काठमाडौं । इन्डियन प्रिमियर लिग (आइपीएल) अन्तरगत हिजो भएको खेलपछि दिल्लीका बलर कुलदिप यादवले कोलकत्ताका ब्याटर रिंकु सिंहलाई सबैका अगाडि दुई थप्पड हानिदिएका छन् ।
खेलाडीहरुबीच हाँसिमजाक चलिरहँदा कुलदीपले थप्पड हानेपछि रिंकु स्तब्ध देखिए ।
दिल्ली क्यापिटल्सको होमग्राउन्डमा भएको खेल कलकत्ताले जितेको थियो । कलकत्ताले दिएको २०५ रनको लक्ष्य पछ्याउने क्रममा दिल्ली १९० रनमा रोकियो । कलकत्ताका रिंकुले २५ बलमा ३६ रन बनाएर टिमलाई जिताउन योगदान दिएका थिए । दिल्लीका कुलदीप भने चलेनन् । उनले ३ ओभर बलिङ गर्दा २७ रन खर्चिए भने कुनै विकेट लिन सकेनन् ।
रिंकु र कुलदीप एकै शहरका खेलाडी हुन् । उनीहरूको आपसी सम्बन्ध राम्रो छ । खेलपछि मैदानबाट निस्किने क्रममा उनीहरुबीच हाँसिमजाक भएको थियो । तर, त्यही क्रममा कुलदीपले अनायास रिंकुको गाला चड्काइदिए । ठट्टाकै भावमा हानेको भए पनि रिंकु ‘सिरियस’ देखिए । यो बीचमा उनीहरुबीच भएको संवाद सुनिएको छैन । तर कुलदीपले फेरि एकपटक गालामा हानेपछि भने रिंकु रिसाएका छन् ।
दुवै खेलाडी मिल्ने साथी भएकाले यो घटनालाई गम्भीररुपमा लिइएको छैन । अन्यथा मैदानभित्र यसरी थप्पड हान्दा कारबाहीको भागिदार हुनुपर्थ्यो ।
Leave a Reply