काठमाडौं । अहिलेका चर्चित गायक दुर्गेश थापालाई जापानी दूतावासले भिसा दिन अस्वीकार गरेको छ । उनी सांगीतिक कार्यक्रमका लागि जापान जाने तयारीमा थिए ।
जापानको ओसाकास्थित कान्साइ सहरमा जून १५ र १५ तारिखका दिन ‘नेपाल महोत्सव २०२५’ आयोजना हुँदैछ । गल्कोट समाज जापानले नेपाली दूतावाससँगको समन्वयमा कार्यक्रम गर्न लागेको हो । यसमा दुर्गेशसहित विष्णु खत्री र अनिता चलाउनेलाई नेपालबाट तीनजना गायक-गायिकालाई निमन्त्रणा गरिएको थियो । आयोजकले कार्यक्रमको पोस्टरमा दुर्गेशको सबैभन्दा ठूलो पोस्टर राखेर प्रचार प्रसार गरिरहेका थिए । तर, उनको भिसा नलागेको स्रोतले बतायो ।
स्रोतका अनुसार सुरूमा आयोजकले जापानमा तीनैजनाको डकुमेन्ट बुझाएर भिसाको प्रोसेस गरेका थिए । विष्णु र अनिताको जापानबाट पेपरभिसा काठमाडौंस्थित जापानी दूतावासमा आयो, तर दुर्गेशको आएन । उनले फेरि काठमाडौंकै दूतावासमा भिसा आवेदन गरेका थिए । तर, फेरि पनि उनलाई भिसा दिन अस्वीकार गरिएको स्रोतले बताएको छ । फलतः दुर्गेश रोकिएका छन् ।
दर्जनौं देशहरूमा गएर सांगीतिक कन्सर्टमा भाग लिइरहेका अहिलेका हटकेक गायक दुर्गेशलाई के कारणले भिसा रिजेक्ट गरिएको हो भन्ने खुलेको छैन । विष्णु र अनिता भने हिजो नै भिसा कलेक्ट गरेर जापान उडिसकेका छन् ।
दुर्गेशले भने भीसा रिजेक्ट भएकाे नभएर आफूले नै विथ ड्र गरेकाे बताए । भीसा आउन ढिलाइ भएपछि अगाडि नै कुवेत जानुपर्ने भएकाले पासपाेर्ट फिर्ता लिएकाे उनकाे भनाइ छ ।
साथै उनले जापानका आयाेजकसँग आफूले कुनै सम्झाैता नगरेकाे पनि बताएका छन् ।
नेपाल प्रेससँग कुरा गर्दै दुर्गेशले भने,`मिल्याे भने जाने भनेर आयाेजकसँग कुरा भएकाे थियाे, तर सम्झाैता गरेकाे थिइनँ । उहाँहरूले बनाउनुभएकाे पाेस्टर मैले सेयर गरेकाे पनि छैन । समयमा भीसा नआएपछि पासपाेर्ट फिर्ता लिएकाे हुँ ।´
Leave a Reply