Category: स्वास्थ्य-जीवनशैली

काठमाडौं । पछिल्लो २४ घण्टामा शनिबार काठमाडौं उपत्यकामा ५४९ जना नयाँ संक्रमित थपिएका छन् । जसमा काठमाडौंमा ३७० जना, भक्तपुरमा ६७ जना र ललितपुरमा ११२ जना छन् ।

स्वास्थ्य तथा जनसंख्या मन्त्रालयका अनुसार उपत्यकामा ९,२७८ जना सक्रिय संक्रमित छन् । जसमध्ये काठमाडौंमा ५,५८३ जना, भक्तपुरमा १,४४० जना र ललितपुरमा २,२५५ जना छन् ।

मन्त्रालयका अनुसार मोरङ, झापा,सुनसरी, काठमाडौं, भक्तपुर, ललितपुर, चितवन, मकवानपुर, काभ्रेपलाञ्चोक, नुवाकोट, सिन्धुपल्चोक, नवलपरासी, कास्की, बाग्लुङ, गोर्खा, स्याङ्जा, तनहुँ, दाङ, रुपन्देही र सुर्खेत मा ५०० भन्दा बढी संक्रमित छन् ।

यस्तै २०० भन्दा बढी धनकुटा, ईलाम, धनुषा, बारा, सप्तरी, सिराहा, दोलखा, धादिङ, सिन्धुली, रामेछाप, लमजुङ, पर्वत, गुल्मी, पाल्पा, बाँके, बर्दिया, जुम्ला, कैलाली र कंचनपुर छन् ।

काठमाडौं । पछिल्लो २४ घण्टामा १८ सय ५७ जनामा कोरोनाभाइरस संक्रमण पुष्टि भएको छ । १३ हजार १७६ वटा नमूना (पीसीआर ९४०९ र एन्टीजेन ३७६७) परीक्षण गर्दा ती संक्रमित थपिएका हुन् ।

स्वास्थ्य तथा जनसंख्या मन्त्रालयका अनुसार शनिवार २७ जनाको मृत्यु भएको छ भने २२ सय २२ जना निको भएका छन् ।

हालसम्म मुलुकमा ३६ हजार ८६६ जना सक्रिय संक्रमित रहेको मन्त्रालयले जनाएको छ ।

नेपालमा कूल ७ लाख भन्दा बढी कोरोनाभाइरस संक्रमित रहेका छन् भने १० हजार ६९० जनाले ज्यान गुमाएका छन् ।

अहिलेसम्म आईसीयूमा ६१५ जना, भेन्टिलेटरमा १७४ जना, होम आइसोलेशनमा ३३,८३५ जना, संस्थागत आइसोलेशनमा ३,०३१ र क्वारेन्टाइनमा ३४६ जना रहेको तथ्यांकमा उल्लेख छ ।

काठमाडौं । कोरोनाभाइरस संक्रमणको तेस्रो लहर आउने वा नआउने सर्वसाधारणमा निर्भर भएको जनस्वास्थ्यविद्ले जनाएका छन् ।स्वास्थ्य तथा जनससंख्या मन्त्रालयले अबको एक महिना अर्थात् असोज दोस्रो हप्ता संक्रमणको तेस्रो लहर आउने चेतावनी दिएको छ ।

तेस्रो लहर आउने वा नआउने सर्वसाधारणमा निर्भर हुने विज्ञले बताएका छन् । निषेधाज्ञा खुकुलो र चाडपर्व सुरु भएसँगै आउजाउ बढेको र जनस्वास्थ्य सुरक्षा मापदण्ड लागू नगर्दा तेस्रो लहरको जोखिम बढेको बताइएको हो ।

