पीटीआई)ले नियमित प्रदर्शनका साथ सरकारको प्रदर्शनमाथि रोक लगाउने निर्देशनको अवज्ञा गरेको छ ।

उत्तर पश्चिमी खैबर पख्तुनख्वा प्रान्तमा रहेको उनको पावरबेसबाट पीटीआई कार्यकर्ताहरू शुक्रबार इस्लामावादतर्फ जान थालेका छन्, तर उनीहरूलाई कन्टेनर अवरोध र अश्रुग्याँसको झोंकाको सामना गर्नुपरेको छ ।

अक्टोबर १५ मा सुरु हुने साङ्घाई कोअपरेसन अर्गनाइजेसन (एससीओ)को शिखर सम्मेलनअघि सुरक्षाको प्रत्याभूति गर्नुपर्ने आवश्यकता औंल्याउँदै शनिबार साना र छरिएर रहेका काफिलाहरूले इस्लामावादमाथि दबाब दिएका थिए ।

‘मलाई हाम्रा सबै जनताप्रति गर्व छ’, खानले शनिबार दिउँसो सामाजिक सञ्जाल एक्समा पोस्ट गरेको सन्देशमा भनिएको छ, ‘हिजो बाहिर (सडकमा) निस्कँदा र अविश्वसनीय बाधाहरू पार गर्दै तपाईंले अविचलित लचिलोपन र साहस देखाउनुभयो ।’

लाहोरमा शनिबार पनि विरोध प्रदर्शन भएको थियो, तर पूर्वी मेगासिटीलाई राजधानीसँग जोड्ने मुख्य मोटरमार्ग अवरुद्ध गरिएको थियो ।

यसैबीच एम्नेस्टी इन्टरनेसनलले सञ्चार कटौती र सडक अवरोधले जनताको अभिव्यक्ति स्वतन्त्रता, सूचनामा पहुँच, शान्तिपूर्ण भेला हुने र हिँडडुल गर्ने अधिकारको हनन गरेको जनाएको छ ।

‘यो प्रतिबन्ध पाकिस्तानमा विरोध प्रदर्शन गर्ने अधिकारमाथिको चिन्ताजनक दमनको एक हिस्सा हो’, अधिकारवादी समूहले भनेको छ ।

सामाजिक सञ्जाल एक्सलाई पनि चुनावपछि पाकिस्तानमा प्रतिबन्ध लगाइएको छ । मतदानको दिन मोबाइल इन्टरनेट पनि काटिएको थियो र पीटीआईले निर्वाचनमा व्यापक रूपमा अनियमितता भएको आरोप लगाएको थियो ।

खानले सन् २०१८ देखि २०२२ सम्म प्रधानमन्त्रीका रूपमा पाकिस्तानको नेतृत्व गरेका थिए । उनलाई पाकिस्तानको राजनीतिक ‘किङमेकर’ मानिएको शक्तिशाली सैन्य संस्थापनसँग सम्बन्ध विच्छेद भएपछि संसदमा अविश्वासको प्रस्ताव ल्याई अपदस्थ गरिएको थियो ।

यसैबीच चिनियाँ समाचार संस्था सिन्ह्वाका अनुसार पाकिस्तानको उत्तरपश्चिम खैबर पख्तुनख्वा प्रान्तमा सुरक्षा बल र सशस्त्र लडाकू समूहबीच भएको झडपमा ६ सैनिक र त्यति नै सङ्ख्यामा सशस्त्र आक्रमणकारीको मृत्यु भएको सेनाले शनिबार जारी गरेको विज्ञप्तिमा जनाइएको छ ।

उक्त घटना प्रान्तको उत्तरी वजिरिस्तान जिल्लामा भएको र त्यहाँ दुई पक्षबीच गोली हानाहान भएको इन्टर सर्भिसेस पब्लिक रिलेसन्स (आईएसपीआर) नामक सेनाको सञ्चार शाखाले जारी गरेको विज्ञप्तिमा उल्लेख छ । -रासस/एएफपी

काठमाडौं । इजरायल र गाजाको युद्ध रिपोर्ट गरेका बीबीसी तथा सीएनएन च्यानलका पत्रकारहरुले आफ्नो मिडिया इजरायल पक्षधर भएको बताएका छन् । बेलायती विश्व च्यानल बीबीसी र अमेरिकी विश्व च्यानल सीएनएनले अलजजिराको लिसनिङ पोस्ट कार्यक्रममा यस्तो बताएका हुन् ।

अलजजिराका अनुसार समाचार कक्षका उपल्लो ओहोदाका अनुहारहरुले इजरायलको पक्षधरता दिने र पुष्टि नहुने कुरालाई पनि इजरायली पक्षको छ भने प्रशारण गर्ने उनीहरुले बताएका छन् । अरबी भाषामा लेखिएका दिन तथा हप्तालाई हमासले लेखेको कुरा भन्दै इजरायली सैन्य अधिकारीले गरेको दाबीलाई एक प्यालेस्टाइनी कर्मचारीले गलत हो भन्दाभन्दै सीएनएनले प्रशारण गरेको बताइएको छ ।

४० हजारको ज्यान गएको समाचारलाई ठूलो नबनाएर हमासलाई उत्तरदायी बनाउने कोणमा समाचार बनाउन सीएनएनमा दबाब दिइने पत्रकारहरुले गुनासो गरेका छन् । बीबीसीले अन्तर्वार्ता लिँदा पक्षधरता देखाउने पत्रकारहरुले बताएका छन् ।

