नवराज सुवेदीको पत्रमा रास्वपाले छलफलै नगर्ने, जवाफ पनि नदिने

काठमाडाैं । राष्ट्रिय स्वतन्त्र पार्टीले राजसंस्था पुनर्स्थापना लागि हुने लागेको संयुक्त जनआन्दोलनमा संलग्न नहुने जनाएको छ । पार्टीका कार्यवाहक सभापति डीपी अर्यालले उक्त आन्दोलनपछि रास्वपाको नैतिक समर्थन वा ऐक्यवद्धता पनि नरहने स्पष्ट पारे ।

संयुक्त जनआन्दोलन समितिका तर्फबाट संयोजक नवराज सुवेदीले हिजो रास्वपालाई १५ जेठबाट हुने आन्दोलमा सहभागीता र सहकार्यको प्रस्ताव गर्दै रास्वपालाई पत्राचार गरेका छन् । उनले कार्यवाहक सभापति डीपी अर्याललाई सम्बोधन गर्दै लेखेको पत्र हिजो रास्वपा कार्यालयमा पुगेको थियो ।
अर्यालले आफूलाई राप्रपाका एकजना केन्द्रीय सदस्यको फोन आएको बताए ।

‘नवराज सुवेदीले फोन गर्नुभएको होइन । राप्रपाको एक केन्द्रीय सदस्यले फोन गरेर एउटा पत्र दिनु छ भन्नुभयो । मैले पार्टी कार्यालय छोड्न भनेको थिएँ । पत्र मैले पाइसकेको छु । तर, उहाँहरुले गर्ने भनेको आन्दोलनमा हाम्रो कुनै पनि संलग्नता र सहकार्य हुँदैन’, अर्यालले भने ।

उनले पत्रका विषयमा पार्टीभित्र सहकार्य र बहससमेत नहुने बताए ।

अर्याललाई पठाएको पत्रमा सुबेदीले रास्वपा सभापति रवि लामिछानेले यो व्यवस्थामा आफूले निस्पक्ष न्याय पाउनेमा शंका व्यक्त गरेको तथा रास्वपा यो व्यवस्थाप्रति असन्तुष्ट रहेको आफ्नो बुझाइ उल्लेख गरेका छन् ।

यस विषयमा प्रश्न गर्दा अर्यालले जवाफ दिए, ‘त्यो उहाँहरुको बुझाइ होला । त्यसमा हाम्रो केही गुनासो छैन । हाम्रो दृष्टिकोण के छ भन्ने अरुले भनिदिने कुरा होइन । उहाँहरुको बुझाइलाई हामी सम्मान गर्छौं तर यो कार्यक्रममा हाम्रो कुनै पनि किसिमको आवद्धता वा सरोकार रहँदैन ।’

उनले रास्वपाभित्र अहिले राजसंस्थाको बहस नै नरहेको दाबी गरे ।

‘पार्टीमा यो विषयमा कुनै पनि इस्यू नै छैन । कोही अमुक नेताले चाहेर हुने कुरा पनि होइन । पार्टीमा बहस, छलफल हुनुपर्छ । त्यस्तो केही भएकै छैन’, अर्यालले थपे ।

अर्यालले पत्रको जवाफ दिइरहनुपर्ने आवश्यता नरहेको समेत बताए ।

‘पार्टीमा अनेक किसिमका पत्रहरु आउँछन् । सबैलाई जवाफ दिइराख्नुपर्छ भन्ने पनि छैन । यो पत्रको हामी जवाफ दिँदैनौं’, उनले भने ।