अहिले जनस्वाथ्यका मापदण्ड लागू नगर्दा गत साउनदेखि उकालो लागेको कोरोनाभाइरस संक्रमणदर अहिले पनि जारी छ । गत साउन १ गते दुई हजार ९३६ मा कोरोनाभाइरस संक्रमण देखिएकोमा गत साउन ७ गतेसम्म आइपुग्दा दुई हजार ७१४ जना संक्रमित पुगेका छन् । यस्तै हिजो (शुक्रबार) दुई हजार ६५, बिहीबार दुई हजार ४३३, बुधबार दुई हजार ४८२, मंगलबार दुई हजार ५२५ संक्रमण पुष्टि भएको छ ।

मन्त्रालयका प्रवक्ता डा. कृष्णप्रसाद पौडेलले तेस्रो लहर आउने वा नआउने सर्वसाधारणमा निर्भर भएको बताए । ‘सर्वसाधारणले जनस्वास्थ्यका मापदण्ड लागू गरे भने तेस्रो लहर आउने सम्भावना कम हुन्छ’, उनले भने, ‘तेस्रो लहर नेपालमा भित्र्याउने कि नभित्र्याउने, कस्तो भेरियन्ट ल्याउने भन्ने जनताको हातमा छ ।’ भीडभाडमा हिँड्ने, जनस्वास्थ्यका मापदण्ड लागू नगर्ने हो भने नेपालमा पनि तेस्रो लहर नआउने भन्न नसकिने उनको भनाइ छ । उनले सरकारले मात्र संक्रमण नियन्त्रण गर्न नसकिने भन्दै सर्वसाधारणले पालना गरेको मापदण्डका आधारमा संक्रमण नियन्त्रण गर्न सकिने जानकारी दिए ।

गत वर्ष निधेषाज्ञा खुला भएसँगै सर्वसाधारणले जनस्वास्थ्यमा मापदण्ड लागू नगरेकाले गत चैतमा दोस्रो सातादेखि दोस्रो लहरको संक्रमण फैलिएको थियो । दोस्रो लहरमा मुलुकमा धेरै नै मानवीय क्षति भएको थियो । अहिले नेपालमा कोरोनाको डेल्टा भेरियन्ट संक्रमण आइरहेको छ ।

संक्रमणको चौथो तह

मन्त्रालयका प्रवक्ता डा. पौडेलका अनुसार अहिले नेपालमा समुदायस्तरमा संक्रमण फैलिरहेको छ । ‘अहिले समुदायस्तरमा संक्रमण फैलिरहेको छ । यसरी फैलिनु भनेको देशको सबै भागमा संक्रमणको तेस्रो वा चौथो तह भन्ने बुझिन्छ’, उनले भने, ‘कुनै पनि जिल्ला वा गाउँमा संक्रमण छैन भन्ने अवस्था छैन । संक्रमण फैलिरहेको हुनाले कति सचेत भएर रोक्न सक्छौँ भन्ने कुरा हो ।’

उनले तेस्रो लहरका लागि अहिले मानिसमा बनेको रोग प्रतिरोधात्मक क्षमताले कति काम गर्छ भन्ने अध्ययनका क्रममा रहेको जानकारी दिए । पाँच/छ महिना अघि खोप लगाएका मानिसको पनि रोग प्रतिरोधात्मक क्षमता घटेकाले तेस्रो लहरसँग सचेत हुनुपर्ने बताए । ‘अहिले भन्दा कमजोर भेरियन्ट आए समस्या हुँदैन’, उनले भने, ‘तर अहिलेको भन्दा बलियो आए समस्या आउन सक्छ ।’

पीसीआर परीक्षण गर्दा अहिले १९.५ प्रतिशतमा संक्रमण देखिएको छ । संक्रमित सबैले परीक्षण नगराउँदा पनि संक्रमणको यकीन तथ्याङ्क बाहिर नआएको मन्त्रालयले जनाएको छ । अहिले पनि सामान्य रुघाखोकी, ज्वरो आएका मानिस परीक्षण गराउन नगएकाले घरमै संक्रमित रहेको मन्त्रालयका प्रवक्ता डा. पौडेलले जानकारी दिए । शुक्रराज ट्रपिकल तथा सरुवा रोग अस्पतालका निर्देशक डा. अनुप बाँस्तोलाले मानिस आफैँ सचेत भएर संक्रमणलाई रोक्नुपर्ने बताए । उनले दैनिक १० देखि २० जना अस्पतालमा आइसकेको भन्दै खोप लगाएका मानिसबाट पनि संक्रमण सर्नसक्ने भएकाले स्वास्थ्यको मापदण्ड लागू गर्न आग्रह गरे ।

