इन्जिनियर घिमिरेको ‘सिसा झ्यालैमा’ लोकदोहोरी गीत सार्वजनिक

काठमाडौं ।  मौलिक झ्याउरे लयमा आधारित लोकदोहोरी गीत “सिसा झ्यालैमा” दिनेश क्षेत्री युट्युब च्यानलमार्फत सार्वजनिक भएको छ।

चर्चित गायिका देवी घर्ति, ई. सुजित घिमिरे र सर्जक दिनेश क्षेत्रीको स्वर रहेको गीतमा गण्डकी प्रदेशको सांगीतिक पहिचान झल्किन्छ।

गीतको शब्द र लय दिनेश क्षेत्रीको रहेको छ भने निर्देशन राजकुमार मगरले गरेका छन्। एलिना रायमाझी र रायन बस्यालले अभिनय गरेको गीतको मिक्सिङ कुमार रानाले गरेका हुन्।

स्याङ्जाका दिनेश क्षेत्री र बाग्लुङकी देवी घर्ति लोकसंगीतमा स्थापित नामहरू हुन्। अर्का गायक ई. सुजित घिमिरे नेपाल विद्युत प्राधिकरणमा कार्यरत सिभिल इन्जिनियर हुन्, तर लोकदोहोरीप्रति बाल्यकालदेखि रुचि राख्ने उनी अब गायकको रूपमा उदाएका छन्।

सर्जक क्षेत्रीका “आकाशैले भुइँलाई हेरेको”, “केशरी”, “माया काखैमा” जस्ता गीत चर्चित छन् भने गायिका घर्ति पाँच हजारभन्दा बढी गीतमा स्वर दिइसकेकी छन्।