काठमाडौं । गृहमन्त्री रमेश लेखकले भिजिट भिसा प्रकरणमा अख्तियारको छानवीनमा परेका त्रिभुवन विमानस्थल अध्यागमन कार्यालयका निर्देशक तीर्थ भट्टराईलाई गृह मन्त्रालयमा आफूले नल्याएको प्रष्ट पारेका छन् ।
संसद भवनमा पत्रकार सम्मेलन गर्दै गृहमन्त्री लेखकले भट्टराईलाई आफूले नै गृह मन्त्रालयमा ल्याएर उक्त ठाउँमा पठाएको जस्तो प्रचार गरिएको भन्दै उनले विगत ५ वर्षदेखि उनी गृह अन्तर्गत नै रहेको बताए ।
मन्त्री लेखकले भट्टराईलाई २०७७ सालमा तत्कालीन गृहमन्त्री रामवहादुर थापा बादलको पालामा गृह मन्त्रालयबाट गोरखा र त्यसपछि महोत्तरीको प्रमुख जिल्ला अधिकारी बनाइएको स्मरण गराए ।
त्यस्तै भट्टराईलाई २०७८ सालमा बालकृष्ण खाँण गृहमन्त्री भएका बेला गृह मन्त्रालय अन्तर्गत पन्जिकरण विभागको महानिर्देशक बनाइएको र सोही वर्ष मोरङको सिडिओ बनाइएको बताए ।
२०७९ सालमा प्रचण्डले गृहमन्त्रीको समेत कार्यभार सम्हालेको बेला गृह मन्त्रालयमा ल्याइएको र नारायणकाजी श्रेष्ठ गृहमन्त्री हुन्जेल उनी सोही विभागका रहेको बताए । त्यसपछि रवि लामिछाने गृहमन्त्री भएका बेला भट्टराईलाई २०८० साउन ४ गते हेटौंडास्थित मुख्यमन्त्री कार्यालयबाट गृहमा ल्याइएको लेखकले बताए ।
उनले आफू गृहमन्त्री भएर आउँदा उनी कसूरजन्य सम्पत्ति व्यवस्थापन विभागको महानिर्देशक रहेको बताए । लेखकले एउटा कर्मचारीमाथि अनुसन्धान हुँदा मन्त्रीले राजीनामा दिने हो भने कोही मन्त्री नै बाँकी नरहेको बताए ।
Leave a Reply