मन्त्रालयले तेस्रो लहर आउनसक्ने भएकाले सबै स्वास्थ्य सङ्घसंस्थालाई अक्सिजन, शैय्यालगायतका पूर्वाधार तयारी अवस्थामा राख्न अनुरोध गरिएको छ । तेस्रो लहरले बालबालिकालाई बढी प्रभाव पार्ने भएकाले उनीहरुका लागि सघन उपचार कक्ष र भेन्टिलेटर तयारी अवस्थामा राख्न निर्देशनसमेत दिएको छ ।

मन्त्रालयले कामै नपरी घर बाहिर निस्किने, अनावश्यकरुपमा जमघट गर्ने जस्ता कार्य गर्दा कोरोना फैलिएर तेस्रो लहर नआउला भन्न सकिन्न । त्यसैले जिम्मेवार नागरिक भई भीडभाड भएको ठाउँमा नजान र घरबाट निस्किँदा सधै सही तरिकाले मास्क लगाउन र एक अर्काबीच कम्तीमा दुई मिटरको दूरी कायम गर्न मन्त्रालयले आग्रह गरेको छ ।

साँझ ८ बजेपछि एक समूह जोगियो

मन्त्रालयका प्रवक्ता डा. पौडेलले साँझ ८ बजेपछि होटेल रेस्टुरेन्ट बन्द गरेर एउटा समूह संक्रमणको जोखिमबाट जोगिएको उनको भनाइ छ । ‘रेस्टुरेन्टमा बसेर खाना, खाजा खानेले मास्क लगाउँदैनन्’, उनले भने, ‘तर साँझ ८ बजेपछि रेस्टुरेन्ट बन्द हुँदा एउटा समूह संक्रमणको जोखिमबाट जोगिएको छ ।’

काठमाडौं । स्वास्थ्य मन्त्रालयले अहिले लगाइएको कोभिड–१९ विरुद्धको खोपको म्याद गुज्रिएको भन्दै फैलाइएको हल्लाकोपछि नलाग्न सर्वसाधारणलाई आग्रह गरेको छ ।

सामाजिक सञ्जालमा मिति सकिएको खोप प्रयोग भएको भन्दै अफवाह फैलिएकोबारे मन्त्रालयले भ्रममा नपर्न आग्रह गरेको हो ।

भुटानबाट आएको २ लाख ३० हजार खोपको म्याद अगस्टसम्म रहेको थियो र त्यो खोप एक हप्ता अगाडी लगाइसकेको खोप शाखाका प्रमुख डा. झलक शर्मा गौतमले बताए ।

सरकारले १८ वर्षभन्दा माथिका कक्षा १२ का परीक्षार्थीहरुलाई र सीमा नाकाबाट नेपाल प्रवेश गर्ने नागरिकलाई अस्ट्राजेनेका खोप लगाउने निर्णय गरेको थियो । म्याद सकिनु अघि खोपको प्रयोग भइसकेको गौतमले बताए । उनले हल्लाको पछि नलागी खोप लगाउन आग्रह गरेका छन् ।

काठमाडौं । स्वास्थ्य तथा जनसंख्या राज्यमन्त्री उमेश श्रेष्ठले कोरोनाविरुद्धको खोप आपूर्ति र खोप लगाउने कार्य सरकारको पहिलो प्राथमिकतामा रहेको बताएका छन् ।प्रतिनिधिसभा, शिक्षा तथा स्वास्थ्यसमितिको आजको बैठकमा उनले दैनिक तीन लाख व्यक्तिले कोरोनाविरुद्धको खोप लगाइरहेको जानकारी दिए । ‘खोप लगाउने कार्य तीब्र जारी छ , दैनिक पाँच लाखलाई खोप लगाउने योजना छ’, उनले भने । हालसम्म कोरोनाविरुद्ध ९० लाख ७७३ मात्रा लगाइसकेको उनले जानकारी दिए ।