इजरायली पक्षलाई सोध्ने प्रश्न नरम हुने उनीहरुको भनाइ छ । इजरायली अतिथिले बालबालिकालाई आगोमा हालिएको, बालबालिकालाई टाउकोमा गोली हानिएको जस्ता झूटा कुरा भन्दा पनि कुनै प्रतिप्रश्न नगरिने उनीहरुले गुनासो गरेका छन् ।

प्यालेस्टाइनीहरुलाई भने जायोनिस्ट भन्ने शब्द लेखेकै भरमा पनि कडाइ गरिने बताइएको छ । युक्रेन र रुस युद्धमा रुसलाई खलनायक र युक्रेनलाई पीडितको रुपमा चित्रित गरेका बीबीसी र सीएनएनले इजरायली हमलामा निर्दोष मान्छेहरु हजारौं मारिँदा पनि इजरायलको प्रतिरक्षा अधिकार भन्दै बचाउन गरेको कुरा अहिले विश्वभर आलोचित छ ।

इजरायल गाजा युद्धले बीबीसी र सीएनएनले आफ्नो विश्वास गुमाएको चर्चा धेरैले गर्दै आएका छन् । मूलधारका मिडियाहरु मात्रै होइन, सोसल मिडिया मेटालगायतले पनि इजरायली पक्षधरता लिएको आरोप छ । टर्कीलगायतका युद्धमा नजोडिएका देशहरुले पनि त्यो आरोप लगाउँदै आएका छन् ।

काठमाडौं । भारत सरकारले गरेको एक अध्ययनले विदेशी पैसा लिएर सञ्चालित एनजीओहरुले विकासलाई रोक्न सक्रिय भएको देखाएको छ ।

भारत सरकारले अमेरिकी खर्बपति जर्ज सोरसको लगानी भएका एनजीओहरुमा गरेको अध्ययनले ती एनजीओहरु विकास तथा आर्थिक क्रियाकलाप रोक्न सक्रिय भएको पाइएको छ ।

भारत सरकारको आन्तरिक राजस्व विभागले गरेको अध्ययनले यस्तो देखाएको हो । रुसी विश्व च्यानल आरटीका अनुसार अक्सफामलगायतका ६ एनजीओमा गरेको अध्ययनले त्यो देखाएको छ ।

खोजका क्रममा अध्ययन गरिएको वक्तव्य, इमेल, सम्झौता, बोर्ड बैठकका माइन्युट सबैको अध्ययन गर्दा यस्तो देखिएको पाइएको छ । अध्ययन गरिएका एनजीओहरुले ७५ प्रतिशतभन्दा धेरै रकम विदेशबाट आएको पाइएको छ । भारतले अक्सफामलाई सन् २०२२ मै बन्द गराइसकेको छ ।

काठमाडौं । युक्रेन र इजरायललाई हतियार दिएको विरोधमा जर्मनीको सडक तातेको छ । प्रदर्शनकारीहरुले त्यसको विरोध गरेर आन्दोलन गरेका छन् ।

आन्दोलनको खबरलाई अमेरिकी तथा युरोपेली मिडियामा खासै स्थान दिइएको छैन, तर यो प्रदर्शनलाई रुसी विश्व च्यानल आरटीले ठूलो स्थान दिएको छ ।

आरटीका अनुसार बर्लिनको सडकमा हजारौंको प्रदर्शनी भएको छ । आणविक युद्धको जोखिम भएको भन्दै उनीहरुले त्यस्तो प्रदर्शन गरेका हुन् ।

पूर्व र पश्चिम जर्मनीको एकता दिवसको अवसर पारेर आन्दोलन भएको आरटीले उल्लेख गरेको छ । धेरै प्रदर्शनकारीहरुले रुस र प्यालेस्टानको झण्डा बोकेका थिए । आयोजकहरुले प्रदर्शनमा ४० हजारको सहभागिता भएको दाबी गरेका छन् ।

काठमाडौं । इजरायलले गाजालगायत प्यालेस्टाइनी भूमि र लेबनानमा निरन्तर हमला जारी राख्दा पश्चिम एशियामा ठूलो युद्धको दुन्दुभी बज्न थालेको छ ।

शनिवार विहानैदेखि इजरायल र लेबनानमा ठूला हमला भएका छन् । इजरायलको आक्रमणमा हालसम्म २ हजारभन्दा बढी निर्दोष मानिस मारिएको लेबनानी स्वास्थ्य मन्त्रालयले जनाएको छ ।

मृत्यु हुनेमा १२७ बालबालिका र २६१ जना महिला छन् । यसैबीच इजरायलले एकोहोरो आक्रमण गरिरहेको लेबनानबाट शनिवार विहान काउन्टर हमला भएको छ ।

लेबनानबाट उत्तरी इजरायलमा ५ वटा रकेट हमला भएको छ । इजरायली सेनाले हमलाबाट मानवीय क्षतिको विवरण नआएको जनाएको छ ।
उता यमनमा हुती विद्रोहीलाई निशाना बनाउँदै अमेरिकी सेनाले गोलाबारी गरेको छ । अमेरिकी सेनाले राजधानी सानासहित यमनका मुख्य शहरमा इरान समर्थित हुथी विद्रोहीविरुद्ध हमला गरेको हो ।

हुथी बिद्रोहीले गत सोमवार अमेरिकी रिपर ट्रोड खसालेका थिए । त्यसपछि अमेरिका बमबारीमा उत्रिएको हो ।इजरायलले हमास लडाकु कमाण्डर हसन नसरल्लाहको हत्या गरेपछि इरानले करिब २ सय ब्यालेस्टिक मिसाइल इजरायलाई निशाना बनाएर प्रहार गरेको थियो ।

