गर्भवतीको मृत्युपछि किष्ट अस्पतालमा आज पनि तोडफोड (तस्बिरहरु)

काठमाडौं । उपचारको क्रममा सुत्केरीको मृत्यु भएपछि ललितपुरकाे इमाडोलस्थित किष्ट शिक्षण अस्पतालमा आज पनि तनावग्रस्त भएको छ ।

अस्पतालको लापरबाहीले सुत्केरीको मृत्यु भएको भन्दै आफन्तले आज पनि प्रदर्शन गरेपछि अस्पतालमा बाक्लो संख्यामा सुरक्षाकर्मी परिचालन भएका छन् ।

प्रहरीले अस्पताल घेरेर राखेको छ भने बाहिर ठूलो संख्यामा मृतकका आफन्त र परिवारका सदस्यहरु भेला भएका छन् । उनीहरुले आज पनि अस्पताल परिसरमा ढुंगामुढासहित तोडफोड गरेका हुन् ।

गत शुक्रबार मीना राईको सुत्केरी गराउने समयमा मृत्यु भएको थियो । अस्पतालको लापरबाहीले गर्भवती महिलाको ज्यान गएको आरोप आफन्तहरुको छ ।

अहिलेसम्म अस्पतालले संवादका लागि समेत नबोलाएको उनीहरुको भनाइ छ । आक्रोशित आफन्तहरुले हिजो अस्पतालमा सामान्य तोडफोड समेत गरेका थिए ।