‘हालसम्म ४० लाख १३ हजार ८८० जना (१३ प्रतिशत)ले खोपको पूरा मात्रा लगाएका छन्’, उनले भने, ‘खोपको पहिलो मात्रा लगाउनेको संख्या १८ प्रतिशत तथा दोस्रो मात्रा लगाउनेको संख्या ३० प्रतिशत छ ।’ वर्तमान सरकारले कोरोना विरुद्धका पाँच करोड ३० लाख मात्रा खोपको सुनिश्चितता गरिसकेको सो अवसरमा उनले जानकारी दिए ।

सरकारले दुर्गम र विकट जिल्लालाई खोप लगाउनका लागि प्राथमिकतामा राखेको उनले बताए । ‘थोरै जनसंख्या तथा उपचार गर्न कठिनाइ हुने हुँदा पहिला दुर्गम जिल्लाका बासिन्दालाई खोप लगाइसक्छौँ’, उनले भने । जापानले उपलब्ध गराएको पाँच लाखभन्दा बढी डोज खोप मौज्दात रहेकाले त्यसलाई विद्यार्थीका लागि छुट्टयाएर हाल लगाउने काम जारी रहेको राज्यमन्त्री श्रेष्ठले जानकारी दिए । उनका अनुसार काठमाडौं उपत्यकामा ६० हजार विद्यार्थीलाई लगाउने लक्ष्य मध्ये हालसम्म २३ हजारले लगाइसकेका छन् ।

प्रदेश १ र प्रदेश २ मा खोप पर्याप्त मात्रामा पठाइएको राज्यमन्त्री श्रेष्ठले बताए । अन्य प्रदेशमा समेत खोप पठाउने कार्य भइरहेको उनले उल्लेख गरे ।

विगतमा रकम तिरिसकेको १० लाख डोज खोप आपूर्ति गर्ने सम्बन्धमा भारतीय राजदूतसित छलफल भएको राज्यमन्त्री श्रेष्ठले जानकारी दिए । ‘भारतबाट खोप चाँडै आपूर्ति हुन्छ, अब त्यसमा बिलम्ब हुँदैन्’, उनले भने । अठार वर्षभन्दा कम उमेर भएकाका लागि मोडर्ना र फाइजरको खोप आपूर्तिको पहल भइरहेको उनले बताए । कक्षा १२ को परीक्षा यही भदौ अन्तिम वा असोज पहिलो साता गर्ने योजना रहेको उनको भनाइ थियो । ‘होम सेन्टरबाटै परीक्षा सञ्चालन गर्ने योजना छ’, उनले भने ।

हाल काठमाडौं उपत्यकामा १३५ खोप केन्द्रमार्फत खोप लगाउने कार्य भइरहेको उनले बताए । शिक्षा र स्वास्थ्यमा जनशक्ति अभाव भएकाले काम समयमै गर्न नसकिएको भन्दै राज्यमन्त्री श्रेष्ठले चाँडै नै कर्मचारीको व्यवस्था गरी द्रुतगतिमा काम अघि बढाइने समितिलाई जानकारी गराए । न्यून कर्मचारीका भरमा योजना बनाए अनुसारको काम गर्न नसकिएको उनको भनाइ थियो । प्रदेश अस्पताल र काठमाडौँ उपत्यकाका अस्पताललाई साधनस्रोत सम्पन्न बनाइने उनले बताए। ‘स्वास्थ्य क्षेत्रमा व्यापक सुधारको आवश्यकता छ’, उनले भने ।

