उपकुलपति र शिक्षाध्यक्षको कार्यालय तोडफोड गर्ने नेविसंघका विद्यार्थीमाथि कारवाही प्रक्रिया सुरू

काठमाडौं । ४ दिनअघि त्रिभुवन विश्वविद्यालयको उपकुलपति प्रा. खड्क केसी र शिक्षाध्यक्ष प्रा. दुविनन्द ढकालको कार्यकक्षमा तोडफोड र तालाबन्दी गर्ने कांग्रेसनिकट नेविसंघका विद्यार्थीमाथि कारवाही प्रक्रिया थालिएको छ ।

त्रिवि रजिष्ट्रारको कार्यालयले एक विज्ञप्ति निकाल्दै १४ गतेको उक्त घटनामा संलग्नहरूलाई कानूनबमोजिम कारवाही तथा भौतिक सम्पत्ति हानी नोक्सानीको क्षतिपूर्ति भराउन कानूनी प्रक्रिया अघि बढाइएको जानकारी दिएको छ ।

सूचना तथा जनसम्पर्क महाशाखा प्रमुख लिल्ली थापा क्षेत्रीद्वारा हस्पताक्षरित विज्ञप्तिमा विश्वविद्यालयका केन्द्रीय पदाधिकारीहरूलाई भौतिक रूपमा आक्रमण गर्ने गरी फोनमार्फत धम्की दिने, सामाजिक सञ्जालको प्रयोग गरी पदाधिकारीको चरित्र हत्या गर्ने जस्ता कार्य गर्नुका साथै त्यसदिन २०-२५ जनाको समूहले उपकुलपतिको कार्यालयमा प्रवेश गरी सचिवालय तोडफोड गर्ने, पदाधिकारी एवं कर्मचारीलाई भौतिक आक्रमण गर्न खोज्ने कार्य गरेकाले कानूनी कारवाहीका लागि सरकार, नागरिक समाजसँग सहयोगको अपिल गरिएको छ ।

त्रिवि कीर्तिपुर परिसरमा पटकपटक विभिन्न व्यक्ति तथा समूहका नाममा विश्वविद्यालयका पदाधिकारी, प्राध्यापक तथा कर्मचारीलाई विभिन्न बहानामा धम्की दिने र विश्वविद्यालयको सम्पत्ति तोडफोडले अन्तर्राष्ट्रियस्तरमै विश्वविद्यालयको साख गिराएको विज्ञप्तिमा जनाइएको छ ।

त्रिविको शैक्षिक क्यालेण्डर अनुसार स्नातक तहकाे प्रथम वर्षकाे परीक्षा असारभित्र गराउनुपर्ने उल्लेख गरिएको छ ।