रुपन्देहीमा रात्रीकालीन इन्डो–नेपाल क्लब च्याम्पियनसिप पुरुष भलिबल प्रतियोगिताको तयारी

रुपन्देही । रूपन्देहीमा रात्रीकालीन १० औं मणिमुकुन्द कप पुरुष भलिबल इन्डो–नेपाल क्लब च्याम्पियनसिप २०८२ हुने भएको छ।

रुपन्देहीमा भलिवलका खेलाडीहरु उत्पादनमा राम्रो मेहनत गरी रहेको मणिमुकुन्द भलिवल क्लबले प्रतियोगिताको दशौं संस्करण भने रात्रीकालिन गराउने जनाएको छ। स्वास्थ्यका लागि खेलकुद, राष्ट्रका लागि खेलकुद भन्ने नाराका साथ वैशाख ६ गतेदेखि हुने प्रतियोगितामा एक भारतीय क्लब र तीन विभागीय क्लबसहित ९ टीमको सहभागिता रहने आयोजकले जनाएको छ।

२०७२ सालदेखि हरेक वर्ष भलिबल प्रतियोगिता आयोजना गर्दै आएको क्लबले आठौं संस्करणसम्म जिल्लास्तरीय र गतवर्षको नवौं संस्करण राष्ट्रियस्तरको आयोजना गरेको थियो। दसौं संस्करणमा भारतीय क्लबलाई समेत सहभागी गरेर आयोजना गरिएको क्लबका अध्यक्ष लोकेन्द्र भण्डारीले जानकारी दिए।

’बिगतका आयोजनाहरुलाई हेरेर हामी उत्साहित छौं त्यसैले यसपटक भारतीय भलिबल क्लबलाई पनि सहभागी गराएका छौं’ भण्डारीले भने।
यसअघिका खेलहरु दिउसोमा आयोजना हुँदै आएकोमा यसपटक भने साँझ ६ बजेदेखि राति १० बजेसम्म चल्नेछन्।

वैशाख महिनामा बुटवलको चर्को गर्मीमा खेलाडीहरुको स्वास्थ्यलाई ध्यानमा राखेर रातिका लागि खेल्ने व्यवस्था गरिएको खेल संयोजक सुरेन्द्र गुरुङले बताए। क्लबले प्रतियोगितामा हरेक वर्ष पुरस्कार राशीसमेत थप गर्दै गएको छ।

नवौं संस्करणमा उपाधि विजेता टीमलाई २ लाख १ हजार १११ रुपैयाँ प्रदान गरिएकोमा दसौं संस्करणमा आइपुग्दा राशी बढाएर ३ लाख ११ हजार १११ रुपैयाँ पुर्‍याइएको अध्यक्ष भण्डारीले जानकारी दिए।

क्लबका अध्यक्ष भण्डारीले राष्ट्रिय तथा अन्तर्राष्ट्रिय भलिबल खेलाडीको खेल कौशल प्रदर्शन गर्ने र नेपालको राष्ट्रिय खेलको रुपमा रहेको भलिबलको विकास गर्ने उद्देश्यले हरेक वर्ष प्रतियोगिता आयोजना गर्दै आएको बताए। गतवर्ष सम्पन्न नवौं संस्करणको राष्ट्रिय भलिबलको उपाधि नेपाल आर्मी क्लबले जितेको थियो। तिलोत्तमा–२ स्थित क्लबको आफ्नै ‘कोर्ट’मा आयोजना गरिने प्रतियोगिता बैशाख १३ गतेसम्म संचालन हुनेछ।

भण्डारीका अनुसार पहिलो पुरस्कारको राशी अमेरिकामा व्यवसाय गर्दै आएका तिलोत्तमा–१ का मोती कंडेलले उपलब्ध गराएका छन्।
त्यस्तै, उपविजेता हुने टीमले २ लाख, ११ हजार १ सय ११ प्राप्त गर्नेछ भने तेस्रो हुने टीमले १ लाख ११ हजार १ सय ११ रुपैयाँ र चौथो हुने टीमले पनि प्रोत्साहन स्वरुप ६६ हजार ६६६ रुपैयाँ प्राप्त गर्नेछ। साथै प्रतियोगितामा विभिन्न ८ विधामा समेत खेलाडीहरुलाई १० हजारदेखि १५ हजार रुपैयाँसम्म पुरस्कार प्रदान गरिने छ।mबलष्mगपगलमब ज्ञठद्धद्धटद्दडछडट।वउन