इरानका सर्वाेच्च नेता अयातुल्लाह खमेनीले सो प्रहारलाई जायज भनेर शुक्रवार नमाजका क्रममा भाषण गरेपछि मध्यपूर्व र पश्चिम एशिया ठूलो युद्धमा फस्ने संकेत देखिएको छ ।

इरानले पश्चिम एशियामा अमेरिकाबाट युद्ध थोपरिएको भन्दै यसको मुस्लिम देशहरुले मिलेर प्रतिकार गर्ने चेतावनी दिएको छ । यसबारे छलफल गर्न इरानी विदेशमन्त्री अब्बास सिरियाको राजधानी दमास्कास पुगेका छन् ।

काठमाडौं । संयुक्त राष्ट्रसङ्घले शुक्रबार समस्याग्रस्त हाइटीमा एक गिरोहको गोली हानाहानमा महिला र बालबालिकासहित कम्तीमा ७० जनाको मृत्युबाट “आतङ्कित” भएको बताएको छ ।

संयुक्त राष्ट्रसङ्घको मानव अधिकार कार्यालयले पोर्ट सोन्डेमा भएको आक्रमणमा कम्तीमा १६ जना गम्भीर घाइते भएको र दर्जनौँ घर र सवारीसाधन आगलागी भएको बताएको छ।

अराजकतामा डुबेको विश्वको सबैभन्दा गरिब देशमध्ये एक, हाइटीमा गिरोहहरूले राजधानी पोर्ट–ओ–प्रिन्स कब्जा गरेका छन् भने सुरक्षा र स्वास्थ्य प्रणाली ध्वस्त भएको छ ।

“हाइटीको पोन्ट सोन्डे सहरमा बिहीबार भएको गिरोहको आक्रमणबाट हामी आतङ्कित भएका छौं”, संयुक्त राष्ट्र मानव अधिकार विभागका प्रवक्ता थामिन अल–खितानले एक विज्ञप्तिमा भने।

“ग्रान ग्रिफ गिरोहका सदस्यले गोली चलाउन स्वचालित राइफलहरू प्रयोग गर्दा कम्तिमा ७० जनाको मृत्यु भएको छ, जसमध्ये करिब १० जना महिला र तीन शिशुहरू थिए ।”

“हाइटी प्रहरीसँगको गोली हानाहानमा दुई गिरोहका सदस्यसहित कम्तीमा १६ जना गम्भीर घाइते भएका छन्। आक्रमणमा गिरोहका सदस्यहरूले कम्तिमा ४५ वटा घर र ३४ वटा गाडीमा आगो लगाएको बताइएको छ ।”

“अधिकारीहरूले यस आक्रमणको द्रुत र गहन अनुसन्धान गर्नु, जिम्मेवारहरूलाई जवाफदेही बनाउनु र पीडित र उनीहरूका परिवारलाई क्षतिपूर्तिको ग्यारेन्टी गर्नु महत्त्वपूर्ण छ”, विज्ञप्तीमा भनिएको छ ।

गत हप्ता संयुक्त राष्ट्रसङ्घको मानवअधिकार कार्यालयले हाइटीमा यस वर्षको हिंसामा तीन हजार ६०० भन्दा बढी मानिस मारिएको जनाएको थियो ।

ललितपुर । छैटौं एसियाली जनसङ्ख्या सम्मेलन आगामी मङ्सिर १२ गतेदेखि १५ गतेसम्म काठमाडौँमा हुनेभएको छ । त्रिभुवन विश्वविद्यालय केन्द्रीय जनसङ्ख्या तथा तथ्याङ्क विभागद्वारा आज यहाँ आयोजित पत्रकार सम्मेलनमा विभिन्न ५० देशका करिब ८०० प्रतिनिधिको सहभागिता रहने बनाइएको छ ।

त्रिवि केन्द्रीय जनसङ्ख्या तथा तथ्याङ्क विभागका प्रमुख प्राडा योगेन्द्रबहादुर गुरुङले चार दिनसम्म चल्ने काठमाडौँ सम्मेलनमा एसियाली मुलुकका जनसङ्ख्याविद्को तर्फबाट १७ विषयमा आधारित ४०० भन्दा बढी कार्यपत्र प्रस्तुत हुने जानकारी दिए ।

विश्वको जनसाङ्ख्यिक परिदृष्य र प्रवृति, यसको राजनीतिक, सामाजिक तथा आर्थिक प्रभाव, विकसित र विकासोन्मुख देशका जनसङ्ख्यालाई प्राप्त हुने अवसर र चुनौतीलगायतका विषयमा केन्द्रित भई कार्यपत्र प्रस्तुत हुने उनले बताए । अहिलेसम्म ४०० प्रतिनिधिसहित २६ देशका ३०० भन्दा बढी कार्यपत्र दर्ता भइसकेको सो अवसरमा बताइयो ।

“आसन्न सम्मेलनमा जनसङ्ख्या र विकासका सन्दर्भमा नेपालले अन्तर्राष्ट्रिय समुदायसँग अनुभव आदानप्रदान गर्ने विश्वास गरिएको छ । नेपालको विकासका एजेण्डालाई थप प्रवद्र्धन गर्ने तथा प्रमाणमा आधारित विकासमा जोड दिनुपर्ने आवश्यकतालाई बढावा दिने अपेक्षा गरिएको छ ।” प्राडा गुरुङले भने । समग्र विश्वसहित एसियाली क्षेत्रको जनसङ्ख्या व्यवस्थापनका पक्षमा नीति–नियम परिवर्तन गर्न तथा नेपालको जनसङ्ख्या नीतिलाई पुनरावलोकन गर्न आसन्न सम्मेलनले मार्गनिर्देश गर्ने उनले जानकारी गराए ।

