नयाँ ठाउँ खोजेर लगानी गर्न बैंकहरुलाई गभर्नर पौडेलको निर्देशन

काठमाडौं । नेपाल राष्ट्र बैंकका गभर्नर विश्वनाथ पौडेले बैंकहरुलाई नयाँ ठाउँ खोजेर लगानी गर्न निर्देशन दिएका छन् । शुक्रबार बैंक तथा वित्तीय संस्था परिसंघ नेपाल (सिबिफिन) साधारण सभामा बोल्दै गभर्नर पौडेलले यस्तो बताएका हुन् ।

बैंकहरुलाई परेको सबै सहयोग गर्न तयार रहेको बताउँदै गभर्नर पौडेलले भने, ‘कहाँ लगानी गर्ने खोज्नु, कसरी ग्रोथ गर्ने खोज्नु र इन्टरप्रेनरतिर पनि खोजी गर्नु । नयाँ ठाउँ कहाँ छ खोज्नु । जसरी हुन्छ नयाँ क्षेत्र खोजेर लगानी गर्नु ।’

नयाँ ठाउँमा लगानी गर्नका लागि कुनै समस्या भए आफूले सहयोग गर्न तयार रहेको समेत उनले सुनाए । त्यसका लागि सँगै काम गर्न राष्ट्र बैंक पछि नहट्ने उनले बताए ।

हामीले कहाँ लगानी गर्ने र कसरी प्रतिफल ल्याउने भन्नेबारे वृहत् छलफल गर्न आवश्यक रहेको उनले बताए । त्यस्तै, उनले लगानीको तालिका लामो समयदेखि बिग्रिएको उनले बताए ।

गभर्नर पौडेलले भने, ‘जनताको लगानी गर्ने मनोबल अझै माथि उठ्न सकेको छैन । यो जेनजीपछि मात्रै आएको समस्या पनि होइन । एक दुई वर्षदेखि नै यस्तो समस्या देखिरहेको छ ।’ राज्यले पनि अहिले ह्वात्तै खर्च गर्ने ठाउँहरू नभएकाले बण्ड जस्ता जारी गर्नुपर्ने आवश्यक रहेको उनले बताए ।