काठमाडौं । नेपाल क्रिकेट संघ क्यानका सचिव पारस खड्काले क्रिकेट खेलेर के हुन्छ र ? भन्ने मानसिकताकाबीच हुर्किएर महिला क्रिकेटमा लाग्ने खेलाडीप्रति सम्मान व्यक्त गरेका छन् । नेपाल पहिलो पटक महिला टी-२० विश्वकपको ग्लोबल क्वालिफायरमा प्रवेश गरेपछि क्यानका सचिव पारस खड्काले आजको जित कुनै आकस्मिक परिणाम नभएको बताए ।
‘क्रिकेट खेलेर के हुन्छ र ? भन्ने मानसिकता राख्ने जमातबीच ती सबै चुनौतीहरू पार गर्दै हुर्किएर महिला क्रिकेटमा लाग्नु भएको बहिनीहरूप्रति सम्मान र कृतज्ञता । नेपालमा हाम्रा बहिनीहरूले क्रिकेट खेल्ने इच्छा राख्नु नै ठूलो कुरा हो, र अझै पनि ती सपनाहरू जीवित छन्’, उनले सामाजिक सञ्जालमा लेखेका छन् ।
सचिव पारसले समाजमा फैलिएका नकारात्मक धारणा र प्रतिक्रियाहरूलाई एकछिनको लागि बिर्सेर, राष्ट्रको प्रतिनिधित्व गर्दै आफ्नो जीवन यो खेलप्रति समर्पित गर्नु साँच्चै सजिलो नभएको बताए । उनले सामाजिक सञ्जालमा गाली गर्नु जत्तिको सजिलो मैदानमा दौडिन नभएको उल्लेख गरेका छन् ।
उनले लेखेका छन्, ‘नेपाली महिला क्रिकेट टिमको आजको जित कुनै आकस्मिक परिणाम होइन, यो त तपाईंहरूले ब्याट र बल समातेको पहिलो दिनदेखि नै सुनिश्चित भइसकेको भविष्य थियो ।’
Leave a Reply