“जनसङ्ख्याको वास्तविक परदृष्यिलाई ध्यान दिन सकिएन भने समस्या निम्तिन सक्छ, यसलाई ख्याल गरेर नीति योजना बनाउनुपर्छ । जनसङ्ख्या संरचनामा भइरहेको स्थानान्तरणले विश्वसँगै नेपालले पनि विकास र सामाजिक सेवाका क्षेत्रमा लिइरहेका नीतिका बारेमा पुनःविचार गर्न आवश्यक छ । सम्मेलनले सरकारलाई यस विषयमा पनि काफी पृष्ठपोषण गर्ने हाम्रो विश्वास लिएका छौँ ।” प्राडा गुरुङले भने ।

नेपाल जनसङ्ख्या सङ्घका अध्यक्ष डा पदमप्रसाद खतिवडाले जनसङ्ख्याको क्षेत्रमा कार्यरत राष्ट्रिय तथा अन्तर्राष्ट्रिय विज्ञहरुबीच अध्ययन, अनुसन्धान र उत्कृष्ट अभ्यास अन्वेषण गरी साझा अवधारणा तयार गर्न सम्मेलन सफल हुने विश्वास व्यक्त गरे ।

“जनसङ्ख्या वृद्धिदर, स्थानान्तरण तथा व्यवस्थापनसहित दिगो विकासका मुद्दामा आवश्यक नीति, योजना, अनुसन्धान, शिक्षण, अनुगमन तथा मूल्याङ्कन र अन्य समसामयिक विषयवस्तुमाथि सम्बद्ध सरकारी निकाय, विश्वविद्यालय, विकास साझेदार संस्था र अन्य सरोकारवालाको तर्फबाट कार्यपत्र प्रस्तुत हुने सम्मेलन जनसङ्ख्यासम्बन्धि साझा समस्या, चुनौत र देशीय, क्षेत्रीय तथा अन्तर्राष्ट्रिय तहमा अवलम्बन गर्नुपर्ने नीति तथा कार्यक्रमा पहिचान गर्न केन्द्रित हुने छ ।” डा खतिवडाले भने ।

सम्मेलनको सचिवालय जनसङ्ख्या अध्ययन केन्द्रीय विभागमा रहने प्रेस संयोजक चेतन अधिकारीले जानकारी गराए। व्यवस्थित रुपमा सम्मेलन सम्पन्न गर्न सघाउ पु¥याउने उद्देश्यले प्रचारप्रसारसहित विभिन्न ६ उपसमिति गठन गरिएको जानकारी दिँदै प्रेस संयोजक अधिकारीले सम्मेलन खर्च करिब रु पाँच करोड लाग्ने बताए ।
रासस

काठमाडौं । अमेरिकी गुप्तचरी निकाय सीआईएले चीन, इरान र उत्तर कोरियाका लागि सूचकहरूको आवेदन खुलाएको छ ।

बेलायती विश्व सेवा बीबीसीका अनुसार चिनियाँ, फारसी र कोरियाली भाषामा सूचना जारी गरेर अमेरिकाको वैदेशिक जासुसी निकायले यस्तो जानकारी माग गरेको हो । बुधबार सामाजिक सञ्जालमा सार्वजनिक गरेको सीआईएको जानकारीअनुसार ती देशका सूचकहरूले सुरक्षितरूपमा सीआईएलाई जानकारी दिन सक्नेछन् ।

सीआईए प्रवक्ताले भनेका छन्, ‘हामी तानाशाही सरकारका मान्छेहरूले हामी खुला छौं भन्नेमा आश्वस्त दिलाउन चाहान्छौं ।’

सीआईले यो सूचना फेसबुक, एक्स, इन्स्टाग्राम, टेलिग्राम तथा लिन्क्डइनमा सार्वजनिक गरिएको छ । इच्छुक सीआईले सूचकहरूले भीपीएन प्रयोग गरेर जोडिन सक्ने भनिएको छ । यस्तै शैलीमा रूसमा गरिएको सूचक भर्नाबाट राम्रो जानकारी आएको भन्दै सीआईएले चीन, इरान र उत्तर कोरियामा पनि यही नियम लगाउन लागेको बताइएको छ ।

काठमाडौं । मङ्गलवार इरानले इजरायलमा गरेको मिसाइल हमलाको संयुक्त राष्ट्रसंघका महासचिव एन्तोनियो गुतेरेसले कडा शब्दमा निन्दा नगरेको भन्दै इजरायलले उनलाई प्रदेश प्रवेशमा निषेध लगाएको छ ।

यो कुराको सार्वजनिक जनकारी इजरायली परराष्ट्रमन्त्री इजरायल कात्जले दिएका हुन् ।

आरटीका अनुसार कात्जले भनेका छन्, ‘दुनियाँका धेरै देशहरूले इजरायलमा भएको हमलाको निन्दा गरिरहँदा कसैले स्पष्ट रूपमा निन्दा गर्दैन भने उसले इजरायल प्रवेश गर्न पाउँदैन ।’

गुतेरेसलाई उनले संयुक्त राष्ट्रसंघको इतिहासको दाग भन्दै उनले चर्को आलोचना गरेका थिए ।

