नन्दन भन्छन्ः अन्तिम बल छक्का हुन्थ्यो होला, हात ठिक नहुँदा अलि पावर लगाउन सकिन (भिडिओ)

काठमाडौं। अन्तिम बलमा चौका हानेर नेदरल्याण्ड्सविरुद्ध नेपाललाई सुपर ओभरमा पुर्‍याएका नन्दन यादवले आफूहरु अनलक्की हुँदा सुपर ओभरमा हार्नुपरेको बताएका छन् ।

आइसीसी लिग–२ र टी–२०आई खेलेर स्वदेश फर्किएका त्रिभुवन विमानस्थलमा हात ठिक नहुँदा अन्तिम बलमा छक्का हानेर नेपाललाई जिताउन नसकेको बताए ।

‘सायद छक्का गएको भए जित्थ्यौं होला । मेरो हात त्यस्तो राम्रो थिएन । अलि पावर लगाउन सकिन त्यो बलमा । नत्र छक्का हुन्थ्यो होला,’ उनले भने ।

उनले अन्तिम बलमा चौका प्रहार गर्दै खेललाई सुपर ओभरमा पुर्‍याएका थिए । उनले ४ अन्तिम ४ बलमा १२ रन प्रहार गरे । उक्त खेलमा तेस्रो सुपर ओभरमा नेपाल नेदरल्याण्ड्स पराजित भएको थियो ।

आफ्नो प्रदर्शनभन्दा पनि टिमलाई कसरी जिताउने भन्ने प्रेसर हुने नन्दनले सुनाए । उनले भने, ‘टिमलाई जिताउनुपर्ने प्रेसर थियो । आफ्नो प्रदर्शन कस्तो हुन्छ भन्दा पनि कसरी टिमलाई जिताउने भन्ने प्रेसरमा थिए ।’

नेपालले लिग–२ अन्तर्गतको सिरिजमा ३ खेलमा जित र एक खेलमा हार बेहोरेको थियो । यस्तै टी–२०आई सिरिजमा दुई खेलमा जित र दुई खेलमा हार बेहोरेको थियो ।