समितिका सभापति जयपुरी घर्तीको अध्यक्षतामा बसेको बैठकमा समितिका सदस्य अञ्जना विशङ्खे, विद्या भट्टराई, गिरिराजमणि पोखरेल, जीवनराम श्रेष्ठ, सरिता न्यौपाने, मानबहादुर विश्वकर्मालगायतले राज्यमन्त्री श्रेष्ठसँग कोरोनाविरुद्धको खोप सम्बन्धी विभिन्न जिज्ञासा राख्नुका साथै आ–आफ्नो सुझावसमेत दिएका थिए । सभापति घर्तीले विद्यार्थीको जाँच समयमै गर्न तथा उनीहरुलाई चाँडोभन्दा चाँडो खोप लगाउन सरकारको ध्यानाकर्षण गराएका थिए ।

टोकियो । जापानले कोेभिड –१९ विरुद्धको मोर्डना खोपलाई तत्काल प्रयोगमा रोक लगाउने निर्णय गरेको छ । जापानी स्वास्थ्य मन्त्रालयले बिहीबार आफ्ना केही नागरिकमा साइड–इफेक्ट देखिएको भन्दै मोर्डनाको १.६३ मिलियन डोजको प्रयोगमा रोक लगाएको हो ।

टाकेडा फर्मास्यूटिकल कम्पनीले बिक्री गर्दे आएको उक्त खोपका बोतलमा रासायनिक पदार्थ भेटिएको कम्पनीले जनाएको छ । ‘हामीले स्वास्थ्य मन्त्रालयको परामर्शमा खोपको प्रयोगमा रोक लगाएका छौं’ कम्पनीले जनाएको छ ।

सरकारले यसबारे मोर्डना खोप कम्पनीमा तत्काल छानविन गर्न भनेपनि कम्पनीले भने कुनै प्रतिक्रिया दिएको छैन । एक–दूई वटा खोपको बोतलमा नकारात्मक असर पर्ने पदार्थ देखिएकाले खोपलाई निलम्बन गरिएको जापानी प्रवक्ता कात्सुनोबु काटोले बताए ।

जापानी संचारमाध्यमका अनुसार उक्त खोपलाई स्पेनमा उत्पादन गरेर टोकियो लगिएको थियो । सो खोप अगस्ट ६ देखि २० मा ओसाकाको खोपकेन्द्रमा प्रयोगमा ल्याइएको थियो । नेपालले पनि मोर्डना खोप खरिदका लागि विश्व बैंकसँग ४० लाख डोजको सम्झौता गरेको छ । बैंकले सो मात्राको खोप खरिद गरिदिने भएको छ । सन् २०२२ को मार्चमा नेपालले मागेको मोर्डनाको खोप आपूर्ति हुने समेत जनाइएको छ ।

काठमाडौं । नर्भिक अस्पतालको निःशुल्क ओपिडी अभियानअन्तर्गत शनिवार वरिष्ठ अर्थोपेडिक सर्जन विषेशज्ञ ऋषि विष्ट र कुलदीप मंगल जोशी नेतृत्वको टिमले सेवा दिने भएको छ ।

नर्भिकमा कार्यरत बिष्ट र जोशीले फ्री ओपिडी सेवा दिने भएका हुन् । यँही शनिवारदेखि नै सहुलियत दरमा हाडजोर्नीसँग सम्बन्धित शल्यक्रिया(ज्वाइन्ट रिप्लेसमेन्ट सर्जरी) समेत सुरु हुने घोषणा गरेको छ ।

शनिवारको फ्री ओपिडीमा आउने बिरामीहरुले समेत ज्वाइन्ट रिप्लेसमेन्ट सर्जरीका लागि नाम टिपाउनसक्ने व्यवस्था मिलाइएको छ ।

बजारको भन्दा निकै सहुलियत दरमा ज्वाइन्ट रिप्लेसमेन्ट सर्जरीको सेवा उपलब्ध गराइने नर्भिक अस्पतालका प्रमुख कार्यकारी अधिकृत अजय मिश्रले जानकारी दिएका छन् ।

हाडजोर्नीसँग सम्बन्धित समस्या भएका र शल्यक्रिया गर्नुपर्ने बिरामीहरुले फ्री ओपिडीको साथै सहुलियत दरको शल्यक्रिया सेवा समेत लिनसक्नेछन् ।