यद्यपि, गुतेरेसले इजरायलको यो कुरा आएपछि इरानी हमलाको विरोध गरेका थिए । त्यसबारेमा भने इजरायली प्रतिक्रिया आएको छैन ।

अन्तर्राष्ट्रिय न्यायालय होस् वा गाजामा काम गर्ने कर्मचारीको इजरायली गोला बारुदमा भएको हत्यामा होस्, इजरायल र राष्ट्रसंघको तनाव पटक पटक आइरहेका छन् ।

काठमाडौं । मङ्गलबार नेपाली समयअनुसार मध्यरात इरानले इजरायलमाथि हमला गरेको जानकारी सार्वजनिक भयो । इरानले इजरायलमा मिसाइल प्रहार गरेका कारण के के हुन्, इजरायल र इरानी दुस्मनीका जरा के के हुन् भन्नेबारे यस सामग्रीमा चर्चा गरिएको छ ।

१. इरानले मङ्गलबार किन हमला गर्‍यो ?

मङ्गलबार इजरायली भूमिमा इरानले हमला गर्ने मूलतः तीन कारण हुन् । एक- इरानी समर्थनका लडाकु समूहहरु हेजबुल्ला, हमास तथा हुथीहरुलाई इजरायलले हमला गर्‍यो ।

सन् २०२३ अक्टोबर ७ मा हमासले इजरायली भूमिमा आक्रमण गरेबाट सुरु भएको लफडाले क्षेत्रीय रूप लिएको हो ।

इजरायलले अन्तर्राष्ट्रिय अदालतमा मुद्दा पुग्ने गरी बालबालिका, महिला, सर्वसाधारणहर हजारौँको ज्यान लिनेगरि इजरायलको दक्षिणमा रहेको हमास क्षेत्र गाजामा प्रत्याक्रमण गर्‍यो ।

त्यसलाई उत्तरी सीमा क्षेत्रको लेबनानी लडाकु समूह हेजबुल्ल्लाले आक्रमण गरिरह्यो । गत जुलाई ३१ मा इरानका नयाँ राष्ट्रपतिको कार्यभार ग्रहण समारोहमा कतारबाट इरान पुगेका हमासका राजनीतिक प्रमुख इस्काइल हानिएको इजरायलले हत्या गर्‍यो ।

उनी बसेको गेष्ट हाउस उडाएर हत्या गर्‍यो । त्यसपछि हेजबुल्लाका प्रमुख हसन नसरल्लालाई पनि इजरायलले सेप्टेम्बर २७ मा लेबनानी राजधानी बेरुतको बङ्करमाथि बम हमला गरेर हत्या गर्‍यो ।

इरानले हुर्काएका र साथ दिएका दुई लडाकु कमान्डरलाई दुई महिनाको अन्तरमा इजरायलले सफाया गरेपछि इरानलाई केही न केही गर्ने बाध्यता थियो ।

त्यसमाथि इजरायलले लेबनानमा स्थल हमला गरेका समाचारहरू पनि आए । इरानी सडकमा हमला गर्न जुलुस निस्किसकेका थिए । आन्तरिक दबाब, क्षेत्रीय गुड विल र आफ्नो फेससेभिङ गर्न इरानले इजरायली भूमिमा हमला गरेको बुझ्न सकिन्छ ।

२. इरानले मङ्गलबार गरेको हमला नै पहिलो हो ?

होइन यस वर्ष गत अप्रिल १३ मा पनि इरानले इजरायलमा हमला गरेको थियो । त्यो हमलाको तत्कालीन सिधा जरो सिरियामा जोडिएको थियो ।

अप्रिल १ मा सिरियाको दमास्कसमा रहेको इरानी कूटनीतिक नियोगको कन्सुलर भवन इजरायलले हवाई हमला गरेर उडायो । त्यहाँ मारिएका १६ जनामा दुई जना इस्लामिक रिभोलुसनरी गार्ड क्रप्सका उच्च ओहोदाका कमान्डर पनि थिए । त्यसकै प्रतिकारमा इरानले हमला गरेको थियो ।

हमाला अगाडि इरानले अमेरिका, बेलायतलगायतका विभिन्न देशहरूलाई पूर्वसूचना दिएको विभिन्न विश्व मिडियाहरूले लेखेका छन् । मङ्गलबारको हमलामा भने त्यो खालको पूर्वजानकारी नदिएर गुप्तचरी जानकारीबाट पत्ता लगाइएको थियो ।

३. मङ्गलबारको हमलामा इजरायली प्रतिक्रिया के छ ? इरानी दाबी के छ ?

मङ्गलबारको हमलामा इरानले इजरायलको गुप्तचर मोसदको मुख्यालय र इजरायली हवाई सेनाको अड्डामा हमला गरेको जानकारी दिएको छ । इजरायलले भने इरानी मिसाइलहरू धेरै बिचैमा खसालिएकोले धेरै क्षति नभएको बताएको छ ।

इजरायलले इरानलाई ठूलो मूल्य चुकाउनुपर्ने चेतावनी दिएको छ । इरानले पनि इजरायलले प्रतिकार गरे झन् ठूलो हमला गर्ने चेतावनी दिएको इरानी मिडिया तेहरानटाइम्स र कतारी च्यानल अलजजिराले उल्लेख गरेका छन् ।

अमेरिकाले इरानले हानेका २०० मिसाइलहरूमा धेरैजसो झारेको बताएको छ । इरानले आक्रमण गरेपछि इजरायलले लेबनानी राजधानी बेरुतमा हवाई हमला बढाएको समाचारहरू आएका छन् ।

४. विश्व नेताहरूले इरानी हमलाबारेमा के भने ?

