संविधानको रक्षा र संसद पुन:स्थापनाको मागसहित कोशीमा संघर्ष थाल्ने एमालेको घोषणा

विराटनगर । नेकपा एमाले कोशी प्रदेशले संविधानको रक्षा र संसद पुनःस्थापना मागसहित प्रदेशस्तरीय संघर्षको घोषणा गरेको छ ।

प्रदेश इन्चार्ज शेरधन राईले विराटनगरमा आयोजित कार्यक्रममा जिल्लास्तरमा छलफल शुरू गरी सवा लाख कार्यकर्ता परिचालन गर्ने निर्णय भएको जानकारी दिए ।

प्रेस चौतारी नेपाल मोरङ शाखाले आयोजना गरेको संवाद कार्यक्रममा राईले भने, ‘पहिलो चरणमा सबै जिल्लामा छलफल र कार्यक्रम तयार गरी आन्दोलनको आँधीबेहरी ल्याउने छौँ । यसमा प्रदेशभरबाट सवा लाख कार्यकर्ता उतार्ने छौं ।’

२५ गतेसम्म १४ वटै जिल्लामा भेला सकेर जिल्ला सदरमुकाम र प्रदेश राजधानीमा प्रदर्शन गर्ने राईले बताए । सुशीला कार्की नेतृत्वको सरकार असंवैधानिक भएको भन्दै उनले यो सरकारले चुनाव गर्न नसक्ने ठोकुवा गरे । नेकपा एमालेले संसद पुनर्स्थापनाको माग राखेर अघि बढेकाले चुनावको विषयमा नसोचेको राईको भनाइ छ ।

सर्वस्वीकार्य छानबिन आयोग गठन गरेर जेन-जी आन्दोलनको क्रममा भएको आगजनी तथा तोडफोडमा संलग्नलाई कारबाही गर्नुपर्ने उनको तर्क छ । गौरीबहादुर कार्की नेतृत्वको छानबिन समिति पूर्वाग्रही र विश्वासिलो नभएको भन्दै उनले यो समितिलाई मानेर अगाडि बढ्न नसकिने बताए ।

राईले भने ‘यसले अगाडि नै धारणा बनाइसकेको छ यस्तो समितिबाट कुनै काम हुँदैन ।’

२०४६ यता लाभको पदमा बसेका नेताका सम्पत्ति छानबिन गर्नुपर्नेमा पार्टी तयार रहेको भन्दै उनले यसका लागि सबै तयार हुनुपर्ने बताए । ‘यस्तो छानबिन मबाटै होस्’, उनले भने ।

एमालेमा नयाँ नेतृत्व महाधिवेशनले टुंगो लगाउने बताउँदै उनले भने, ‘सडकबाट माग गरेर नेतृत्व परिवर्तन हुदैन । यसको विधि प्रक्रिया हुन्छ । महाधिवेशनबाट नै नेतृत्वको छिनोफानो हुन्छ र पार्टी पुनर्गठनका छलफल हुन्छन् अहिले नेतृत्व हटाउने कुरा सान्दर्भिक छैन ।’