काठमाडौं। सप्तरीको अग्नीसाईर कृष्णासवरन गाउँपालिका अध्यक्ष दिनानाथ चौधरीले दिएको राजीनामा उपाध्यक्ष कल्पना चौधरीले स्वीकृत गरेकी छन् ।
गाउँपालिकाकी उपाध्यक्ष कल्पना चौधरीको कार्यकक्षमा रहेको सोफामा सुतेर वडाध्यक्षबाट खुट्टा मालिस गराएको भिडियो सामाजिक सञ्जालमा भाइरल भएपछि अध्यक्ष चौधरी विवादमा परेका थिए ।
विवाद फैलिएसँगै उनले गत ५ असोजमा उपाध्यक्ष चौधरीलाई सम्बोधन गर्दै राजीनामा पत्र बुझाएका थिए ।सोही दिन गाउँ सभासमेत बसेको थियो ।
राजीनामा पत्रमा उनले पदमा रहेर निरन्तर काम गर्न नसक्ने अवस्था आएको उल्लेख गरेका छन् ।
‘म दिनानाथ चौधरी, अग्नीसाईर कृष्णासवरन गाउँपालिकाको अध्यक्ष पदमा कार्यरत रही आएकोमा विभिन्न कारणवश सो पदमा निरन्तर कार्य गर्न असमर्थ भएको छु । पदमा आवश्यक दक्षता, समय र ऊर्जा दिन नसकेको महसुस भएकाले स्वेच्छाले नै राजीनामा दिएको छु’ उनले पत्रमा लेखेका छन् ।
उनले गाउँपालिका अध्यक्षको हैसियतले पाएको अनुभव जीवनको महत्त्वपूर्ण उपलब्धि भएको उल्लेख गर्दै भविष्यमा पनि समाज र गाउँको सेवामा निरन्तर समर्पित रहने प्रतिबद्धता जनाएका छन् ।
अध्यक्ष चौधरीको राजीनामा कार्यपालिका बैठकले स्वीकृत गरेको उपाध्यक्ष कल्पना चौधरीले जानकारी दिएकी छन् ।
अध्यक्ष नेकपा एमालेबाट निर्वाचित भएका थिए भने उपाध्यक्ष नेपाली कांग्रेसबाट निर्वाचित भएकी थिइन् । जनप्रतिनिधिहरूबीचको मतभेद र आन्तरिक विवादकै कारण पालिकाको गाउँ सभा पनि ढिलो बसेको थियो ।
पालिका उपाध्यक्षले अध्यक्षले असोज ५ मा राजीनामा दिएको र आफूले कार्तिक १७ गते स्वीकृत गरेको पत्र निर्वाचन आयोगलाई पठाइसकेको जानकारी दिइन् । यसको बोधार्थ कानुन मन्त्रालयसहित मधेस प्रदेशको मुख्यमन्त्री कार्यालय, जिल्ला समन्वय समितिको कार्यालय, जिल्ला प्रशासनमा पठाइएको छ ।
Leave a Reply