अमेरिकी राष्ट्रपति जो बाइडेनले इजरायललाई पूर्ण साथ हुने बताएका छन् भने संयुक्त राष्ट्रसंघका महासचिव एन्तोनियो गुतेरेसले मध्यपूर्वमा बढेको द्वन्द्वको वृद्धिलाई भर्त्सना गर्ने बताएका थिए । अरू विश्व नेताहरुमा पश्चिमा इजरायल समर्थक देशहरूले इरानले द्वन्द्व चर्काएको भन्दै आलोचना गरेका छन् भने अरू देशका मुखर नेताहरूले शान्ति कायम गर्न आग्रह गरेका छन् ।

५. इरान र इजरायलको शत्रुताको जग के हो ?

प्यालेस्टाइनीहरु बसेको भूभागलाई कब्जा गरेर बसाइएकाहरूबाट सन् १९४८ को मेमा इजरायल देश जन्मेको हो ।

इजरायलीहरूले यो हजारौं वर्ष पुरानो आफ्नो भूमि हो भन्दै कब्जा गरेर देश बनाएका हुन् । बसिरहेकाहरूलाई उठाएर, धपाएर र हिंसा गरेर बनाइएको देश भएकोले धेरै देशले इजरायललाई मान्यता अझै दिएका छैनन् । यस्तो नदिनेहरूमा मूलतः मुस्लिम देशहरू छन् । यो ऐतिहासिक कारण हो ।

जसका बाछिटाहरू अहिले घरी गाजा र घरी अरू प्योलेस्टाइनी क्षेत्रहरूमा देखिइरहेको छ ।

अर्को कारण भनेको भूराजनीति र शक्ति प्रदर्शन हो । इजरायल पश्चिम एसियाको शक्तिशाली देश हो । उसलाई क्षेत्रीय रूपमा चुनौती दिने इरानमात्रै हो । यी दुवै देशका सीमा जोडिएका छैनन्, तर उनीहरूका स्वार्थहरू जोडिएका छन् ।

प्रायः इरानले आफैंले हमला नगरेर आफ्ना सहयोगी दस्ताहरू हुथी, हमास र हेजबुल्लालाई प्रयोग गर्ने गरेको थियो, तर पछिल्ला महिनाहरूमा भने उनीहरूको सिधासिधी जस्तै युद्ध भएको छ ।

काठमाडौं । चालू आर्थिक वर्ष नेपालको आर्थिक वृद्धिदर ५.१ प्रतिशत पुग्ने प्रक्षेपण वर्ल्ड बैंकले गरेको छ । गत आर्थिक वर्ष ३.९ प्रतिशत आर्थिक वृद्धि भएको अनुमान छ । उच्च पर्यटक आगमन, जलविद्युत र धान उत्पादनको वृद्धिले आर्थिक वृद्धिदर बढ्ने प्रक्षेपण वर्ल्ड बैंकले गरेको हो ।

विश्व बैंकको आज नेपाल डेभलपमेन्ट अपडेट : अन्तर्राष्ट्रिय आप्रवासन र नेपालमा यसको प्रभाव विषयक प्रतिवेदन सार्वजनिक गर्दै आर्थिक वृद्धिदर विस्तार हुने प्रक्षेपण गरेको हो ।

नेपालको अर्थतन्त्र आगामी आर्थिक वर्ष (२०८२/०८३) भने ५.५ प्रतिशतले वृद्धि हुने अनुमान गरिएको छ । केन्द्रीय बैंकको लचक मौद्रिक नीति र नियामकीय प्रावधानहरूमा गरिएको सहजीकरणका कारण नेपालको वृद्धिमा निजी क्षेत्रको महत्त्वपूर्ण योगदान रहने अनुमान गरिएको छ ।

यद्यपि प्रतिवेदनले बहु जोखिमहरू पनि पहिचान गरेको छ, जसअन्तर्गत वित्तीय प्रणालीमा उच्च जोखिम सहितको निजी क्षेत्रको कर्जा वृद्धिलाई सीमित गर्ने निष्क्रिय कर्जा, लगानी नै प्रभावित हुन सक्ने गरी सम्भावित नीतिको अनिरन्तरता, पूर्वाधार विकासलाई असर गर्ने पुँजीगत खर्चको कार्यान्वयनमा हुन सक्ने ढिलाइ, क्षेत्रीय अस्थिरता र व्यापार अवरोध जसले पर्यटन र आन्तरिक मागलाई कम गर्न सक्ने जस्ता जोखिमहरू औँल्याएको छ ।

“नेपालको अर्थतन्त्र क्रमिक सुधारको मार्गमा छ”,राष्ट्रिय योजना आयोगका उपाध्यक्ष प्राध्यापक डा. शिवराज अधिकारीले भने “बजेटरी प्रक्रियामा सुधार ल्याउँदै पूरा हुने चरणमा रहेका परियोजनाहरूलाई सम्पन्न गरेर पुँजीगत खर्च बढाउने हाम्रो प्राथमिकताले बृहत् अर्थतन्त्रको स्थायित्व सुदृढ गर्नेछ, आन्तरिक उत्पादन बढाउनेछ र धेरै रोजगारी सिर्जना हुनेछन् ।”

आप्रवासी श्रमिक प्राप्त गर्ने गल्फ मुलुकहरू र मलेसियामा आएका झट्काहरूले पनि वृद्धिलाई धिमा गर्न सक्छ, खास गरी घरपरिवारको उपभोग, गरिबी निवारण र मानव पुँजी विकासमा भूमिका खेल्ने अन्तर्राष्ट्रिय विप्रेषणमा यसले असर पुर्‍याउनेछ ।

