काठमाडौं । राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले देशको न्याय प्रशासनप्रति नै दिक्दारी प्रकट गरेका छन् । आफूलाई बिना आधार पटक–पटक म्याद थप गरिएकोप्रति उनले आज इजलासमै असन्तुष्टि जनाए ।
मिश्रलाई आज छैटौंपटक म्याद थपका लागि जिल्ला अदालत काठमाडौं लगिएको थियो । न्यायाधीश महेन्द्रबहादुर कार्कीसँग समय लिएर उनले आफ्नो भनाइ राखे ।
मिश्रले भने, ‘चलनचल्तिको भाषामा भन्ने हो भने म न्याय प्रशासनको कार्यशैली देखेर ट्वाँ परेको छु ।’
आफूले गरेको अपराध के हो र कुन प्रमाण नस्ट गर्न सक्ने भनेर नछोडिएको हो भन्ने बुझ्न नसकिएको उनले गुनासो गरे ।
मिश्रले थपे, ‘यहाँले बुझ्नु भए पनि हुन्छ, म हिरासतमा रहँदा पनि मैले कानूनको दृढ पालना गरेको छु र कानूनी प्रक्रियालाई सदैव सहयोग नै गर्नेछु । तर आज मलाई अन्याय भएको महसुस भइरहेको छ ।’
उनले चैत १५ को घटनामा आफूलाई जस्तै मुद्दा लागेको भगवती रोक्कालाई छोडिएको तर सबै कानूनी प्रक्रिया पूरा हुँदा आफूलाई पटक पटक म्याद थपिनुको आशय बुझ्न नसकेको बताए । उनले सरकारी वकिललाई सबै घटनालाई एउटै बास्केटमा हालेर नहेर्न पनि अनुरोध गरे ।
यसअघि १० गते भएको आदेश प्रहरी र अदालतबाटै पालना नभएको गुनासो पनि मिश्रले गरेका थिए । ‘वैशाख १० गतेको आदेश बमोजिम सम्पूर्ण कानूनी प्रक्रिया पूरा गरी छोड्नु भन्ने आदेश पालना भएन, झनै गोलमटोल भयो’, उनले भने ।
१० गतेको आदेशमा न्यायाधीसले मिश्रको हकमा प्रहरीले के के प्रमाण जुटाउन बाँकी छ भनेर पेश गर्ने आदेश दिएका थिए । यदि त्यस्तो विवरण पेश गर्न नसकेको खण्डमा मिश्रलाई छोड्न सकिने संकेत आदेशमा गरिएको थियो । तर, प्रहरीले केही पनि पेश नगरीकन १४ गते एक हप्ता म्याद थपेको मिश्रका वकिलको आरोप छ ।
आज पनि अदालतले मिश्रमाथि के के अनुसन्धान बाँकी छ भन्ने विवरणबिनै म्याद थप गरिदिएको छ ।
Leave a Reply