आन्दोलन र विषम परिस्थितिको कारण देखाउँदै ‘महाभोज’ को प्रदर्शन स्थगित

काठमाडौं । भोलि (जेठ १५ ) मा प्रदर्शनको तयारी गरिएको ‘महाभोज’ तत्काललाई स्थगित गरिएको छ । ‘देशभर फैलिएका विभिन्न आन्दोलन तथा विषम परिस्थिति’ लाई कारण देखाउँदै निर्माता हिमाल कडरियाले प्रेस विज्ञप्ति जारी गर्दै प्रदर्शन स्थगित गरिएको जनाएको छ ।

विज्ञप्तिमा भनिएको छ, ‘पछिल्लो समय देशभर फैलिएका विभिन्न आन्दोलन तथा विस्तारित विषम परिस्थितिका कारण आम जनजीवन प्रभावित भइरहेको अवस्थालाई दृष्टिगत गर्दै, चलचित्र ‘महाभोज’ को प्रदर्शन नेपाल तथा नेपाल बाहिरका सबै देशहरूमा हाललाई स्थगित गरिएको जानकारी गराउँदछौँ ।’

चलचित्रप्रति दर्शकहरूले देखाएको उत्साह र समर्थनप्रति आभार प्रकट गर्दै निर्माताले मुलुकको संवेदनशील परिस्थितिमा दर्शकको सुरक्षालाई पहिलो प्राथमिकतामा राखिएको विज्ञप्तिमा जनाइएको छ । अवस्था सामान्य भएपछि नयाँ प्रदर्शन मिति सार्वजनिक गरिने बताएको छ ।

‘महाभोज’ सहकारीको रकम अपचलनको कथावस्तुमा निर्माण गरिएको चलचित्र हो ।