काठमाडौं । चिनियाँ कम्युनिष्ट पार्टीका महासचिव तथा राष्ट्रपति सी जिङपिङले आफ्नो कार्यकालको एक दुर्लभ यात्रा अन्तर्गत आज तिब्बतको राजधानी ल्हासा भ्रमण गरेका छन् ।
क्षेत्रीय राजधानी ल्हासा प्रस्थान गर्नुअघि सीले तिब्बतको दक्षिण–पश्चिमी सहर न्याङ्ची भ्रमण गरे । न्याङ्ची भ्रमणमा राष्ट्रपति सीले सीचुवान–तिब्बत रेलवे परियोजना र प्रस्तावित ल्हासा–न्याङ्ची रेलवे परियोजनाको निरिक्षण समेत गरे ।
बिहीबार सीले न्याङ्चीस्थित सिचुवान–तिब्बत रेलवेको डिजाइनबारे बुझे । साथै, ल्हासा–न्याङ्ची रेलवे परियोजना बारे पनि चासो राखे । गत जुनमा संचालनमा आएको न्याङ्ची–ल्हासा रेल पनि चढे ।
१७४० किलोमिटर लम्बाईको सिचुवान–तिब्बत रेलवे अन्तर्गतको न्याङ्ची महत्वपूर्ण र रणनीतिक यातायात हब समेत हो जसले दक्षिण–पश्चिम चीनको सिचुवानको राजधानी छेङ्दु र ल्हासालाई जोड्नेछ ।
गत जुनमा संचालनमा आएको उक्त रेलवे सेवा तिब्बत प्लेटोको पहिलो बुलेट र विद्युतीय रेलसेवा पनि हो । विश्लेषकहरु राष्ट्रपति सीको भ्रमणलाई तिब्बतको आर्थिक विकास र स्थायित्व तथा तिब्बती नागरिकको जीवनस्तरमा सुधार गर्न केन्द्रिय सरकारको विकास प्राथमिकता रहेको रुपमा औंल्याउँछन् ।
‘चीनले आगामी पाँचवर्षभित्र सीमावर्ती सहर र क्षेत्रलाई विकास गर्ने योजना बनाएको छ । पश्चिम र पूर्वी क्षेत्रबीचको आर्थिक असमानता हटाउनुलाई चीनले दोस्रो शताब्दीको प्रमुख लक्ष्य बनाएको छ’ इन्स्टिच्युट अफ साउथ एसियन स्टडिजका उपनिर्देशक लुइ चुनहाओले भने ग्लोबल टाइम्ससँग भने ।
निर्माण सम्पन्न भएपछि सिचुवान–तिब्बत रेलसेवाले चीनका अन्य क्षेत्रसँगको यात्रा समयलाई ३० प्रतिशतले घटाउँछ । साथै, ४८ घण्टा लाग्ने छेङ्दु र ल्हासाको यात्रा अब १३ घण्टामै सीमित हुनेछ ।
विश्लेषकहरु यो रेल लाइनले राष्ट्रिय रेल परियोजनामा तिब्बतको प्रतिष्ठा अझै वृद्धि हुनेछ । साथै, क्षेत्रीय आर्थिक विकास तथा नेपालसहितका छिमेकी मुलुकलाई पनि आर्थिकरुपमा फाइदा पुग्नेछ ।
‘पूर्वाधार संजालमा सुधार भएसँगै तिब्बत दक्षिणपश्चिम चीनको मुख्य आर्थिक थलो बन्नेछ । उदाहरणका लागि, नेपालसँगको आर्थिक र व्यापारिक सहायतामा तिब्बतले समन्वयन गर्नेछ’ लीले भने, ‘तिब्बतमा रेलसेवा हुने वित्तिकै यसले यस क्षेत्रसहित बाहिर पनि सामान तथा कार्गो ढुवानीमा समेत फाइदा पुग्नेछ ।’
ल्हासा भ्रमणमा सीले पोताला दरबारदेखि केही गुम्बाहरुको समेत अवलोकन गरे । राष्ट्रपतिको रुपमा सीले पहिलोपटक ल्हासा भ्रमण गरेका हुन् । चिनियाँ कम्युनिष्ट पार्टीले सय वर्ष मनाएको केही सातामै महासचिव सीको तिब्बत अर्थलाई महत्वपूर्णरुपमा लिइएको छ । सीले यसअघि सन् १९९८ मा फुजियान पार्टी प्रमुखको रुपमा र अर्कोपटक सन् २०११ मा उपराष्ट्रपतिको रुपमा तिब्बत भ्रमण गरेका थिए ।