तथापि, नेपालको आप्रवासन अत्यन्त महँगो, असमान अवसरहरू र धेरैका लागि प्रक्रिया नै चुनौतीपूर्ण रहेको प्रतिवेदनमा भनिएको छ ।

प्रतिवेदनले नेपालको आप्रवासनको फाइदा र लागतका पछिल्ला तथ्यहरू प्रस्तुत गर्दै दिगोपन र प्रतिफल विस्तारको सुनिश्चितता गर्ने उद्देश्यले समावेशी आप्रवासन व्यवस्थापन प्रणाली निर्माणका लागि आवश्यक प्रमुख नीतिगत हस्तक्षेपहरूलाई प्राथमिकताका साथ उल्लेख गरेको छ ।

“वृद्धिको गतिलाई कायम राख्नु नेपालको विकासका लागि महत्त्वपूर्ण छ । यसका लागि प्रमुख क्षेत्रहरू जस्तै पूर्वाधार, सुशासन, मानवपुँजीविकास र निजी क्षेत्रमा निरन्तर सुधारको आवश्यकता पर्दछ”,विश्व बैंकका माल्दिभ्स, नेपाल र श्रीलंकाका लागि राष्ट्रिय निर्देशक डेभिड सिस्लेनले भने “नेपालले विदेशी कामदारहरूबाट रेमिट्यान्सबाट धेरै फाइदा हासिल गरेको छ र यी प्रवाहहरूको व्यवस्थापनमा सुधार, विदेशमा काम खोज्ने नेपालीहरूलाई राम्रोसँग सहयोग गर्न र नेपालमा दक्ष नेपालीहरूलाई उत्पादनशील बनाउन वातावरण सिर्जना गर्ने जीवन्त घरेलु अर्थतन्त्रको निर्माण नेपालको भविष्यको लागि महत्त्वपूर्ण छ ।

सुदृढ र थप समावेशी आप्रवासन व्यवस्थापन प्रणालीले पारदर्शी भर्ना प्रक्रिया स्थापित गर्नेछ, श्रमिकलाई विदेश जान राम्रो तयारी गराउनेछ, श्रम बजारमा आप्रवासीहरूको सुरक्षा र आवतजावतलाई सुनिश्चित गर्नेछ, दीर्घकालका सीप र गन्तव्य विविधीकरणका लागि योजना बनाउनेछ र फर्किएका श्रमिकहरूको पुँजी र सिपलाई प्रभावकारी उपयोग गर्नका लागि सहयोगी वातावरण निर्माण गर्नेछ, प्रतिवेदनमा भनिएको छ ।

अर्धवार्षिक रूपमा प्रकाशित हुने नेपाल डेभलपमेन्ट अपडेटले दीर्घकालीन र विश्वव्यापी दृष्टिकोणसँग सान्दर्भिक गराउँदै पछिल्ला वर्षका आर्थिक विकास सम्बन्धी गहनतम विश्लेषण गर्दै आएको छ ।

काठमाडौं । इरानले इजरायलमा मिसाइल हमला गरेको छ । इजरायली भूमिमा इरानले हानेको मिसाइल इजरायलले लेबनानमा स्थल हमला र हेजबुल्ला प्रमुख हसन नसरल्लालाई हत्या गरेपछि भएको हो ।

बीबीसीका अनुसार इरानले प्रहार गरेका केहि मिसाइल इजरायलले रोकेको छ । इजरायलभरि साइरन बीबीसीले उल्लेख गरेको छ । सामाजिक सञ्जालमा आएका फुटेजमा इरानी हाइपरसोनिक मिसाइल ११० मिनेटमा इजरायल पुगेको तथा लेबनानमा खुशी मनाइएको देखाइएको छ ।

अलजजिराका अनुसार अरब क्षेत्रमा भएका अमेरिकी सैन्य शिविरमा भने इरानले हमला गरेको छैन्। गत अप्रील १३ मा पनि इरानले इजरायली भुमीमा आफ्ना सैन्य कमाण्डर मारेपछि आक्रमण गरेको थियो ।

यसैबिच अमेरिकी रास्ट्रपति जो बाइडेनले इजरायलमा प्रहार भएका मिसाइल रोक्न सेनालाई आदेश दिएका छन् । यो अगाडिको इरानी हमलाका कैयौ ड्रोन र मिसाइल मध्य बाटैमा बेलायत र अमेरिकाले सुट गरेका थिए ।

काठमाडौं । भारततर्फको कास्मिरमा स्थानीय चुनावमा आज अन्तिम दिन भएको छ । अक्टोबर ८ अर्थात अबको एक हप्ता पुगेपछि नतिजा सार्वजनिक हुनेछ । भारतले संविधानको धारा ३७० हटाएर कास्मिरको स्वायत्तताका केही आधार अन्त्य गरेको थियो । त्यसपछि भएको यो प्रथम चुनाव हो ।

चुनावमा एक उम्मेदवारको खुट्टामा जीपीएस ट्र्याकर राखिएको छ । उनी हुन् महोमद सिकन्दर मलिक । कास्मिरको बन्दिपुरा जिल्लाका स्वतन्त्र उम्मेदवार उनले राजनीतिक सभाहरुमा आफ्नो खुट्टामा लगाइएको जीपीएस देखाएर उनी भोट माग्ने गर्छन् ।

