निर्वाचन आयोगमा नवराज सुवेदीले भने- मैले राप्रपा त्यागेको छैन, पार्टीले अन्याय गर्‍यो (भिडिओ)

काठमाडौं । राष्ट्रिय प्रजातन्त्र पार्टी (राप्रपा) को अनुशासन आयोगबाट हटाइएका नवराज सुवेदीले निर्वाचन आयोगमा उजुरी दिएका छन् । उजुरी पश्चात पत्रकारसँग कुरा गर्दै उनले आफूमाथि अन्याय भएको बताए ।

सुबेदीले आफूमाथि नसोधीकन यो निर्णय लिइएको भन्दै चित्त दुखाएका थिए ।

उनले भने, ‘प्राकृतिक न्यायको सिद्धान्त अनुसार पनि निर्णय लिनु अगाडि मलाई सोध्नुपर्थ्यो । मलाई सोधिएको छैन । चिठी लेखेर दिएको पनि छैन । मैले मिडियाबाट थाहा पाएँ, मलाई निकाल्नुभयो र अर्को मान्छे राख्नुभयो रे भनेर ।’

आफूलाई कारबाही गर्दा केन्द्रीय समितिबाट निर्णय नगरी अध्यक्षले स्वेच्छाचारिता प्रदर्शन गरेको सुबेदीले बताए ।

पत्रकारले उनलाई ‘तपाईँले त आफैँ राप्रपा त्यागे भनेर सार्वजनिक रूपमा घोषणा गर्नुभएको होइन र ? भनेर सोधेका थिए ।
त्यसको प्रत्युत्तर सुवेदीले यसरी दिए, ‘तपार्ईंले ठिक प्रश्न सोध्नुभयो । तर त्यो भाषणको अगाडि र पछाडि हेर्नुपर्छ । मैले भनेको थिएँ, संवैधानिक राजसंस्था, बहुदलीय प्रजातन्त्र र हिन्दू राष्ट्रको निम्ति जुनसुकै सेक्रेफाइस गर्न पनि तयार छु, पार्टीबाट राजीनामा दिनुपर्‍यो, छोड्नुपर्‍यो भने पनि तयार छु, तर यो पद म छोड्दिन भनेको थिएँ । तर अगाडि, पछाडिको सबै हटाइयो । जे सुविधा लाग्छ त्यही काटेर त्यो पोर्सन मात्रै हाल्नुभयो । ममाथि पार्टीमा अन्याय भएको छ । त्यसको खिलाफमा आवाज उठाएको हो ।’

उनले यो विषयले पार्टीमा फुट भने नआउने स्पष्ट पारे ।