सिन्धुपाल्चोक। सिन्धुपाल्चोकका १२ स्थानीय तह मध्ये ११ स्थानीय सरकारले आगामी आर्थिक वर्षका लागि नीति कार्यक्रम र बजेट सार्वजनिक गरेका छन्।
संविधान अनुसार असार १० भित्र स्थानीय सरकारले नीति कार्यक्रम र बजेट ल्याउनुपर्ने व्यवस्था गरेको छ । सोही व्यवस्था अनुसार सिन्धुपाल्चोकका ३ नगरपालिकासहित ८ गाउँपालिकाले नीति कार्यक्रम र बजेट सार्वजनिक गरेका छन् ।
सुनकोशी गाउँपालिकामा भने नेपाली कांग्रेसबाट निर्वाचित उपाध्यक्षसहितका जनप्रतिनिधि गाउँ सभाको कार्यक्रममा सहभागी नभएपछि बैठक हुन सकेन ।
सिन्धुपाल्चोकका मेलम्ची,बाह्रविसे र चौतारा साँगाचोकगढी नगरपालिका र अन्य गाउँपालिकाले नीति कार्यक्रम र बजेट सार्वजनिक गरेका छन् । स्थानीय सरकारले जीविकोपार्जन,शिक्षा,खेलकुद लगायतलाई प्राथामीकतामा राखेर नीति कार्यक्रम र बजेट ल्याएका छन् ।
सुनकोशीमा कांग्रेसका अवरोध
सुनकोशी गाउँपालिकामा उपाध्यक्षसहित बहुमत सदस्य नेपाली कांग्रेसबाट निर्वाचित भएका छन् । गाउँ सभा सञ्चालन भइरहँदा उपाध्यक्ष कान्छी लामा आफ्नै कार्यकक्षमा रहेकी थिइन् ।
नेपाली कांग्रेस सुनकोशीले सोमबार गाउँपालिकामा आफ्ना १६ बुँदे मागपत्र पेश गर्दे माग पुरा गराउन दबाब दिएको थियो । सुनकोशी गाउँपालिकाका पुर्व अध्यक्ष श्रवणकुमार जिसीसहितको कांग्रेस नेता कार्यकर्ताहरुले गाउँपालिका अध्यक्ष टपिन्द्रप्रसाद तिमिल्सिनालाई ज्ञापन–पत्र बुझाएको थियो ।
कांग्रेस नेता कार्यकर्ताहरु गाउँपालिकालाई ज्ञापन पत्र बुझाउन आएपनि शैली र गतिविधि भने अत्यन्तै अराजक र गुण्डागर्दी शैलीमा कांग्रेस नेता कार्यकर्ताहरु उत्रेका थिए । पुर्व गाउँपालिका अध्यक्ष श्रवणकुमार जिसीले वर्तमान गाउँपालिका अध्यक्ष टपिन्द्रप्रसाद तिमिल्सिनालाई ‘सिंगल सिगल’ भिड्ने हो भन्दै बसेको स्थानबाट पटक पटक उठेका थिए । सुनकोशी–७ का अध्यक्ष इश्वर तिमिल्सिनाले अवस्थालाई सम्हालेका थिए ।
सुनकोशी गाउँपालिका–२ ठोकर्पा स्वास्थ्य चौकी भवन गाउँपालिकाको असहमतिकाबीचमा पनि पूर्व मन्त्री मोहनबहादुर बस्नेतले उद्घाटन गरेपछि कांग्रेस नेताहरु गाउँपालिका अध्यक्ष तिमिल्सिनासँग चिढिएका छन् ।
टेरामक्स उपकरणमा अख्तियार दुरुपयोग अनुसन्धान आयोगले पुर्व सूचना तथा सञ्चार मन्त्री बस्नेतलाई मुद्दा दायर गरेपछि मुद्दा दर्ता गरेको व्यक्तिबाट स्वास्थ्य भवन उद्घाटन गर्न नहुने भन्दै गाउँपालिकाकाले विज्ञप्ती प्रकाशित गरेको थियो । नेपाली कांग्रेसले बुझाएको ज्ञापन–पत्रमा उक्त विज्ञप्ती प्रकाशित गर्नु गलत रहेको भन्दै त्यसलाई सच्याउनुपर्ने माग समेत गरेका छन् ।
निर्धारित मितिभित्रै गाउँ सभा सम्पन्न गर्नका लागि उपाध्यक्ष सहित वडा अध्यक्षहरुसँग पटक पटक छलफल भएपनि कुरा नमिलेको सुनकोशी गाउँपलिकाका अध्यक्ष टपिन्द्रप्रसाद तिमिल्सिनाले जानकारी दिए । निर्धाधित मिति भित्रै बजेट र नीति कार्यक्रम ल्याउन नसकेपछि संघीय सरकारले दिने अनुदानमा समेत यो वर्ष कटौती गरेको अध्यक्ष तिमिल्सिनाले बताए ।
‘अघिल्लो वर्षपनि असार १० मा बजेट र नीति कार्यक्रम ल्याउन सकेनौ,त्यसले गर्दा आउने वर्ष संघीय अनुदानमा ५० लाख जति बजेट कटौती भएको छ अध्यक्ष तिमिल्सिनाले भने–‘यो वर्ष पनि हुन सकेन,हामीलाई थप घाटा भएको छ ।’ सुनकोशी गाउँपालिका उपाध्यक्ष कान्छी तामाङ भने अध्यक्ष लचक नभएकाले आफूहरु गाउँ सभामा सहभागी नभएको बताइन् ।
Leave a Reply