तुर्किएको विश्व च्यानल टीआरटी वर्ल्डका अनुसार ३७ वर्षका मलिक कास्मिरको चुनावमा भाग लिएका ८७० उम्मेदवारहरुमा एक हुन् । उनलाई जमात इ इस्लामी नामक इस्लामिक संगठनसँग जोडिएको आरोपमा त्यस्तो गरिएको बताइएको छ ।

उनलाई जीपीएस जोडिएको बारेमा उनले टीआरटी वर्ल्डलाई भनेका छन्, ‘मेरो निजी स्वतन्त्रता हरण गरिएको छ । यसले मेरो जीवनमा धेरै असर गरेको छ ।’

 

काठमाडौं । इजरायलले लेबनानी भूमिमा स्थल हमला सुरु गरेको छ । यस अगाडि हवाई हमलामात्रै गर्दै आएको इजरायलले लेबनानी लडाकु समूह हेजबुल्लालाई लक्षित गरेर हमला सुरु गरेको छ । बेलायती विश्व सेवा बीबीसीका अनुसार इजरायलले ‘सीमित, स्थानीय र लक्षित’ हमला गर्ने बताएको छ ।

इजरायली सेनाको हवाई हमलामा परेर लेबनानी राजधानी बेरुतमा हेजबुल्लाका प्रमुख हसन नसरल्लाको ज्यान गएको थियो । नसरल्लाबाहेक अरु धेरै हेजबुल्लाका कमान्डरहरुको पनि ज्यान गएको छ । नसरल्लालाई हमला गर्नुभन्दा अगाडि इजरायलले हेजबुल्लाले प्रयोग गर्ने पेजर र वाकीटाकीहरुमा विस्फोटक पदार्थ राखेर पड्काएको थियो ।

लेबनानी सरकारी अधिकारीहरुले इजरायली हमलामा हजारभन्दा धेरैको ज्यान गएको तथा १० लाख मान्छे विस्थापित भएको बताएका छन् ।

गत वर्षको अक्टोबर ७ मा हमासले हमला गरेपछि प्रतिकारमा उत्रिएको इजरायलले पछि आक्रमणलाई विस्तार गरेर लेबनान तथा यमनसम्म पु¥याएको हो । लेबनानमा सीमा जोडिएकोले स्थल हमला भएको छ । सीमा नजोडिएको यमनमा हवाई हमला भएको छ । हमलामा धेरै सर्वसाधारणको हताहती भएका समाचारहरु आइरहेका छन् ।

काठमाडौं । जापानका नयाँ प्रधानमन्त्रीले संसद विघटन गरेर चुनाव गराउने भएका छन् ।

जापानको लामो सत्ताधारी दल उदार लोकतान्त्रिक पार्टी (एलडीपी)का प्रधानमन्त्री सिगेरु इसिबाले आगमी हप्ता सदन विघटन गरेर कार्तिक ११ (अक्टोबर २७) मा चुनाव गर्ने तयारी गरेको जापान टाइम्सले उल्लेख गरेको छ ।

जापान टाइम्सका अनुसार जापानको ४६५ सिटे सदनमा सत्ताधारी दल एलडीपीको २५५ सांसद छन् । प्रधानमन्त्री इसिबाले मंगलबार कार्यभार सम्हाल्ने बताइएको छ ।

काठमाडौं । खर्बपति व्यवसायी तथा सामाजिक सञ्जाल एक्सका मालिक एलन मस्कले कमला ह्यारिसले चुनाज जितेमा एक दलीय व्यवस्था हुने जिकिर गरेका छन् । डोनाल्ड ट्रम्पले चुनाव हारे अमेरिकामा फेरि पनि चुनाव नहुने उनको भनाइ छ ।

रुसी विश्व च्यानल आरटीका अनुसार कुनै दल विशेषको पकड नभएका स्विङ स्टेटहरूमा आप्रवासीहरूलाई धमाधम नागरिकता दिएर चुनाव जित्ने डेमोक्रेटिक पार्टीको रणनीति भएको मस्कले बताएका छन् । चुनाव हुन एक महिना मात्रैबाँकी छँदा मस्कको यस्तो बताएका हुन् ।

एक्समा लेख्दै मस्कले बीस गैरकानुनी आप्रवासीमा एकजनाले मात्रै नागरिकता पाए चार वर्षमा त्यो संख्या २० लाख हुने भन्दै डेमोक्रेटिक पार्टीले त्यसरी चुनाव जित्न लागेको दाबी गरे ।

काठमाडौं । भारतीय कम्युनिस्ट पार्टी माक्र्सवादीको अर्को महाधिवेशन नभएसम्मका लागि प्रकाश कारत संयोजक तोकिएका छन् । महासचिव सिताराम यचुरीको निधनपछि दिल्लीमा आइतवार बसेको बैठकले कारतलाई पोलिटव्युरो र केन्द्रीय कमिटीको संयोजक तोकिएको हो ।

पार्टीले यसलाई अन्तरिम नेतृत्व भन्दै आगामी वर्ष हुने २४ औं महाधिवेशनसम्म कारतलाई नेता बनाएको हो । यचुरीभन्दा भन्दा पहिले पनि कारत महासचिव थिए ।

सिपिआइएमको महाधिवेशन आगामी अप्रिलमा हुँदैछ । कुनै बेला भारतीय सत्ता राजनीतिको निर्णायक शक्ति मानिने यो पार्टी अहिले केरल राज्यको नेतृत्वमा सिमित छ भने संसदमा ५ सीटको मात्र शक्ति छ ।