श्रेय अगस्तीको स्वरमा ‘संघर्ष’ सार्वजनिक

काठमाडाैं । गत शनिबार गीतकार संघ नेपालबाट ‘संघर्ष’ म्युजिक भिडियो सार्वजनिकीकरण गरिएको छ । अग्रज गीतकार हरिभक्त बुढाथोकीको शब्द, चेतन चुँडालको संगीत र श्रेय अगस्तीको स्वरमा रहेको संघर्षको संगीत संयोजन चाँद सिंह, मिक्स मास्टर महेश्वर मान राजभण्डारीको छ ।

सरोज खनाल, दिपेन्द्र सोनाम र दिपेन्द्र राज गिरीको संयुक्त अभिनय एवं आएल्प शेर्पाको बाल अभिनयमा बनेको उक्त म्युजिक भिडियोको शृंगार पुनम चौधरी, छायांकन दिनेश पराजुली, सम्पादन विकास धमला र निर्देशन निकेश खड्काले गरेका हुन् भने कथा साक्षी-श्रेय र भिडियो व्यवस्थापन संकेत अगस्तीको हो ।

संघर्ष म्युजिक भिडियोमा मानिसको जीवनको संघर्ष एवं एउटा पिता र उसको सन्तानको बिग्रेको सम्बन्धलाइ जताइएको छ । सर्जक बुढाथोकी भन्छन्, ‘हिजो हामी जन्मिनु अघि अन्धकारमा थियौं, आज दियो झैं बालेर उज्यालो फैलाई रहेका छौं, भोलि फेरि त्यही अन्धकारमा विलिन हुने छौं । जीवन र मृत्युविचको गुज्रिएको पल नै जीन्दगी हो ।’

८५ वर्षीय गीतकार हरिभक्त बुढाथोकीको यसअघि ‘मेरो बाबा’, ‘बुढेसकाल’, ‘नजर लाग्ला नी’, ‘दुरी मलाइ हुनु छैन’ र ‘मलाइ हार्न दिंदैन’ चर्चित गीतहरुमा पर्छन् ।