काठमाडौं । औषधिको मूल्य बढाउनेबारे छलफल गर्न आज औषधि व्यवस्था विभागको बैठक बस्ने भएको छ । अपरान्ह औषधि मुल्य अनुगमन समितिसँगको बैठकमा मुल्य वृद्धिबारे छलफल हुने भएको छ ।

बैठकमा औषधिहरुको मूल्यमा परिमार्जन, संशोधन, , मूल्य निर्धारण कार्यविधि तथा मूल्य निर्धारण नभएका औषधिको मूल्य निर्धारण गर्ने विषयमा छलफल हुने भएको छ।

विभागले नेपाल औषधि उत्पादक संघ, नेपाल औषधि व्यवसायी संघ, नेपाल फर्मास्युटिकल्स एसोसियसन र उपभोक्ता जागरण तथा हित संरक्षण मञ्चलाई बैठकमा बोलाएको छ।

काठमाडौं । कोभिड–१९ महामारीले वीर अस्पतालमा रोकिएको मिर्गौला प्रत्यारोपण सेवा पुनः सञ्चालनमा आएको छ । मिर्गौला प्रत्यारोपण समितीको मंगलबार बसेको बैठकमा सो निर्णय भएको हो ।

अस्पतालमा २०७६ चैत ४ गतेसम्म नियमित रुपमा मिर्गौला प्रत्यारोपण भइरहेको थियो । ०७६ चैत ११ गतेदेखि लकडाउन भएपछि सेवा रोकिएको अस्पतालका कार्यकारी प्रमुख अधिकारी भुपेन्द्र बस्नेतले जानकारी दिए ।

उनका अनुसार स्वास्थ्य तथा जनसंख्या मन्त्रालयले आकस्मिकबाहेक इलेक्टिभ सर्जरी सेवा बन्द गर्न निर्देशन दिएको थियो । मन्त्रालयले वीरलाई कोभिड यूनिफाईडमा रुपान्तरण गरेपछि सेवा बन्द भएको थियो ।

अहिले नयाँ भवनमा कोरोना संक्रमितको उपचार सुरु भएकोले सेवालाई निरन्तरता दिने निर्णय भएको बस्नेतले जानकारी दिए । मिर्गौला प्रत्यारोपणका लागि स्वास्थ्यकर्मी समेत तयारी अवस्थामा रहेका उनले बताए ।

काठमाडौं । चिकित्सा शिक्षा आयोगले पारा मेडिकलको स्नातक तहतर्फ नतिजामा कोटाभन्दा कम उत्तीर्ण गराएको भन्दै नर्सिङ तथा पारामेडिक्स कलेजको छाता सङ्गठन एलाइट साइन्स इन्स्ट्यिुसन एशोसिएशन (एशिया) ले सच्याउन माग गरेको छ ।

परीक्षा प्रणाली र उत्तीर्ण नम्बर धेरै राख्दा कोटाभन्दा कम विद्यार्थी उत्तीर्ण भएको भन्दै सच्याउन माग गरिएको हो । एशियाका अध्यक्ष यमप्रसाद अधिकारीले आयोगमा कोटाभन्दा कम विद्यार्थी उत्तीर्ण गराएकाले आयोगले नतिजालाई पुनःविचार गर्नुपर्ने बताए । उनले कोटाअनुसार विद्यार्थी नहुँदा आफूहरूलाई कलेज सञ्चालन गर्नसमेत समस्या परेको बताए ।

पहिलोपटक आयोगले लिएको एकीकृत प्रवेश परीक्षामा उत्तीर्णका लागि ५० प्रतिशत ल्याउनुपर्ने व्यवस्था गरेको थियो । जसले गर्दा यसपटक तोकिएको कोटाभन्दा कम विद्यार्थी उत्तीर्ण भएका छन् ।

