दलित बालिकालाई बाँधेर यातना दिनेमाथी कडा कारवाही गर्न राष्ट्रिय महिला आयोगको माग

काठमाडौं । रामेछापको मन्थली नगरपालिका १३ भलुवाजोरका शेरबहादुर श्रेष्ठले आफ्नो घरमा प्रवेश गरेको भन्दै १३ वर्षका दलित बालिकालाई डोरीले बाँधेर राखी यातना दिनु बाल अधिकार हनन र जातीय विभेद विरुद्धको अपराध भएको राष्ट्रिय महिला आयोगको ठहर गरेको छ । आयोगले एक विज्ञप्ती जारी गर्दै यस घटनाप्रति आयोगको गम्भिर ध्यानाकर्षण भएको जनाएको हो ।

यसरी बालिकालाई दलित भएको र उनले घर भित्र प्रवेश गरेको हुनाले घर अछुतो बनाईदिएको भन्दै २१ घण्टासम्म डोरीले बाधेर राख्ने कार्य अत्यन्त अमानवीय निर्मम, जातिय विभेद तथा बालबालिका माथिको गम्भिर कसूर भएको आयोगको प्रवक्तासमेत रहेकी उपसचिव चमिला भट्टराईले जारी गरेको विज्ञप्तीमाा भनिएको छ । यस किसिमको अमानवीय कसूरमाथी गम्भिरताकासाथ छानविन गरि सत्यतथ्य पत्ता लगाई पीडितलाई न्याय दिलाउन र दोषीलाई कानून बमोजिम दण्डित गर्न राष्ट्रिय महिला आयोगले सम्बन्धित निकायको ध्यानाकर्षण गराएको छ ।

दिन प्रतिदिन समाजमा बढिरहेको नाबालिका, किशोरी र महिलामाथिको यौन हिंसा, जबरजस्ती करणी र तत्पश्चात हत्यासमेतका जघन्य घटनाप्रति आयोगको गम्भिर ध्यानाकर्षण भएको आयोगले जनाएको छ ।