मदन भण्डारीको हीरक जयन्ती मनाइने, मूल समिति संयोजकमा ईश्वर पोखरेलको प्रस्ताव

काठमाडौं । नेकपा एमालेका तत्कालीन महासचिव जनताको वहुदलीय जनवादका प्रणेता जननेता मदन कुमार भण्डारीको हीरक जयन्ती मनाउन केन्द्रीयस्तरबाटै समिति बन्ने भएको छ ।

मदन भण्डारी फाउण्डेशनल भण्डारीको हीरक जयन्ती–२०८३ मनाउन नेकपा एमालेबाट बरिष्ठ उपाध्यक्ष ईश्वर पोखरेलको संयोजकत्वमा २ सय सदस्यीय मूल समिति गठनको तयारी गरेको छ ।

२०१० साल असार १४ गते जन्मिएका भण्डारीको ७४ पुगेर ७५ वर्ष लाग्ने दिन पारेर मदन जयन्तकै दिन सो समिति घोषणा हुन लागेको बताइएको छ । यद्यपी यसको औपचारिक निर्णय भएको छैन ।

असार १४ गते मदन जयन्तीको अवसरमा एमाले र फाउन्डेशनले विभिन्न कार्यक्रम गर्दै आएका छन् । यस वर्ष हीरक जयन्ती मनाउनेगरी विशेष कार्यक्रम आयोजना गर्ने तयारी छ ।

फाउण्डेशनले असार १४ गते आयोजना गर्ने कार्यक्रममा प्रधानमन्त्री तथा नेकपा एमालेका अध्यक्ष केपी शर्मा ओलीबाट मूल समिति घोषणा गर्ने तयारी छ । गत साता पूर्व राष्ट्रपति तथा फाउण्डेशनका संरक्षक विद्यादेवी भण्डारी र प्रधानमन्त्री ओलीबीचको भेटमा सो विषयमा समेत छलफल भएको बताइएको छ ।

भण्डारीकै चाहना र आग्रहमा ईश्वर पोखरेललाई संयोजक बनाउन लागिएको फाउण्डेशनका एक सदस्यले बताए । फाउण्डेशनकै ब्यानरमा पूर्व राष्ट्रपति भण्डारीले देशव्यापी दौडाहा र कार्यकर्ता भेटघाट पनि चलिरहेको र यसलाई अझ व्यापक बनाउने तयारी पनि छ ।

धेरैजसो एमाले नेताहरुले ओलीकै प्रस्ताव र ओलीसँगकै समन्वयमा विद्या भण्डारी एमालेको नेतृत्व गर्नेगरी पार्टीमा सक्रिय हुनु उपयुक्त हुने सुझाव दिइरहेका बेला गत साता दुई नेताबीच बालुवाटारमा छलफल भएको थियो । यो संवाद फेरि गर्नेगरी टुंगिएको निकट नेताहरुको भनाइ छ ।

भण्डारीले अध्यक्ष ओलीसँग निर्णायक संवाद गरेर आफू देशव्यापी अभियानमा अघि बढ्ने निकट नेताहरुको दावी छ । मदन भण्डारीको हीरक जयन्ती मूल समिति गठनपछि यसले २ वर्षसम्म विभिन्न कार्यक्रम आयोजना गर्ने र ती कार्यक्रममार्फत विद्या भण्डारीले कार्यकर्ता तथा सर्वसाधारणसँगको भेट अघि बढाउने दावी समेत केही नेताहरुको छ ।

गता २०८१ साल असोज ५ गते फाउण्डेशनको केन्द्रले काठमाडौंमा आयोजना गरेको स्थापना दिवसमा फाउण्डेशनका संस्थापक भण्डारीले आगामी वि.सं.२०८३ सालमा जननेताको हीरक जयन्ती मनाउन आव्हान गरेकी थिइन् ।

माक्र्सवादको सिर्जनात्मक प्रयोगमार्फत कम्युनिस्ट आन्दोलनको लोकतान्त्रिकरण गर्ने नेता मदन भण्डारीको २०५० जेठ ३ गते दासढुंगा दुर्घटनामा निधन भएको थियो । विश्वमै कम्युनिस्ट शासन र पार्टीहरु धराशायी भएका बेला नेपालमा जबजमार्फत भण्डारीले गरेको प्रतिस्पर्धात्मक राजनीतिको विश्वमै चर्चा भएको थियो ।