‘आयोगले त्रिवि चिकित्साशास्त्र अध्ययन संस्थान (आइओएम)लाई केन्द्रित गरेर ५० प्रतिशत ल्याउनेलाई मात्र उत्तीर्ण गराइएको छ’, उनले भने, ‘अन्य चारवटा विश्वविद्यालयले नर्सिङ तथा पारामेडिक्स पढाउँछन् उनीहरू सबैको हेरेर त्यही अनुपातमा बनाउनुपर्ने थियो । उत्तीर्ण प्रतिशत ५० राख्नु व्यवहारिक होइन ।’ यसअघि त्रिवि, पूर्वाञ्चल विश्वविद्याल, पोखरा विश्वविद्यालय र काठमाडौँ विश्वविद्यालयले आ–आफ्ना कलेजलाई मेडिकल शिक्षाका लागि प्रवेश परीक्षा दिने गर्दथे ।

पोखरा विश्वविद्यालयअन्तर्गतका नर्सिङ तथा पारामेडिक्स कलेजहरूको सङ्गठनका अध्यक्ष नवराज पाण्डे प्रवेश परीक्षाका कम नम्बर ल्याएकै आधारमा मात्र माथिल्लो कक्षा पढ्न नपाउने कुरा व्यवहारिक नहुने बताए । उनले प्रवेश परीक्षामा अनुत्तीर्ण भएका विद्यार्थी भारत र बङ्गलादेशमा जाने गरेको बताए । ‘नेपालमा नै पारा मेडिकलको शिक्षा हामी उपलब्ध गराउँदै आएका छौँ । तर यसपटक आयोग कोटाभन्दा कम परीक्षार्थी उत्तीर्ण गराएर धेरै विद्यार्थी भारत र बङ्गलादेशमा पढ्न गइरहेका छन्’, उनले भने, ‘उत्तीर्ण प्रतिशत घटाएर विद्यार्थीलाई नेपालमै पढ्न पाउने वातावरण बनाउनुपर्दछ ।’

आयोगले लिएको परीक्षामा कोटाभन्दा दुई हजार १८५ जना कम परीक्षार्थी उत्तीर्ण भएका थिए । ती विषयमा चार हजार ६८ कोटा भए पनि एक हजार ८८३ मात्र परीक्षार्थी उत्तीर्ण भएका थिए । बिपीएचमा एक हजार ४२० कोटामा ५६५, बिएस्सी नर्सिङ एक हजार १०० मा ५०४, बी फार्मेसीमा ९०२ कोटामा ५४७ जना मात्रै उत्तीर्ण भएका छन् ।

यस्तै फिजियोथेरापी बिपिटीमा १५० जनाको कोटामा ११४, बीएस्सी एमआइटी रेडियोग्राफीमा ७१ जना कोटामा ३५, बिएस्सी एमएलटी ४२५ कोटामा ११८ जना मात्रै उत्तीर्ण भएका छन् । नर्सिङग कलेज सञ्चालक केपी सिंहले परीक्षामा भएको त्रुटिकै कारण कम विद्यार्थी उत्तीर्ण भएको बताए । उनले अधिकांश परीक्षार्थी पारामेडिक्सतर्फको भएको र प्रश्न प्लस टुतर्फबाट सोधेकाले धेरै फेल भएको बताए । उनले एकीकृत प्रवेश परीक्षाको नतिजालाई पुनःविचार नगरे आफूहरूले कलेजको साँचो आयोगलाई बुझाउने बताए ।

उनले तत्काल पुनः परीक्षाको सम्भावना नभएको हुँदा कोटा पूरा हुने गरी यसपटकलाई परीक्षा दिइसकेका विद्यार्थीलाई नै पढ्न पाउने अवसर दिनुपर्ने बताए । पाँच विद्यार्थी सङ्गठनले आयोगबाट लिइएको मेडिकल र पारामेडिकल प्रवेश परीक्षामा कोटाभन्दा कम परीक्षार्थी उत्तीर्ण भएको भन्दै पुनः परीक्षाको मागसमेत गरिसकेका छन् ।